Popular Bible Verses from 1 Tesaloniseenses 5

Share

Pet chiibʼoq kuxh ex bʼenamen. Tul yeʼ laʼ etanbʼa inatxhax Tiuxh. Tul aqʼvaq taʼntiuxh te quBʼaal Tiuxh tiʼ jankʼal uvaʼ laʼ pal ex s-tuul. Tan ech u titzʼabʼal quBʼaal Tiuxhe setiʼ, tiʼ uvaʼ at vet etatin tuchʼ u quBʼaal JesuKriisto.

Tul aʼ quBʼaal Tiuxh toq bʼanon, tul laʼ itxʼaj ex tuul jankʼal inqʼa epaʼv txhaqpaq, u quBʼaal Tiuxh uvaʼ, aʼe u taqʼil u bʼaʼnil tu qaanima. Tul yeʼl ex laʼ paʼvin ex vatz quBʼaal Tiuxh, kʼuxh kamxh paʼvil, kʼuxh tiʼ kam uvaʼ laʼ etitzʼa tetitzʼabʼal, atz kʼuxh tiʼ kam uvaʼ laʼ etatxhva tuchʼ vetaanima, atz kʼuxh tiʼ kam uvaʼ laʼ ebʼan tuchʼ vetxhiʼoʼl, tan yeʼ laʼ utxhi laʼ paʼvin ex s-tuchʼ. Echetz yeʼ laʼ itxhej yole setiʼ uvaʼ kantxhaq, tetxhal topoon u tulebʼal quBʼaal JesuKriisto inpaqte. Tan kʼuqlebʼxh kʼuul u quBʼaal Tiuxh uvaʼ qat saʼon tzaan ex tiʼ ebʼen sitenam. Tul tira toq ibʼaneʼ kam uvaʼ alel taʼn.

Tul yeʼ laʼ ebʼana uvaʼ laʼ etaqʼ ichʼexel u yeʼbʼaʼn tiʼ vemol uvaʼ laʼ bʼanon u yeʼbʼaʼn sete. Pet yeʼl ex laʼ yaʼ ex tiʼ ibʼanax u bʼaʼn sevatzaqil, ex niman tetz Jesuus. Atz yeʼ laʼ yaʼ ex tiʼ ibʼanax u bʼaʼn te inqʼa xaol s-kaqaayil.

Echetz taqʼvaq tibʼ etial sevatzaq, atz lotxhvaq etibʼ sevatzaq tiʼ echʼij kʼatz quBʼaal Tiuxh, eche uvaʼ nikxh motx ebʼaneʼ.

Atz nikat qujaq bʼaʼnil sete, ex qumol s-niman tetz Jesuus, uvaʼ laʼ motx etoksa inqʼa emol s-niman tetz Jesuus t-bʼey, inqʼa yeʼ isaʼ aqʼon. Atz laʼat motx etaqʼ kʼuqlebʼal ikʼuul inqʼa yeʼx itial tiʼ viyolbʼal quBʼaal Tiuxh. Atz laʼat motx elotxh inqʼa kaʼl kuxh ikʼuul. Tul yeʼl ex laʼ pal ekʼuul tiʼ etatin xoʼl kaqaayil inqʼa emol s-niman tetz Jesuus.

Tan aʼ titzʼabʼal quBʼaal Tiuxh s-qiʼ uvaʼ, aʼ u qunimat u quBʼaal Jesuus laʼ kolon oʼ vatz u kʼaxbʼichil. Pet jit aʼ titzʼabʼal quBʼaal Tiuxh s-qiʼ uvaʼ laʼ pal oʼ tu kʼaxbʼichil.

Tan jankʼalxh ex, ex vet kʼaol imeʼal quBʼaal Tiuxh, tan etootzaql veteʼ uvaʼ laʼ ul u quBʼaal JesuKriisto, xaʼtetze txʼebʼoʼmy ex s-tiʼ. Tan ech tatin vetootzaqibʼal eche u txiqubʼal, atz tuchʼ, eche qʼiil. Pet jit ech koq vet vetootzaqibʼal eche inqʼa xaol, inqʼa jit niman tetz Jesuus, tan yeʼxhkam nik itxʼebʼoneʼ. Tan eche tokto, atz eche aqʼbʼal atil bʼen tuchʼ inqʼa titzʼabʼal.