2 Koriintios ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
2 KORIINTIOS
Uvaʼs toq qootzaqitaʼ jaʼl tzʼibʼan u uʼ 2 Koriintios
Aʼetz u uʼe uvaʼ 2 Koriintios ibʼij, uvaʼ antxh tetz Paʼp. Pet aloq jit Paʼp koq nikich tzʼibʼan inqʼa yol, pet atich vaʼl taj tzʼibʼ uvaʼ nikich tal inqʼa yol s-te, tul sebʼtich itzʼibʼataʼ. Antetz Timoteeo atich kʼatz Paʼp uvaʼs nikich talt Paʼp itzʼibʼal viyol. Ech uvaʼe nik tal tu 2 Koriintios 1.1.
Uvaʼs toq qootzaqitaʼ kam s-tuul tzʼibʼal u uʼ 2 Koriintios
Maʼtichetz itzʼibʼal vet u uʼ 1 Koriintios kamal vaʼl yaʼbʼ, atz maq kaʼvaʼl yaʼbʼ itzʼibʼalich veteʼ, yaʼnetze tzʼibʼal vet u uʼ 2 Koriintios. Kamal ilxhte tuulbʼal u yaʼbʼ oʼlaval toxkʼal (55), atz maq tuulbʼal u yaʼbʼ vaqlaval toxkʼal (56) m.t.J. Aʼetz tzʼibʼalik u uʼ 2 Koriintios tuulbʼal Masedoonia, tal uvaʼ, ex itxhokvat Paʼp Tiito, u lotxhol tetz. Ech uvaʼe nik tal tu 2 Koriintios 2.2-13 tuchʼ 7.4-16.
Uvaʼs toq qootzaqitaʼ kame u taqʼil vitxhusun Paʼp tuul u tuʼ 2 Koriintios
Aʼetz u taqʼil viyol Paʼp tiʼ inqʼa itzaʼlal uvaʼ nikich palka tuulbʼal uvaʼ nikich ipaxsat viyolbʼal quBʼaal Tiuxh t-junun tenam.
Nikat tal Paʼp inuqul paqte tiʼ u tatin siapoostol quBʼaal Jesuus, xoʼl inqʼa niman tetz Jesuus tu tenam Koriinto.
Nikat tal Paʼp tiʼ u toksat inqʼa niman tetz Jesuus t-bʼey. Atz tal paqte tiʼ kam inqʼa bʼaʼn ibʼana. Tul nikat taqʼ itial inqʼa niman tetz Jesuus inpaqte, tiʼ uvaʼ laʼ atin tibʼaʼnil s-vatz.
Atz nikat tal Paʼp kam s-tiʼil yeʼ bʼen vet Paʼp tiʼ isolil inqʼa niman tetz Jesuus, tul maʼtich talt Paʼp uvaʼ laʼich bʼeni.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 2 Koriintios
U uʼ 2 Koriintios uvaʼ itzʼibʼa ka Paʼp, tan vajqil nimla txhaq tanul elnaʼq inqʼa yol uvaʼ nik tal s-tuul.
2 Koriintios 1.1-4
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus tu tenam Koriinto.
1. 2 Koriintios 1.5-11
U bʼaxa tanul yol, tan aʼ tal Paʼp, tiʼ uvaʼ laʼ tanatxh vet vikʼaxbʼisal u vinaq uvaʼ bʼanon val u paʼv tuchʼ vitxutxubʼal. Tan titzʼa vet tibʼ u vinaq, tul yeʼxhkam nikich ibʼan veteʼ.
2. 2 Koriintios 1.12—6.18
Vikaʼv tanul yol, tan aʼ tal Paʼp, tiʼ uvaʼ mam yol te Paʼp uvaʼs itxhaqax taʼn quBʼaal Jesuus tiʼ talax inqʼa bʼaʼnla txhaq yol tiʼ Jesuus xoʼl inqʼa jit tijaq imam Israeel. Taletz Paʼp inuqul s-xoʼl tiʼ tiqatzil talax viyolbʼal quBʼaal Tiuxh, atz tiʼ inqʼa itzaʼlal nikich palk tiʼ vipaxsaleʼ. Aloq tiraetz nikich ichiibʼ Paʼp tiʼ talax viyolbʼal quBʼaal Tiuxh s-xoʼl, tan nikich til Paʼp ivatzin kʼatz inqʼa xaol tiʼ ipaxsat viyolbʼal quBʼaal Tiuxh. Tan nikich motx ijalpu inqʼa jit tij imam Israeel itxumbʼal tiʼ inqʼa tatineʼ uvaʼs motx inimat inqʼa bʼaʼnla txhaq yol tiʼ Jesuus.
Tul motxetz tal Paʼp inuqul tiʼ u tiqleʼm uvaʼ tira nikich ibʼen te Paʼp uvaʼ, aʼ u quBʼaal Jesuus aqʼon s-te uvaʼs ikʼutxht tibʼ quBʼaal Jesuus te Paʼp tiʼ u bʼey uvaʼ maʼt t-Damaasko. Tul iapoostolich vet quBʼaal Jesuus tiʼ ipaxsal inqʼa bʼaʼnla txhaq yol xoʼl inqʼa jit tij imam Israeel. Tan atich jolol inqʼa niman tetz Jesuus tu tenam Koriinto uvaʼ nikich motx eesan iqʼij Paʼp. Tan aʼ nikich motx taleʼ uvaʼ yeʼl u tiqleʼm Paʼp nikich topoon tiʼ u tiqleʼm jolt inqʼa iqʼon iviʼ, inqʼa nikich taqʼbʼ tu tenam Koriinto. Echetz nikich ibʼant Paʼp eelae u tiqleʼm tuchʼ jolt inqʼa iqʼonich iviʼ. Tul nikich ibʼan Paʼp eela jankʼal inqʼa taqʼon nikich ibʼan tiʼ ipaxsal viyolbʼal quBʼaal Tiuxh. Tul nikich ibʼan Paʼp eela kam inqʼa ivatz nikich taqʼeʼ, atz jankʼal palnaʼqich viʼ u taqʼon jolt inqʼa iqʼon iviʼ.
3. 2 Koriintios 7.1-16
Vitoxv tanul yol, tan aʼ tal Paʼp, tiʼ uvaʼ nik ichiibʼ Paʼp tiʼ inqʼa aj Koriinto, tan motx titzʼaaq tibʼ t-inqʼa ipaʼv uvaʼs talt Paʼp viyolbʼal quBʼaal Tiuxh s-xoʼl uvaʼs tex Paʼp s-bʼaxa.
4. 2 Koriintios 8.1—9.15
Vikajv tanul yol, tan aʼ tal Paʼp tiʼ u lotxhbʼal uvaʼ nikich imolox tu tenam Koriinto. Tul laʼich bʼen aqʼaxoq ka xoʼl inqʼa tij imam Israeel, inqʼa meebʼaʼich kuxh tatin vet tu tenam Jerusaleen. Tan bʼeenoxh motx ikʼaxbʼ taʼn val u mam vaʼy uvaʼ uli, uvaʼs tel u mam saqʼi tuulbʼal u tenam Jerusaleen. Aʼetz, ex elaʼpoq kam uvaʼ maʼtich talt Agaavo. Ech uvaʼe nik tal tu uʼ Vibʼanoʼm inqʼa Apoostol 11.28.
5. 2 Koriintios 10.1—12.13
Vitoʼv tanul yol, tan aʼ tal Paʼp tiʼ u taqʼon uvaʼ nikich ibʼan xoʼl inqʼa jit tij imam Israeel, atz xoʼl inqʼa aj Koriinto. Tan tira nikich inatxh Paʼp uvaʼ, aʼ Paʼp ilolich tetz inqʼa iqʼon iviʼ, inqʼa jeqlich tu Koriinto. Pet jit aʼ jolt inqʼa apoostol ilolich tetz inqʼa aj Koriinto uvaʼ tzajnaʼqich tu tenam Jerusaleen. Ech uvaʼe nik tal tu Gaalatas 2.7.
Poro atetz jolol inqʼa aj Koriinto nikich kʼulun jolt inqʼa apoostol uvaʼ tzajnaʼqich tu tenam Jerusaleen. Tul nikich motx taqʼax ipuaq, atz kam uvaʼ nikich motx isaʼeʼ, kʼuxh jit aʼ, ex alon viyolbʼal quBʼaal Tiuxh xoʼl inqʼa aj Koriinto s-bʼaxa; tul kʼuxhetz jitichaq ayaʼl ikʼuul tiʼ inqʼa aj Koriinto.
Echetz s-tiʼile nikich itxhok Paʼp ibʼokʼtziil inqʼa aj Koriinto, tiʼ uvaʼ yeʼ laʼ aqʼax ka Paʼp taʼn. Tan aʼ Paʼp alon viyolbʼal quBʼaal Tiuxh s-xoʼl s-bʼaxa. Tul aʼ Paʼp uvaʼ palnaʼq itxumbʼal tiʼ talax viyolbʼal quBʼaal Tiuxh s-xoʼl viʼ jolt inqʼa nikich motx tex okebʼen. Tul aʼ Paʼp uvaʼ mamala etxhlal, atz kaebʼal aanima nikich ikʼutxh xoʼl inqʼa aj Koriinto. Pet yeʼxhkam nikich motx ibʼan jolt inqʼa nikich motx taqʼbʼeʼ. Echetz aʼ Paʼp palnaʼqich u aqʼon nikich ibʼan xoʼl inqʼa xaol, inqʼa aj Koriinto, viʼ jolt inqʼa iqʼon iviʼ uvaʼ nikich motx taqʼbʼeʼ. Tul yeʼl puaq, atz yeʼl lotxhbʼal nikich ijaq Paʼp uvaʼs nikich taqʼbʼ xoʼl inqʼa aj Koriinto, eche nikich ibʼan jolt inqʼa nikich taqʼbʼeʼ. Tul yeʼ nikich isaʼ Paʼp toksal iqʼij tiʼ inqʼa aj Koriinto uvaʼs itzʼibʼat bʼen Paʼp u yol s-xoʼl s-bʼaxa. Pet toksaetz vet Paʼp iqʼij, tiʼ uvaʼ tan, ixval vet Paʼp taʼn jolol inqʼa aj Koriinto. Tan tabʼi vet Paʼp uvaʼ, aʼ vet jolt inqʼa iqʼon iviʼ nikich isaʼaxeʼ, atz nikich motx toksal vet iqʼij.
Echetz s-tiʼile tal vet Paʼp uvaʼ, aʼ Paʼp aqʼel tiqleʼm taʼn quBʼaal Jesuus tiʼ tiqʼol iviʼ xoʼl inqʼa aj Koriinto.
6. 2 Koriintios 12.14—13.10
Vivaqaq tanul yol, tan aʼ tal Paʼp, tiʼ uvaʼ laʼ isoli vet Paʼp inqʼa aj Koriinto titoxpaq. Tul aʼ laʼ bʼen til Paʼp kam yaʼel tatin inqʼa aj Koriinto vatz quBʼaal Tiuxh. Tul jununxh laʼich ibʼen Paʼp s-tiʼ, tiʼ tilixeʼ qat kol titzʼal tibʼ t-inqʼa ipaʼv, atz maq yeʼle. Tan aʼ Paʼp apoostol, atz ilol tetz, kam yaʼel inqʼa aj Koriinto tiʼ itxʼolt tiqʼot viyolbʼal quBʼaal Tiuxh.
2 Koriintios 13.11-14
Tiyaʼtebʼaletz veteʼ, tul nik tal Paʼp bʼaʼnla txhaq yol tiʼ inqʼa aj Koriinto. Tul tal Paʼp uvaʼ laʼ motx taqʼ tibʼ bʼaʼnilaq ikʼuul s-vatzaq. Atz nikat tal Paʼp uvaʼ nik taqʼ bʼen inqʼa niman tetz Jesuus, uvaʼ nikich ikʼul tibʼ tuchʼ Paʼp, bʼaʼnil ikʼuul inqʼa niman tetz Jesuus, inqʼa at t-Koriinto. Tul nikat tal Paʼp vaʼt bʼaʼnla yol tiʼ inqʼa niman tetz Jesuus aj Koriinto.
Currently Selected:
2 Koriintios ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.