1 Xhun ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
1 XHUN
Uvaʼs toq qootzaqitaʼ jaʼl tzʼibʼan u uʼ 1 Xhun
Aʼetz u uʼe uvaʼ 1 Xhun ibʼij, uvaʼ itzʼibʼa Xhun, u apoostol. Tan tira nik ibʼan eela inqʼa yol tuul u uʼ 1 Xhun tuchʼ vikajv uʼ tiʼ quBʼaal Jesuus. Tan eelaxh inqʼa yol uvaʼ nik tal oʼvaʼl inqʼa versiikulo tixeʼtebʼal kaʼvaʼl inqʼa uʼ inqʼae. Tan nikat ibʼan eela inqʼa yol uvaʼ tal Xhun, tiʼ uvaʼ atoqaqxh taanima inqʼa niman tetz Jesuus s-vatzaq, eche uvaʼ motx itxhus ka quBʼaal Jesuus. Ech uvaʼe nik tal t-Xhun 13.34-35. Tul nikat tiqʼo tzaan Xhun kaʼl inqʼa yol s-tuul tiʼ ibʼen te inqʼa niman tetz Jesuus. Tan ibʼan Xhun eela inqʼa niman tetz Jesuus tuchʼ u txiqubʼal, tan ech uvaʼe tal quBʼaal Jesuus. Atz ibʼan Xhun eela inqʼa jit niman tetz Jesuus tuchʼ u tokto. Tul antxh Xhun tzʼibʼan u uʼ Apokaliipsis inpaqte. Aʼetz Xhune uvaʼ tira txhʼuyichxh tiʼ quBʼaal Jesuus txhaqpaq, tal nikich exk quBʼaal Jesuus. Tan at uvaʼ taʼn kuxh oxvaʼl inqʼa itxhaq quBʼaal Jesuus, inqʼa iapoostol, nikich tiqʼo quBʼaal Jesuus s-tiʼ. Antetz Xhun at xoʼl oxvaʼl inqʼae. Tan taʼn kuxh oxvaʼl inqʼa apoostol ilon viyolon quBʼaal Jesuus tuchʼ Moisees, tuchʼ Eliias viʼ u vitz. Ech uvaʼe nik tal tu Tio 17.1.
Uvaʼs toq qootzaqitaʼ kam s-tuul tzʼibʼal u uʼ 1 Xhun
Aʼetz itzʼibʼal vet u uʼ 1 Xhun tixoʼl u yaʼbʼ oʼvaʼl toʼkʼal (85) m.t.J. tuchʼ u yaʼbʼ laval toʼkʼal (90) m.t.J. Tan qʼestich vet Xhun uvaʼs itzʼibʼat Xhun u uʼ tu tenam Eefeso. Atichetz jolol inqʼa iqʼon iviʼ xoʼl inqʼa niman tetz Jesuus motx tzʼibʼan ka vinuqul tiʼ Xhun uvaʼ Xhun tzʼibʼan u uʼ 1 Xhun.
Uvaʼs toq qootzaqitaʼ kame u taqʼil vitxhusun Xhun tuul u tuʼ 1 Xhun
Aʼetz u taqʼil viyol Xhun itzʼibʼa bʼen te inqʼa niman tetz Jesuus, tiʼ uvaʼ atoqxh taanima inqʼa niman tetz Jesuus s-vatzaq laʼ ibʼana, eche uvaʼ ibʼekʼ ka quBʼaal Jesuus. Oqetz uvaʼ echxh laʼ ibʼan inqʼa niman tetz Jesuuse tiʼ isaʼt tibʼ s-vatzaq, tul aʼetz vibʼekʼbʼal quBʼaal Tiuxhe nik inima.
Nikat tal Xhun, uvaʼ laʼ ixee tibʼ inqʼa niman tetz Jesuus, tiʼ yeʼ inimal val u yaabʼla txhusbʼal uvaʼ nikich talax xoʼl inqʼa niman tetz Jesuus. Aʼe, uvaʼ jit eela vitxhiʼoʼl quBʼaal Jesuus tuchʼ vitxhiʼoʼl inqʼa alam aanima vatz txʼavaʼ.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 1 Xhun
U uʼ 1 Xhun, tan kajvaʼlen tanul elnaʼq inqʼa yol uvaʼ nik tal s-tuul.
1 Xhun 1.1-4
Aʼetz ixeʼtebʼe Xhun talax tiʼ viyol tu tuʼ, aʼe, uvaʼ toksa iqʼij quBʼaal Jesuus, u Aqʼol tetz qʼij saq uvaʼ yeʼl iyaʼebʼal imotxebʼal. Echetze vixeʼtebʼal viyol Xhun nik tal tzitza, tan nik ibʼan eela tuchʼ vixeʼtebʼal vaʼt u tuʼ uvaʼ itzʼibʼa tiʼ kam inqʼa motx palk quBʼaal Jesuus tuulbʼal u qʼij isaq vatz txʼavaʼ. Tul nik tal tuul u tuʼ uvaʼ aqʼol qʼij saq u quBʼaal Jesuus, eche uvaʼ nik tal tzitza tu 1 Xhun 1.1-4 tuchʼ tu Xhun 1.1-14.
1. 1 Xhun 1.5—2.17
U bʼaxa tanul yol, tan aʼ tal Xhun, tiʼ uvaʼ laʼ motx taqʼ inqʼa niman tetz Jesuus yaʼl tiʼ inimal quBʼaal Jesuus. Tul yeʼ laʼ motx paʼvini, atz nimamoq jankʼal inqʼa yol taʼn, inqʼa abʼimal vet taʼn. Atz tal bʼen Xhun inuqul, tiʼ uvaʼ, aʼ vinimal viyolbʼal quBʼaal Tiuxhe uvaʼ atoqaqxh taanima s-vatzaq laʼ motx ibʼana.
2. 1 Xhun 2.18—3.24
Vikaʼv tanul yol, tan aʼ tal Xhun, tiʼ uvaʼ at inqʼa tzʼeqol tzijla txhusul nikich motx ixaon tiʼ ipaxsal viyolbʼal quBʼaal Tiuxh s-vatz. Pet tzʼeqo tzij kuxh uvaʼ nikich motx taleʼ. Aʼetz inqʼae nikich eesan iqʼij u quBʼaal Jesuus, tan yeʼ nikich motx iqejeʼ uvaʼ Tiuxh Jesuus, atz yeʼ nikich motx iqejeʼ uvaʼ, aʼ tzajnaʼq quBʼaal Jesuus tu amlikaʼ. Aʼetz tal Xhun uvaʼ yeʼ laʼ motx taqʼ inqʼa niman tetz Jesuus iviʼ te inqʼa yol inqʼae.
Pet taqʼetz Xhun itxumbʼal inqʼa niman tetz Jesuus uvaʼ taʼn kuxh inqʼa yol qeoqich taʼn, inqʼa txhusuʼm uvaʼ motx tal inqʼa apoostol s-xoʼl. Pet yeʼ laʼ motx inima vaʼtoʼq txhusbʼal uvaʼ tzʼeqo tzij kuxhtuʼ. Tan ech uvaʼe nik tal tu 1 Xhun 2.24.
Atetz vaʼt txumbʼal tal Xhun te inqʼa niman tetz Jesuus, aʼe, uvaʼ, aʼ laʼ motx inima kam uvaʼ laʼ tal viTiuxhil Tiuxh s-te. Tul aʼ viTiuxhil Tiuxh laʼ alon s-te jabʼistee uvaʼ inuqulxhtuʼ. Tul aʼetz uvaʼe, laʼ inima. Pet oq laʼ tal viTiuxhil Tiuxh s-te uvaʼ jit inuqul, tul aʼetz uvaʼe, yeʼ laʼ motx inima. Ech uvaʼe nik tal tu 1 Xhun 2.27.
Tul at vaʼt txumbʼal tal Xhun te inqʼa niman tetz Jesuus, aʼe, uvaʼ atoqxh taanima s-vatzaq laʼ ibʼana. Oqetz ech uvaʼe laʼ ibʼane, tul aʼetze nik ixee tibʼ vatz joltoʼq txhusbʼal uvaʼ jit inuqul. Ech uvaʼe nik tal tu 1 Xhun 1.3-10.
3. 1 Xhun 4.1—5.12
Vitoxv tanul yol, tan aʼ tal Xhun, tiʼ uvaʼ yeʼ laʼ motx inima inqʼa niman tetz Jesuus inqʼa yaabʼla txhusbʼal uvaʼ nikich motx talaxaq s-te. Atz kam telaq kuxh tzʼeqo tzij. Tan aʼ motx tal inqʼa tzʼeqol tzij uvaʼ yeʼl itxhiʼoʼl ikaqal quBʼaal Jesuus uvaʼs tul vatz txʼavaʼ. Atz jit Tiuxh quBʼaal Jesuus s-vatz. Tul nikat tal Xhun paqte te inqʼa niman tetz Jesuus uvaʼ, aʼ laʼ motx ibʼane uvaʼ atoqxh taanima s-vatzaq.
4. 1 Xhun 5.13-21
Vikajv tanul yol, tan aʼ tal Xhun, tiʼ uvaʼ oq laʼ paʼvin inqʼa niman tetz Jesuus vatz quBʼaal Tiuxh, tul laʼ ikuy quBʼaal Tiuxh vipaʼv, oq laʼ ijaq ikuya s-tiʼ. Pet atetz vaʼt u paʼv tal Xhun, uvaʼ yeʼ laʼ kuyux taʼn quBʼaal Tiuxh. Aʼe u paʼv uvaʼ yeʼ nik inima inqʼa xaol uvaʼ Tiuxh u quBʼaal Jesuus.
Nikat tal Xhun uvaʼ yeʼ laʼ inatxhkʼuula inqʼa niman tetz Jesuus inqʼa bʼitichla tiuxh.
Currently Selected:
1 Xhun ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.