Hèbérù ŋa 6

1Ńbɛ̀ɛ́, àa kó kɔ ɛ̀kɔ́-àtsɛ̃̀tsɛ̃̀ ti nára-Kírísítò dzɔ̀ɔ́ nákpálà-kã̀ tã́ná, tsí ká lɔ ńwádzú. Àa kó lɔ ńwádzú, tsí àa kó gba ɛ̀kɔ́ yèé nákó tse tsí àa nákó nyáa ɖonùgbó ńnɔ́-àkaralé#ɛ́. Dzɔ̀ɔ́ dzɔ̀ɔ́#ɛ́, àa tsɛ̀kɔ́ fú ŋɛ́ ní iŋɛ́ yèé kò nɛ́ èrè-kã̀ kpókpó, tsí náa bí ikú fúnɛ ŋa#á, e kɔ̀ ŋá dzɔ̀ɔ́, tsí e nyíìlò kpaɖà, tsí e nɛ́ àkaralé si ńǹtá-Ɔ̀ɖáyé. 2Tsí àa tsɛ̀kɔ́ ti nára-kíbí à náa wɛ̀† fúnɛ, tsí mɔ́wɔ́ lé ńǹtá-nɛ gbà#á gbo fú ŋɛ́. Tsí kíbí Ɔ̀ɖáyé nákó dzí òkú ŋa wá náyé#ɛ́, tsí kpɛdzɔ́ fú ŋa, tsí ɛdzɔ́ yèé nákó ɖá#á kàkó nɛ́ títã́ láyé#ɛ́, àa tsɛ̀kɔ́ nyɛ̀ŋɛ̀ gbo fú ŋɛ́. Ó ɖi, àa kàkó tɔ́ sɛ̃̀ wá ńǹtá-iŋɛ́ nyɛ̀ŋɛ̀ ŋa ró. 3Báàyí#ɛ́, àa kó lɔ ńwádzú, tsí àa kó ɖonùgbó. Bí Ɔ̀ɖáyé dzɛ́, bɛ́ɛ̀ ní àa nákó tse#ɛ́.

4-6Ó ɖi, bí ɔ̀nyà-kã̀ nɛ́ àkaralé si ńǹtá-Yèésù tã́, tsí tɔ́ wáa kɔ̀ɔ́ dzɔ̀ɔ́ ró#ɛ́, à kàkó nyáa tse, tsí kó sɛ̃̀ nyíìlò kpaɖà ró. Ńǹwèrè yèé ó nɛ́ àkaralé si ńǹtá-Yèésù#ɛ́, ìsérè‐ɛ̀ tsí, tsí ó rí òtítɔ́-Ɔ̀ɖáyé mà. Ɔ̀ɖáyé tse ore fúu, tsí ó gbàá kpó. Mímí-Ɔ̀ɖáyé† tì wá ńǹtá-òŋu gbo. Ó gbɔ́ afɔ̀-Ɔ̀ɖáyé, tsí ó rí ní ó ɖɔ̃̀. Kíbí Ɔ̀ɖáyé tse iŋɛ́-àwùsì ŋa nódzú‐ɛ̀#ɛ́, ó rí kíbí nákó wáa dzoyè òŋu ikpá si ńǹtalɛ̀ gbà#á. Bí ɔ̀nyà-kã̀ káà tó títí ńbɛ̀ tã́, tsí kɔ àkaralé yèé ó nɛ́ si ńǹtá-Yèésù#ɛ́ dzɔ̀ɔ́ ró#ɛ́, ó tã́ ni, à kàkó nyáa tse tsí kó sɛ̃̀ nyíìlò kpaɖà ró. Kò nɛ́ tsítse nɔ́ɔ̀kã̀ ró, iŋɛ́ yèé tse#ɛ́, kíbí ó tse bɛ́ɛ̀#ɛ́, ó ɖánɔ́ mú Ɔma bíbí-Ɔ̀ɖáyé náàwùdzɔ, tsí ó wà kíbí òŋu ká‐ɛ̀ sɛ̃̀, tsí wà kã̀ã́ si ńǹtá-egi-ìɖáàgàlàdzà† gbo bɛ́ ró yí.

7Ká fɔ̀ ní oko-kã̀ wà, tsí òdzò náa rɔ̀ si ńnɛ̀ kpeékpeé dzì ńǹɖì‐ɛ̀. Òdzò#ɛ́ náa rɔ̀ kpíkpɔ̀ títí ilɛ̀#ɛ́ náa tù si rere gé ni. Tsí bí olóko#ɛ́ tsoko#ɛ́, tsí gbɛ̃ ìdzɛ si ńnɛ̀, ilɛ̀#ɛ́ kà tì sã dzídzɛ fúu bɔ̀. Bí ilɛ̀-kã̀ wà bɛ́ɛ̀, Ɔ̀ɖáyé náa tu kùsɛ̀ɛ̀ fúu. 8Ó ɖi, bí òdzò náa rɔ̀ ɖà nóko#ɛ́ bɛ́ɛ̀, tsí ilɛ̀#ɛ́ kà sã dzídzɛ fú olóko#ɛ́, tsí kà kàa bɛ́ɛ̀, èkíkã́kò gé ní náa gbàá si kpó dzùbɛ̀ɛ̀#ɛ́, ilɛ̀ nyɛ̀ŋɛ̀ kò wà nɔ́ɔ̀nà-kã̀ ró. Èré-Ɔ̀ɖáyé wà ɖóro ɖèé. Tsí ńǹtã̀ntã́‐ɛ̀#ɛ́, iná gé ní nákó wáa dzóo kpa kpó búláá#á.

9Ɛ̃ɛ̃, ǹ wíìnyɛ̀ fú ŋɛ́ líle líle bɛ́ɛ̀. Ó ɖi, àrínódzú-mi ŋa, ɛ̀ŋɛ òŋu, ǹ nɛ́ àkaralé si ní è wà nɔ́ɔ̀nà-ire#ɛ́ si, ɔ̀nà yèé nákó gbɛ̃́ ŋɛ́ lɔ nɔ́là#á. 10Ɔ̀ɖáyé náa tse òtítɔ́, kàkó gbàgbé iŋɛ́ yèé è tse ŋa#á láyé. È mɔ́wɔ́ gbè fú ɛnɛ yèé ŋa dzɛ́ ti Ɔ̀ɖáyé#ɛ́ wáa lɔ, tsí è tɔ́ wà mɔ́wɔ́ gbè fú ŋa si làkóò ró. Kíbí è tse bɛ́ɛ̀#ɛ́, ó wà nyà ŋà ní è nɛ́ àmúɖɔ̃̀ fú Ɔ̀ɖáyé, tsí Ɔ̀ɖáyé kàkó gbàgbé láyé. 11Tsí kíbí ó le mí si#ɛ́, ǹ wà wò ní ɛ̀ŋɛ kpó, ikpá yèé è wà tse#ɛ́, kṹnukṹ kó wà tseé làkóò gé náàrìmáa mí títí lɔ, àtsùgbée iŋɛ́ yèé è módzú si nɔ́ɔ̀nà si fú#ɛ́ kó tɔwɔ́-ŋɛ́. 12Bí è wà tse bɛ́ɛ̀ làkóò làkóò, è kàkó wáa ɖi ɔ̀gɛ̃. È nákó kɛ́ ɔwɔ́-ɛnɛ yèé ŋa nɛ́ àkaralé si ńǹtá-Ɔ̀ɖáyé, tsí fɛ̀ɖɔ̃̀ tù, tsí ɖóro kpíkpɛ̃́ títí iŋɛ́ yèé Ɔ̀ɖáyé tàlé fú ŋa#á, ó tɔwɔ́-ŋa#á.

Ɔ̀ɖáyé kà rúnɛ láyé, bí ó tàlé-kã̀, náa sãã́ gé ni

13Ɔ̀ɖáyé tàlé fú gbágbóǹgbàgbò-wa Àbàràhámì†. Tsí kíbí ó tàlé#ɛ́, ó kpe òŋu ká‐ɛ̀ si ńǹtá‐ɛ̀ ní òŋu nákó sãã́, iŋɛ́ yèé tse#ɛ́, iŋɛ́-kã̀ kò wà, tsí láre Ɔ̀ɖáyé, tsí Ɔ̀ɖáyé kó kpè si ńǹtá‐ɛ̀. 14Ó tàlé fú Àbàràhámì ní:

“Ìɖéǹɖè ni, màa tu kùsɛ̀ɛ̀ fɛ́ɛ,

tsí màa fɛ́ɛ nɔ́malɔ́ma kpíkpɔ̀.”#6:14 Ìwé-Ìkpìnkpìlɛ̀-ayé 22:16-17 (Genèse 22:16-17)

15Tsí Àbàràhámì fɛ̀ɖɔ̃̀ tù, tsí ɖóro kpíkpɛ̃́ títí iŋɛ́ yèé Ɔ̀ɖáyé tàlé fúu#ɛ́ wáa tɔwɔ́‐ɛ̀.

16Àwa ɔ̀nyà ŋa, bí ɔ̀nyà-kã̀ bàkó kpe iŋɛ́-kã̀ si ńǹtá-afɔ̀-kã̀, náa kpe iŋɛ́ yèé láre òŋu ká‐ɛ̀#ɛ́ ni. Tsí bí ó tse bɛ́ɛ̀ gé ná, ìnyà dzídzɛ-kã̀ kpókpó kò wà ró. 17Ɔ̀ɖáyé gbo wò ní ɛnɛ yèé ŋa nákó gba iŋɛ́ yèé ŋa òŋu tàlé si#ɛ́, òŋu kó wíìnyɛ̀ fú ŋa, tsí ká mà rere ní òŋu kàkó kpàrɔ̀ láyé. Iŋɛ́ yèé òŋu tse ètò si ní òŋu nákó tse#ɛ́, òŋu nákó tseé ní ó dzɛ́#ɛ́. Ńbɛ̀ɛ́, ó kpe òŋu ká‐ɛ̀ si ńǹtá‐ɛ̀ ní àlé yèé òŋu ta#á, òŋu taá ni. 18Ó tse bɛ́ɛ̀, tsí kó ń ɖáàmí le wá ni. Ó tàlé, tsí kpe òŋu ká‐ɛ̀ si ńǹtá‐ɛ̀. Tsí kíbí àa mà ní Ɔ̀ɖáyé kà rúnɛ láyé#ɛ́, àa nɛ́ àkaralé ní iŋɛ́ méèdzì yèé ó tse nyɛ̀ŋɛ̀ ŋa#á kàkó kpàrɔ̀ láyé. Àa sá lɔ káà ɖúkù ńɖɔ̀‐ɛ̀ ní kó tsɛ́wé bò wá, tsí àlé yèé ó ta, tsí kpe òŋu ká‐ɛ̀ si ńǹtá‐ɛ̀#ɛ́ wà ɖáàmí le wá kũkũ ní iŋɛ́ yèé ó ń si ńwádzú si fú wa, tsí àa módzú si nɔ́ɔ̀nà si ní àa nákó gbà nɔ́wɔ́‐ɛ̀#ɛ́, àa kó tsákìí banɛ́ kũkũ. 19Iŋɛ́ yèé àa módzú si nɔ́ɔ̀nà si fú#ɛ́ mú àyɛ̀-wa ŋa ɖóro si ɖíŋúú kíbí ekìkã̀ náa mú ɛrã ɖóro si bɛ́#ɛ́ ni. Tsí ó wɔlé-Ɔ̀ɖáyé yèé wà nɔ́ɔ̀rɔ̃#ɛ́ lɔ, tsí kɔ atsɔ-ìbònà#á dzɔ̀ɔ́, tsí lɔ títí ńǹɖòɖò-ilé#ɛ́ ńbí Ɔ̀ɖáyé wà#á. 20Ɛnɛ yèé tsúwádzú-wa lɔ bɛ̀ náàtsùgbé-wa#á, Yèésù ni. Ìɖéǹɖè#ɛ́, Yèésù dzɛ́ ɔ̀gã́-atsɛbɔ-Ɔ̀ɖáyé ŋa† néwo-wa títí lɔ náàrìtã́. Ó dzɛ́ atsɛbɔ-Ɔ̀ɖáyé† kíbí ìrɔ́-atsɛbɔ-Ɔ̀ɖáyé yèé Mɛ̀kìsèɖɛ́kì dzɛ́#ɛ́.

Currently Selected:

Hèbérù ŋa 6: ngl

Highlight

Copy

Compare