1 Koriintios 10

Uvaʼs ibʼekʼt Paʼp uvaʼ yeʼ laʼ inatxhkʼuula inqʼa niman tetz Jesuus inqʼa bʼitichla tiuxh eche uvaʼ ibʼan inqʼa tij imam Israeel s-naʼya

1Jankʼal ex inmol s-niman tetz Jesuus, yeʼ esotzsa sekʼuul uvaʼ txhʼuyich quBʼaal Tiuxh tiʼ inqʼa kʼuy qumam s-naʼya, inqʼa Israeel. Tan aʼich kʼutxhbʼal tetze u suʼtzʼ uvaʼ atich s-tiibʼa. Atz motx xaon paʼl tinikʼa u Kaq Maar. 2Tul jankʼalxh inqʼa kʼuy qumam motx qeon u tiqleʼm Moisees uvaʼs tatinaq jaqʼ u suʼtzʼ, atz uvaʼs motx ixaon paʼl tinikʼa u Kaq Maar.{*}#10.2 Eeksodo 13.17—14.31. Aʼ nik tal u yol tu kastiiya uvaʼ: —...fueron bautizados en la nube y en el mar, —chiche. Aʼ nik elkaʼpun uvaʼ molomalich tibʼ vitenam quBʼaal Tiuxh, inqʼa tij imam Israeel tuchʼ Moisees, uvaʼs ixeʼtaq vet tiʼ inimal jankʼal inqʼa iyol quBʼaal Tiuxh uvaʼ tal te Moisees. Tan tzum motx tilt itxakatxh u suʼtzʼ s-tiibʼa; atz tzum motx ipalaq paʼl tinikʼa u mamaʼ vatz aʼ. Aʼetz nik elkaʼpun uvaʼ eela vet tuchʼ, eche vikuʼaq xeʼ aʼ ibʼana tiʼ ixeʼt tiʼ inimal viyol quBʼaal Tiuxh. Tan tzitzi xeʼtik vet quBʼaal Tiuxh tiʼ itxhusux vet inqʼa akʼ txumbʼal tiʼ inatxhkʼuulal taʼn vitenam. Tul opoonaqetz vet tu vitz Sinaii, tul mamala tel iyol quBʼaal Tiuxh tal vet te vitenam. Tul itzaqʼbʼeetz vet u tenam inimal viyol quBʼaal Tiuxh. Echetz talax vete uvaʼ qat kuʼ xeʼ aʼ, tan motx tal vet viyol tiʼ inimal quBʼaal Tiuxh. 3Tul jankʼalxh inqʼa kʼuy qumam etxhbʼun u etxhbʼubʼal, u manaa, uvaʼ quBʼaal Tiuxh aqʼon kuʼl s-te.#Eeksodo 16.35 4Tul jankʼalxh inqʼa kʼuy qumam ukʼan u aʼ uvaʼ quBʼaal Tiuxh aqʼon. Aʼetz u aʼ motx tukʼa uvaʼ eluʼl tuul u sivan uvaʼ itop Moisees tuchʼ vibʼaara. Tul aʼ nik elkaʼp u sivan u Kriisto uvaʼ txhʼuyich s-tiʼ, tiʼ ilotxhoxeʼ.#Eeksodo 17.5-7

5Kʼuxhetz motx til inqʼa kʼuy qumam jankʼal inqʼa motx ibʼan quBʼaal Tiuxh, poro tira motx isotzsa s-kʼuul. Tul tira yeʼ motx ibʼana kam uvaʼ isaʼ quBʼaal Tiuxh s-te. Echetz s-tiʼile yeʼ motx opoon tu bʼaʼnla txʼavaʼ. Pet motx kuxh silun vet ka inqʼa itxhiʼoʼl tu tzaqa txʼavaʼ.#Nuumeros 14.29-30; Deuteronoomio 1.34-40

6Jankʼaletz inqʼa motx ibʼan inqʼa kʼuy qumam s-naʼya, inqʼa Israeel, tan vaʼl vet kʼutxhbʼal tetze s-qe uvaʼ yeʼ laʼ qoksa bʼen qaanima tiʼ u yeʼbʼaʼn, eche uvaʼ motx ibʼan inqʼa kʼuy qumam s-naʼya. 7Echetz yeʼ enatxhkʼuula inqʼa bʼitichla tiuxh, eche uvaʼ ibʼan jolol inqʼa kʼuy qumam. Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—Motxetz kʼuqeʼv vet

u tenam,

tul xeʼtaq vet txʼaʼon,

atz xeʼtaq vet ukʼoq aʼ

tiʼ inatxhax vibʼitichla tiuxh.

Tul mamala chiibʼichil

tuchʼ paʼv motx ibʼan vet

vatz vibʼitichla tiuxh,

—chich u yol.#Eeksodo 32.6

8Atz yeʼ motx eyansa etibʼ tuchʼ uvaʼ jit ekʼulel etibʼ s-tuchʼ, eche uvaʼ ibʼan jolol inqʼa kʼuy qumam. Tan, tiʼ uvaʼ motx iyansaaq tibʼ tuchʼ uvaʼ jitich ikʼulel tibʼ s-tuchʼ, tul tuulbʼal kuxh vaʼl qʼij yatzʼaxaq el vinaq oxvaʼl mil (23,000) inqʼa kʼuy qumam taʼn quBʼaal Tiuxh.#Nuumeros 25.1-18

9Tul yeʼ motx etxhok tul ikʼaʼnal quBʼaal Tiuxh setiibʼa, eche uvaʼ ibʼan jolol inqʼa kʼuy qumam. Tan, tiʼ uvaʼ motx itxhok tul ikʼaʼnal quBʼaal Tiuxh s-tiibʼa, tul ikuy quBʼaal Tiuxh itxhiʼix taʼn kan. Tul tetxhal motx ikameʼ.#Nuumeros 21.5-6{*}#10.9 Nuumeros 21.5-6; Deuteronoomio 2.16, 21. Eche u yol uvaʼ: —Yeʼ laʼ etxhok tul ikʼaʼnal quBʼaal Tiuxh, —chiche. Aʼ nik taleʼ uvaʼ yeʼ laʼ itxhok inqʼa xaol ixeʼt paʼvinoq vatz quBʼaal Tiuxh, oq tootzaql vet inqʼa paʼv uvaʼ yeʼ nik isaʼ quBʼaal Tiuxh laʼ bʼanaxi. Deuteronoomio 6.16; Vibʼanoʼm inqʼa Apoostol 15.10; 1 Koriintios 10.9

10Tul yeʼ laʼ ekʼaxa etibʼ tiʼ kam inqʼa nik isaʼ quBʼaal Tiuxh laʼ bʼanaxi, eche uvaʼ ibʼan jolol inqʼa kʼuy qumam. Tan, tiʼ uvaʼ motx tal yol tiʼ kam inqʼa nik isaʼ quBʼaal Tiuxh, tul itxhaq tzaan quBʼaal Tiuxh val viaanxel tiʼ iyatzʼaxaq el.#Nuumeros 16.41-49

11Echetz kam uvaʼ motx palk inqʼa kʼuy qumam, tan aʼ itxaʼk laʼ ibʼensa s-qe uvaʼ yeʼ laʼ qubʼan, eche u paʼv uvaʼ motx ibʼana. Tul ile tzʼibʼamal ka tiʼ imaqt oʼ tiʼ yeʼ ibʼanax u paʼv, oʼ inqʼa nik ilon kame u titzʼabʼal quBʼaal Tiuxh s-qiʼ, tetxhal qul tzitza t-vitzoqpebʼal intanul yaʼbʼ.{*}#10.11 ¿Kam nik elkaʼp u yol ‹vitzoqpebʼal intanul yaʼbʼ› uvaʼ nik tal tu versiikulo uvaʼa? Aʼ nik tal inqʼa apoostol uvaʼ itzoqpebʼal intanul yaʼbʼ uvaʼs tul vet u Mesiias.

12Echetz jaʼl ex, uvaʼ txhabʼamal vet etatin kʼatz quBʼaal Tiuxh nik enatxheʼ, tul noqxh etil etibʼ. Tul yeʼ laʼ kuʼ ex t-paʼv. 13Tul jankʼalxh inqʼa nik ikʼutxh tibʼ sete tiʼ ekuʼ t-paʼv, tan jit yaʼnxhte xeʼtiya. Pet kaqaayil kuxh xaol nik itxhokox ikuʼ t-paʼv. Echetz kʼuxh laʼ txhokox ekuʼ t-paʼv, poro yeʼl ex laʼ kuʼ ex, tan kʼuqlebʼxh kʼuul u quBʼaal Tiuxh tiʼ elotxhoxeʼ. Tan saʼ koq kuxh ikuy epal t-invaʼq mam itzaʼlal, oq uvaʼ yeʼ laʼ etxʼol epal s-tuul. Pet oqetz laʼ pal ex t-invaʼq itzaʼlal, tul aʼ vet quBʼaal Tiuxh laʼ aqʼon etxumbʼal tiʼ eteleʼl s-tuul tiʼ yeʼ epaʼvineʼ.

Uvaʼs ibʼekʼt Paʼp te inqʼa niman tetz Jesuus uvaʼ yeʼ laʼ iyuj vinatxhkʼuulal Tiuxh tuchʼ vinatxhkʼuulal inqʼa demoonio

14Echetz s-tiʼile nik val sete, ex, uvaʼ nik inchiibʼ setiʼ, uvaʼ tira laʼ eteesa el inqʼa bʼitichla tiuxh teviʼ tiʼ inatxhkʼuulaleʼ, eche laʼ itzʼeqteʼl tibʼ vaʼq xaol kʼatz vaʼq kam uvaʼ xoʼvebʼal. 15Atz niketz val sete, tan ataq vet etxumbʼal tiʼ tabʼileʼ. Antetzxh vet ex itzʼan inqʼa yol uvaʼ nik val sete, oq uvaʼ antxhte. 16Tan oʼ nik qubʼan vaʼl quyol tuchʼ quBʼaal JesuKriisto uvaʼs nik qunimat vikamebʼal tuchʼ u tel vikaqal tiʼ vitxhojt inqʼa qupaʼv. Tan nik qujaq vibʼaʼnil quBʼaal Tiuxh tiibʼa u taʼl uuva uvaʼ at kuʼ tu koopa. Tul nik qukʼa tiʼ qulsat vibʼaʼnil quBʼaal Tiuxh s-qukʼuul uvaʼ at s-qiibʼa. Tul tiraetz nik qulsa s-qukʼuul kam uvaʼ tel vikaqal quBʼaal JesuKriisto s-qiʼ.

Atz kʼuxh u paan uvaʼ nik qupixh s-tuul, tul nik qutxʼaʼeʼ, tan tiraat nik qulsa s-qukʼuul kam uvaʼ ikʼaxbʼ vitxhiʼoʼl u quBʼaal JesuKriisto s-qiʼ. 17Poro vaʼletz kuxh u paan, tul sibʼalen oʼ nik etxhbʼun. Aʼetz nik elkaʼpun uvaʼ kʼuxh sibʼalen oʼ, poro vaʼl kuxh vet qatin s-quvatzaqil, eche tatin qutxhiʼoʼl uvaʼ vaʼl kuxhtuʼ.

18Pet bʼenoqetz sete tiʼ kam uvaʼ nik ibʼan inqʼa qumol s-tijaq imam Israeel tiʼ inqʼa qejoʼm uvaʼ nik motx ibʼaneʼ. Tan vaʼl kuxh vet nik motx ibʼan tuchʼ quBʼaal Tiuxh uvaʼs nik tetxhbʼut bʼiitxhaqul inqʼa oya uvaʼ nik toksal ok vatz quBʼaal Tiuxh viʼ u natxhkʼuulabʼal tu tostiuxh tu tenam Jerusaleen. 19Aʼetz nik val uvaʼ yeʼ laʼ ebʼan eela eyol tuchʼ inqʼa bʼitichla tiuxh tiʼ etetxhbʼut inqʼa etxhbʼubʼal uvaʼ nik toksal s-vatz taʼn inqʼa jit niman tetz Jesuus. Pet kʼuxhetz ech nik vale, poro jit aʼ nik val uvaʼ itzʼlel koq inqʼa bʼitichla tiuxh. Tul yeʼxhkam nik valeʼ uvaʼ kantxhaq koq inqʼa etxhbʼubʼal uvaʼ nik toksal s-vatz. 20Pet aʼ nik vale uvaʼ kamxh oyail uvaʼ nik toksa inqʼa jit niman tetz Jesuus vatz inqʼa bʼitichla tiuxh, tan te inqʼa demoonioe nik taqʼvat. Pet jit vatz quBʼaal Tiuxhe nik motx toksavat. Echetz nik valte oq uvaʼ laʼ etetxhbʼu inqʼa etxhbʼubʼal uvaʼ nik toksal vatz inqʼa bʼitichla tiuxh, tul exetz vete nik ebʼan vaʼl eyol tuchʼ inqʼa demoonio. Tul yeʼetz insaʼ uvaʼ laʼ ebʼan eela eyol s-tuchʼ.

21Tan yeʼ laʼ utxhi kaʼvaʼl laʼ ebʼanvat eela eyol. Tan nik etukʼa u taʼl uuva uvaʼ tu koopa tiʼ etulsat vikamebʼal quBʼaal JesuKriisto sekʼuul. Tul echatxh nik etukʼat txhan u taʼl uuvae uvaʼ nik toksal vatz demoonio. Echetz yeʼ laʼ utxhi uvaʼ vaʼl eyol laʼ ebʼan tuchʼ quBʼaal Jesuus tiʼ etetxhbʼut inqʼa etxhbʼubʼal. Tul laʼat ebʼan txha vaʼt eyol tuchʼ inqʼa demoonio tiʼ etetxhbʼut u etxhbʼubʼal uvaʼ nik toksal s-vatz. 22Echetz yeʼ laʼ etxhok tul ikʼaʼnal quBʼaal Tiuxh setiibʼa, tan jit aʼ, oʼ palnaʼq oʼ viʼ u quBʼaal Jesuus tiʼ yeʼ tul kʼaxbʼichil s-qiibʼa.#Deuteronoomio 32.16, 21

Uvaʼs talt Paʼp tiʼ jankʼal uvaʼ laʼ bʼanaxi, tul aʼ quBʼaal Tiuxh laʼ oksal iqʼij s-tuchʼ

23Tul kamal ech toq etal s-eche: —Laʼ kuxh utxhi laʼ inbʼana kam uvaʼ laʼ ikuy inqʼa bʼekʼbʼal inbʼantaʼ, —kamal toq etaleʼ. Poro jitetz ayaʼl uvaʼe ikʼulel laʼ ebʼana. Atz kamal echat toq etal s-eche: —Laʼ kuxh utxhi laʼ inbʼana kam uvaʼ laʼ ikuy inqʼa bʼekʼbʼal inbʼantaʼ, —kamal toq etaleʼ. Tul jit ayaʼl uvaʼe laʼ chʼijsan tatin vemol, inqʼa niman tetz Jesuus vatz quBʼaal Tiuxh. 24Tul yeʼ laʼ utxhi uvaʼ, aʼ kuxh vetetz laʼ etoksa sejunal. Pet aʼat laʼ etitzʼa uvaʼ bʼaʼnat laʼ elkaʼp te vemol.

25Echetz bʼaʼn kuxhtuʼ kʼuxh kamxh txhibʼil laʼ etetxhbʼu, inqʼa nik eloqʼ t-inqʼa kʼayibʼ txhibʼ. Tul yeʼ laʼ etabʼi inuqul maq oksamal vet vatz bʼitichla tiuxh. Pet loqʼs kuxh laʼ etetxhbʼu, echetz yeʼ laʼ tel etaanimae s-tiʼ. 26Tan quBʼaal Tiuxh aqʼon ka u txhibʼ, eche uvaʼ nik tal viyolbʼal quBʼaal Tiuxh uvaʼ ech nik tal s-eche:

—Tetz quBʼaal Tiuxh

u txʼavaʼ

tuchʼ jankʼal inqʼa kam

uvaʼ at s-vatz,

—chiche.#Saalmo 24.1

27Oqetz at invaʼq xaol uvaʼ yeʼx okoq s-niman tetz Jesuus, tul oq laʼ ibʼekʼ ex tiʼ ebʼen txʼaʼon s-tiʼ, tul bʼenoqnetz ex. Tul yeʼ laʼ etabʼi kam bʼanel taʼn u etxhbʼubʼal. Pet loqʼs kuxh laʼ etetxhbʼu jankʼal uvaʼ laʼ taqʼ eluʼl sevatz, echetz yeʼ laʼ tel etaanimae tiʼ iyansat ex.

28Pet oqetz ech laʼ alax sete s-eche: —Oksamal vete u txhibʼ uvaʼa vatz inqʼa bʼitichla tiuxh, —oq chaq eʼl ex, tul aʼletz kuxh yeʼ laʼ etetxhbʼu veteʼ. Echetz yeʼ laʼ etxhoʼnisat taanimae u xaol uvaʼ laʼ alon u yol sete. Tan oq laʼ etxhiʼ u txhibʼ s-vatz, tul aʼetz laʼ titzʼa veteʼ uvaʼ ant ex nik natxhkʼuulan u bʼitichla tiuxh. Tan avoqe at vaʼtoʼq xaol nik ibʼan kaʼl ikʼuul s-tiʼ. Tul laʼ txhoʼn vet taanima s-tiʼ. [Tetz quBʼaal Tiuxh u txʼavaʼ tuchʼ jankʼal inqʼa kam uvaʼ at s-vatz.]#Saalmo 24.1 29Aʼetz nik val uvaʼ yeʼ laʼ txhoʼn taanima vemol uvaʼ nik ibʼan kaʼl ikʼuul tiʼ u txhibʼ. Pet jit aʼ nik val uvaʼ, aʼ ex laʼ txhoʼn etaanima.

Pet kamal at ex, uvaʼ ech nik etal s-eche: —¿Kametz s-tiʼil laʼ kuxh maqax in tiʼ ibʼanax kam uvaʼ laʼ insaʼa, oq vootzaqle uvaʼ jit paʼv? —kamal toq etaleʼ.

30—Atzoqetz nik vaqʼ taʼntiuxh te quBʼaal Tiuxh tiʼ kam uvaʼ nik vetxhbʼu, tul yeʼxhabʼiletz laʼ maqon in s-tiʼ oq bʼaʼn sinvatz, —kamal chich ex.

31¡Ape! Kʼuxhetz kamxh laʼ ebʼan tiʼ venimaneʼ, atz kʼuxh kamxh laʼ etetxhbʼu, atz kʼuxh kamxh laʼ etukʼa, atzoq kam tel kuxh vaʼtoʼq s-tiʼ, tul bʼanvaq. Poro aʼ quBʼaal Tiuxh etoksa iqʼij tuchʼ jankʼal uvaʼ laʼ ebʼana. 32Pet ech kuxhte uvaʼ jit eqʼaqʼal laʼ kuʼ inqʼa xaol t-paʼv, kʼuxh inqʼa tij imam Israeel, atz kʼuxh inqʼa jit tij imam Israeel. Atz jitoq eqʼaqʼal laʼ kuʼ inqʼa niman tetz Jesuus t-paʼv, inqʼa chʼexel vet taʼn quBʼaal Tiuxh. 33Echetz ebʼan, eche uvaʼ nik inbʼaneʼ, tan yeʼxhabʼil invaʼq nik intxhoʼnisa. Pet aʼ nik intxhok uvaʼ ayaʼl inqʼa xaol laʼ chiibʼ tiʼ kam uvaʼ nik inbʼan tiʼ viqʼot viyolbʼal quBʼaal Tiuxh. Aloq jit taʼn kuxh in nik vitzʼa vibʼ sinjunal tiʼ intxhokt vetz. Pet aʼat nik vitzʼa uvaʼ bʼaʼnat laʼ elkaʼp mamala xaol, echetz laʼ motx ichitpe t-inqʼa kʼaxkʼo tiʼ inqʼa ipaʼv.

Currently Selected:

1 Koriintios 10: ixlC

Highlight

Copy

Compare