Evreeos 8

Aʼ u yole, tiʼ uvaʼ, aʼ vet quBʼaal Jesuus viqʼesal oksan quyol vatz Tiuxh, tuulbʼal vikaʼv iyol quBʼaal Tiuxh uvaʼ ijeqbʼa tuchʼ inqʼa niman tetz Jesuus

1Aʼetz taqʼil u quyol uvaʼ sebʼt qalt sete: Aʼe, uvaʼ at Vaʼl qʼesal oksan yol vatz Tiuxh nik lotxhon oʼ, uvaʼ mij taʼn invaʼq ipaʼv ati. Tul ile kʼuqlel vet tisebʼal quBʼaal Tiuxh tiʼ ixeʼsal taqʼax kuʼ yol tinuqul tu nimla tatibʼal quBʼaal Tiuxh tu amlikaʼ. Tan ech ikʼuqeʼv quBʼaal Tiuxh, eche ikʼuqeʼv aqʼol kuʼ yol tinuqul.#Saalmo 110.1 2Tul tiqatz tilix tuul okaʼp tal uvaʼ nik natxhkʼuulalik quBʼaal Tiuxh. Atz tiqatz tilix u nuqlaxh tilan tatibʼal quBʼaal Tiuxh uvaʼ quBʼaal Tiuxh bʼiton, pet jit invaʼq vinaq bʼiton.

3Poro jankʼalxh inqʼa iqʼesal oksan yol vatz Tiuxh, inqʼa tzitza vatz txʼavaʼ, tan aʼ taqʼon toksal inqʼa oya, atz itzʼeʼsal ok oya vatz quBʼaal Tiuxh. Tul tetxhal kuxh iqʼomal kamxh invaʼq oya taʼn tiʼ toksal vatz quBʼaal Tiuxh. 4Echetze uvaʼ atich koq quBʼaal Jesuus tzitza vatz u txʼavaʼ, tul yeʼlebʼ quBʼaal Jesuus oksal s-tatxhul xoʼl inqʼa iqʼesal oksan yol vatz Tiuxh. Tan ataqich iqʼesal oksan yol vatz Tiuxh uvaʼ tiqatzich taqʼax ok oya vatz quBʼaal Tiuxh, eche uvaʼ nik tal inqʼa bʼekʼbʼal uvaʼ itzʼibʼa ka Moisees.

5Poro kam uvaʼ nikich motx ibʼan inqʼa iqʼesal oksan yol vatz Tiuxh tzitza vatz txʼavaʼ, tan aʼ kuxh nikich teesa ivatzibʼal kam uvaʼ nikich tutxh tu amlikaʼ, atz ech kuxh nikich motx ibʼan, eche tilix icheonal invaʼq kam. Tul echatxh, eche uvaʼ tal quBʼaal Tiuxh te Moisees uvaʼs toqnaʼqich ibʼit vet Moisees u bʼuʼq tostiuxh s-naʼya. Tan ech tal quBʼaal Tiuxh te Moisees s-eche:

—Txhabʼaxh ibʼitix s-bʼaʼn

jankʼal inqʼa kam

uvaʼ kʼutxhux see viʼ u vitz.

Poro tira echatxh laʼ abʼan

eche u etxhlal kʼutxhux see,

—xeʼte.#Eeksodo 25.40

6Petetz vet uvaʼ s-txheel, tan sibʼ palnaʼq vet tiqleʼm u quBʼaal Jesuus viʼ inqʼa oksan yol vatz Tiuxh xoʼl inqʼa tij imam Israeel. Tul sibʼat palnaʼq tiqleʼm vikaʼv iyol quBʼaal Tiuxh uvaʼ aqʼel ka tiqʼabʼ u quBʼaal JesuKriisto, viʼ u bʼaxa iyol quBʼaal Tiuxh uvaʼ ijeqbʼa tuchʼ inqʼa tij imam Israeel. Tan sibʼ telatetz palnaʼq inqʼa mam bʼaʼnil uvaʼ taltzii quBʼaal Tiuxh taqʼaxeʼ viʼ inqʼa bʼaʼnil uvaʼ taltzii quBʼaal Tiuxh taqʼax tu bʼaxa iyol.

7Poro eche uvaʼ tira koq bʼaʼn u bʼaxa yol uvaʼ jeqbʼali, tul yeʼxhkametzebʼ vet vaʼtoʼq yol laʼich jeqbʼali.

8Pet iyaj quBʼaal Tiuxh inqʼa tij imam Israeel. Tul ech tal quBʼaal Tiuxh s-eche:

—Tetxhal toq opoonoq invaʼl qʼij

uvaʼ toq injeqbʼa vaʼt vinyol setuchʼ,

ex inqʼa tij imam Israeel,

atz ex inqʼa tij imam Judaa.

9Poro jit vet ech u yol

toq injeqbʼa setuchʼ

eche uvaʼ injeqbʼa tuchʼ

inqʼa kʼuy emam

uvaʼs ex intxhʼiqit tzaan

tuulbʼal Ejiipto,

tul aʼ, in iqʼon ibʼey.

Tan jit nuq koqxh motx tal

inqʼa kʼuy emam,

tiʼ inimal vinyol uvaʼ

motx injeqbʼa ka s-tuchʼ.

Echetz motx vaqʼt kae

inqʼa kʼuy emam s-junal.

In nik alon u yol.

10Tuulbʼaletz inqʼa qʼij,

inqʼa yaʼn tuleʼ,

tul toq injeqbʼa ka vaʼt vinyol

tuchʼ inqʼa tij imam Israeel.

In nik alon u yol.

Tan laʼ vaqʼ tootzaqi

inqʼa tij imam Israeel vinyolbʼal.

Atz laʼat vaqʼ itxey taanima vinyolbʼal,

tul laʼ kaj vinyolbʼal tu taanima,

atz eche tzʼibʼamal laʼ ikaj s-tuul.

Tul aʼ, in iTiuxh laʼ ibʼana.

Tul intenam laʼ ibʼana.

11Tul jit laʼ nal koq itxhus

inqʼa imol tiʼ vootzaqileʼ,

atz jit ech koq laʼ tal te

inqʼa imol s-eche:

«Nima u quBʼaal Tiuxh,»

chaq koq.

Tan jankʼalxh vet inqʼa xaol

laʼ ootzaqin in,

kʼuxh qʼes, atz kʼuxh txul.

12Tul laʼ inkuy inqʼa kantxhaqla

txumbʼal nik motx ibʼaneʼ.

Tul yeʼl inpaqt laʼ vulsa vet

inqʼa ipaʼv sinkʼuul,

—xeʼt quBʼaal Tiuxh.#Jeremiias 31.31-34

13Niketz tal quBʼaal Tiuxh uvaʼ ‹vaʼt› vinyol chiche. Aʼetz talaxeʼe uvaʼ yeʼ vet nik toksa u bʼaxa iyol s-tuul; atz palnaʼq vet ka. Jabʼisteetz uvaʼ palnaʼq vet ka, tul yeʼletz vet itxaʼke. Aʼetz vet talaxe uvaʼ, aʼ vet toq sotzoq el.

Currently Selected:

Evreeos 8: ixlC

Highlight

Copy

Compare