Hèbérù ŋa 1

Ɔ̀ɖáyé wíìnyɛ̀ fú wa gbà ńǹtá-Ɔma bíbí‐ɛ̀

1Ɖzɔ̀ɔ́ dzɔ̀ɔ́#ɛ́, Ɔ̀ɖáyé gbà ńǹtá-agbáfɔ̀-Ɔ̀ɖáyé fɔ̀† ŋa, tsí wíìnyɛ̀ fú gbágbóǹgbàgbò-wa ŋa. Náa gbà nɔ́ɔ̀nà kpíkpɔ̀, tsí wà wíìnyɛ̀ fú ŋa làkóò làkóò. 2Ó ɖi, ńǹtã̀ntã́-ayé yèé àa wà si báàyí#ɛ́, ó gbà ńǹtá-Ɔma bíbí‐ɛ̀, tsí wíìnyɛ̀ fú wa. Ńǹtá‐ɛ̀ ní ó gbà, tsí ɖá ayé gbaŋgba#á kpó#ɛ́, tsí òŋu ké ní ó tsã̀, tsí mú iŋɛ́ ɔ̀kã̀lɔ́ɔ̀kã̀ kpó bɔwɔ́#ɛ́. 3Iyì-ɔma#á wà nya kíbí Ɔ̀ɖáyé nɛ́ iyì tó gbà#á ɖíre, tsí bí ò rí ɔma#á gé ni ò rí kíbí Ɔ̀ɖáyé wà gbà tútútú#ɛ́ ńnɛ̀ɛ́. Náa wà wíìnyɛ̀ òŋu ikpá, tsí ó tse tsí iŋɛ́ ɔ̀kã̀lɔ́ɔ̀kã̀ kpó wà si làkóò làkóò. Ó tse tsí Ɔ̀ɖáyé kó nyáa mú àbi-ɔ̀nyà-ayé yèé ŋa, tsí ń tɔrɛ fú ŋa, tsí náànyì-bɛ́ɛ̀#ɛ́, ó ǹɖe lɔ nɔ́ɔ̀rɔ̃, tsí lɔ káà dzokó náàwóòtã́-Ɔ̀ɖáyé Olíkpá ɔ̀kã̀lɔ́ɔ̀kã̀ kpó. 4Ńbɛ̀ɛ́, Ɔ̀ɖáyé sɔ ɛ́kɔ-kã̀ fúu. Ɛ́kɔ#ɛ́, ó lákṹ láre ɛ́kɔ-adzítsɛ́-ɔ̀rɔ̃† ɔ̀kã̀lɔ́ɔ̀kã̀ kpó, tsí ó wà nyà ɖíre ní òŋu ní kpeéwo fú adzítsɛ́-ɔ̀rɔ̃ ŋa kpó#ɛ́.

Yèésù, Ɔma bíbí-Ɔ̀ɖáyé kpeéwo fú adzítsɛ́-ɔ̀rɔ̃ ŋa

5Ìɖéǹɖè#ɛ́, Ɔ̀ɖáyé kò fɔ̀ fú adzítsɛ́-ɔ̀rɔ̃†-kã̀ wòrí ní:

“Ɔma-mi ní ò dzɛ́#ɛ́,

nɔ́mbɛ́#ɛ́, ǹ wà fɔ̀ ní: Ǹ dzɛ́ boba-ɛ̀ɛ.”#1:5a Ìwé-Orĩ ŋa 2:7 (Psaumes 2:7)

Tsí kò fɔ̀ ti nára-adzítsɛ́-ɔ̀rɔ̃-kã̀ gbo wòrí ní:

“Èmi, màa ɖi boba fúu,

tsí òŋu nákó ɖi ɔma fú mi.”#1:5b Ìwé 2 Sàmùwɛ́lì 7:14 (2 Samuel 7:14)

6Ó ɖi, ńǹwèrè yèé Ɔ̀ɖáyé bɛ ɔma‐ɛ̀ onùgbó#ɛ́ wá ńǹtalɛ̀#ɛ́, ó fɔ̀ ní:

“Adzítsɛ́-ɔ̀rɔ̃ ŋa kpó

ká wà mú erí kãlɛ̀ fúu.”#1:6 Ìwé-Orĩ ŋa 97:7 (Psaumes 97:7)

7Tsí ti nára-adzítsɛ́-ɔ̀rɔ̃ ŋa#á, ó fɔ̀ ní:

“Ɔ̀ɖáyé tse tsí adzítsɛ́-ɔ̀rɔ̃ ŋa

ká wà kíbí afɛ́fɛ́ òŋu iná gbígbã̀ bɛ́,

tsí ká wà tsitsɛ́ fúu.”#1:7 Ìwé-Orĩ ŋa 104:4 (Psaumes 104:4)

8Tsí ó fɔ̀ fú Ɔma bíbí‐ɛ̀ òŋu ní:

“Ɔ̀ɖáyé, nàa dzokó náàntã̀-oyè-ɛ̀ɛ

títí lɔ náàrìtã́,

tsí nàa banɛ́ ɔ̀kpá-oyè-ɛ̀ɛ si,

tsí nàa dzoyè òŋu òtítɔ́.

9Nà dzáfɔ̀-òtítɔ́ tsítse,

tsí nà nya íbàɖí tsítse kãdzú.

Ńnɛ̀ ní, èmi, Ɔ̀ɖáyé-ɛ̀ɛ, ǹ tsã̀ɛ́ náàŋírĩ-àdzɔ́rɛ̃̀-ɛ̀ɛ ŋa,

tsí tse àɖɛ̃́ ɖà néwo fɛ́ɛ, tsí ń múɛ dzɛ ólú,

tsí ó tse tsí ayè lákṹ-kã̀ wà tɛ́ɛ#ɛ́.”#1:9 Ìwé-Orĩ ŋa 45:7-8 (Psaumes 45:7-8)

10Tsí ó tɔ́ fɔ̀ fú Ɔma bíbí‐ɛ̀ ró ní:

“Ɔlɔ́dzɔ́, ìwɔ ní ɖá iŋɛ́ ɔ̀kã̀lɔ́ɔ̀kã̀ kpó ńǹkpìnkpìlɛ̀#ɛ́.

Ò mú ɔwɔ́-ɛ̀ɛ, tsí ń tse ilɛ̀ òŋu ìgbèrí.

11Iŋɛ́ nyɛ̀ŋɛ̀ ŋa nákó wáa ra kpó.

Ó ɖi, ìwɔ òŋu, ò wà si títí lɔ náàrìtã́.

À nákó gbó, tsí ya kpó nyɛ́gbɛ̃́nyɛ́gbɛ̃́

kíbí ìwɔ̀ra gbígbó bɛ́,

12tsí nàa kpa ŋá ɖé, tsí kpàrɔ̀ ŋá

kíbí à náa kpa ìwɔ̀ra ɖé, tsí kpàrɔ̀ɔ́ bɛ́#ɛ́.

Ó ɖi, ìwɔ òŋu, ò kàkó kpàrɔ̀ láyé,

àyɛ̀-ɛ̀ɛ kò nɛ́ ìkpàkũ.”#1:12 Ìwé-Orĩ ŋa 102:26-28 (Psaumes 102:26-28)

13Ó ɖi, kò fɔ̀ fú adzítsɛ́-ɔ̀rɔ̃-kã̀ wòrí ní:

“Wáa dzokó náàwóòtã́-mi,

títí n mú ɔ̀tɛ̀-ɛ̀ɛ ŋa tsã́lɛ̀,

tsí o mú ɛsɛ̀ lé ńǹtá-ŋa.”#1:13 Ìwé-Orĩ ŋa 110:1 (Psaumes 110:1)

14Adzítsɛ́-ɔ̀rɔ̃ ŋa òŋu#ɛ́, à wà tsitsɛ́ fú Ɔ̀ɖáyé, tsí wà sɛ̃̀ɛ̃́ gé ni. Ɔ̀ɖáyé náa wà bɛ̀ ŋá wá ńǹtalɛ̀#ɛ́ fú ɛnɛ yèé ŋa nákó gbà là#á, tsí ká wáa mɔ́wɔ́ gbè fú ŋa.

Currently Selected:

Hèbérù ŋa 1: ngl

Highlight

Copy

Compare