Efeesios 2

Uvaʼs talt Paʼp uvaʼ tuchʼ kuxh vibʼaʼnil quBʼaal Tiuxh qat chitpik oʼ

1Aʼetz vet quBʼaal JesuKriisto aqʼon qʼij esaq uvaʼ yeʼl iyaʼebʼal imotxebʼal. Pet uvaʼs jatxhaq tzaan, tan kamnaʼqich vet ex vatz quBʼaal Tiuxh taʼn inqʼa epaʼv, atz taʼn inqʼa yeʼbʼaʼn inqʼa nikich motx ebʼaneʼ. 2Aʼichetz u yeʼbʼaʼn nikich ebʼan s-jatxhaq tzaan inqʼaa. Tan aʼ kuxh txhʼuyich ex tiʼ kam uvaʼ nikich ibʼan inqʼa xaol sevatz, inqʼa vatz txʼavaʼ, inqʼa yeʼ ootzaqimal quBʼaal Tiuxh taʼn. Tan aʼ nik motx inima viqʼesal jankʼal inqʼa demoonio, inqʼa iqʼesal tuul kaqiqʼ. Tan aʼ iqʼomal taʼn u txumbʼal tetz palsa yolil vatz quBʼaal Tiuxh. Aʼ u txumbʼale uvaʼ sebʼt taqʼonv tu taanima inqʼa xaol, inqʼa yeʼ nik niman quBʼaal Tiuxh.{*}#2.2 Kʼuxh aʼ nik tal u versiikulo ‹vatz txʼavaʼ,› aʼ nik elkaʼpun uvaʼ ‹jit aʼ tzajnaʼq kʼatz quBʼaal Tiuxh tu amlikaʼ.› Atz vaʼt nik elkaʼpun uvaʼ ‹yeʼ ootzaqimal quBʼaal Tiuxh taʼn,› atz ‹jit aʼe vinuqul.› Ech uvaʼe nik tal t-Tio 5.14 tuchʼ t-Xhun 1.5. 3Atz echatich kuxh oʼe s-qukaqaayil inqʼa ibʼan ka. Tan aʼ kuxh nikich qubʼan inqʼa kantxhaq uvaʼ nikich tatxhva u qutxhiʼoʼl. Atz nikich qaqʼ te u qutxhiʼoʼl, atz te u qitzʼabʼal kam u paʼv uvaʼ nikich isaʼ ibʼanaxeʼ. Tiʼetz uvaʼ, oʼ aj paʼvom vatz quBʼaal Tiuxh, xaʼtetze ikʼulelxhtuʼ uvaʼ laʼich ul vikʼaʼnal quBʼaal Tiuxh s-qiibʼa. 4Pet sibʼxh taanima quBʼaal Tiuxh s-qiʼ. Tan yeʼ qat ikuy qukʼaxbʼeʼ, tan tira qat itxum quvatz. 5Kʼuxhetz kamnaʼqich vet oʼ taʼn u paʼv vatz quBʼaal Tiuxh, pet tiʼetz vet quqejt u quBʼaal JesuKriisto, tul qat itzʼeʼv vet oʼ vatz quBʼaal Tiuxh; itzʼeʼv vet oʼ taʼn u titzʼeʼvsat quBʼaal Tiuxh u quBʼaal JesuKriisto. Tan yiqxh ibʼaʼnil quBʼaal Tiuxh, tul qat chitpik oʼ t-inqʼa qupaʼv. 6Tul tiʼetz quqejt u quBʼaal JesuKriisto, tul qat taqʼ quBʼaal Tiuxh qʼij qusaq uvaʼ yeʼl iyaʼebʼal imotxebʼal, eche uvaʼ taqʼt quBʼaal Tiuxh qʼij isaq quBʼaal JesuKriisto uvaʼs titzʼeʼv inpaqte. Tul vaʼletz vet kʼuqlel oʼ kʼatz quBʼaal JesuKriisto t-inqʼa amlikaʼ tal uvaʼ kʼuqlel tiʼ ibʼant iqʼesalil. 7Qatetz ibʼan quBʼaal Tiuxh u yol uvaʼe, tiʼ ikʼutxhuxeʼ uvaʼ tira sibʼxh taanima s-qiʼ s-txheel, atz kʼuxh jattant yaʼbʼ laʼ uli, tan sibʼ ikuyuneʼ, tiʼ uvaʼ qat palk u quBʼaal JesuKriisto s-qiʼ. 8Tan aʼ vibʼaʼnil quBʼaal Tiuxh qat chiton ex, tan qat eqej vet u quBʼaal JesuKriisto. Jitetz tiʼ ebʼanoʼm tul qat ichitvat ex, pet yiqxh qat tzaj u bʼaʼnil t-taanima. Tul qat ichit ex. 9Echetz yeʼxhabʼil laʼ toksa iqʼij. Tan jit tiʼ ibʼanoʼm vaʼq xaol qat chitonka. 10Tan aʼ u quBʼaal Tiuxh qat bʼanon, tul qat taqʼ bʼen oʼ s-tetz, atz sitenam. Tan tiʼ u qatin tuchʼ quBʼaal JesuKriisto, tul qat titzʼeʼvsa oʼ quBʼaal Tiuxh. Tan aʼ isaʼ quBʼaal Tiuxh uvaʼ, aʼ laʼ qubʼan vet inqʼa bʼaʼnla bʼanoʼm. Tan ech uvaʼe itzʼamich vet taʼn quBʼaal Tiuxh uvaʼs yeʼnaqich ichʼexeʼt oʼ.

Uvaʼs talt Paʼp uvaʼ ibʼaʼnil vikamebʼal quBʼaal Jesuus vatz kurus, tul vaʼl kuxh vet iyol inqʼa niman tetz Jesuus, inqʼa aj Eefeso, kʼuxh tij imam Israeel, atz kʼuxh yeʼle

11Echetz ulsavaq sekʼuul vetatiniche uvaʼs yeʼxnaqich etootzaqit u quBʼaal Tiuxh, ex inqʼa jit ex tij imam Israeel. Tan, tiʼ uvaʼ yeʼ nikich enima viqolpeʼl inbʼiil te vetxhiʼoʼl, tul elnaʼqich eqʼij taʼn inqʼa tij imam Israeel. Tan aʼich titzʼabʼal inqʼa tij imam Israeel uvaʼ taʼnxh atich taanima quBʼaal Tiuxh s-tiʼ, tan nikich motx inima u yol tiʼ viqolpeʼl inbʼiil te vitxhiʼoʼl taʼn inqʼa xaol. 12Poro tira yeʼl invaʼq bʼaʼnil nikich etxʼebʼeʼ kʼuxh laʼich kam ex. Tan tira jetxhonaʼqich el ex kʼatz quBʼaal Tiuxh tuulbʼal vetatin vatz txʼavaʼ. Tul jitoqich etootzaq u quBʼaal JesuKriisto. Tul jitoqich ex tij imam Israeel. Tul tira jetxhich el ex kʼatz inqʼa iyol quBʼaal Tiuxh, inqʼa jeqbʼamich ka taʼn tiʼ talt ka u tulebʼal u quBʼaal JesuKriisto. 13Pet s-txheel, tan ibʼaʼnil vet quBʼaal JesuKriisto, tul qat jetxhon vet ok ex kʼatz u quBʼaal Tiuxh. Tan tiʼ tel vikaqal quBʼaal JesuKriisto vatz u kurus, tul qat kuypik vepaʼv.

14Tan aʼ quBʼaal JesuKriisto qat oksan u bʼaʼnil s-quxoʼl. Tul qat taqʼ quBʼaal JesuKriisto qukʼul qibʼ, kʼuxh tij imam Israeel, atz kʼuxh jit tij imam Israeel. Tul qat teesa el quBʼaal JesuKriisto u txhiʼkʼuula ibʼ s-quxoʼl uvaʼ echiche ikuʼ tzʼach ikuʼ s-quxoʼl. 15Tan aʼ vikam quBʼaal JesuKriisto vatz u kurus ul eesan iqʼij inqʼa txhiʼkʼuula ibʼ. Atz antxh vikam u quBʼaal JesuKriisto ul bʼanon uvaʼ jit vet tetxhal laʼ nimal inqʼa bʼekʼbʼal tuchʼ inqʼa qejoʼm uvaʼ txhaqpaq kuxh inimal taʼn inqʼa tij imam Israeel. Tan aʼ uvaʼe, nikich jatxon quxoʼl. Pet aʼetz vet u quBʼaal JesuKriisto qat aqʼon qukʼul qibʼ kʼuxh jatxelich qibʼ setuchʼ, ex inqʼa jit ex tij imam Israeel. Echetz vaʼl kuxh vet qitzʼabʼal s-qukaqaayil tiʼ quqejt u quBʼaal JesuKriisto, tan at vet u bʼaʼnil s-quxoʼl.{*}#2.15 ¿Kam talax u yol uvaʼ?, ech tal Paʼp s-eche: —...vikam u quBʼaal Jesuus ul bʼanon uvaʼ jit vet tetxhal laʼ nimal inqʼa bʼekʼbʼal tuchʼ inqʼa qejoʼm uvaʼ txhaqpaq kuxh inimaleʼ, —chiche. Aʼ nik tal Paʼp uvaʼ nimal kuxh nik ex elkaʼp vikam quBʼaal Jesuus vatz kurus tiʼ itxhoox inqʼa qupaʼv. Vaʼle, uvaʼ jit vet tetxhal koq laʼich tzʼeʼsal ok inqʼa txoo s-jaqbʼal kuybʼal vatz quBʼaal Tiuxh, eche uvaʼ nikich inima inqʼa tij imam Israeel. Tan aʼ vikamebʼal quBʼaal Jesuus txhoon vipaʼv inqʼa xaol vatz quBʼaal Tiuxh; pet jit tetxhal laʼ bʼanax vaʼtoʼq kam tiʼ itxhoox inqʼa paʼv, eche uvaʼ nikich tal inqʼa bʼekʼbʼal. Pet aʼ laʼich ibʼan vet inqʼa xaol uvaʼ tuchʼ taanima laʼ motx ijaqvat ikuya tiʼ inqʼa ipaʼv te quBʼaal Tiuxh. Aʼe u ‹justificación,› chich eʼl t-kastiiya. Atz vaʼte, uvaʼ, aʼ vet quBʼaal Jesuus nik oksan iyol inqʼa niman tetz vatz quBʼaal Tiuxh. Pet jit vet tetxhal laʼ atin vaʼtoʼq oksan yol vatz quBʼaal Tiuxh, eche uvaʼ nik tal inqʼa bʼekʼbʼal. Tan yekxh viyol inqʼa xaol vatz quBʼaal Jesuus. Aʼe u ‹intercesión,› chich eʼl t-kastiiya. Atz vaʼte, tan aʼ vet viTiuxhil Tiuxh nik txʼaon inqʼa niman tetz Jesuus t-inqʼa ipaʼv. Atz aʼat nik txʼaon inqʼa niman tetz Jesuus paqte, vinimal viyolbʼal quBʼaal Tiuxh; aʼe inqʼa bʼaʼnla txhaq yol tiʼ Jesuus. Tan aʼ uvaʼe, nik txʼaon inqʼa titzʼabʼal, tul aʼ laʼ ibʼan vet inqʼa bʼaʼn. Pet jit aʼ laʼ ibʼan vet inqʼa kantxhaqla txumbʼal, aʼe inqʼa tzʼilbʼixsa ibʼ vatz quBʼaal Tiuxh. Atz jit aʼ laʼ nimal vet kam uvaʼ nik tal inqʼa bʼekʼbʼal. Tan nik tal inqʼa bʼekʼbʼal uvaʼ jatvatzul kuxh inqʼa kam nik tzʼilbʼixsan inqʼa xaol. Tul tetxhaletz laʼ inima inqʼa bʼekʼbʼal tetz u txʼajoʼm. Pet aʼichetz itxaʼk inqʼa bʼekʼbʼal vitxhusux inqʼa xaol tiʼ ibʼen s-te uvaʼ nik motx itzʼilu tibʼ t-inqʼa paʼv vatz Tiuxh. Tan kʼuxh nik tal inqʼa bʼekʼbʼal tiʼ inqʼa txʼajoʼm, atz tiʼ itxʼajax inqʼa kam, tan aʼ nik itxhus bʼen s-tuchʼ uvaʼ laʼ bʼen te inqʼa xaol uvaʼ ech laʼ motx itxʼajt tibʼe t-inqʼa ipaʼv. Pet aʼetz itxhus vet quBʼaal Jesuus te inqʼa xaol tiʼ u txʼao ibʼ uvaʼ aʼ laʼ itxʼaj vet inqʼa xaol u taanxelal vatz quBʼaal Tiuxh tuchʼ vinimal viTiuxhil Tiuxh, atz tuchʼ vinimal inqʼa bʼaʼnla txhaq yol tiʼ Jesuus; aʼe viyolbʼal quBʼaal Tiuxh. Aʼe u ‹regeneración,› chich eʼl t-kastiiya. Echetz ex ibʼan vet quBʼaal Jesuuse tiʼ itzoqpisal inimal inqʼa bʼekʼbʼal. Tul jit vet tetxhal laʼich nimal jatvatzul inqʼa qejoʼm. Atz vaʼte, aʼe uvaʼ, aʼ vet itenam quBʼaal Tiuxh inqʼa nik niman quBʼaal Jesuus. Pet jit vet aʼ itenam quBʼaal Tiuxh, inqʼa tij imam Israeel, inqʼa qolel vet el inbʼiil te vitxhiʼoʼl. Tan aʼich itxaʼk uvaʼ nimanich tetz quBʼaal Tiuxh, inqʼa qolel el inbʼiil te vitxhiʼoʼl. Pet tuulbʼaletz vet uvaʼs tul quBʼaal Jesuus vatz txʼavaʼ, tan aʼichetz laʼ bʼen vet sitenam quBʼaal Tiuxh, inqʼa laʼ kʼuqbʼan ikʼuul tiʼ quBʼaal Jesuus, kʼuxh kamxh tenamil. Pet jit tetxhalen koq vet tijaq imam Israeel. Tan aʼetz vet tetxhlal vitenam Tiuxh tal quBʼaal Jesuus, aʼe viTiuxhil Tiuxh uvaʼ laʼ atin vet tu taanima inqʼa xaol, pet jit tetxhalen koq vet laʼ qolpeʼl inbʼeeq te vitxhiʼoʼl. Jatvaʼletz inqʼa yol uvaʼ qat qal tzitza, tan aʼetz inqʼa yole uvaʼ nik tal inqʼa bʼekʼbʼal, atz aʼetz inqʼae ul iyaʼsa quBʼaal Jesuus inimaleʼ. Pet yeʼxhkam iyaʼsa quBʼaal Jesuus inimal uvaʼ laʼ ikʼuqbʼa inqʼa xaol ikʼuul tiʼ quBʼaal Tiuxh tiʼ ikuyux vipaʼv. Antetzxh uvaʼe pal tiqʼo quBʼaal Jesuus, atz pal toksa quBʼaal Jesuus iyakʼil. Aʼe, uvaʼ atxh qaanima tiʼ quBʼaal Tiuxh laʼ ibʼana. Atz laʼ qunatxhkʼuula tuchʼ qaanima tuchʼ qitzʼabʼal, atz tuchʼ qaanxelal. Atz vaʼt, uvaʼ nik tal u bʼekʼbʼal, uvaʼ atxh taanima inqʼa xaol s-tibʼilaq laʼ ibʼana. Antetzxh uvaʼe pal taqʼ quBʼaal Jesuus iyakʼil inpaqte. Tan aʼetz uvaʼe, aʼl tira yeʼ nikich motx inima inqʼa iqʼesal uqʼeʼybʼal vatz quBʼaal Jesuus. Echetz s-tiʼile aʼl taqʼt quBʼaal Jesuus iyakʼil u yol uvaʼe tuchʼ inqʼa niman tetz. Tan tal quBʼaal Jesuus jabʼil uvaʼ nik isaʼ ibʼen siqʼesalil xoʼl inqʼa niman tetz Jesuus, tul aʼ uvaʼe, laʼ taqʼ bʼen tibʼ s-kʼuulan tetz imol. Pet jit kuxh aʼl laʼ taqʼt bʼen tibʼ s-nim, echiche inqʼa iqʼesal uqʼeʼybʼal. 16Tul aʼ vikam quBʼaal JesuKriisto vatz kurus qat oksan bʼaʼnil s-quxoʼl tuchʼ quBʼaal Tiuxh. Tul vaʼl kuxh vet qitzʼabʼal s-qukaqaayil laʼ qubʼana. Tul ech vet qatin, eche u qutxhiʼoʼl, tan vaʼl kuxh tatineʼ, kʼuxh nima vatzlen elnaʼqle, atz at itxakunbʼal junun. Echetz antxh vikam quBʼaal JesuKriisto vatz kurus qat eesan el inqʼa txhiʼkʼuula ibʼ s-quxoʼl. 17Tan qat ul u quBʼaal JesuKriisto tiʼ ipaxsal inqʼa bʼaʼnla txhaq yol tiʼ tok u bʼaʼnil sexoʼl, ex inqʼa jit ex tij imam Israeel, ex inqʼa sibʼxh atich el ex kʼatz quBʼaal Tiuxh. Atz qatat ul ipaxsa quBʼaal JesuKriisto inqʼa bʼaʼnla txhaq yol sexoʼl tiʼ tok u bʼaʼnil sexoʼl tuchʼ quBʼaal Tiuxh, ex inqʼa tij imam Israeel, ex inqʼa jetxhich ok etibʼ tiʼ iqeex viyolbʼal quBʼaal Tiuxh. 18Echetz tuchʼ vibʼaʼnil quBʼaal JesuKriisto, tul vaʼl kuxh vet nik qok vatz quBʼaal Tiuxh taʼn viTiuxhil.

19Tootzaqletz vet ex quBʼaal Tiuxh. Pet jit vet ex vaʼq xaol uvaʼ yeʼ ootzaqimal uvaʼ tal kuxh tzajnaʼqle. Pet qat oky vet ex s-aj tenam, tu tenam tal uvaʼ nik ibʼanvat quBʼaal Tiuxh iqʼesalil tiibʼa inqʼa niman tetz, inqʼa chʼexel vet taʼn. Atz qat oky vet ex s-tatxhul kʼatz quBʼaal Tiuxh, eche tatin inqʼa nitxaʼ kʼatz ibʼaal. 20Aʼetz ixeʼal viyolbʼal quBʼaal Tiuxh nimamal etaʼn, aʼe inqʼa yol uvaʼ tal ka quBʼaal JesuKriisto. Atz aʼe, uvaʼ nik ipaxsa inqʼa apoostol. Tul aʼ uvaʼe, nikich itxhus inqʼa qʼexsanich tetz viyol quBʼaal Tiuxh. Tan ech nik ibʼan quBʼaal Tiuxh tiʼ inukʼil inqʼa niman tetz Jesuus, eche nik ibʼan vaʼq aqʼol jaʼ otzotz uvaʼ laʼxh itxhabʼa itzaj u otzotz tu kuʼebʼ ixeʼ. 21Pet aʼ u quBʼaal Tiuxh nik nukʼin inqʼa niman tetz Jesuus s-kaqaayil. Tul aalemal ichʼij vet tiʼ ijetxhon ok kʼatz quBʼaal Tiuxh. Tan ech bʼanel taʼn, eche vaʼq aqʼol jaʼ otzotz uvaʼ nik inukʼi jaʼ inqʼa sivan, tetxhal ibʼen s-vaʼq tostiuxh. 22Echetz ant vet ex qat ichʼex ex quBʼaal Tiuxh, tiʼ uvaʼ tira laʼ atin vet viTiuxhil Tiuxh tuul etaanxelal.

Currently Selected:

Efeesios 2: ixlC

Highlight

Copy

Compare