2 Koriintios 5

Uvaʼs talt Paʼp tiʼ vitxhiʼoʼl inqʼa niman tetz Jesuus

1Tan qootzaqle uvaʼ bʼiil kuxh toq ibʼan u qutxhiʼoʼl tzitza vatz txʼavaʼ, tul laʼ sotzi. Pet jatuetz laʼ eleʼl oʼ tzitza vatz txʼavaʼ, tul qootzaqle uvaʼ at vaʼt qutxhiʼoʼl uvaʼ nik itxʼebʼon s-qiʼ t-amlikaʼ uvaʼ yeʼl iyaʼebʼal imotxebʼal toq tatineʼ. Tan u qutxhiʼoʼl, u tetz vatz txʼavaʼ, tan ech kuxh tatin, eche vaʼq paʼtebʼal uvaʼ laʼ utxh ijalpul el. Pet xamtel laʼ aqʼax vet bʼen s-vaʼl jeqlebʼal uvaʼ tira laʼ itxhabʼa vet tatineʼ, uvaʼ taʼnxh quBʼaal Tiuxh laʼ viinqixsan. 2Pet s-txheel, tiʼetz uvaʼ nik qupal t-inqʼa itzaʼlal vatz txʼavaʼ, tul tzʼeʼyxh vet oʼ tiʼ qubʼen tiʼ qukʼult vaʼt qutxhiʼoʼl, eche vaʼq xaol uvaʼ nik ijiqʼjoʼlaneʼ, tan kʼaxbʼinaʼq vitxhiʼoʼl. Tul nik isaʼeʼ laʼ tiqʼo tibʼ. Tan tikʼ vet vaʼt qutxhiʼoʼl uvaʼ qetz vet laʼ ibʼan tu amlikaʼ. Tan ech vet u qutxhiʼoʼl laʼ ibʼana, eche vaʼq akʼ jeqeʼvbʼal uvaʼ laʼ atin oʼ s-tuul tu amlikaʼ. 3Echetz tuulbʼal uvaʼs laʼ qukʼult vet vaʼt u qutxhiʼoʼl uvaʼ laʼ taqʼ quBʼaal Tiuxh s-qe, tul yeʼl iyaʼebʼal imotxebʼal laʼ tatin vet u qaanxelal s-tuul; eche vaʼq xaol uvaʼ atoʼk toksaʼm, pet jit laʼ kuxh tʼureʼv el vitxhiʼoʼl.

4Tan tuulbʼal uvaʼ il oʼ at oʼ tu qutxhiʼoʼl tetz vatz txʼavaʼ, uvaʼ ech kuxh tatin, eche ipukux vaʼq paʼtebʼal, tan tira nik qujiqʼjotxh t-kʼayunchil tiʼ qeleʼl s-tuul. Atz tira nik ipal qukʼuul tiʼ qatin tuul u qutxhiʼoʼl. Tan yeʼ qusaʼ uvaʼ ech kuxh vet laʼ qatin s-eche, eche vaʼq xaol uvaʼ tʼurlele, tul yeʼl toksaʼm atoʼk. Pet aʼ qusaʼ uvaʼ laʼ taqʼ quBʼaal Tiuxh vaʼt u qutxhiʼoʼl uvaʼ akʼ veteʼ, eche toksat vaʼq xaol vaʼt toksaʼm s-tiʼ. Echetze u qutxhiʼoʼl tetz vatz txʼavaʼ uvaʼ at ikamebʼal, tan laʼ jalp veteʼ. Tul aʼ vet ivatzil vaʼt u qutxhiʼoʼl uvaʼ yeʼl vet iyaʼebʼal imotxebʼal laʼ tilt qʼij saq. 5Tul antxh quBʼaal Tiuxh, uvaʼ viinqixsan oʼ, bʼanon ka tiʼ qukʼult invaʼt u qutxhiʼoʼl. Echetz s-tiʼil qat taqʼ viTiuxhil s-qe s-tetxhlal uvaʼ laʼ taqʼ vaʼt qutxhiʼoʼl.

6Echetz tiʼ uvaʼ at viTiuxhil Tiuxh tu qaanima, tul nik qukʼuqbʼa vet qukʼuul tiʼ quBʼaal Tiuxh bʼenamen, tiʼ uvaʼ laʼ taqʼ vaʼt akʼla qutxhiʼoʼl. Tan qootzaql veteʼ uvaʼ toq eloq el oʼ tuul vatz qutxhiʼoʼl vatz u txʼavaʼ. Tan yeʼx aqʼel vaʼt u akʼla qutxhiʼoʼl taʼn quBʼaal Tiuxh. Tan yeʼx bʼenoq oʼ kʼatz u quBʼaal Jesuus. 7Echetz kʼuxh yeʼx qileʼt inqʼa nik qaleʼ, poro kʼuqlel vet qukʼuul tiʼ quBʼaal Tiuxh uvaʼ toq taqʼ vet vaʼt akʼla qutxhiʼoʼl. 8Pet kʼuqlelxh qukʼuul tiʼ quBʼaal Tiuxh. Tan aʼ qusaʼ uvaʼ laʼ el vet ka u qutxhiʼoʼl s-qiʼ, u tetz vatz txʼavaʼ. Tul een koq vet oʼ kʼatz u quBʼaal Jesuus tu qatibʼal tu amlikaʼ.

9Echetz qubʼan yaʼl tiʼ ichiibʼisal u quBʼaal JesuKriisto, kʼuxh tuulbʼal uvaʼ ant atil oʼ tu txhiʼoʼl tetz vatz txʼavaʼ, atz kʼuxh tuulbʼal uvaʼ maʼt qeleʼl tuul u qutxhiʼoʼl tetz vatz txʼavaʼ. 10Niketz qubʼan yaʼl tiʼ ichiibʼisal u quBʼaal Tiuxh, tan laʼ opoon invaʼl qʼij uvaʼ, tetxhal kuxh laʼ pal oʼ vatz quBʼaal JesuKriisto uvaʼ kʼuqlel t-vikʼuqeʼvbʼal tetz iqʼesalil, tul laʼ taqʼ kuʼ yol tinuqul s-qiʼ. Echetz jununil vet inqʼa xaol laʼ pal kʼulun vet vitxʼaqaʼm kam uvaʼ ikʼulel laʼ aqʼax s-te. Tan aʼ laʼ bʼenk tiʼ kam qat ibʼan tuulbʼal uvaʼs atich t-vitxhiʼoʼl tetz vatz txʼavaʼ, maq bʼaʼn, atz maq yeʼbʼaʼn qat ibʼana.

Uvaʼs talt Paʼp inqʼa yol tiʼ tok bʼaʼnil xoʼl inqʼa xaol tuchʼ quBʼaal Tiuxh

11Pet tiʼetz uvaʼ qootzaqle uvaʼ, tetxhal kuxh laʼ pal oʼ vatz u quBʼaal Jesuus, tul at quxoʼval vatz quBʼaal Tiuxh, tiʼ uvaʼ tetxhal kuxh laʼ qutzoqpixsa u taqʼon quBʼaal Tiuxh. Echetz nik qubʼant yaʼle tiʼ ibʼokʼtziil inqʼa xaol tiʼ inimal quBʼaal Tiuxh. Tul tootzaql quBʼaal Tiuxh u bʼaʼnla txumbʼal uvaʼ qat qukʼutxh sexoʼl. Tul nikatetz qutxʼebʼeʼ uvaʼ bʼaʼnat u qutxumbʼal qat qubʼan sexoʼl.

12Poro jit quqʼij nik qoksa inpaqte tuchʼ inqʼa yol uvaʼ nik qal bʼen sete, kʼuxh at xaol sexoʼl uvaʼ ech nik titzʼae. Pet aʼ kuxh qusaʼe uvaʼ tij ex tiʼ etalt bʼaʼnla yol s-qiʼ te inqʼa niman tetz Jesuus, inqʼa nik motx toksa iqʼij tiʼ kam inqʼa nik ibʼan sexoʼl. Tan bʼane bʼaʼn koq taanima vatz quBʼaal Tiuxh tuchʼ inqʼa nik motx ibʼaneʼ. Pet koq oʼ, tan aʼ een qaanima tiʼ velotxhoxeʼ. 13Tul at xaol nik eesan quqʼij. Tan aʼ nik taleʼ uvaʼ, oʼ yannaʼq quviʼ tiʼ qilt kam inqʼa nik ikʼutxh quBʼaal Tiuxh s-qe. Pet niketz qal inqʼa yol kam uvaʼ nik ikʼutxh quBʼaal Tiuxh s-qe. Tan aʼ qusaʼ qoksat iqʼij u quBʼaal Tiuxh s-tuchʼ. Pet oqetz bʼaʼn inqʼa txhusbʼal nik etabʼi qaltaʼ, tul aʼetz qusaʼe laʼ chʼij ex kʼatz quBʼaal Tiuxh taʼn. 14Kʼuxhetz kam kuxh nik qaleʼ nik etabʼi, poro aʼ nik qukʼutxheʼ uvaʼ sibʼxh taanima u quBʼaal JesuKriisto tiʼ jankʼal inqʼa xaol. Aʼetz uvaʼe, nik yaʼlun oʼ. Tan tiʼ uvaʼ qat taqʼ tibʼ u quBʼaal JesuKriisto kamoq tiʼ itxhoox ipaʼv jankʼal inqʼa xaol, echetz s-tiʼile tetxhal kuxh laʼ imaq tibʼ inqʼa xaol tiʼ ipaʼvineʼ, ech vete invaʼq kamnaʼq uvaʼ yeʼl vet tokebʼal u paʼv s-tiʼ. 15Qatetz taqʼ tibʼ quBʼaal JesuKriisto kamoq s-qiʼ tiʼ itxhoox inqʼa qupaʼv, jankʼal oʼ inqʼa niman tetz. Tan aʼ titzʼabʼal s-qiʼ uvaʼ yeʼ laʼ qubʼan vet kam u tatxhaʼv u qutxhiʼoʼl. Pet aʼ u titzʼabʼal s-qiʼ uvaʼ, aʼ laʼ qubʼan vet u bʼaʼnla txumbʼal uvaʼ laʼ chiibʼisan u quBʼaal JesuKriisto, uvaʼ kami, tul itzʼeʼv inpaqte tiʼ taqʼax qʼij qusaq uvaʼ yeʼl iyaʼebʼal imotxebʼal.

16Poro jit vet aʼ nik qitzʼa kam bʼanel taʼn inqʼa xaol tuchʼ vitxumbʼal tetz vatz txʼavaʼ uvaʼ iqʼomal taʼn. Kʼuxh ech kuxh nikich qitzʼan, eche uvaʼ nik titzʼan inqʼa xaol, inqʼa jit niman tetz Jesuus, pet aʼetz vet uvaʼs qok s-niman tetz, tul jalpinaʼq vet qitzʼabʼal tiʼ tilixeʼ. Tan jit vet ech u qitzʼabʼale s-tiʼ. Tul echich qitzʼabʼale tiʼ tilix tatin u quBʼaal JesuKriisto uvaʼ atich vatz txʼavaʼ, pet jit vet ech u qitzʼabʼale uvaʼs qok vet tiʼ inimaleʼ.

17Tan jaʼl u xaol uvaʼ nik ikʼuqbʼa ikʼuul tiʼ u quBʼaal JesuKriisto, tul aʼetz uvaʼe, jalpinaʼq vet itxumbʼal taʼn quBʼaal Tiuxh, eche invaʼq u kam uvaʼ yaʼn viinqixsaliya. Tan inqʼa oʼtla txumbʼal iqʼomalich taʼn inqʼa xaol, tan qat pay vet ka. Pet s-txheel, tan jalpinaʼq vet vitxumbʼal inqʼa xaol tiʼ tatin vatz u txʼavaʼ. 18Jankʼaletz eche tiʼ vijalp vitxumbʼal inqʼa niman tetz Jesuus, tan aʼ u quBʼaal Tiuxhe nik bʼanon. Atz antxh u quBʼaal Tiuxh qat oksan bʼaʼnil s-quxoʼl s-tuchʼ tiʼ kam uvaʼ ul ibʼan u quBʼaal JesuKriisto. Tul aʼetz vet qaqʼon taʼn quBʼaal Tiuxh talax te inqʼa xaol tok bʼaʼnil s-xoʼl tuchʼ quBʼaal Tiuxh. 19Tan ech uvaʼe nik qupaxsa, uvaʼ antxh quBʼaal Tiuxh nik oksan bʼaʼnil s-xoʼl tuchʼ jankʼal inqʼa xaol, inqʼa nik qeon; tul yeʼ nik toksa jankʼal vipaʼv inqʼa xaol s-tuul, tiʼ kam uvaʼ ul ibʼan u quBʼaal JesuKriisto. Tul aʼetz vet qaqʼon taʼn quBʼaal Tiuxh talax te inqʼa xaol tok bʼaʼnil s-xoʼl tuchʼ quBʼaal Tiuxh. 20Aʼetz vet oʼ bʼanol ivatzil quBʼaal JesuKriisto vatz txʼavaʼ. Echetz aʼ vet u quBʼaal Tiuxhe nik bʼokʼtziin ex, uvaʼs nik ibʼanbʼet oʼ tiʼ ebʼokʼtziileʼ. Niketz quyaʼlu sete tiʼ ejaqt ekuya te quBʼaal JesuKriisto, tiʼ tok bʼaʼnil sexoʼl tuchʼ quBʼaal Tiuxh. 21Yeʼlich inbʼeeq ipaʼv u quBʼaal JesuKriisto. Atz kʼuxhetz yeʼlich inbʼeeq ipaʼv, poro aʼ vet iqatzin kaqaayil vipaʼv inqʼa xaol. Echetz s-tiʼile tira kʼaxbʼisal taʼn quBʼaal Tiuxh tiʼ itxhojt vipaʼv inqʼa niman tetz. Tul tiʼetz vet inimal u quBʼaal JesuKriisto, tul yeʼl vet paʼv at jaʼp s-qiibʼa vatz quBʼaal Tiuxh.

Currently Selected:

2 Koriintios 5: ixlC

Highlight

Copy

Compare