Evreeos 12

Aʼ u yole, tiʼ uvaʼ, aʼ laʼ txhʼuyeʼvik inqʼa niman tetz Jesuus tiʼ kam inqʼa palk u quBʼaal Jesuus

1Poro ile nik qal sete uvaʼ mamala niman tetz quBʼaal Tiuxh s-naʼya nik ilon tzaan oʼ tuul suʼtzʼ, tiʼ kam inqʼa nik palk oʼ, eche tilix saatxhvil taʼn mamala xaol nik tilt oʼ. Echetz qaqʼvaq kaj jankʼal inqʼa nik maqon oʼ; aʼe jankʼal inqʼa paʼv uvaʼ nik albʼixsan oʼ tiʼ inimal u quBʼaal JesuKriisto. Ech qubʼan, eche vaʼq saatxhvil uvaʼ yeʼl vaʼq kam uvaʼ al atoʼk s-tiʼ, tiʼ iqʼexaʼ. Tan kʼaqel kuxh tibʼ tiʼ toleʼveʼ. Echatetz kuxh oʼe laʼ ibʼana, yeʼ laʼ qukuya uvaʼ kam kuxh laʼ maqon oʼ tiʼ qelka tiʼ quBʼaal Jesuus. Pet txhʼuyoq kuxh oʼ tiʼ jankʼal uvaʼ nik isaʼ quBʼaal Tiuxh s-qiʼ. Pet oʼ yeʼ laʼ tanbʼan, eche vaʼq saatxhvil uvaʼ, aʼ nik tojqeʼla uvaʼ bʼaxal s-vatz.

2Pet kʼaqoq kuxh qibʼ tiʼ u quBʼaal Jesuus. Tan aʼ u quBʼaal Jesuus nik kʼutxhun s-qe tiʼ kam laʼ qubʼan tiʼ qukʼuqbʼat qukʼuul tiʼ quBʼaal Tiuxh. Atz aʼ quBʼaal Jesuus ul tzoqpisan jankʼal uvaʼ isaʼ u quBʼaal Tiuxh laʼ ibʼana. Echetz itzoqp vete jankʼal uvaʼ nimamal qaʼn tiʼ quBʼaal Jesuus. Tan ech uvaʼe, ibʼan u quBʼaal Jesuus, tan aʼ nikich isaqi bʼen vichiibʼ kʼatz quBʼaal Tiuxh. Aʼetz uvaʼe, nikich itxʼebʼ quBʼaal Jesuus laʼich ikʼula. Echetz s-tiʼile ikotxʼ ivatz tiʼ ipal t-inqʼa kʼaxkʼo uvaʼs ijaʼ vatz kurus. Atz ech s-tiʼil paqte uvaʼ yeʼ toksa s-tuul, kʼuxh chʼixvisali. Echetz il vet u quBʼaal Jesuus kʼuqlel tisebʼal quBʼaal Tiuxh tiʼ ibʼant viqʼesalil, u quBʼaal Tiuxh uvaʼ kʼuqlel tu kʼuqeʼvbʼal tetz bʼanbʼal iqʼesalil.

3Echetz bʼenoq sete uvaʼ yeʼl quBʼaal Jesuus uqli, atz yeʼl quBʼaal Jesuus pal ikʼuul, kʼuxh bʼeeno ikʼaxbʼisal quBʼaal Jesuus taʼn inqʼa aj paʼvom. Echatetz yeʼ laʼ etuqle, atz echatetz yeʼ laʼ ipal ekʼuule, kʼuxh laʼ pal ex t-kʼaxkʼo. 4Tan kʼuxh il ex nik ebʼan txhʼaʼo tiʼ yeʼ epaʼvineʼ, poro yeʼl invaʼxoʼq ex etaqʼ etibʼ yatzʼaxoq el, atz laʼ el vekaqal, eche uvaʼ ibʼan quBʼaal Jesuus.

Aʼ u yole tiʼ u bʼaʼnil uvaʼ nik taqʼ ka inqʼa itzaʼlal, inqʼa nik ikuy quBʼaal Tiuxh ipal inqʼa niman tetz Jesuus s-tuul

5Pet ¿maqetz qat sotzy inqʼa iyol quBʼaal Tiuxh sekʼuul inqʼa nik oksan ex t-bʼey? Tan eche toksat invaʼq bʼaala initxaʼa t-bʼey nik tulbʼe oʼ quBʼaal Tiuxh. Tan ech nik tal inqʼa yol uvaʼ tzʼibʼamal ka s-eche:

—Inkʼaol, yeʼ laʼ utxhi uvaʼ

laʼ aaqʼ elaʼp s-eche,

u toksat axh

quBʼaal Tiuxh t-bʼey.

Tul jitoq laʼ el ka axh tiʼ inimal

quBʼaal Tiuxh kʼuxh laʼ iyaj axh.

6Tan jaʼl uvaʼ nik toksa

quBʼaal Tiuxh t-bʼey,

tul tzitzi nik ikʼutxhvat

quBʼaal Tiuxh uvaʼ,

aʼ at taanima s-tiʼ.

Atz jaʼl uvaʼ toksa

quBʼaal Tiuxh sikʼaol,

tul aʼetz uvaʼe,

nik taqʼ tzʼuʼm s-tiʼ,

tiʼ toksal t-bʼey,

—chich u yol.#Joov 5.17; Proveervios 3.11-12

7Pet kotxʼvaq evatz t-inqʼa itzaʼlal uvaʼ laʼ palk ex, tan aʼ uvaʼe, nik ibʼanbʼe quBʼaal Tiuxh tiʼ etoksal t-bʼey. Tul tzitzi nik ikʼutxhvat quBʼaal Tiuxh uvaʼ, ex vet kʼaol imeʼal. Tan yeʼl invaʼq kʼaol meʼal uvaʼ yeʼ koq laʼ oksal t-bʼey taʼn ibʼaal. 8Tan oqetz yeʼ laʼ toksa ex quBʼaal Tiuxh t-bʼey, eche nik toksal jatvaʼlxh kʼaol meʼal t-bʼey, tul jitetzxh meero ex kʼaol imeʼal quBʼaal Tiuxhe. Atz jitetz meero bʼaala quBʼaal Tiuxhe sete.

9Jankʼaletz eche tatin qutxutx qubʼaal tzitza vatz txʼavaʼ, tan nikich toksa oʼ t-bʼey tuulbʼal uvaʼs txulich kuxh oʼ. Tul nikichetz qunima; ¡aʼatetz kol u quBʼaal Tiuxh, uvaʼ tu amlikaʼ, yeʼ laʼ qunima, atz aʼe u aqʼol qʼij isaq u qaanxelal, atz aqʼol qʼij qusaq s-kʼatza uvaʼ yeʼl iyaʼebʼal imotxebʼal!

10Poro nikichetz toksa oʼ qutxutx qubʼaal t-bʼey, tuulbʼal bʼiil vatz qʼij qusaq tzitza vatz txʼavaʼ. Tan aʼ titzʼabʼal s-qiʼ uvaʼ tibʼaʼnil laʼ elkaʼp oʼ. Echatetz kuxh u quBʼaal Tiuxhe, tan nik toksa oʼ t-bʼey, tiʼ uvaʼ, aʼ titzʼabʼal s-qiʼ uvaʼ tibʼaʼnil laʼ atink oʼ. Atz echatxh laʼ qujetxhon el kʼatz paʼv, eche u quBʼaal Tiuxh laʼ ibʼana. 11Poro tuulbʼaletz uvaʼ sebʼt qoksal t-bʼey, tul yeʼl oʼ nik quchiibʼ s-tiʼ. Pet aʼl nik qutxumun taʼn. Pet oqetz nik qukʼulvii u qoksal t-bʼey, tul sibʼ ibʼaʼnil toq taqʼ s-qe. Tan jatvaʼletz inqʼa laʼ kuyun toksal t-bʼey taʼn quBʼaal Tiuxh, tul aʼetz vet toq ikʼutxh vibʼen s-jik; atz bʼaʼnil vet at s-xoʼl s-vatzaq toq ibʼaneʼ.

Aʼ u yoleʼ, tiʼ uvaʼ nik aqʼon itial inqʼa niman tetz Jesuus uvaʼ yeʼ laʼ motx taqʼ ka inimal u kaʼv iyol quBʼaal Tiuxh uvaʼ ijeqbʼa tiʼ quBʼaal Jesuus

12Echetz yeʼ uql ex tuulbʼal uvaʼs nik toksat ex quBʼaal Tiuxh t-bʼey. Pet bʼanvaq yaʼl, atz iqʼovaq eyakʼil, eche vaʼq xaol uvaʼ laʼ ibʼan yaʼl tiʼ ilakax jaʼ viqʼabʼ, atz tiʼ ibʼant inqʼa toq tial kʼuxh uqlinaʼq veteʼ.#Isaiias 35.3 13Tul ech ebʼan, eche vaʼq xaol uvaʼ bʼaʼnxh nik tamt ka vaʼq bʼey tetz xaonbʼal.#Proveervios 4.26 Echetz yeʼ laʼ tel kae inqʼa txhʼuyel setiʼ. Pet aʼl laʼ ibʼant yaʼl, eche yeʼ laʼ ikaj vaʼq niman tetz Jesuus uvaʼ kaʼl ikʼuul tiʼ inimaleʼ. Pet aʼl laʼ itxhej itial tiʼ quBʼaal Jesuus. Echetz yeʼ laʼ ikaj invaʼq koye tiʼ u bʼey, pet aʼl laʼ tiqʼot vet tibʼ.

14Tul aʼxh ebʼan yaʼl tiʼ itxhokox tok bʼaʼnil sexoʼl tuchʼ inqʼa xaol s-kaqaayil. Pet jit kuxh aʼ ebʼan u paʼv. Pet aʼ ejetxhvat ok etibʼ kʼatz quBʼaal Tiuxh. Tan jaʼl uvaʼ yeʼ laʼ ijetxhoʼk tibʼ kʼatz quBʼaal Tiuxh, tul yeʼl paqul laʼ bʼen til ivatz quBʼaal Tiuxh.

15Echetz itzʼamoqxh etibʼ tiʼ etatineʼ. Tul yeʼl ex laʼ kaj ex tiʼ vibʼaʼnil quBʼaal Tiuxh. Atz yeʼ laʼ ekuy ikaj invaʼq kʼayunchil tetaanima, eche laʼ ikaj taqʼil invaʼq yaabʼla tzeʼ tu txʼavaʼ uvaʼ laʼ xalmit inpaqte.#Deuteronoomio 29.18 Tan aʼetz kuxh u kʼayunchil toq maqon ex. Tul jitetz kuxh taʼn ex laʼ imaq ex, pet laʼetz kuxh ebʼoqo vete jolt inqʼa emol tiʼ ibʼanax u kantxhaq s-tuchʼ. 16Tul yeʼl ex laʼ eyansa etibʼ tuchʼ vaʼtoʼq emol uvaʼ jit ekʼulel etibʼ s-tuchʼ. Atz yeʼ la eteesa iqʼij inqʼa ibʼanoʼm quBʼaal Tiuxh. Tan ebʼanch tetzan Esauu. Tan tiʼ kuxh vaʼl laq taʼl, tul ikʼayivat Esauu u tiqleʼm s-bʼaxa kʼaola.#Jeenesis 25.29-34 17Tan etootzaqle uvaʼ xamtich ex tabʼi txha vet Esauu uvaʼ laʼich aqʼax u bʼaʼnil s-te taʼn qʼes ibʼaal. Tul yeʼl vet u bʼaʼnil aqʼax ka tiibʼa Esauu. Tan maʼtich taqʼt vet el qʼes u bʼaala u bʼaʼnil. Kʼuxhetz txhoʼn vet te Esaau, atz kʼuxh mam oqʼel ibʼan vet Esauu tiʼ tabʼileʼ, tan yeʼ aqʼax vet te Esauu.#Jeenesis 27.30-40

18Pet aʼl ejetxhtoʼk etibʼ kʼatz quBʼaal Tiuxh, u kʼutxhul bʼaʼnil s-qe. Tan jit vet ech, eche u vitz s-naʼya. Tan oq laʼich motx ikan inqʼa kʼuy qumam u vitz, tul yek laʼich motx kam taʼn. Tan xoʼvebʼalich tilix u quBʼaal Tiuxh tzitzi.#Eeksodo 19.12, 13, 21 Atz motx til tel xamal tiviʼ u vitz. Atz motx til tok qʼeqxichil. Tul motx til itokbʼixeʼ. Atz motx til ilitzʼkabʼineʼ. 19Tul motx tabʼi toqʼsal val u trompeeta uvaʼ oqxhich iyakʼile. Atz motx tabʼi u tiʼ iqul quBʼaal Tiuxh tiʼ viyoloneʼ, uvaʼ xoʼvebʼal tabʼileʼ. Tul tiʼetz vet inqʼa motx tila, atz motx tabʼi, tul motx ijaq vet bʼaʼnil uvaʼ yeʼlich laʼ yolon vet u quBʼaal Tiuxh s-te.#Eeksodo 19.16-22; 20.18-21; Deuteronoomio 4.11-12; 5.22-27 20Tan nikichaq ixoʼvaq vet tiʼ tabʼit vibʼekʼoʼm quBʼaal Tiuxh. Tan ech tal quBʼaal Tiuxh s-te s-eche:

—Jaʼl invaʼq xaol,

atz kʼuxh invaʼq kuxh txoo

laʼ ijetxh ukuʼl tibʼ

xeʼ toq u vitz,

tan tetxhal laʼ yatzʼax el s-sivan,

(atzoq aʼl laʼ jutil el s-txhʼitxhʼ,)

—xeʼt quBʼaal Tiuxh.#Eeksodo 19.12-13

21Poro mam xoʼval uvaʼ nikich motx tabʼi inqʼa tij imam Israeel. Tan echat tal Moisees s-eche:

—Poro aʼat in tʼuntʼutxh

taʼn xoʼvale,

—xeʼt Moisees.#Deuteronoomio 9.19

22Pet koqetz vet ex, ex inqʼa etzan tetz vikaʼv yol ijeqbʼa quBʼaal Tiuxh. Tan il ex jetxhel vet ok etibʼ kʼatz vaʼt u vitz Sioon; aʼe u tenam tal uvaʼ atil u itzʼlichla quBʼaal Tiuxh, atz kʼatz vaʼt u Jerusaleen, uvaʼ tu amlikaʼ, atz kʼatz mamala tanul bʼaʼnla txhaq aanxel nik motx ichiibʼ setiʼ. 23Atz qat ok vet ex s-niman tetz Jesuus xoʼl inqʼa bʼaxa itzʼibʼal vet ibʼij tu amlikaʼ. Atz il ex, jetxhel vet ok etibʼ kʼatz u quBʼaal Tiuxh, u aqʼol kuʼ yol tinuqul tiʼ jankʼal inqʼa xaol s-kaqaayil. Atz il ex jetxhel vet ok etibʼ kʼatz inqʼa xaol, inqʼa aqʼax bʼen s-jik vatz quBʼaal Tiuxh, inqʼa jetxhel vet el tibʼ kʼatz paʼv taʼn u quBʼaal Tiuxh. 24Atz il ex jetxhel vet ok etibʼ kʼatz u quBʼaal Jesuus, u Ilol tetz vaʼt u yol uvaʼ nik ijeqbʼa quBʼaal Tiuxh. Atz il ex jetxhel vet ok etibʼ kʼatz u kuybʼal uvaʼ oleʼv vikaqal quBʼaal Jesuus s-tiʼ, vikaqal u quBʼaal Jesuus tetz u kaʼv yol. Tul sibʼ palnaʼq vikaqal quBʼaal Jesuus, viʼ vikaqal Aveel uvaʼ jaqon taqʼax ichʼexel tiʼ taqʼax kuʼ yol tinuqul s-tiʼ.#Jeenesis 4.10

25Ilvaqetz etibʼ, tul yeʼ etixva u quBʼaal Tiuxh uvaʼ nik alon inqʼa yol tuulbʼal u kaʼv iyol uvaʼ qat ijeqbʼa. Tan motx kʼaxbʼisal inqʼa kʼuy qumam s-naʼya vatz txʼavaʼ taʼn quBʼaal Tiuxh, tan quBʼaal Tiuxh nikich oksan s-jik. Yeʼ motx itxʼak ikolt tibʼ vatz u kʼaxbʼichil uvaʼ taqʼ quBʼaal Tiuxh s-tiibʼa, ¡aʼetz kol oʼ yeʼ laʼ kʼaxbʼisal oʼ taʼn quBʼaal Tiuxh, uvaʼ een tu amlikaʼ, oq laʼ qʼaʼv oʼ tiʼ yeʼ inimal u quBʼaal Tiuxh!

26Tan s-naʼya, yekich tiʼn u txʼavaʼ taʼn viyolon quBʼaal Tiuxh. Pet s-txheel, tan ech alel taʼn quBʼaal Tiuxh s-eche:

—Laʼetz tiʼn

u txʼavaʼ inpaqte.

Poro ant vet u amlikaʼ

laʼ tiʼni,

—chich quBʼaal Tiuxh.#Ageeo 2.6

27Atetz nik elkaʼpun u yol ‹inpaqte.› Tan aʼ nik talvat quBʼaal Tiuxh u yol tiʼ itiʼnsal inqʼa viinqixsamal taʼn. Tul taʼn kuxh laʼ kaj vet inqʼa yeʼ laʼ utxh itiʼnsaleʼ.

28Echetz nik qalte sete uvaʼ qaqʼvaq taʼntiuxh te quBʼaal Tiuxh setuchʼ, tiʼ uvaʼ toq ikʼul vet oʼ quBʼaal Tiuxh tal uvaʼ nik ibʼanvat viqʼesalil uvaʼ yeʼ laʼ utxh itiʼnsaleʼ. Chiibʼoq oʼ s-tiʼ. Atz qaqʼvaq taʼntiuxh s-te. Atz qunatxhkʼuula quBʼaal Tiuxh. Atz qaqʼvaq jaʼ vibʼij quBʼaal Tiuxh. Atz quxoʼva qupaʼvin s-vatz. 29Tan oq yeʼ laʼ qubʼan uvaʼ nik tal quBʼaal Tiuxh, tul ech laʼ ibʼan quBʼaal Tiuxh s-qe, eche u xamal uvaʼ yeʼxhkam vet invaʼq laʼ kaj taʼn.#Deuteronoomio 4.24

Currently Selected:

Evreeos 12: ixlC

Highlight

Copy

Compare