2 Koriintios 11

Uvaʼs ibʼant tibʼ Paʼp eela tuchʼ inqʼa nikich motx tal tibʼ s-apoostol

1Niketz injaq bʼaʼnil sete uvaʼ laʼ ekotxʼ evatz tiʼ tabʼil jolol inqʼa yol nik val bʼen sete tiʼ voksat inqʼij. Pet nik innatxheʼ uvaʼ inebʼ yannaʼq bʼeeq inviʼ tiʼ voksat inqʼij; in yannaʼq inviʼ. ¡Echetz kotxʼvaq evatz tiʼ etabʼit in!

2Tan tira at vaanima setiʼ. Tul aʼ nik vitzʼa kam toq elkaʼp ex vatz quBʼaal Tiuxh. Tan quBʼaal Tiuxh oksan t-vaanima setiʼ. Tul aʼ nik insaʼ setiʼ uvaʼ taʼn kuxh quBʼaal JesuKriisto laʼ etal seBʼaal. Tul yeʼl ex laʼ eteesa etibʼ t-bʼey tuchʼ vaʼtoʼq txhusbʼal uvaʼ jit tetz quBʼaal JesuKriisto. Tul ech nik inbʼan setiʼ, eche vaʼq bʼaala uvaʼ laʼ taqʼ vimeʼal te vaʼl vinaq. Tul qʼopo ixvaak kuxh vimeʼal s-laʼ taqʼtaʼ. Tul aʼ nik vitzʼa uvaʼ yeʼl ex laʼ el ex t-bʼey, tetxhal etxʼebʼt tul u quBʼaal JesuKriisto inpaqte, eche laʼ taqʼt u bʼaala vimeʼal uvaʼ ixvaak kuxhtuʼ te vikʼulel.

3Pet nik vitzʼa uvaʼ kamal nik eteesal t-bʼey taʼn Satanaas, eche uvaʼ teesat Satanaas Eeva t-bʼey. Tul aʼ nik vitzʼa uvaʼ kamal toq kuxh teesa Satanaas vetitzʼabʼal t-bʼey taʼn inqʼa nik txhusun inqʼa kantxhaqla txhusbʼal sexoʼl. Tul aʼ laʼ elk vet ka ex tiʼ inqʼa yol uvaʼ eqej s-bʼaxa. Tan kʼuqlebʼxh kʼuul exe tiʼ inimal u quBʼaal JesuKriisto. Tul nuqxh nik etaleʼ, tan yeʼxhkam vaʼtoʼq nikich etitzʼa. 4Pet kametz vet s-tiʼil nik ekʼulvii txha vet inqʼa yol te joltoʼq xaol inqʼa nik topoon txhan vet sexoʼl uvaʼ vaʼten vet inqʼa yol nik tal tiʼ quBʼaal JesuKriisto sete, viʼ inqʼa nik qal sete. Tul tiraetz nik ekotxʼ txha evatz tiʼ tabʼileʼ. Tul nik ekʼul txha vet inqʼa yol uvaʼ vaʼten vet nik tal tiʼ viTiuxhil Tiuxh viʼ inqʼa nik qal sete. Tul nik ekʼul txha vet inqʼa yol uvaʼ vaʼten vet nik tal tiʼ inqʼa bʼaʼnla txhaq yol tiʼ Jesuus, uvaʼ yeʼ nik ibʼan eela tuchʼ inqʼa alel vet sete qaʼn. 5Tul aʼ nik vitzʼa uvaʼ jit aʼ inqʼa xaol inqʼae palnaʼq u tiqleʼm sinviʼ vatz quBʼaal Tiuxh, tul kʼuxh antxh inqʼae nik motx tal tibʼ s-nimla txhaq apoostol sexoʼl. 6Tan kʼuxh jit josqʼil nik intxʼolt talax yol sevatz, poro atetz vet vootzaqibʼal tiʼ viyolbʼal quBʼaal Tiuxh. Tul aloq ile tira qat qukʼutxh sexoʼl tuchʼ jatvatzul txumbʼal.

7Tul kamal aʼ inpaʼv qat inbʼan sevatz, uvaʼ oy kuxh ex inpaxsat inqʼa bʼaʼnla txhaq yol tiʼ Jesuus sexoʼl. Tul qat viqʼo kuʼl vibʼ, tan aʼ vitzʼabʼal laʼ voksa eqʼij. 8Pet aʼl aʼ jolt inqʼa niman tetz Jesuus veesa puaq tiqʼabʼ tiʼ kam uvaʼ nik isaʼon tiʼ inqʼa aqʼon nik inbʼan tiʼ elotxhoxeʼ. 9Tul kʼuxhetz inkʼul u puaq te jolt inqʼa niman tetz Jesuus, tul motxetz veteʼ. Poro yeʼletz invaʼq ex injaq vet lotxhbʼal sete uvaʼs atich in sexoʼl. Pet tuuletz ul taqʼt inqʼa niman tetz Jesuus lotxhbʼal vetz, inqʼa tzajnaʼqich t-Masedoonia, echetz inmaqt vibʼe tiʼ yeʼ inxhaakalit ex tiʼ injaqt puaq sete. Tul inxh yeʼ laʼ xhaakalin ex kʼuxh laʼ saʼon invaʼq kam s-ve. 10Tul nuqxh inqʼa nik val sexoʼl, tan vootzaqle uvaʼ at quBʼaal JesuKriisto sinkʼatza. Tul vootzaqle uvaʼ tira yeʼl puaq laʼ inkʼul sete tiʼ inpaxsat viyolbʼal quBʼaal Tiuxh sexoʼl. Tul aʼetz nik chiibʼisan in, atz nik voksavat inqʼij, tiʼ uvaʼ yeʼl puaq nik inkʼul sete. Tul yeʼxhabʼil sexoʼl tuulbʼal Akaaya, laʼ maqon in tiʼ toksal inqʼij, tiʼ uvaʼ tan, yeʼl puaq laʼ inkʼul sete tiʼ inpaxsat paʼl viyolbʼal quBʼaal Tiuxh sexoʼl. 11Niketz val inqʼa yol sete inqʼaa, tan kamal aʼ nik etitzʼa uvaʼ, in yeʼl vaanima setiʼ, xaʼte yeʼl puaq nik injaq sete. Pet yeʼle. Tan tootzaql quBʼaal Tiuxh uvaʼ tira at vaanima setiʼ.

12Tan at jolol xaol sexoʼl uvaʼ nik atxhvan toksal iqʼij tiʼ ibʼanax kam invaʼq aqʼon, eche uvaʼ nik inbʼaneʼ. Pet aʼetz insaʼ yeʼ laʼ talax yol s-viʼ, atz yeʼ laʼ tal inqʼa xaol inqʼae, uvaʼ tiʼ puaq nik aqʼonvik in. Xaʼtetze yeʼl puaq nik injaq sete. Tul kametzxh uvaʼ nik inbʼaneʼ, tul ant kuxh uvaʼe toq inbʼane. Jit eela in s-tuchʼ.

13Echetze inqʼa xaol inqʼae, tan nikaq kuxh motx tal tibʼ s-apoostol, s-bʼanol itxhaq Kriisto. Poro jitaqxh apoostol. Pet junal eesanalaq kuxh t-bʼey, kʼuxh nik motx tal tibʼ s-taqʼonvil quBʼaal JesuKriisto. Tan aʼ nik motx ikʼutxheʼ uvaʼ echaq vete iapoostol quBʼaal JesuKriisto tilixeʼ, poro jitaqxh apoostol. 14Tul ikʼulelaq kuxhtuʼ uvaʼ, ech nik motx ibʼane tiʼ ikʼutxhtaq tibʼ uvaʼ, ech vete apoostol tilixeʼ. Tan ech uvaʼe ibʼan Satanaas, tan litzʼkabʼinyich txhan vet tilix Satanaas, s-eche bʼaʼnla iaanxel quBʼaal Tiuxh. Echetz yeʼl ex laʼ sotz ekʼuul te uvaʼ nik motx ibʼan inqʼae. 15Tan junal bʼanolaq taqʼon Satanaase. Tul yeʼletz ex laʼ kaj etaanima s-te, tiʼ uvaʼ bʼaʼnla bʼanoʼm nik motx ibʼaneʼ laʼ qila. Pet tiʼetz uvaʼ taqʼonvil quBʼaal Tiuxh tilix tuchʼ inqʼa nik motx ibʼaneʼ, tul tetxhal laʼ kʼaxbʼisal taʼn quBʼaal Tiuxh, tan ikʼulelxhtuʼ uvaʼ, ech laʼ motx bʼanaxe s-te tiʼ inqʼa kantxhaqla bʼanoʼm nik motx ibʼaneʼ.

Uvaʼs talt Paʼp vikʼaxbʼeʼ, tiʼ uvaʼ iapoostol quBʼaal Jesuus Paʼp

16Tul toq val sete inpaqte uvaʼ yeʼxhkam laʼ etitzʼa s-viʼ, uvaʼ, in yannaʼql inviʼ tiʼ voksat inbʼeeq inqʼij. Atz kʼuxhetz ech uvaʼe nik etitzʼa s-viʼ, pet kotxʼ vaq evatz s-ve tiʼ inqʼa yol uvaʼ nik val sete, eche nik ekotxʼt evatz te inqʼa nik motx tal tibʼ s-apoostol. 17Kametz uvaʼ nik val sete tiʼ voksat inqʼij tuchʼ vintial, tul jit ech uvaʼe tal quBʼaal Jesuus. Pet nik innatxheʼ uvaʼ, inebʼ yannaʼq bʼeeq inviʼ tiʼ voksat inqʼij. 18Tan mamala xaol nik motx toksa iqʼij sexoʼl, tul ech vete jit niman tetz Jesuus nik motx ibʼaneʼ. Echatetz kuxh toq voksat inqʼije tiʼ u vaqʼon. 19Tan vootzaqle uvaʼ toq etabʼi vinyol. Tan aʼ koq yeʼ laʼ etabʼi vinyol, atz nik etabʼi viyol inqʼa kam kuxh yolil nik motx tal sete, inqʼa yeʼ nik ibʼen yol s-te. Tul atetz etxumbʼal nik etaleʼ. 20Ape. Oqetz at etxumbʼal nik etaleʼ, tul keʼchetz nik ekotxʼt evatz tiʼ tabʼileʼ. Tan nik enima inqʼae, kʼuxh ech vete ex taqʼonvil nik ibʼaneʼ. Tul nik kuxh ekotxʼ vet evatz kʼuxh mam etxhbʼuʼm nik ibʼan sexeʼ. Atz nik kuxh ekotxʼ evatz, kʼuxh kam kuxh etetz nik tatxhva, tul nik tiqʼo. Atz nik kuxh ekotxʼ evatz, kʼuxh nik taqʼ bʼen tibʼ s-nim seviʼ. Atz nik kuxh ekotxʼ evatz, kʼuxh nik ikʼaxbʼisa ex tuchʼ yol, eche vaʼq qʼabʼ nik ipoqeʼl tevatz. 21Tul nik ibʼen s-ve uvaʼ jit ech vintxumbʼale uvaʼ qat inbʼan sexoʼl tiʼ tabʼil lotxhbʼal sete; xaʼte nik eteesa inqʼij. Tan tira viqʼo kuʼl vibʼ sexoʼl, tul aʼl chʼixvebʼal qat elkaʼp vet in etaʼn.

Pet inqʼa xaol inqʼae, tan kam tel kuxh s-tiʼil nik toksavataq iqʼij. Tul echat kuxh ine inpaqte. Tan laʼat utxh voksat inqʼij s-tiʼ, kʼuxh ech vete in yannaʼql inviʼ nik innatxheʼ uvaʼs nik voksat inqʼij. 22Niketz toksa inqʼae iqʼij, inqʼa nik tal tibʼ s-apoostol. Niketz motx toksa iqʼij, tiʼ uvaʼ aʼxh u evreeo iyolbʼal. Tan txhabʼamalxh tzaan taʼn. Poro echatetz kuxh ine, tan aʼxh u evreeo inyolbʼal. Tul txhabʼamalatxh tzaan vaʼn. Niketz motx toksa iqʼij, tiʼ uvaʼ tijaq imam Israeel, atz itenam quBʼaal Tiuxh. Poro echatetz kuxh ine, tan inatetz tij imam Israeel, atz in itenam quBʼaal Tiuxh. Niketz motx toksa iqʼij, tiʼ uvaʼ tij imam Avraʼaam, u kʼuy qumam. Poro echatetz kuxh ine, tan inatetz tij imam Avraʼaam, u kʼuy qumam. 23Niketz motx toksa iqʼij, tiʼ uvaʼ bʼanol taqʼon quBʼaal JesuKriisto. Poro echatetz kuxh ine. Tan aʼl sibʼ palnaʼq inqʼa aqʼon qat inbʼan viʼ inqʼa qat motx ibʼana. (Tan nuqxhtuʼ uvaʼ, eche in tira yannaʼq inviʼ tiʼ voksat inqʼij s-vatz.) Poro nuqlaxh yol uvaʼ elomx koq aqʼon inbʼana. Tan elomx koq paqul jaʼ in t-tzeʼ viʼ inqʼae. Tan yeʼl s-atxhel u tzʼuʼm qat vatxhi viʼ inqʼae, tiʼ ipaxsal inqʼa bʼaʼnla txhaq yol tiʼ quBʼaal JesuKriisto. Tul jatpaqx kuxh tetxhxh inyatzʼax el tiʼ ibʼanax u taqʼon quBʼaal JesuKriisto. 24Tul oʼpaqlen atxhimal vinaq bʼelelaval tzʼuʼm vaʼn taʼn inqʼa iqʼesal inqʼa tij imam Israeel, inqʼa yeʼ nik saʼon quBʼaal JesuKriisto. 25Tul oxpaqlen atxhimal txhʼitxhʼ vaʼn taʼn inqʼa aj Rooma. Paqt uvaʼ mamala sivan kʼonil el s-viʼ tiʼ inyatzʼax el. Oxpaqt pal kuʼ vaarko tuul mamaʼ aʼ sinjaqʼ. Tul inpaquletz uvaʼ atich kuxh vet in viʼ mamaʼ aʼ tuulbʼal vaʼl qʼij tuchʼ invaʼt aqʼbʼal, tul maʼtich ipal vet kuʼ u vaarko jaqʼ u mamaʼ aʼ. 26Tan tal kuxh bʼey qat motx palk in. Tul at uvaʼ bʼiitxhaqt kuxh yeʼ nikich inkam ka xeʼ mamaʼ xaomla aʼ. Atz at bʼiitxhaqt kuxh yeʼ nikich vok tiqʼabʼ elqʼom. Atz nima paqul kuxh nikich inpal titzaʼlal taʼn inqʼa inmol s-aj tenamil. Atz nima paqul kuxh nikich inpal titzaʼlal taʼn inqʼa jit tij imam Israeel. Atz nima paqul kuxh nikich inpal titzaʼlal taʼn inqʼa mam tenam tal uvaʼ nikich palk in. Atz nima paqul kuxh nikich inpal titzaʼlal t-inqʼa vitz, uvaʼ yeʼl xaol s-tuul, tal uvaʼ nikich palk in. Atz kam kuxh itzaʼlal palk in viʼ mamaʼ aʼ. Atz nima paqul kuxh pal in titzaʼlal taʼn inqʼa nik motx tal tibʼ s-niman tetz Jesuus. 27Tul qat inbʼutxhl vibʼ, atz qat uqliy in t-aqʼon tiʼ itxhokox inpuaq, tiʼ kam uvaʼ nik isaʼon s-ve tiʼ ipaxsal inqʼa bʼaʼnla txhaq yol. Atz at yeʼ nikich invateʼ. Atz nima paqt uvaʼ kamyichxh in t-vaʼy, atz kamyxh in t-tzaqa tziʼil. Atz nima paqt uvaʼ mij nikich tutxh intxʼaʼoneʼ. Atz at uvaʼ bʼeeno nikich vel taʼn txheʼv. Atz at uvaʼ yeʼlich vet voksaʼm tetz chʼexpubʼ vibʼ.

28Tul jitetz kuxh taʼne uvaʼ nik val sete. Pet jun qʼij vitzʼat inqʼa qumol s-niman tetz Jesuus, kam yaʼelaqe, jankʼale inqʼa niman tetz Jesuus, inqʼa nik imol tibʼ t-inqʼa tenam. 29Tan oq jaʼl invaʼq qumol s-niman tetz Jesuus nik tuqleʼ, tul inat vet nik vuqleʼ nik innatxheʼ. Atzoq nik vabʼi uvaʼ nik itxhokox ikuʼ invaʼq qumol s-niman tetz Jesuus t-paʼv, tul tira nik ilakp inviʼ, tiʼ uvaʼ nik txhokon ikuʼ vimol t-paʼv.

30Tiʼetz inqʼa nik eesan inqʼij, tul nik innatxheʼ uvaʼ ikʼulel laʼ voksa tel inqʼij. Aloq jit aʼ laʼ voksavat inqʼij, tiʼ uvaʼ, in nik txʼolon ibʼanaxeʼ. Pet aʼ nik voksavat inqʼij tiʼ jabʼiste uvaʼ yeʼ nik intxʼoleʼ. 31Tul tootzaql u quBʼaal Tiuxh, viBʼaal u quBʼaal Jesuus, uvaʼ jit tzʼeqo tzij nik inbʼaneʼ. Tul laʼ oksal iqʼij quBʼaal Tiuxh tinjattanulxh yaʼbʼ uvaʼ yaʼn tuleʼ.

32Tan ech inbʼane paqul uvaʼs atich in tu tenam Damaasko. Tan maʼtich ikuʼ vet yol s-viʼ taʼn val u nimla iqʼesal tuulbʼal inqʼa tenam inqʼae, tul laʼich txeyp in taʼn sol. Tan nikich inpaxsa paʼl inqʼa bʼaʼnla txhaq yol tuulbʼal Damaasko. Aʼetz u nimla iqʼesal bʼekʼon intxeypeʼ uvaʼ oksal siqʼesal taʼn Areetas, u mam iqʼesal. 33Poro yeʼletzxh in txeyp in, tan aʼl aqʼax kuʼ in tuul val u mamaʼ xuʼk taʼn inqʼa niman tetz Jesuus. Tul aʼ aqʼaxik eluʼl in t-val vixotoʼlil otzotz uvaʼ atich jaʼ viʼ u tzʼach uvaʼ sutimalich ok tiʼ u tenam Damaasko. Tul sibʼ atich jaʼ u tzʼach. Echetz txhaqtan vaqʼaxich vet kuʼl tiʼ iqul u tzʼach. Yeʼletz viqʼesal oleʼv tiʼ intxeypeʼ. Echetz chʼixvebʼal vel vet el tu tenam uvaʼe.#Vibʼanoʼm inqʼa Apoostol 9.23-25

Currently Selected:

2 Koriintios 11: ixlC

Highlight

Copy

Compare