Santiaago 1

SANTIAAGO

Uvaʼs taqʼt bʼen Santiaago bʼaʼnil ikʼuul inqʼa niman tetz Jesuus, inqʼa paxnaʼq el tuulbʼal jankʼal u vatz txʼavaʼ

1In Santiaago, vaʼl taqʼonvil quBʼaal Tiuxh, atz bʼanol taqʼon u quBʼaal JesuKriisto.

Nik intzʼibʼa bʼen val u uʼ sete, jatvaʼlxh ex inqʼa tij imam kabʼlaval inqʼa tij imam Israeel, inqʼa paxnaʼq el ex vatz u txʼavaʼ.

Tul nik vaqʼ bʼen bʼaʼnil ekʼuul sekaqaayil.

Uvaʼs talt Santiaago uvaʼ aʼlxh laʼ ikʼuqbʼat inqʼa niman tetz Jesuus ikʼuul tiʼ quBʼaal Tiuxh oq laʼ pal titzaʼlal

2Jatvaʼlxh ex inmol s-niman tetz Jesuus, toq val sete uvaʼ aʼl telxh laʼ echiibʼ s-tiʼ oq uvaʼ laʼ pal ex t-kalabʼaq itzaʼlal. 3Tan etootzaql veteʼ uvaʼ, at uvaʼ antxh quBʼaal Tiuxh nik kuyun epal t-inqʼa itzaʼlal tiʼ tilixeʼ uvaʼ aʼl tel kol toq ekʼuqbʼat ekʼuul tiʼ quBʼaal Tiuxh, pet maq yeʼle. Tan aʼ itxaʼk nik epal t-inqʼa itzaʼlal uvaʼ aʼl yeʼ laʼ etel ka tiʼ ekʼuqbʼat ekʼuul tiʼ quBʼaal Tiuxh. 4Oqetz ech laʼ ekʼuqbʼat ekʼuule tiʼ quBʼaal Tiuxh, tul aʼetz kʼaqel taʼn uvaʼ tzʼeqel tel etatin s-vatz laʼ ibʼana tiʼ eqʼanbʼ tiʼ inimal viyolbʼal. Tul jitetz jankʼal kam laʼ saʼon tel sete tiʼ vetatin vatz quBʼaal Tiuxh.

Uvaʼs talt Santiaago uvaʼ oq yeʼl tel itxumbʼal inqʼa niman tetz Jesuus tiʼ ikotxʼt ivatz tiʼ ipal t-inqʼa itzaʼlal, tul laʼ tabʼi te quBʼaal Tiuxh, tul laʼ taqʼa

5Oqetz at invaʼq ex yeʼl etootzaqibʼal tiʼ kam laʼ etule ekotxʼt evatz t-inqʼa itzaʼlal, tul abʼivaq etxumbʼal te quBʼaal Tiuxh. Tan tuchʼxh ayaʼl taanima quBʼaal Tiuxh laʼ ilotxh jatvaʼl u xaol uvaʼ laʼ abʼin lotxhbʼal s-te. Tul yeʼl uvaʼ bʼiil koq kuxh laʼ taqʼ quBʼaal Tiuxh. Pet niimxh laʼ taqʼ te jaʼl uvaʼ laʼ abʼin. Tul yeʼ laʼ teesa quBʼaal Tiuxh iqʼij jabʼil uvaʼ laʼ jaqon s-te. 6Aʼetz uvaʼs laʼ tabʼit u xaol te quBʼaal Tiuxh, tul aʼ isaʼ uvaʼ kʼuqloqxh ikʼuul tiʼ quBʼaal Tiuxh uvaʼ laʼ taqʼ s-te. Pet yeʼ laʼ ibʼan kaʼl ikʼuul tiʼ ikʼuluxeʼ. Tan jaʼl u xaol uvaʼ laʼ kaʼkabʼin ikʼuul tiʼ quBʼaal Tiuxh, tul aʼetz u xaole uvaʼ ech nik tulel taʼn u titzʼabʼal eche ixulil bʼen u mam aʼ taʼn kaqiqʼ. Tan maʼt s-eche, tul maʼt txhan tinpaqʼite. 7Oqetz ech titzʼabʼal u xaole, tul yeʼ itxʼebʼeʼ uvaʼ toq ikʼul te quBʼaal Tiuxh kam uvaʼ nik tabʼi. 8Jaʼletz u xaol uvaʼ kaʼl kuxh ikʼuul tiʼ quBʼaal Tiuxh, aʼetz u xaole uvaʼ echat kuxh nik ibʼant kaʼl ikʼuule tiʼ jankʼal uvaʼ nik ibʼaneʼ.

Uvaʼs talt Santiaago uvaʼ jatvaʼlxh inqʼa niman tetz Jesuus, kʼuxh meebʼaʼ, atz kʼuxh txʼiol iqʼij, tan tetxhal kuxh laʼ toksa iqʼij quBʼaal Tiuxh tiʼ u bʼaʼnil uvaʼ ibʼan quBʼaal Tiuxh te u qʼij isaq

9Jatvaʼlxh inqʼa niman tetz Jesuus, uvaʼ meebʼaʼ kuxh tatineʼ, tul aʼ isaʼ uvaʼ chiibʼoq kuxhtuʼ, tiʼ uvaʼ sibʼ tatin vatz quBʼaal Tiuxh. Tan tira nik toksa quBʼaal Tiuxh iqʼij tiʼ vikʼuqbʼat ikʼuul tiʼ quBʼaal Tiuxh. Atz sibʼ tatin u niman tetz Jesuus vatz quBʼaal Tiuxh.

10Tul kʼuxh u niman tetz Jesuus, uvaʼ txʼiol iqʼij, tan chiibʼoqat kuxhtuʼ, tan tira qat tiqʼo kuʼl tibʼ tuchʼ u tatineʼ, tiʼ ikʼuqbʼat ikʼuul tiʼ u quBʼaal Tiuxh. Tan nik ibʼen s-te uvaʼ toq motxoq u qʼij isaq tzitza vatz txʼavaʼ tuchʼ inqʼa txʼijbʼal iqʼij, eche nik itzaqeʼl vaʼq xuʼm kʼatz vitzeʼil. 11Tan il kuxh u qʼij nik ijaʼul. Tul tira nik itzaq vet u xuʼm taʼn vitzʼaʼl u kaqiqʼ. Tul tira nik itzʼeq vet u xuʼm vijosqʼilil, atz nik motx itojp veteʼ. Echatetz uvaʼe, laʼ ibʼan u txʼiol iqʼij. Tan aʼetz uvaʼs laʼ ikameʼ, tul laʼ kaj jankʼal inqʼa kam tetz uvaʼ nik itxʼak puaq s-tiʼ.

Uvaʼs talt Santiaago uvaʼ at vibʼaʼnil quBʼaal Tiuxh tiibʼa inqʼa xaol uvaʼ nik kotxʼon ivatz tiʼ ipal t-inqʼa itzaʼlal

12Atetz vibʼaʼnil quBʼaal Tiuxh tiibʼa u xaol uvaʼ yeʼ nik ikuy ikuʼ tu paʼv, atz nik ikotxʼ ivatz kʼuxh nik tetxhbʼul ikuʼ tu paʼv taʼn inqʼa itzaʼlal. Tan oqetz laʼ ikotxʼ ivatz tiʼ imaqt tibʼ vatz u paʼv, echetz laʼ ikʼutxhte uvaʼ nik toleʼv tiʼ imaqt tibʼ tiʼ ibʼanax u paʼv. Tul laʼ ikʼul vaʼl txʼaqaʼm tetz qʼij isaq uvaʼ yeʼl iyaʼebʼal imotxebʼal, eche ikʼulux vaʼl koroona. Aʼ u txʼaqaʼme uvaʼ tal quBʼaal Tiuxh te jatvaʼl inqʼa at taanima tiʼ quBʼaal Tiuxh.

13Oqetz at invaʼq xaol laʼ etxhbʼul ikuʼ t-paʼv, tul titzʼachi uvaʼ quBʼaal Tiuxh nik etxhbʼun ikuʼ t-paʼv. Tan yeʼl paqul uvaʼ laʼ koq itxhok quBʼaal Tiuxh ikuʼ invaʼq xaol t-paʼv. Tan tira bʼaʼn u quBʼaal Tiuxh. Tul jitoq laʼ etxhbʼul ikuʼ quBʼaal Tiuxh t-paʼv. 14Tan antxh nik itzʼke vibʼanax inqʼa kantxhaq kʼatz junun inqʼa xaol. Ajtetz qat kʼoʼpil vet u xaol taʼn u tatxhaʼv, tul qat tatxhva vet ibʼanax inqʼa paʼv. 15Oqetz qat naqʼbʼ vet tatxhvat u txhiʼoʼl u paʼv, tul tiraetz nik ikʼutxh vet tatineʼ uvaʼ, aʼ vet u paʼv nik ibʼaneʼ. Tuulbʼaletz vet uvaʼ, aʼ vet u paʼv nik ibʼaneʼ, tul aʼetz vet u kamchil vatz quBʼaal Tiuxh kʼaqel taʼn.

Uvaʼs talt Santiaago uvaʼ yeʼ laʼ utxhi laʼ qitzʼa uvaʼ quBʼaal Tiuxh nik txhokon qilixeʼ tiʼ ibʼanax invaʼq paʼv

16Ex inmol s-niman tetz Jesuus, ex, uvaʼ nik inchiibʼ setiʼ, etitzʼach kuxhtuʼ uvaʼ quBʼaal Tiuxh nik etxhbʼun qukuʼ t-invaʼq paʼv. Oqetz ech laʼ etitzʼae, tul nik kuxh eteesa etibʼ t-bʼey. 17Pet atz aʼl nik taqʼt quBʼaal Tiuxh jankʼal inqʼa bʼaʼnla txʼaqaʼm s-qe, atz jankʼal inqʼa oya uvaʼ jikxhtuʼ. Tan een qat tzajk kʼatz quBʼaal Tiuxh tu amlikaʼ, u viinqixsan tetz inqʼa txiqubʼal vatz amlikaʼ. Pet aloq jitetz ech nik ijalp vitxumbʼal quBʼaal Tiuxh, eche nik ijalp vitxiqun inqʼa txiqubʼal vatz amlikaʼ, atz eche nik itiʼn vimujil inqʼa kam. Tan mij bʼeeq laʼ jalp titzʼabʼal tiʼ taqʼt vibʼaʼnil s-qe. 18Tan qat ichʼex oʼ quBʼaal Tiuxh tiʼ titzʼeʼv u qaanxelal s-vatz, tan qat quqej viyol uvaʼ inuqulxhtuʼ. Echetz aʼ vet oʼ setuchʼ qat qoksa qibʼ s-niman tetz Jesuus s-bʼaxa vatz jolt inqʼa xaol. Echetz vet oʼ, eche bʼaxa ivatz inqʼa txhiko nik imoloxeʼ vatz jankʼal inqʼa xaol, inqʼa iviinqixsa quBʼaal Tiuxh vatz txʼavaʼ.

Uvaʼs talt Santiaago uvaʼ, aʼ inqʼa niman tetz Jesuus bʼanol tetz kam uvaʼ nik tal viyolbʼal quBʼaal Tiuxh

19Ex, inmol s-niman tetz Jesuus, ex, uvaʼ nik inchiibʼ setiʼ, toq val vaʼl u yol sete. Jankʼal ex sekaqaayil, atoqxh jaʼ eviʼ tiʼ tabʼil inqʼa yol tiʼ viyolbʼal quBʼaal Tiuxh. Jit nal kuxh laʼ etal kam u yol laʼ ul tetitzʼabʼal. Atz jit nal kuxh laʼ ilakp eviʼ. 20Tan oq nal kuxh laʼ ilakp iviʼ u xaol, tul jitetz vet aʼ nik ibʼan kam u jikla txumbʼal uvaʼ nik isaʼ quBʼaal Tiuxh.

21Echetz nik valte sete uvaʼ aqʼvaq vet ka ibʼanax inqʼa paʼv uvaʼ txoqebʼal kʼuul vatz quBʼaal Tiuxh, atz ibʼanax inqʼa mamala kantxhaq. Pet aʼ ebʼan uvaʼ laʼ etiqʼo kuʼl etibʼ tiʼ ekʼult viyolbʼal quBʼaal Tiuxh uvaʼ qat tava quBʼaal Tiuxh tetaanima. Tan aʼetz uvaʼe, laʼ kolon vetaanxelal vatz u kʼaxkʼo tiʼ inqʼa epaʼv.

22Poro bʼanvaq kam uvaʼ nik tal viyolbʼal quBʼaal Tiuxh. Pet jit taʼn kuxh laʼ ebʼan u tabʼileʼ. Tan oq laʼ etala uvaʼ nik enima kam uvaʼ nik tal viyolbʼal quBʼaal Tiuxh, tul oqetz yeʼ nik ebʼaneʼ, tul juntetz kuxh nik eteesa etibʼe t-bʼey vatz quBʼaal Tiuxh. 23Tan at xaol uvaʼ taʼn kuxh nik ibʼan tabʼil viyolbʼal quBʼaal Tiuxh, pet yeʼ nik ibʼan kam uvaʼ nik taleʼ. Tul aʼetz uvaʼe, eela tuchʼ invaʼq u xaol uvaʼ maʼt itxiqu vikaʼyebʼal t-invaʼq espeejo. 24Bʼantan tira qat tootzaqi vikaʼyeʼ uvaʼs qat itxiqut tibʼ tu espeejo, pet qatetz bʼen veteʼ, tul qat sotz vet s-kʼuul kame vikaʼyeʼ.

25Pet atetz xaol uvaʼ nik abʼin viyolbʼal quBʼaal Tiuxh, yaʼne tekʼxh qat bʼen vet tiʼ tilix kam uvaʼ nik tal inqʼa bʼekʼbʼal uvaʼ jikxhtuʼ, inqʼa bʼekʼbʼal uvaʼ nik kʼutxhun teleʼl u xaol t-vipaʼv. Tul nik inuq txakbʼa vet tibʼ u xaol vatz quBʼaal Tiuxh tiʼ inimaleʼ. Tul jit kuxh abʼin vet tetz, pet bʼanol tetz kam uvaʼ nik taleʼ. Aʼetz u xaole uvaʼ toq taqʼ quBʼaal Tiuxh vibʼaʼnil tiibʼa jankʼal uvaʼ nik ibʼaneʼ.

Uvaʼs talt Santiaago, jaʼl u xaol uvaʼ nik txumun ivatz imol, aʼetz u xaole uvaʼ nuqxh nik tal tiʼ inatxhkʼuulal Tiuxh

26Kamal at invaʼq xaol sexoʼl uvaʼ junt nik taqʼ bʼen tibʼ s-nim tiʼ taltaʼ uvaʼ qʼanbʼinaʼql vet tiʼ inimal viyolbʼal quBʼaal Tiuxh. Poro oq tira yeʼ nik imaq tibʼ tiʼ talax yaabʼla yol, tul juntetz kuxh nik teesa tibʼe t-bʼey vatz quBʼaal Tiuxh, atz yeʼxhkamatetz itxaʼke vatz inqʼa xaol kʼuxh nik taleʼ uvaʼ qʼanbʼinaʼq vet vatz quBʼaal Tiuxh.

27Pet atetz invaʼl kʼutxhbʼal tetz uvaʼ ayaʼlxh qukʼuul nik qunima inqʼa bʼaʼnla txhaq yol, tul aʼ nik qukʼutxh s-tuchʼ uvaʼ yeʼl vaʼq kam nik qil bʼen s-tiʼ. Tul tira yeʼl invaʼq kantxhaq atoʼk tu qaanima vatz quBʼaal Tiuxh. Aʼe, uvaʼ tijxh laʼ ilbʼel inqʼa nitxaʼ, inqʼa yeʼl vet itxutx ibʼaal. Atz tij laʼ ilbʼel inqʼa txakay ixoq, inqʼa nik motx ipal titzaʼlal. Aʼetz uvaʼe tira bʼaʼn vatz u quBʼaal Tiuxh. Jaʼletz u niman tetz Jesuus uvaʼ qʼanbʼinaʼql vatz quBʼaal Tiuxh, tul laʼ itxʼol imaqt tibʼ tiʼ yeʼ ibʼanax inqʼa paʼv uvaʼ nik ibʼan inqʼa xaol vatz txʼavaʼ, inqʼa jit niman tetz Jesuus.

Currently Selected:

Santiaago 1: ixlC

Highlight

Copy

Compare