Gaalatas 4

1Niketz val sete uvaʼ ech qatin, oʼ inqʼa tij imam Israeel, eche vaʼq xaak uvaʼ laʼ etzan inqʼa kam tetz vibʼaal. Tuulbʼaletz uvaʼ ant kuxh xaak, tul yeʼnaq tzʼeqoq viyaʼbʼ tiʼ tetzal inqʼa kam, kʼuxh tetz inqʼa kam s-kaqaayil laʼ tal ka u bʼaala. Pet yeʼl bʼeeq ichiʼil laʼ til u xaak s-nali. Eelaetz kuxh tatine u xaak tuchʼ vaʼq uvaʼ loqʼel tok tiʼ aqʼon. 2Pet laʼ kuxh atin vet u xaak kʼatz inqʼa xeen tetz, atz kʼatz inqʼa ilol tetz. Echetz tzʼeqnal vet opoon inqʼa yaʼbʼ uvaʼ alel ka taʼn vibʼaal u xaak, yaʼne laʼ tetza vet inqʼa kam.

3Poro echatichetz kuxh qatine, eche u xaak, oʼ inqʼa tij imam Israeel. Tan atich kuxh ok oʼ jaqʼ inqʼa bʼekʼbʼal. Atz tira tatxhʼelich kuxh oʼ taʼn inqʼa naʼyla qejoʼm tetz vatz txʼavaʼ, inqʼa nimamich kuxh tzaan qaʼn. Aʼetz uvaʼe, nik ibʼan eela tuchʼ u xaak uvaʼ yeʼnaq tzʼeqoq viyaʼbʼ. 4Pet opoon nalichetz vet u qʼij uvaʼ alelich ka taʼn quBʼaal Tiuxh, tul taqʼ vet tzaan quBʼaal Tiuxh viKʼaol. Tul aʼ val u chelem ixvaak ikʼam quBʼaal Tiuxh tiʼ tul viKʼaol vatz qʼij saq. Tul atich ok jaqʼ inqʼa bʼekʼbʼal. 5Tan aʼ ul ichit viKʼaol quBʼaal Tiuxh jankʼal inqʼa atich ok jaqʼ inqʼa bʼekʼbʼal. Echetz laʼ motx qubʼen vete s-kʼaol imeʼal u quBʼaal Tiuxh. 6Echetz, tiʼ uvaʼ, ex vet kʼaol imeʼal u quBʼaal Tiuxh, tul quBʼaal Tiuxh qat aqʼon vet viTiuxhil viKʼaol te taanima. Aʼetz vet viTiuxhil viKʼaol qat aqʼon qukʼul vet qibʼ tuchʼ quBʼaal Tiuxh. Xaʼtetze ech nik qal vet te quBʼaal Tiuxh s-eche taʼn viTiuxhil: —Bʼaali, —chich vet oʼ te quBʼaal Tiuxh.#Xhun 3.5 7Echetz yeʼl vet axh tatxhʼel axh taʼn inqʼa bʼekʼbʼal, eche invaʼq xaol uvaʼ loqʼel tok tiʼ aqʼon, pet axh vet kʼaol imeʼal quBʼaal Tiuxh. Tul tiʼetz uvaʼ, axh vet kʼaol imeʼal quBʼaal Tiuxh, tul antetz vet axh toq etzanoq axh taʼn.

Uvaʼs ibʼekʼt Paʼp uvaʼ yeʼ laʼ motx qʼaʼv vet inqʼa niman tetz Jesuus tiʼ tok jaqʼ inqʼa bʼekʼbʼal

8Eche inqʼa s-jatxhaq tzaan, tan yeʼich etootzaql u quBʼaal Tiuxh. Tan aʼ kuxh atich ok ex jaqʼ ibʼekʼbʼal ‹inqʼa tiuxh,› chichich eʼli, tul jitichetzxh Tiuxh. 9Petetz vet uvaʼ s-txheel, tan qat etootzaqil vet quBʼaal Tiuxh, ¡keʼchetz nik esaʼt eqʼaʼv inpaqte tiʼ inimal inqʼa qejoʼm inqʼa yeʼxhkam nik taqʼeʼ, atz yeʼxhkam itxaʼk! Kʼuxh: —Qat etootzaqil vet quBʼaal Tiuxh, —uvaʼ nik valeʼ, pet aloq quBʼaal Tiuxh ootzaqin etetz. Pet ¡kametzebʼ s-tiʼil nik esaʼ etok paqte jaqʼ inqʼa bʼekʼbʼal tiʼ itatxhʼt ex! 10Tan aʼ kuxh atoʼk teviʼ, inimal inqʼa nimla qʼij, inqʼa qejoʼm tiʼ inqʼa ichʼ, atz inqʼa qejoʼm, inqʼa tiʼ yaʼbʼ nik enimataʼ, inqʼa jun yaʼbʼ kuxh tuleʼ.#Nuumeros 28.11; Leviitiko 23.24-25 11Poro niketz intxumun setiʼ, tiʼ uvaʼ nik eqʼaʼv s-tiʼ. Tan avoqe yiqxh nikich kuxh inbʼutxh vibʼ tiʼ inbʼant yaʼl tiʼ talax viyolbʼal quBʼaal Tiuxh sexoʼl, tul avoqe yeʼl kuxh itxaʼk uvaʼ ex inbʼan sexoʼl.

12Pet ex inmol s-niman tetz Jesuus, ex inqʼa jit tij imam Israeel, tan aʼ qat viqʼo tetz inqʼa eqejoʼm. Pet toq injaq bʼaʼnil sete, uvaʼ echatxh laʼ ebʼan, eche uvaʼ nik inbʼan sexoʼl. Tan yeʼl in etixva in tiʼ eyaʼlut in tiʼ inimal inqʼa qejoʼm uvaʼs atich in sexoʼl. 13Tul etootzaqle uvaʼ, tiʼ kuxh uvaʼ oybʼalich in, tul kaj in sexoʼl. Tul motx inpaxsa vet inqʼa bʼaʼnla txhaq yol tiʼ quBʼaal JesuKriisto sexoʼl s-bʼaxa. 14Pet kʼuxh motx el ex t-bʼey tiʼ inkʼuulaleʼ uvaʼs oybʼalich in, tul yeʼl in etixva in. Atz yeʼl ex ebʼan kaʼl ekʼuul tiʼ ibʼanax bʼaʼnil s-ve. Pet ekʼul in tibʼaʼnil. Tan ech ekʼult in, eche ikʼulux vaʼq aanxel tetz quBʼaal Tiuxh. Atz eche ikʼulux u quBʼaal JesuKriisto ekʼult in. 15¡Sotzyetz kol vet u mam chiibʼichil sekʼuul uvaʼ nikich ebʼaneʼ! Tan vootzaqle uvaʼ yeʼl invaʼq kam laʼich emaq taqʼax s-ve, oq uvaʼ laʼich vabʼi sete. Tan eche uvaʼ laʼich koq utxh etaqʼt inqʼa bʼaqʼ evatz s-ve, tul laʼich etaqʼa. 16Pet s-txheel, tan yanyetz vet in sevatz, tan aʼ vinuqul nik val sete tiʼ etok t-bʼey. Oqetzebʼ laʼ txhiʼan vet ex s-viʼ.

17Pet inqʼa xaol, inqʼa tzʼeʼyaq txhan kuxh vet tiʼ ebʼokʼtziileʼ, tul laʼ ok bʼen ex s-tiʼ nik taleʼ, tan jit bʼaʼnla itzʼabʼal koq uvaʼ nik titzʼa setiʼ. Pet aʼaq kuxh isaʼ eteleʼl s-qukʼatza, tul aʼ laʼ okk vet bʼen ex s-tiʼ nik taleʼ. 18Ape bʼaʼnetz kuxhteʼe uvaʼ nuq koqxh nik tal tuchʼ uvaʼ atxh taanima setiʼ; atz aʼ koqxh u bʼaʼnil nik titzʼa setiʼ. Tul jitetz koq kuxh taʼn laʼ ibʼanvat uvaʼ atxh taanima setiʼ tuulbʼal uvaʼ at in sexoʼl.

19Jankʼaletz ex inqʼa atxh vaanima setiʼ, tan eche tatin kʼaol inmeʼal etatin sinvatz. Tan nik in xeʼt txumun paqte setiʼ, tiʼ uvaʼ yaʼn ex nik echʼij kʼatz quBʼaal Tiuxh. Atz nik inkʼaxbʼeʼ, eche uvaʼ nik ikʼaxbʼ vaʼl txutxa uvaʼ tetxhal toleʼv tiʼ talal vineʼ. Pet tetxhal laʼ opoon ex, uvaʼ laʼ tzʼeq tziʼ ivatz etiqʼot vitxumbʼal u quBʼaal JesuKriisto. 20Tul tira nik insaʼeʼ uvaʼ een koq in s-txheel sexoʼl, tul laʼ injalpu vinyoloneʼ. Tul josqʼilxh laʼ valt inuqul sete. Tan ¡tira nik isotz inkʼuul tiʼ kam uvaʼ nik ebʼaneʼ!

Uvaʼs txumbʼalimal tiqʼot tzaan Paʼp Saara tuchʼ Agaar tiʼ vitxhusuneʼ

21Poro jatvaʼletz ex, uvaʼ nik esaʼ etok paqte jaqʼ inqʼa bʼekʼbʼal, poro ulsa vaqetz sekʼuul kam uvaʼ nikich tulbʼe ex inqʼa bʼekʼbʼal. 22Tan tzʼibʼamal ka uvaʼ txhej kaʼvaʼl ikʼaol Avraʼaam. Vaʼl ikʼaol Avraʼaam txhej tuchʼ val u ixoq uvaʼ loqʼelich tok tiʼ aqʼon t-otzotz. Vaʼt ikʼaol Avraʼaam txhej tuchʼ u tixqelichxhtuʼ, uvaʼ jitich loqʼel tok tiʼ aqʼon, pet chitpinaʼqich kuxhtuʼ.#Jeenesis 16.1-15; 21.1-3 23Echetze u xaak, tal val u ixoq uvaʼ loqʼelich tok tiʼ aqʼon, tan tuchʼ kuxh u tatxhaʼv vitxhiʼoʼl Avraʼaam ulk u xaak vatz qʼij saq. Pet koq u xaak, u tal u ixoq uvaʼ chitpinaʼqich kuxhtuʼ, tan aʼ ulk u xaak tiʼ telaʼp inqʼa iyol quBʼaal Tiuxh uvaʼ maʼtich taltaʼ.

24Echetz nik viqʼot tzaane u yol uvaʼ txumbʼalimal tiʼ kaʼvaʼl inqʼa ixoq, tan kaʼvaʼl inqʼa ixoq inqʼae, tan aʼ nik ibʼan eela tuchʼ kaʼvaʼl viyol quBʼaal Tiuxh jeqbʼamal tzaan taʼn. Aʼ u bʼaxa yol ijeqbʼa quBʼaal Tiuxh, nik ibʼan eela tuchʼ ixoq Agaar. Aʼ u yole uvaʼ utxh tu vitz Sinaii tiʼ inimal inqʼa bʼekʼbʼal. Aʼetz inqʼa xaol nik niman inqʼa bʼekʼbʼal inqʼaa, inqʼa nik ibʼan eela tuchʼ inqʼa tal u ixoq, inqʼa aʼ alamal, tiʼ uvaʼ laʼ loqʼox ok tiʼ aqʼon. 25Echetz aʼ Agaar uvaʼ loqʼel tok tiʼ aqʼon, nik ibʼanax eela tuchʼ viyol quBʼaal Tiuxh uvaʼ ijeqbʼa tu vitz Sinaii uvaʼ at tuulbʼal Araavia. Atz nikat ibʼan eela tuchʼ u tenam Jerusaleen s-txheel. Tan txeyel inqʼa tij imam Israeel, inqʼa aj Jerusaleen, taʼn inqʼa bʼekʼbʼal. 26Pet koq u tenam Jerusaleen, uvaʼ t-amlikaʼ, tan aʼ nik ibʼan eela tuchʼ u ixoq uvaʼ chitele. Aʼetz vikaʼv iyol quBʼaal Tiuxhe uvaʼ jeqbʼamal taʼn, tul aʼ uvaʼe, nimamal qaʼn. Tan chitel vet oʼ tiʼ inimal vikaʼv iyol quBʼaal Tiuxh. Niketz ibʼan eela tuchʼ u txutxa uvaʼ chitel inqʼa tal.

27Tan ech val u yol tzʼibʼamal ka t-viyolbʼal quBʼaal Tiuxh s-eche:

—Chiibʼen, axh u ixoq uvaʼ yeʼl axh navalaneʼ,

axh, uvaʼ yeʼxxh vaʼxoʼq aval.

Tul sichʼin t-chiibʼichil.

Atz axh, uvaʼ yeʼxxh inpaqxoʼq qʼeqʼun axh

t-txhoʼm

tiʼ talal vaʼq neʼ,

txʼakoʼk tiʼ aqul tiʼ qʼeqʼuʼm t-txuqʼtxunchil.

Tan u ixoq uvaʼ at kuxh vet ka,

tan aʼl tel laʼ itxhej tal

viʼ u ixoq uvaʼ tzʼalonaʼqle,

—chich u yol.#Isaiias 54.1{*}#4.27 Isaiias 54.1. Eche inqʼa yol uvaʼ tal Isaiias, tan aʼ taltaʼ uvaʼs yeʼnaqich txeypoq bʼen inqʼa aj Jerusaleen tu mam tenam Vaviloonia tu yaʼbʼ 586 y.u.J. Tan tira motx txeyp bʼen kaqaayil xaol tu Jerusaleen, tul iqʼol bʼen s-pereexhoil t-Vaviloonia. Pet kaʼt kuxh vet inqʼa xaol kaj ka tu tenam Jerusaleen. Tan taʼn kuxh vet inqʼa qʼes kaj ka tuchʼ inqʼa oybʼaliche. Echetz mam txumlebʼal kajk vet u tenam Jerusaleen. Pet ibʼaxabʼsaetz Isaiias talaxeʼ uvaʼ tetxhal laʼich qʼaʼv inqʼa tij imam Israeel tu tenam Jerusaleen inpaqte. Pet xamtel mam vet chiibʼichil ibʼan inqʼa tij imam Israeel uvaʼ motx iqʼaʼv vet tu tenam Jerusaleen. Tiqʼoetz tzaan Paʼp u yol uvaʼ tal Isaiias, tan aʼ nik ibʼan eela tuchʼ u tatxhul inqʼa xaol, inqʼa t-Jerusaleen vatz txʼavaʼ tuulbʼal uvaʼs atich Paʼp vatz txʼavaʼ. Nik ibʼan eela tuchʼ u tatxhul inqʼa niman tetz Jesuus, inqʼa laʼ motx bʼen atinoq tu akʼla Jerusaleen tu amlikaʼ tuulbʼal vikaʼv yol uvaʼ ijeqbʼa quBʼaal Tiuxh. Tan nikich tal Paʼp uvaʼ sibʼ tel xaol niman tetz Jesuus laʼ atin tu amlikaʼ viʼ inqʼa nik tatin tu tenam Jerusaleen vatz txʼavaʼ, tuulbʼal u bʼaxa yol uvaʼ ijeqbʼa quBʼaal Tiuxh, uvaʼ itzʼibʼa ka Moisees.

28Echetz nik valte sete, ex inmol s-niman tetz Jesuus, uvaʼ, oʼ vet ikʼaol imeʼal quBʼaal Tiuxh tiʼ iqeex u yol uvaʼ alel vet ka taʼn quBʼaal Tiuxh tiʼ u quBʼaal Jesuus. Echetz eela vet oʼ tuchʼ Isaak, tan alal Isaak vatz txʼavaʼ, tiʼ uvaʼ inima Avraʼaam viyol quBʼaal Tiuxh uvaʼ tal s-te.

29Toq viqʼo tzaan u yol tiʼ Ismaeel. Tan nikich itxhiʼan taanima Ismaeel tiʼ Isaak, Ismaeel uvaʼ yiqxh tatxhaʼv itxhiʼoʼl Avraʼaam ulk vatz qʼij saq. Pet Isaak, uvaʼ quBʼaal Tiuxh alon tul vatz qʼij saq, tan aʼ uvaʼe, txhiʼkʼuulali. Echatetz kuxh uvaʼe nik ibʼan inqʼa xaol s-txheel, inqʼa txeyel kuxh taʼn inqʼa bʼekʼbʼal. Tan niketz itxhiʼan s-qiʼ, oʼ inqʼa niman tetz Jesuus. 30Poro ech nik tal viyolbʼal quBʼaal Tiuxh tzʼibʼamal ka s-eche: —¡Tuki bʼen ixoq tuchʼ u tal, uvaʼ loqʼel tok tiʼ aqʼon! Tan yeʼl tokebʼal u tal u ixoq tiʼ tetzan kʼatz vibʼaal. Tan jit tzum laʼ tetzat u tal u ixoq u bʼaʼnil tuchʼ u kʼaola uvaʼ chitele, —chich u yol.#Jeenesis 21.10

31Echetz nik valte sete, ex inmol s-niman tetz Jesuus, uvaʼ yeʼl vet oʼ qitzel oʼ tiʼ inimal inqʼa bʼekʼbʼal, eche u tal u ixoq uvaʼ loqʼel tok tiʼ aqʼon. Pet chitel vet oʼ, eche u tal ixoq uvaʼ chitele.

Currently Selected:

Gaalatas 4: ixlC

Highlight

Copy

Compare