1 Tesaloniseenses 5

1Poro toq val sete, ex qumol niman tetz Jesuus, eche tiʼ inqʼa qʼij uvaʼ jatu laʼ ul u quBʼaal JesuKriisto inpaqte, tan jiten laʼ qutzʼibʼa vet bʼen sete. 2Tan etootzaql vet s-bʼaʼn uvaʼ tetxhal toq opoonoq vet viqʼiilil u quBʼaal Tiuxh, tul yeʼ kuxh taqla laʼ ul u quBʼaal Jesuus tiibʼa inqʼa jit niman tetz, eche laʼ tul invaʼq elqʼom s-aqʼbʼal.{*}#5.2 ¿Kam s-tiʼil nik tal u versiikulo uvaʼa, uvaʼ eche vaʼq elqʼom laʼ tul u quBʼaal Jesuus? Niketz kuxh ikʼam u yol elqʼom tiʼ uvaʼ yeʼ kuxh taqla laʼ ul u quBʼaal Jesuus vatz inqʼa jit niman tetz, tan yeʼxhkam nik itxʼebʼon tiʼ tuleʼ. Pet inqʼa nik itxʼebʼon tiʼ tuleʼ, tan jit ech koqe elqʼom toq tul s-vatz. 3Tan tuulbʼal uvaʼs ech laʼ tal inqʼa xaol, inqʼa jit niman tetz Jesuus s-vatzaq s-eche: —Il oʼ at oʼ tibʼaʼnil. Atz il oʼ txhabʼamal qatineʼ, —chaq inqʼa xaol, tul ajt kuxh laʼ tabʼi inqʼa xaol topoon u sotzchil s-tiibʼa. Tan yeʼ kuxh taqla laʼ opoon viqʼiil vikʼaxbʼisal inqʼa xaol, eche tok invaʼq u ixoq vatz itxhoʼm uvaʼ oybʼalt veteʼ. Tul yeʼl paqul laʼ oleʼv inqʼa jit niman tetz Jesuus tiʼ teleʼl vatz u kʼaxkʼo.

4Petetz ex inqʼa qumol s-niman tetz Jesuus, tan etootzaql veteʼ uvaʼ toqxh uloq u quBʼaal Jesuus. Tan jit vet ech etatin, eche vaʼq xaol uvaʼ at bʼen tu tokto. Atz jit uvaʼ yeʼ koq kuxh taqla laʼ ul sevatz, eche tul elqʼom. 5Tan jankʼalxh ex, ex vet kʼaol imeʼal quBʼaal Tiuxh, tan etootzaql veteʼ uvaʼ laʼ ul u quBʼaal JesuKriisto, xaʼtetze txʼebʼoʼmy ex s-tiʼ. Tan ech tatin vetootzaqibʼal eche u txiqubʼal, atz tuchʼ, eche qʼiil. Pet jit ech koq vet vetootzaqibʼal eche inqʼa xaol, inqʼa jit niman tetz Jesuus, tan yeʼxhkam nik itxʼebʼoneʼ. Tan eche tokto, atz eche aqʼbʼal atil bʼen tuchʼ inqʼa titzʼabʼal. 6Echetz yeʼ qusotzsa s-qukʼuul u tulebʼal quBʼaal Jesuus, eche nik ibʼan inqʼa xaol, inqʼa jit niman tetz Jesuus. Atz yeʼ qubʼan, eche nik ibʼan inqʼa xaol inqʼa yeʼxhkam kuxh nik titzʼa, inqʼa eche vataʼm bʼanel taʼn. Pet txʼebʼoʼmoq al oʼ tiʼ tul u quBʼaal Jesuus, tul itzʼamoqxh qatineʼ. 7Pet jit kuxh ech laʼ qubʼan, eche xaol, inqʼa sotznaʼql ikʼuul taʼn vataʼm s-aqʼbʼal. Atz jit kuxh ech laʼ qubʼan, eche inqʼa nik iqʼabʼan s-aqʼbʼal, tan sotznaʼq kuxh ikʼuul. Tan nikoq inatxh veteʼ kam nik tutxheʼ.

8Pet oʼ inqʼa niman tetz Jesuus, oʼ inqʼa ech vet u qootzaqibʼal, eche qʼiil, tan itzʼamoqxh qatineʼ. Atz kʼuqloqxh qukʼuul tiʼ quBʼaal Jesuus. Atz qusaʼvaqxh qibʼ s-quvatzaqil. Oqetz ech nik qubʼane, tul eelaetz vet oʼ tuchʼ invaʼq sol uvaʼ nik ikol tziʼ taanima, atz u tiʼ iqul tuchʼ u kolbʼal tibʼ. Tul jitetz kuxh taʼne, pet txʼebʼoʼmoq al oʼ tiʼ ul teesat el oʼ u quBʼaal Jesuus vatz u txʼavaʼ, tul laʼ ichit oʼ t-inqʼa kantxhaq vatz txʼavaʼ. Eelaetz vet oʼe tuchʼ invaʼq sol uvaʼ nik ikol iviʼ tuchʼ u kolbʼal iviʼ.{*}#5.8 Aʼ u yol ‹ul teesa oʼ› kaʼvaʼlen nik elkaʼpun. Tan vaʼle, uvaʼ nik tal, tiʼ uvaʼ laʼ ul eesaloq el oʼ vatz u txumlebʼalla atinchil tzitza vatz txʼavaʼ. Pet vaʼtetz telaʼpun, uvaʼ laʼ ikol oʼ vatz inqʼa kʼaxbʼichil tiʼ inqʼa qupaʼv.

9Tan aʼ titzʼabʼal quBʼaal Tiuxh s-qiʼ uvaʼ, aʼ u qunimat u quBʼaal Jesuus laʼ kolon oʼ vatz u kʼaxbʼichil. Pet jit aʼ titzʼabʼal quBʼaal Tiuxh s-qiʼ uvaʼ laʼ pal oʼ tu kʼaxbʼichil. 10Tan aʼ u quBʼaal Jesuus qat kam s-qiʼ, tiʼ uvaʼ vaʼl kuxh vet laʼ qatin s-tuchʼ. Tan kʼuxh maʼt qukameʼ laʼ uli, atz maq ant itzʼlel oʼ uvaʼs laʼ tul quBʼaal Jesuus inpaqte, tan vaʼl kuxh vet laʼ qatin s-tuchʼ. 11Echetz taqʼvaq tibʼ etial sevatzaq, atz lotxhvaq etibʼ sevatzaq tiʼ echʼij kʼatz quBʼaal Tiuxh, eche uvaʼ nikxh motx ebʼaneʼ.

Uvaʼs talt opoon Paʼp nima vatzul inqʼa bʼekʼoʼm te inqʼa niman tetz Jesuus tu tenam Tesaloonika

12Niketz qujaq bʼaʼnil sete, ex inqʼa qumol s-niman tetz Jesuus, uvaʼ laʼ eqej inqʼa nik taqʼ yaʼl tiʼ taqʼonv tiʼ viyolbʼal quBʼaal Tiuxh sexoʼl, inqʼa at tiqleʼm, tul nik toksa ex t-bʼey. 13Tul tij laʼ motx etila, tan nik taqʼonv sexoʼl. Atz atoq etaanima s-tiʼ. Tul tibʼaʼnil laʼ atink ex sevatzaqil.

14Atz nikat qujaq bʼaʼnil sete, ex qumol s-niman tetz Jesuus, uvaʼ laʼ motx etoksa inqʼa emol s-niman tetz Jesuus t-bʼey, inqʼa yeʼ isaʼ aqʼon. Atz laʼat motx etaqʼ kʼuqlebʼal ikʼuul inqʼa yeʼx itial tiʼ viyolbʼal quBʼaal Tiuxh. Atz laʼat motx elotxh inqʼa kaʼl kuxh ikʼuul. Tul yeʼl ex laʼ pal ekʼuul tiʼ etatin xoʼl kaqaayil inqʼa emol s-niman tetz Jesuus.

15Tul yeʼ laʼ ebʼana uvaʼ laʼ etaqʼ ichʼexel u yeʼbʼaʼn tiʼ vemol uvaʼ laʼ bʼanon u yeʼbʼaʼn sete. Pet yeʼl ex laʼ yaʼ ex tiʼ ibʼanax u bʼaʼn sevatzaqil, ex niman tetz Jesuus. Atz yeʼ laʼ yaʼ ex tiʼ ibʼanax u bʼaʼn te inqʼa xaol s-kaqaayil.

16Pet chiibʼoq kuxh ex bʼenamen. 17Tul yeʼ laʼ etanbʼa inatxhax Tiuxh. 18Tul aqʼvaq taʼntiuxh te quBʼaal Tiuxh tiʼ jankʼal uvaʼ laʼ pal ex s-tuul. Tan ech u titzʼabʼal quBʼaal Tiuxhe setiʼ, tiʼ uvaʼ at vet etatin tuchʼ u quBʼaal JesuKriisto. 19Tul yeʼ laʼ emaq ibʼant viTiuxhil Tiuxh u taqʼon sekʼatza, tul jit ech laʼ ebʼan, eche itzajsal invaʼq xamal. 20Tul yeʼ laʼ eteesa iqʼij inqʼa yol uvaʼ nik iqʼexsa inqʼa alol tetz viyol quBʼaal Tiuxh sexoʼl taʼn viTiuxhil Tiuxh. 21Pet bʼaxa laʼ etabʼi inuqul inqʼa yol uvaʼ laʼ alax sexoʼl, tul aʼ laʼ ebʼanbʼe jabʼiste u bʼaʼn. 22Pet yeʼ laʼ eqea, oq yeʼbʼaʼn u yol.

23Tul aʼ quBʼaal Tiuxh toq bʼanon, tul laʼ itxʼaj ex tuul jankʼal inqʼa epaʼv txhaqpaq, u quBʼaal Tiuxh uvaʼ, aʼe u taqʼil u bʼaʼnil tu qaanima. Tul yeʼl ex laʼ paʼvin ex vatz quBʼaal Tiuxh, kʼuxh kamxh paʼvil, kʼuxh tiʼ kam uvaʼ laʼ etitzʼa tetitzʼabʼal, atz kʼuxh tiʼ kam uvaʼ laʼ etatxhva tuchʼ vetaanima, atz kʼuxh tiʼ kam uvaʼ laʼ ebʼan tuchʼ vetxhiʼoʼl, tan yeʼ laʼ utxhi laʼ paʼvin ex s-tuchʼ. Echetz yeʼ laʼ itxhej yole setiʼ uvaʼ kantxhaq, tetxhal topoon u tulebʼal quBʼaal JesuKriisto inpaqte. 24Tan kʼuqlebʼxh kʼuul u quBʼaal Tiuxh uvaʼ qat saʼon tzaan ex tiʼ ebʼen sitenam. Tul tira toq ibʼaneʼ kam uvaʼ alel taʼn.

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Tesaloonika, tul yaʼ vet tiʼ itzʼibʼal bʼen viyol

25Niketz injaq bʼaʼnil sete, ex qumol s-niman tetz Jesuus, natxhvaq Tiuxh s-qiʼ. 26Tul taqʼvaq tibʼ bʼaʼnil ekʼuul sevatzaqil, tul itzʼubʼvaq tibʼ txala etziʼ, ex inqʼa niman tetz Jesuus.{*}#5.26 Kʼuxh nik tal u versiikulo tiʼ vitzʼubʼt tibʼ txala itziʼ inqʼa niman tetz Jesuus tan ech uvaʼe nikich motx tutxh tiʼ ikʼutxhux u bʼaʼnil xoʼl inqʼa niman tetz Jesuus tzitzi. Pet aloq jit tetxhal koq laʼ itzʼubʼ tibʼ itziʼ inqʼa niman tetz Jesuus, jankʼal inqʼa talaq kuxh atila. Tan jitaq eela inqʼa nik motx ibʼanax t-junun tenam tiʼ ikʼutxhtaq inqʼa niman tetz Jesuus u bʼaʼnil s-vatzaq. 27Tul toq inbʼan yaʼl sete, vatz u quBʼaal Jesuus, uvaʼ laʼ sikʼlel u uʼ uvaʼa xoʼl jankʼal inqʼa niman tetz Jesuus tzitzi. 28Tul aʼ vibʼaʼnil u quBʼaal JesuKriisto laʼ atin sexoʼl sekaqaayil.

[Tul echxh laʼ ibʼane.]

Currently Selected:

1 Tesaloniseenses 5: ixlC

Highlight

Copy

Compare