Lúkà 5
5
Sìmɔ́nì aɖàɖɔ̀ɔ́ wáa ɖi ɔmatsɛ́-Yèésù
(Màtéwò 4:18-22; Mákò 1:16-20)
1Ó ɖi nɔ́dzɔ́-kã̀, tsí Yèésù wà tsɛ̀kɔ́-afɔ̀-Ɔ̀ɖáyé fú ɔ̀nyà ŋa. Ó ɖóro nétíɖò tsítsédzú tɛ̀ŋgɛ̀lɛ̀ɛ̀-kã̀ si. À náa kpe oɖò#ɛ́ ní Gɛ̀nɛ̀sàrɛ́tì, tsí ɔ̀nyà ŋa kpó kpérí lɔ, tsí wà tse kìrì kìrì kìrì ní àŋa kó gbɔ́ afɔ̀ yèé ó wà wí#ɛ́. 2Tsí ó nyí, tsí rí ɔkɔ̃̀-odzómi méèdzì kã̀ŋa nétíɖò#ɛ́. Aɖàɖɔ̀ɔ́ ŋa kò wà nɔ́kɔ̃̀ ŋa#á si ró, à tì, tsí wà wɛ ɔ̀ɖɔ̀ɔ́-ŋà ŋa. 3Ɔkɔ̃̀-odzómi#ɛ́-kã̀ dzɛ́ ti Sìmɔ́nì. Tsí Yèésù ǹɖe, tsí wɔ̀ ńnɛ̀ dzokó. Tsí ó wà wí fú Sìmɔ́nì ní: Kó sɔ́ ɔkɔ̃̀#ɛ́ lɔ nódzú-omi#ɛ́ oɖé.
Tsí Sìmɔ́nì sɔ́ɔ lɔ, tsí Yèésù rí ayè, tsí tɔ́ wà tsɛ̀kɔ́ fú ŋa ńǹkɛ̀ɛ́. 4Kíbí ó tsɛ̀kɔ́#ɛ́ tã́#á, ó wí fú Sìmɔ́nì ní: Kó sɔ́ ɔkɔ̃̀#ɛ́ lɔ náàbù, tsí ká káà ɖa ɔ̀ɖɔ̀ɔ́-ŋà ŋa ɖà bɛ̀.
5Tsí Sìmɔ́nì wà dzɔ́ŋù fúu ní: Ɔ̀gá! Àŋa ti tsitsɛ́ nóoru títí wá ńǹɖádzá, tsí fá òógù ta, tsí àŋa kò mú iŋɛ́-kã̀ kpókpó. Ó ɖi báàyí#ɛ́, kíbí ó dzɛ́ òŋu ní wí fú àŋa bɛ́ɛ̀#ɛ́, òŋu nákó mú ɔ̀ɖɔ̀ɔ́ ŋa#á ɖà nómi#ɛ́ ró nóŋù-afɔ̀‐ɛ̀.
6Tsí Sìmɔ́nì òŋu ɔmatsɛ́‐ɛ̀ ŋa ǹɖe, tsí tse si ńǹtá-afɔ̀#ɛ́. Títí kó bɔ oɖé#ɛ́, à mú ɛdzã tó bɛ́ɛ̀ títí kíbí à wà fa ɔ̀ɖɔ̀ɔ́#ɛ́, ó le si ɖíŋúɖíŋú, tsí bòkó ya.
7Tsí à wawɔ́ kpe enìkéèdzì-ŋa yèé wà nɔ́kɔ̃̀-odzómi-èkéèdzì si#ɛ́ ní ká wáa mɔ́wɔ́ gbè fú àŋa ɖé. Tsí à kpérí wá, tsí wáa fàá, tsí ɖa ɛdzã ŋa#á ɖà nɔ́kɔ̃̀ méèdzì méèdzì ŋa#á, tsí ó kɔ̃́ ŋa títí ɔkɔ̃̀ ŋa#á bòkó tɛ́kì nómi.
8-10Kíbí Sìmɔ́nì Òkúta rí kpíkpɔ̀-ɛdzã yèé à mú náàrìkã̀ntso#ɛ́, dzidzi múu gbòkã́, tsí ó ǹɖe, tsí káà kálɛ̀ nábɛ́-Yèésù, tsí ní: Ɔlá-mi, máa sɔ́má-mi ró, iŋɛ́ yèé tse#ɛ́, ɔ̀nyà-íbàɖí ní ǹ dzɛ́#ɛ́. Ǹ kò dzɔ o sɔ́má-mi gìɖì.
Bɛ́ɛ̀ ké ní dzidzi mú Yàkúbù òŋu Yòhánà† ɔma-Sèbèɖé ŋa gbo#ɛ́. Àŋa gbo, à wà nɔ́kɔ̃̀#ɛ́, tsí à náa dzɔ́ tsitsɛ́ bá Sìmɔ́nì.
Tsí Yèésù wà wí fú Sìmɔ́nì ní: Kó máa sá. Ó ɖi, ti nɔ́mbɛ́#ɛ́, kàkó wà mú ɛdzã ró, ɔ̀nyà ŋa ní nákó wà gbɛ̃́ wá fú òŋu#ɛ́.
11Kíbí ó fɔ̀ bɛ́ɛ̀#ɛ́, à fùɖá, tsí fa ɔkɔ̃̀ ŋa#á si náàtàkè, tsí kɔ itsɛ́-ŋa dzɔ̀ɔ́, tsí à tɛ̀ náànyì-Yèésù lɔ.
Yèésù bɔ aɖɔ́ɔ̀tɛ̀-kã̀
(Mákò 1:40-45)
12Ó ɖi nɔ́dzɔ́-kã̀ ró, tsí Yèésù wà ńǹlú-òmírɛ̃̀-kã̀ si. Tsí ɔ̀nyà-kã̀ wà ńǹlú#ɛ́ bɛ̀, tsí ara‐ɛ̀ ɖɔ́ɔ̀tɛ̀ kpó. Kíbí ó rí Yèésù#ɛ́, ó lɔ káà kálɛ̀, tsí mú erí kãlɛ̀ fúu, tsí wà tsìkálɛ̀ fúu ní: Ɔ̀gá! Ó dzàre ɖé, kó bɔ òŋu ɖé! Ó ɖi, bí ó dzɛ́ nákó nyáa bɔ òŋu, tsí òŋu kó ɖi ɔ̀nyà mímá nódzú-Ɔ̀ɖáyé.
13Tsí Yèésù na ɔwɔ́, tsí ń kã̀ã́, tsí fɔ̀ ní: Ɛ̃ɛ̃, òŋu dzɛ́! Kó ɖi ɔ̀nyà mímá nódzú-Ɔ̀ɖáyé.
Tsí ńǹɖì-bɛ̀ gbòkã́#á, ɔ̀tɛ̀#ɛ́ tã́ nára‐ɛ̀, tsí ó ɖi abarakpá.
14Tsí Yèésù wí fúu ní: Kó máa fɔ̀ fú ɔ̀nyà-kã̀ kpókpó ní òŋu ní bɔɔ́#ɛ́. Ó ɖi, kóyá, kó lɔ káà mú ara‐ɛ̀ ŋa atsɛbɔ-Ɔ̀ɖáyé† ní àrɔ̃̀#ɛ́ tã́. Tsí kó tsɛbɔ ńǹrɔ́-kíbí Mɔ̀ɔ́sè† ti fɔ̀ɔ́ si fú ŋa dzɔ̀ɔ́ dzɔ̀ɔ́#ɛ́, tsí kó ń gba àfárá, àtóoríi ɔ̀nyà kpó kó mà ní àrɔ̃̀#ɛ́ tã́ fúu.
15Ó ɖi, àríkɛ̀ɛ́ gìɖì afɔ̀#ɛ́ wà fɔ́ si ńǹlú#ɛ́ wérí kpó làkóò#ɛ́ ńnɛ̀ɛ́. Tsí ɔ̀nyà ŋa kpérí kpíkpɔ̀ wá ńɖi-Yèésù, tsí ká wáa gbɔ́ afɔ̀‐ɛ̀. Tsí àkɔ̃̀rɔ̃̀ kã̀ŋa gbo wà náàŋírĩ-ŋa, tsí wà wí fúu ní: Kó bɔ àŋa gbo.
16Ó ɖi, Yèésù ǹɖe ńɖi-ŋa, tsí lɔ nɔ́ɔ̀ɖã̀, tsí káà wúùre.
Yèésù bɔ arɔ-kã̀
(Màtéwò 9:1-8; Mákò 2:1-12)
17Ó ɖi nɔ́dzɔ́-kã̀ gbo ró, tsí Yèésù wà ńnɔlé-kã̀ si, tsí wà tsɛ̀kɔ́ fú ɔ̀nyà ŋa. Ikpá-Ɔlɔ́dzɔ́ wà báa si ní kó wà bɔ àkɔ̃̀rɔ̃̀ ŋa. Tsí náàŋírĩ-ɛnɛ yèé dzokó si ŋa#á, ɔma-ɛgbɛ́-Fàrísì† kã̀ŋa òŋu akɔ́nɛ nɛ́kpa-Ɔ̀ɖáyé† kã̀ŋa gbo dzokó si bɛ̀. À ti ńǹlú kã̀kã̀ kpó nérè-Gàlìlé òŋu nérè-Yùɖéyà wá, tsí ɔ̀nyà kã̀ŋa gbo ti ńYèrúsàlɛ́mì, tsí wá.
18Títí kó bɔ oɖé#ɛ́, ɔ̀nyà kã̀ŋa gbo wáa tó náànkpã̀nàkũ̀-ilé#ɛ́, tsí à kɛ́ àkɔ̃̀rɔ̃̀-kã̀ wá. Arɔ ní ó dzɛ́#ɛ́, ɛsɛ̀‐ɛ̀ ŋa kú. Tsí à kɛ́ɛ si ńbànkàrá si. Tsí à wà wò ní àŋa kó kɛ́ɛ wɔ̀ ńnɔlé#ɛ́ lɔ ńɖi-Yèésù. 19Tsí à kɛ́ɛ wɔlé#ɛ́ kũ̀, iŋɛ́ yèé tse#ɛ́, ɔ̀nyà ŋa kpɔ̀ gbegbé. Tsí à ǹɖe, tsí kɛ́ àkɔ̃̀rɔ̃̀#ɛ́, tsí ń gu ilé#ɛ́ lɔ, tsí káà tsí éwo-ilé#ɛ́, tsí tìí gbà bɛ̀ òŋu bànkàrá#á, tsí ń bɔ́ náàŋírĩ-ɔ̀nyà ŋa#á, tsí ń si nábɛ́-Yèésù.
20Tsí kíbí Yèésù rí mà ní à nɛ́ àkaralé si ńǹtá-òŋu#ɛ́, ó wà wí fú àkɔ̃̀rɔ̃̀#ɛ́ ní: Òŋu mú àbi‐ɛ̀ ŋa tɔrɛ fúu.
21Kíbí ó wíìnyɛ̀ bɛ́ɛ̀#ɛ́, akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa wà bɛ̀, tsí à wà fɔ̀ ńnɔ́-ara-ŋa ní: Tsáyì! Kí tse tsí idza#á wà wíìnyɛ̀ bɛ́ɛ̀? Ó wà gbɛ̃ɛ̃́rĩ́ ɛ́kɔ-Ɔ̀ɖáyé ni. Ɔ̀ɖáyé òŋu níìkã̀ntso gé ní nákó nyáa mú àbi-nɛ tɔrɛ fúnɛ#ɛ́ nɔ̀!
22Tsí Yèésù òŋu ti ma ìsérè-ŋa si, tsí ó wà bèrè ŋá ní: Kí tse tsí à wà tsèsérè-ìrɔ́ nyɛ̀ŋɛ̀? 23Òŋu kó fɔ̀ fú ɔ̀nyà-kã̀ ní à mú íbàɖí‐ɛ̀ ŋa, tsí ń tɔrɛ fúu òŋu kó ǹɖe, tsí kó rɛ̃̀ fe, náàŋírĩ-oŋù-afɔ̀ méèdzì ŋa#á fee, yèésí le lárè ná? 24Ó ɖi, òŋu wà wò ní ká mà ní, òŋu, Ɛnɛ yèé ɔ̀nyà bí#ɛ́†, òŋu nɛ́kpá ńǹtalɛ̀ bí, tsí òŋu kó mú àbi-nɛ tɔrɛ fúnɛ. Tsí ó nyíwo arɔ#ɛ́, tsí ó fɔ̀ fúu ní: Òŋu wà wí fúu ní fee, kó ǹɖe, tsí kó kɛ́ bànkàrá‐ɛ̀, tsí kó lɔ ńlé.
25Tsí ńǹɖì-bɛ̀ gbòkã́#á, arɔ#ɛ́ ǹɖe nódzú-ŋa bɛ̀, tsí kɛ́ bànkàrá‐ɛ̀ kpákì, tsí dzì nɔ́ɔ̀nà-ilé, tsí wà nyɛ Ɔ̀ɖáyé làkóò.
26Ńbɛ̀ɛ́, àŋa kpó yèé wà bɛ̀#ɛ́, ó mù ŋá, tsí nódzo fú ŋá, tsí à wà nyɛ Ɔ̀ɖáyé ní: Kpɔ̀ɔ́! Kpɔ̀ɔ́! Iŋɛ́ yèé àŋa rí nɔ́mbɛ́ ŋa#á, à tse àbáàrí.
Yèésù kpe Lèfí ní kó tɛ̀ náànyì-òŋu
(Màtéwò 9:9-13; Mákò 2:13-17)
27Náànyì-bɛ́ɛ̀#ɛ́, Yèésù fùɖá ti ńlé#ɛ́ wáa làkóò, tsí rí ɔ̀nyà-kã̀. Agbalómbà-kã̀ ní ó dzɛ́#ɛ́, tsí à náa kpèé ní Lèfí†, tsí ó dzokó si ńǹɖì-itsɛ́-agbalómbà ŋa. Tsí Yèésù fɔ̀ fúu ní: Kó ǹɖe, tsí kó tɛ̀ náànyì-òŋu.
28Tsí ó ǹɖe, tsí tɛ̀ náànyì‐ɛ̀, tsí kɔ iŋɛ́ ɔ̀kã̀lɔ́ɔ̀kã̀ kpó dzɔ̀ɔ́.
29Ó ɖi, nɔ́dzɔ́-òmírɛ̃̀ ró, tsí Lèfí wà dzɛ ɔɖɔ̃́ lákṹ-kã̀ fú Yèésù. Tsí agbalómbà ŋa òŋu ɔ̀nyà kã̀ŋa gbo, à wá ńlé-Lèfí kpíkpɔ̀, tsí à kpérí kpó, tsí wà dzɛŋɛ́ náàdzɔ́.
30Tsí ɔma-ɛgbɛ́-Fàrísì† ŋa òŋu akɔ́nɛ nɛ́kpa-Ɔ̀ɖáyé† yèé wà nɛ́gbɛ́-ŋa#á, kíbí àŋa gbo, à rí bɛ́ɛ̀#ɛ́, à wà kpɔ̀kɔ̃̀ɔ̃́rɔ̃̀, tsí à wà bere ɔmatsɛ́‐ɛ̀ ŋa ní: Kí tse tsí à wà dzɛ, tsí wà mɔ bá agbalómbà ŋa òŋu olòmírɛ̃̀ yèé ŋa kà nyɛ̀wɔ̀-Ɔ̀ɖáyé#ɛ́ ná?
31Tsí Yèésù tsí arũ, tsí wà fɔ̀ fú ŋa ní: Abarakpá kò bere abɔnɛ, àkɔ̃̀rɔ̃̀ ni. 32Ó ɖi, òŋu kò tse àtsùgbé-atsòtítɔ́ ŋa, tsí wá ńǹtalɛ̀ bí. Àtsùgbé-adzàbi ŋa ní òŋu wá#á, tsí ká nyíìlò kpaɖà.
À bere Yèésù náfɔ̀-kã̀ ti nára-arũ ɖíɖì
(Màtéwò 9:14-17; Mákò 2:18-22)
33Tsí à wà wí fú Yèésù ní: Ɔmatsɛ́-Yòhánà† ŋa náa ɖi arũ, tsí wúùre gbo kpeékpeé, tsí ɔmatsɛ́-ɔma-ɛgbɛ́-Fàrísì† ŋa gbo náa tse bɛ́ɛ̀. Ó ɖi, ɔmatsɛ́ tɛ̀ɛ̀ ŋa òŋu náa wà dzɛ, tsí wà mɔ.
34Tsí Yèésù dzɔ́ŋù fú ŋa ní: Ká fɔ̀ ní ɔ̀nyà-kã̀ náya wá, tsí ídza‐ɛ̀ ŋa wà dzɛ ɔɖɔ̃́ báa. Ńǹwèrè yèé ɔkɔláya#á wà bá ŋa si, tsí à wà dzɛ ɔɖɔ̃́#ɛ́ fe, à nákó nyáa fɔ̀ fú ídza‐ɛ̀ ŋa ní ká ɖi arũ yáà? 35Ó ɖi, ìwèrè-kã̀ nákó wáa wá, tsí ɔkɔláya#á kàkó wà náàŋírĩ-ŋa ró. À nákó wáa múu lɔ. Bí àsòkò nyɛ̀ŋɛ̀ tó, à nákó ɖi arũ ńǹkɛ̀ɛ́.
36Tsí Yèésù kpòwe-kã̀ fú ŋa ró ní: Ɔ̀nyà-kã̀ kpókpó kà ya ìwɔ̀ra titɔ̃, tsí ń tá ìwɔ̀ra gbígbó. Bí kò tsi bɛ́ɛ̀, ìwɔ̀ra titɔ̃#ɛ́ nákó bàdzɛ́, tsí yèé à bù tamá ìwɔ̀ra gbígbó#ɛ́ gbo kàkó ɖé báa.
37Bɛ́ɛ̀ ké ní à kà mú ɔtí-òròrò, tsí ń ɖà náàkpò-awɔ hóhó#ɛ́ ńnɛ̀ɛ́. Bí kò tsi bɛ́ɛ̀, ɔtí#ɛ́ nákó tse tsí àkpò#ɛ́ nákó ɖá, tsí ɔtí#ɛ́ nákó ɖànu, tsí àkpò#ɛ́ gbo nákó rá. 38Fee, ó wà ní ká mú ɔtí-òròrò, tsí ń ɖà náàkpò-awɔ titɔ̃ ni.
39Ó ɖi, ɛnɛ yèé ŋa ti wà mɔtí ɖíɖá#á, à kà wo ká mɔtí-òròrò ró. À náa fɔ̀ ní ɔtí ɖíɖá ní sã̀#á.
Currently Selected:
Lúkà 5: ngl
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.