1 Xhun 1

1 XHUN

Uvaʼs talt Xhun inqʼa yol tetz qʼij saq

1Toq intzʼibʼa inqʼa yol tiʼ val u Vinaq uvaʼ atichxh tixeʼtebʼal uvaʼs yeʼnaqich xeʼtoq u qʼij saq.

Tul qabʼi,

atz qilxh tuchʼ quvatz.

Tul qutxhabʼaxh isaqileʼ.

Atz qukanxh tuchʼ quqʼabʼ.

Aʼetz u Vinaqe

uvaʼ alon u yol

tiʼ taqʼax qʼij qusaq

uvaʼ yeʼl iyaʼebʼal imotxebʼal.

2Aʼetz ulk u Vinaq vatz txʼavaʼ, u Aqʼol qʼij saq. Tul qiletzxhtuʼ. Tul aʼetz uvaʼe, nik qal inuqul inqʼa yol s-tiʼ, tiʼ uvaʼ yeʼl iyaʼebʼal imotxebʼal qʼij isaq. Aʼetz uvaʼe, atichxh kʼatz quBʼaal Tiuxh, tul tira ul s-quxoʼl. 3Aʼetz nik qal inuqul inqʼa yol s-tiʼ sexoʼl kame uvaʼ qila, atz qabʼi. Echetz ant ex vaʼl quyol setuchʼ laʼ ibʼana. Tul nuqxhtuʼ uvaʼ, aʼ nik qubʼanvat vaʼl quyol tuchʼ u quBʼaal Tiuxh, atz tuchʼ JesuKriisto, viKʼaol. 4Niketz qutzʼibʼa inqʼaa sete, tiʼ uvaʼ tira laʼ etootzaqi uvaʼ, aʼe vinuqul. Tul tira laʼ chiibʼ oʼ setuchʼ s-tiʼ.

Uvaʼs talt Xhun inqʼa yol tiʼ u quBʼaal Jesuus uvaʼ, aʼe u txiqubʼal

5Echetz kamxh u yol uvaʼ qabʼi talt u quBʼaal JesuKriisto, tul aʼ uvaʼe, nik qal inuqul sexoʼl. Aʼe, uvaʼa: Tira bʼaʼn u quBʼaal Tiuxh; mij taʼn invaʼq paʼv at s-kʼatza, eche invaʼq txiqubʼal uvaʼ yeʼl bʼeeq tokto at s-kʼatza.

6Oqetz nik qaleʼ uvaʼ vaʼl quyol tuchʼ quBʼaal Tiuxh, tul oq aʼ nik qubʼan inqʼa yeʼbʼaʼn, eche vaʼq xaol uvaʼ nik ibʼan u yeʼbʼaʼn tu tokto, tul niketz qutzʼeqe tzij. Tul jitetz aʼ nik qubʼane vinuqul uvaʼ nik tal viyolbʼal quBʼaal Tiuxh. 7Pet oqetz aʼ nik qubʼan u bʼaʼn, eche inqʼa xaol uvaʼ at tu txiqubʼal, aʼetz nik qubʼane, eche u quBʼaal Tiuxh. Tul vaʼletz vet quyole s-quvatzaq. Tul nik itxʼaj oʼ tuulbʼal kaqaayil qupaʼv, tiʼ uvaʼ qat ibʼan u quBʼaal JesuKriisto, viKʼaol quBʼaal Tiuxh tiʼ tel vikaqal tiʼ itxʼajteʼl jankʼal inqʼa qupaʼv.{*}#1.7 Nik tal u versiikulo uvaʼa —...vikaqal u JesuKriisto, viKʼaol quBʼaal Tiuxh, nik txʼajon oʼ, —chiche. Aloq aʼ nik elkaʼpun uvaʼ: Tiʼ vikam u quBʼaal Jesuus, tul qat itxhojvat inqʼa qupaʼv vatz quBʼaal Tiuxh. Jaʼletz uvaʼ laʼ kʼuqbʼan ikʼuul s-tiʼ, tiʼ uvaʼ, aʼ vikamebʼal quBʼaal Jesuus txhoon vipaʼv, tul kuyeletz vet inqʼa ipaʼv taʼn quBʼaal Tiuxh. Tul yeʼletz vet itxʼoq xeʼ quBʼaal Tiuxh nik elkaʼpun.

8Oqetz nik qaleʼ uvaʼ yeʼl paʼv nik qubʼaneʼ, juntetz kuxh nik qeesa qibʼe t-bʼey. Tul yeʼletz vinuqule nik qaleʼ. 9Pet oqetz laʼ qaloʼk inuqul inqʼa qupaʼv te quBʼaal Tiuxh, tul aʼletz bʼaʼn. Tan kʼuqlebʼalxh kʼuul viyoloneʼ, atz jikxh tiʼ ikuyux inqʼa qupaʼv. Tul toq itxʼaj oʼ tuulbʼal kaqaayil yeʼbʼaʼn. 10Oqetz nik qaleʼ uvaʼ yeʼl paʼv nik qubʼaneʼ, niketz kuxh qaqʼ bʼen u quBʼaal Tiuxhe s-tzʼeqol tzij, tan nik tal quBʼaal Tiuxh uvaʼ yeʼl invaʼq xaol uvaʼ yeʼl koq ipaʼv. Tul yeʼletz viyol quBʼaal Tiuxhe nik qunima.

Currently Selected:

1 Xhun 1: ixlC

Highlight

Copy

Compare