1 Tesaloniseenses 3
3
1Poro tzʼeʼyichetzxh vet oʼ tiʼ qubʼen sexoʼl, tul yeʼxh utxhi. Pet kaj kuxh vet oʼ tu tenam Ateenas.#Vibʼanoʼm inqʼa Apoostol 17.15 2Pet aʼ vet Timoteeo qutxhaq bʼen tiʼ taqʼax etial, atz tiʼ ikʼuqbʼal ekʼuul tiʼ inimal quBʼaal JesuKriisto. Tan qumol Timoteeo s-niman tetz Jesuus; atz qumol tiʼ ipaxsal inqʼa bʼaʼnla txhaq yol tiʼ quBʼaal JesuKriisto. 3Echetz ibʼen vet Timoteeoe sexoʼl, tiʼ uvaʼ yeʼl ex laʼ itzʼan ex tiʼ inqʼa itzaʼlal nik palk ex. Aloq etootzaq s-bʼaʼn uvaʼ kʼaqel kuxh qibʼ kʼuxh laʼ pal oʼ t-inqʼa itzaʼlal. 4Tan tuulbʼal uvaʼs atich oʼ sexoʼl, tul yek nikich qaqʼ etootzaqi txhaqpaq, tiʼ uvaʼ tetxhal kuxh laʼich pal oʼ t-kʼaxkʼo tiʼ inimal u quBʼaal JesuKriisto. Tul echxh uvaʼe qat ibʼane, tan etootzaqle. 5Echetz s-tiʼile tul tzʼeʼyichxh vet in tiʼ tootzaqileʼ kam yaʼelich ex tiʼ inimal u quBʼaal JesuKriisto. Xaʼtetze intxhaq vet bʼen Timoteeo tiʼ bʼen tabʼitaʼ kam yaʼel ex tiʼ venimat u quBʼaal JesuKriisto. Tan aʼ nikich inxoʼva toleʼv u yaabʼla eesanal t-bʼey setiʼ, uvaʼ nik txhokon ikuʼ inqʼa xaol t-paʼv. Tan avoqe laʼ tetxhbʼu ekuʼ t-paʼv tiʼ etanbʼat inimal u quBʼaal JesuKriisto. Tan oq laʼ oleʼv u eesanal t-bʼey setiʼ, tul yeʼxhkametz vet itxaʼke inqʼa qaqʼon uvaʼ ex quyaʼlu ibʼanax sexoʼl.
Uvaʼs ichiibʼ Paʼp tiʼ u bʼaʼnla yol uvaʼ tabʼi tiʼ inqʼa niman tetz Jesuus uvaʼs tex Timoteeo s-xoʼl
6Pet eletz vet tzaan Timoteeo sexoʼl, tul ul tal vet Timoteeo bʼaʼnla yol s-qe setiʼ, tiʼ venimat u quBʼaal JesuKriisto, atz tiʼ uvaʼ at etaanima sevatzaq. Atz ulat tal Timoteeo uvaʼ bʼenamen nik motx etulsat oʼ sekʼuul tuchʼ bʼaʼnil. Tul kametzxh uvaʼ tira nik esaʼt qilixeʼ, tul echatetzxh nik qusaʼt etilixe. 7Qabʼietz vet u yol uvaʼ tal Timoteeo setiʼ, ex qumol niman tetz Jesuus, tiʼ venimat u quBʼaal JesuKriisto, tul aʼl itxhej vet qutial taʼn. Tan nikich iyolon qaanima tiʼ kam inqʼa nikich qupalebʼe, atz nikich qitzʼan s-tiʼ, tan maʼtich qojqeʼlal tzaan sexoʼl. 8Tul tira yekich kʼuqeʼv qukʼuul uvaʼs qabʼitaʼ uvaʼ nuqtxaklel ex tiʼ inimal u quBʼaal Jesuus. 9Echetz tira palnaʼq u quchiibʼ viʼ ichiibʼ vaʼq xaol tiʼ vaʼq kam, tiʼ qaqʼt taʼntiuxh te quBʼaal Tiuxh setiʼ, tan tira mam chiibʼichil nik qunatxh vatz quBʼaal Tiuxh tiʼ jankʼal inqʼa qat ibʼan sexoʼl. 10Tan nik qunatxh Tiuxh s-qʼiil s-aqʼbʼal tuchʼ qaanima, tiʼ uvaʼ laʼ bʼen qil ex inpaqte; tul laʼ bʼen qulotxh ex tiʼ etxhabʼat tel inqʼa bʼaʼnla txhaq yol tiʼ quBʼaal JesuKriisto, tan nima tel kam uvaʼ yeʼx etootzaqit s-tiʼ.
11Aʼetz Tiuxh, u quBʼaal, tuchʼ u quBʼaal JesuKriisto laʼ kuyun qubʼenaʼ, tul tetxhalxh laʼ bʼen oʼ sexoʼl. 12Tul quBʼaal Tiuxh laʼ bʼanon, tul aʼl tel laʼ motx echʼijeʼ, atz laʼ motx esaʼ etibʼ sevatzaq. Tul echatxh laʼ motx esaʼt etibʼ sevatzaq, eche uvaʼ nik qusaʼt ex. 13Tul aʼ u quBʼaal Tiuxh laʼ aqʼon etial, tul tira laʼ ejetxheʼl etibʼ kʼatz u paʼv, tetxhal etopooneʼ uvaʼ mij vet vaʼq paʼv laʼ til quBʼaal Tiuxh ebʼantaʼ. Aʼetz laʼ tilt ex u quBʼaal Jesuus uvaʼs laʼ tul inpaqte tuchʼ jankʼal inqʼa niman tetz, inqʼa chʼexel vet taʼn.
Currently Selected:
1 Tesaloniseenses 3: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
