1 Tesaloniseenses ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
1 TESALONISEENSES
Uvaʼs toq qootzaqitaʼ jaʼl tzʼibʼan u uʼ 1 Tesaloniseenses
Aʼetz u uʼe uvaʼ 1 Tesaloniseenses ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu 1 Tesaloniseenses 1.1. Tul ant Timoteeo tuchʼ Siilas nik toksa tzaan Paʼp s-tuul tiʼ vilotxhox tiʼ ipaxsal viyolbʼal quBʼaal Tiuxh.
Uvaʼs toq qootzaqitaʼ kam s-tuul tzʼibʼal u uʼ 1 Tesaloniseenses
Aʼetz itzʼibʼat Paʼp u uʼ 1 Tesaloniseenses tu yaʼbʼ laval toxkʼal (50) m.t.J., atz maq tu yaʼbʼ junlaval toxkʼal (51) m.t.J. Tan kamal aʼ taqʼbʼ Paʼp tu tenam Koriinto t-vimotxebʼal u yaʼbʼ laval toxkʼal (50), atz maq aʼ taqʼbʼ Paʼp t-vixeʼtebʼal u yaʼbʼ junlaval toxkʼal (51). Echetz nik ibʼene s-qe uvaʼ, aʼ itzʼibʼavat Paʼp u tuʼ tu tenam Koriinto.
Tul atetz vaʼt uvaʼ nik bʼensan s-qe. Tan ikaʼpaqichetz vet tex Paʼp tiʼ ipaxsal inqʼa bʼaʼnla txhaq yol tiʼ Jesuus, tul yekich vet tu tenam Tesaloonika tuulbʼal Masedoonia s-bʼaxaxhtuʼ. Tul ex ipaxsa vet Paʼp inqʼa bʼaʼnla txhaq yol tiʼ Jesuus tzitzi. Ech uvaʼe nik tal t-Vibʼanoʼm inqʼa Apoostol 17.1-10. Tul tzitzietz taqʼbʼ vet viyolbʼal quBʼaal Tiuxh tu tenam Tesaloonika. Pet ojqeʼlamal tel tzaan Paʼp tu tenam Tesaloonika, tan tira yeʼ nikich isaʼax vet taʼn inqʼa tij imam Israeel. Aʼetz yekich vet Paʼp tu tenam Bereea. Poro aqʼbʼal aqʼbʼ vet Paʼp tzitzi. Ech uvaʼe nik tal t-Vibʼanoʼm inqʼa Apoostol 17.10.
Uvaʼs toq qootzaqitaʼ kame u taqʼil vitxhusun Paʼp tuul u tuʼ 1 Tesaloniseenses
Aʼetz taqʼil viyol Paʼp tal te inqʼa niman tetz Jesuus, tiʼ uvaʼ tira nikich ichiibʼ Paʼp tiʼ tok jolol inqʼa aj Tesaloonika s-niman tetz Jesuus, kʼuxh tira nikich itxhiʼkʼuulal Paʼp taʼn jolt inqʼa tij imam Israeel tetxhal tojqeʼlal el tu tenam Tesaloonika.
Atz nikat taqʼ Paʼp itial inqʼa aj Tesaloonika, tiʼ uvaʼ aʼxh laʼ motx ibʼan jankʼal uvaʼ itxhus Paʼp s-te tiʼ inimal inqʼa bʼaʼnla txhaq yol tiʼ Jesuus.
Atz nikat itxhus Paʼp te inqʼa aj Tesaloonika, tiʼ uvaʼ tetxhal laʼ itzʼeʼv inqʼa niman tetz Jesuus inpaqte, inqʼa maʼt ikameʼ tuulbʼal uvaʼs yeʼxnaq uloq u quBʼaal Jesuus.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 1 Tesaloniseenses
U uʼ 1 Tesaloniseenses uvaʼ itzʼibʼa ka Paʼp, tan oʼvaʼlen tanul elnaʼq inqʼa yol uvaʼ nik tal s-tuul.
1 Tesaloniseenses 1.1
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus tu tenam Tesaloonika tuubʼal Masedoonia tuulbʼal Greesia.
1. 1 Tesaloniseenses 1.2-10
U bʼaxa tanul yol, tan aʼ tal Paʼp, tiʼ uvaʼ nik taqʼ Paʼp taʼntiuxh te Tiuxh, tiʼ uvaʼs motx tok vet jolol inqʼa aj Tesaloonika tiʼ inimal inqʼa bʼaʼnla txhaq yol tiʼ Jesuus. Tul tira ataqichxh vet taanima tiʼ quBʼaal Tiuxh, tul txʼebʼoʼmaq kuxh vet al tiʼ tul u quBʼaal Jesuus inpaqte.
Tul tulsa Paʼp s-kʼuul inqʼa aj Tesaloonika kamiche inqʼa tatineʼ uvaʼs motx tok tiʼ viyolbʼal quBʼaal Tiuxh s-bʼaxa. Tan mam txhiʼanchil kʼuul motx ibʼan jolt inqʼa tij imam Israeel tiʼ Paʼp, atz tiʼ Siilas. Tan mamala xaol motx ok vet tiʼ inimal inqʼa bʼaʼnla txhaq yol tiʼ Jesuus. Echetz s-tiʼile xeʼt vet jolt inqʼa tij imam Israeel tiʼ itxhaqtziil jolt inqʼa xaol tiʼ ivavul Paʼp tuchʼ Siilas. Ech uvaʼe nik tal t-Vibʼanoʼm inqʼa Apoostol 17.1-9.
Kʼuxhetz mam vavu ibʼ ibʼan inqʼa xaol, poro yeʼ itanbʼa inqʼa niman tetz Jesuus iqeex inqʼa bʼaʼnla txhaq yol tiʼ Jesuus. Kʼuxhetz maʼtich tel vet s-kaʼoxvaʼl yaʼbʼ ipal inqʼa vavu ibʼ, poro oqxhich ichiibʼ Paʼp tiʼ uvaʼ antxh nimamalich u quBʼaal Jesuus taʼn inqʼa aj Tesaloonika. Tul nik tal Paʼp uvaʼ tira nik itxuqʼtxuneʼ, tiʼ uvaʼ txʼebʼoʼmich al inqʼa aj Tesaloonika tiʼ u tul quBʼaal Jesuus inpaqte, uvaʼ toq tzaoq t-amlikaʼ, viKʼaol quBʼaal Tiuxh uvaʼ itzʼeʼv inpaqte. Tul aʼ uvaʼe, laʼ kolon inqʼa aj Tesaloonika vatz u kʼaxbʼichil uvaʼ laʼ taqʼ quBʼaal Tiuxh tiibʼa inqʼa aj paʼvom.
2. 1 Tesaloniseenses 2.1—3.13
Vikaʼv tanul yol, tan aʼ tal Paʼp, tiʼ vikaʼpaqut talax kame uvaʼ ibʼan tiʼ talax viyolbʼal quBʼaal Tiuxh xoʼl inqʼa aj Tesaloonika. Kʼuxhetz mam vavu ibʼ ibʼan inqʼa xaol tiʼ u yol, poro yeʼl Paʼp xoʼv s-te. Tan aʼl ex taqʼt ivatz kam uvaʼ ibʼan Paʼp, tan mamala xaol motx ok vet s-niman tetz Jesuus tiʼ tabʼit inqʼa bʼaʼnla txhaq yol. Tul ikʼutxh Paʼp uvaʼ tira at taanima tiʼ inqʼa motx ok vet s-niman tetz Jesuus, eche vaʼq bʼaala uvaʼ tira at taanima tiʼ kʼaol imeʼal. Kʼuxhetz bʼaʼnichxh tatin Paʼp tuchʼ inqʼa niman tetz Jesuus, tan tetxhal kuxh ojqeʼlal bʼen Paʼp tuchʼ Siilas taʼn jolt inqʼa tij imam Israeel, atz taʼn jolt inqʼa xaol, inqʼa txhaqtziil taʼn inqʼa tij imam Israeel.
Kʼuxhetz ojqeʼlal el Paʼp xoʼl inqʼa niman tetz Jesuus, poro eletz vet s-qʼij, tul itxhok vet Paʼp txumbʼal tiʼ iqʼaʼv paqte xoʼl inqʼa niman tetz Jesuus, inqʼa jeqlich tu tenam Tesaloonika. Poro yeʼ nikich tutxh vet iqʼaʼv Paʼp. Echetz s-tiʼile aʼ vet Timoteeo itxhaq bʼen Paʼp tiʼ taqʼax itial inqʼa niman tetz Jesuus tzitzi, atz tiʼ tilixeʼ kam yaʼelaqiche. Tul aʼl tel ex itxhust Timoteeo viyolbʼal quBʼaal Tiuxh te inqʼa niman tetz Jesuus.
Yaʼne qʼaʼv vet Timoteeo inpaqte kʼatz Paʼp. Tul mam chiibʼichil ibʼan vet Paʼp, tan tabʼi vet Paʼp talt Timoteeo uvaʼ aʼlxh nikich tiqʼot inqʼa aj Tesaloonika iyakʼil tiʼ inimal viyolbʼal quBʼaal Tiuxh. Aʼetz uvaʼe, itzʼibʼa bʼen Paʼp tiʼ tulsat inqʼa niman tetz Jesuus s-kʼuul kame uvaʼ palk Paʼp s-bʼaxa xoʼl inqʼa aj Tesaloonika.
Yaʼne nik taqʼ Paʼp itial inqʼa niman tetz Jesuus uvaʼs nik iyaʼ Paʼp tiʼ talax intanul viyol. Tan aʼ nik tal Paʼp uvaʼ, aʼ u quBʼaal Tiuxh tuchʼ u quBʼaal Jesuus laʼ iqʼon ibʼey, tul laʼ aqʼbʼ xoʼl inqʼa niman tetz Jesuus tzitzi. Tul quBʼaal Tiuxh laʼ bʼanon, tul aʼl tel laʼ motx isaʼt tibʼ inqʼa niman tetz Jesuus s-vatzaq. Atz laʼ motx isaʼ jolt inqʼa xaol, eche uvaʼ, ex ikʼutxh Paʼp s-vatz uvaʼ tira at taanima tiʼ inqʼa niman tetz Jesuus. Tul quBʼaal Tiuxh laʼ aqʼon iyakʼil tiʼ inimal viyolbʼal. Tul yeʼl yol laʼ txhej s-tiʼ, tan nik ijetxheʼl tibʼ kʼatz u paʼv, tetxhal topoon u tulebʼal quBʼaal Jesuus inpaqte.
3. 1 Tesaloniseenses 4.1-12
Vitoxv tanul yol, tan aʼ tal Paʼp tiʼ u taqʼt itxumbʼal inqʼa niman tetz Jesuus tu tenam Tesaloonika, tiʼ uvaʼ jikxh laʼ motx tiqʼot viyolbʼal quBʼaal Tiuxh tinuqul. Tul antxh laʼ ibʼan kam uvaʼ itxhus Paʼp s-te tuchʼ Siilas, atz tuchʼ Timoteeo s-bʼaxa. Tan aʼ uvaʼe, ibʼekʼ ka u quBʼaal Jesuus s-te tiʼ tiqʼol viyolbʼal quBʼaal Tiuxh s-bʼaʼn. Tan aʼ titzʼabʼal quBʼaal Tiuxh, s-tiʼ uvaʼ laʼ ijetxheʼl tibʼ kʼatz u paʼv. Tul aʼ laʼ ijetxhvataq ok tibʼ kʼatz quBʼaal Tiuxh. Echetz mamala tel txumbʼal nik tal quBʼaal Tiuxh te inqʼa niman tetz.
4. 1 Tesaloniseenses 4.13—5.11
Vikajv tanul yol, tan aʼ tal Paʼp tiʼ u tulebʼal u quBʼaal Jesuus inpaqte. Tan yeʼnaqich bʼenoqaq s-te s-bʼaʼn tiʼ u tulebʼal quBʼaal Jesuus inpaqte. Echetz s-tiʼile tal Paʼp uvaʼ jit jutxich yol koq laʼ iqʼaʼv u quBʼaal Jesuus inpaqte, pet laʼ tal quBʼaal Tiuxh toqʼsal trompeeta te val u aanxel tiʼ talax u tulebʼal u quBʼaal Jesuus. Tul mam yol laʼ ibʼana uvaʼs laʼ tel tzaan tu amlikaʼ. Pet vatz inqʼa jit niman tetz Jesuus, inqʼa yeʼxhkam bʼeeq nik titzʼa tiʼ itxʼebʼoneʼ, tan yeʼxhkam inatxhbʼe u qʼij uvaʼs laʼ tul u quBʼaal Jesuus.
Echetz s-tiʼile tal bʼen Paʼp te inqʼa niman tetz Jesuus uvaʼ laʼ motx taqʼ tibʼ itial s-vatzaq tiʼ itxʼebʼon tiʼ u tulebʼal quBʼaal Jesuus inpaqte. Echetz uvaʼe tal Paʼp tiʼ iyaʼ tiʼ talax vikajv tan iyol.
5. 1 Tesaloniseenses 5.12-24
Vitoʼv tanul yol, tan aʼ tal Paʼp, tiʼ uvaʼ nima tel kuxh txumbʼal nik tal Paʼp te inqʼa niman tetz Jesuus. Tan nik tal Paʼp uvaʼ laʼ motx taqʼ inqʼa niman tetz Jesuus itial inqʼa iqʼon iviʼ s-xoʼl. Tul nik tal Paʼp paqte uvaʼ yeʼ laʼ motx itanbʼa taqʼonv tiʼ itxʼebʼex tul u quBʼaal Jesuus. Tul yeʼ laʼ motx itanbʼa inatxhkʼuulal quBʼaal Tiuxh. Tul yeʼ laʼ imaq taqʼonv viTiuxhil Tiuxh s-kʼatza. Tul yeʼ laʼ teesa iqʼij inqʼa yol uvaʼ nik tal inqʼa alol tetz viyolbʼal quBʼaal Tiuxh s-xoʼl taʼn viTiuxhil Tiuxh.
Tul nikat taqʼ bʼen Paʼp itial inqʼa niman tetz Jesuus tuchʼ inqʼa iyol uvaʼ antxh quBʼaal Tiuxh laʼ bʼanon, tul laʼ ijetxhoʼk tibʼ s-kʼatza, tul tetxhal itzʼeq opoon vijalput tatin s-vatz. Tan quBʼaal Tiuxh nik saʼon uvaʼ bʼaʼn laʼ tatinaq tuchʼ quBʼaal Tiuxh.
1 Tesaloniseenses 5.25-28
Tiyaʼebʼaletz veteʼ, tul nik taqʼ bʼen Paʼp bʼaʼnil ikʼuul inqʼa niman tetz Jesuus. Tul nik tal bʼen Paʼp bʼaʼnla yol s-tiʼ.
Currently Selected:
1 Tesaloniseenses ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.