Gàlátì ŋa 5

Kírísítò gbà wá dzɔ̀ɔ́, tsí àa rí ayè

1Kírísítò gbà wá dzɔ̀ɔ́ náàtsùgbée àa kó rí ayè ìɖéǹɖè ni. Ńbɛ̀ɛ́, è náa wà nɔ́wɔ́ nɔ́wɔ́ si. È máa dzɛ́, tsí e sɛ̃̀ ɖi arú ró, tsí ká mú ɛ̀ŋà si nɛ́sɛ̀ fú ŋɛ́.

2Èmi, Kpɔ́lù, ǹ wà fɔ̀ɔ́ fú ŋɛ́ ní: Bí ó dzɛ́ ní è dzɛ́, tsí à ɖákó† fú ŋɛ́ kíbí ó wà nórò-ɔma-Ìyúɖà† ŋa#á, iŋɛ́ yèé Kírísítò tse#ɛ́, èrè-kã̀ kpókpó kò wà ńnɛ̀ fú ŋɛ́. 3Ǹ sɛ̃̀ wà fɔ̀ɔ́ ró ní ɔ̀nyà ɔ̀kã̀lɔ́ɔ̀kã̀ kpókpó, bí ó dzɛ́, tsí à ɖákó fúu, ó wà ní ɛnɛ nyɛ̀ŋɛ̀ kó rɛ̃̀ si nɛ́kpa-Mɔ̀ɔ́sè† dzálɛ̀ títí kó máa bɔ ɔ̀kã̀ kpókpó gìɖì. 4Ɛ̀ŋɛ yèé ŋa wà wò ní e rɛ̃̀ si nɛ́kpa-Mɔ̀ɔ́sè, tsí Ɔ̀ɖáyé kó gbà ŋɛ́ nɔ́ɔ̀nyà-atsòtítɔ́ nódzú-ara‐ɛ̀#ɛ́, kíbí è wà wò bɛ́ɛ̀#ɛ́, ó tse tsí Kírísítò kò tse ɔ̀kã̀ntso bá ŋɛ́ si ró. Tsí ore-ɔ̀fɛ́-Ɔ̀ɖáyé gbo kò wà bá ŋɛ́ si ró. 5Ó ɖi, àwa òŋu, àa nɛ́ àkaralé si ńǹtá-Kírísítò, tsí módzú si nɔ́ɔ̀nà si ní Ɔ̀ɖáyé nákó gbà wá nɔ́ɔ̀nyà-atsòtítɔ́ nódzú-ara‐ɛ̀. Mímí-Ɔ̀ɖáyé† ní tse tsí odzú-wa wà nɔ́ɔ̀nà si bɛ́ɛ̀#ɛ́. 6Tsí kíbí Yèésù Kírísítò tse ɔ̀kã̀ntso bá wa si#ɛ́, iŋɛ́ yèé kpã́dzú#ɛ́, kò tsi afɔ̀-ká ɖákó nàmí ká máa ɖákó ni. Iŋɛ́ yèé kpã́dzú#ɛ́ ní wà dzɛ́ ní àa kó nɛ́ àkaralé si ńǹtá-Kírísítò, tsí àkaralé-wa#á kó tse tsí àa kó wà nɛ́ àmúɖɔ̃̀ fúnɛ#ɛ́.

7È wà fa ɔ̀nà#á làkóò rere dzɔ̀ɔ́ nɔ̀! Nɛ̀ɛ́ wáa ɖí ɔ̀nà fú ŋɛ́ ní ɛ̀ŋɛ kó máa gba òtítɔ́, tsí ń tsitsɛ́ tse ró ná? 8Iŋɛ́ yèé ŋa à wà fɔ̀ fú ŋɛ́, tsí wà ń bàdzɛ́ etí fú ŋɛ́#ɛ́, iŋɛ́ nyɛ̀ŋɛ̀ ŋa kò ti ńɖi-Ɔ̀ɖáyé, ɛnɛ yèé wà kpè ŋɛ́ ní ɛ̀ŋɛ kó wáa gba òtítɔ́#ɛ́. 9Onùgbó ŋa náa fɔ afɔ̀-kã̀ ní: Ɔ̀tsɛ̃̀ oɖé tsígíɖí gé ní à náa ń ròmá àkàmì-ɔkà-kpɔ̃́nɔ́, tsí náa kɛ́ kpó wùdzèè#ɛ́. 10Ó ɖi èmi òŋu, Ɔlá-wa tse tsí ǹ nɛ́ àkaralé si ńǹtá-ŋɛ́ si ní è kàkó tsèsérè-kã̀, tsí kó gbà níìkã̀ fú tèmi. Ó ɖi, ɛnɛ yèé wà mú ìsérè-ŋɛ́ ŋa ròmá#á, Ɔ̀ɖáyé nákó kpɛdzɔ́ báa. Bí ɛnɛ nyɛ̀ŋɛ̀ wà nɔ́ɔ̀kã̀lɔ́ɔ̀kã̀ kpókpó gìɖì, Ɔ̀ɖáyé nákó kpɛdzɔ́ báa, tsí ɖáàbi fúu kpoŋu ni.

11Ìnàbí-mi ŋa, èmi òŋu, ǹ kò wà dzíkɔ̀ fúnɛ ró ní ká wà ɖákó. Ó má dzɛ́ ní ǹ wà dzíkɔ̀ fúnɛ bɛ́ɛ̀, ɔ̀nyà ŋa kàá wà tsoró bá mi ró, tsí ikɔ̀ yèé ǹ wà dzɛ́ fúnɛ gbo ti nára-kíbí à kã Kírísítò si ńǹtá-egi-ìɖáàgàlàdzà†, tsí ó kú#ɛ́, ikɔ̀#ɛ́ gbo kàá wà ɖɔ́kpɔ fú ŋa ró. 12Tsí ǹ wà wò ní ɛnɛ yèé ŋa wà bàdzɛ́ etí fú ŋɛ́#ɛ́, ká wà tseé lárè bɛ́ɛ̀ ró. Bí ó ɖé fú ŋa gìɖì, ká fɔ̀, tsí ká ya ŋá gbo.

È fú Mímí-Ɔ̀ɖáyé nɔ́ɔ̀nà, tsí kó wà gbɛ̃́ ŋɛ́

13Ìnàbí-mi ŋa, kíbí Ɔ̀ɖáyé kpè ŋɛ́#ɛ́, ó kpè ŋɛ́, àtsùgbée e rí ayè ni. Ó ɖi, kíbí ó kpè ŋɛ́ ní ɛ̀ŋɛ kó rí ayè#ɛ́, kó máa dzì ńkìlíkìlí fú ŋɛ́, tsí e wà tse si ńǹtá-awù-kíbí è yà gbà#á. Kà kàa bɛ́ɛ̀, ó wà ní e wà nɛ́ àmúɖɔ̃̀ fú ara-ŋɛ́ ŋa, tsí kó tse tsí e wà dzítsɛ́ fúnɛ náàŋírĩ-ara-ŋɛ́ ŋa náàrì nyíwò. 14Ǹ wà wí bɛ́ɛ̀, iŋɛ yèé tse#ɛ́, ɛkpa-Ɔ̀ɖáyé†#ɛ́ kpó, à kpérí‐ɛ̀ si ńnɔ́-oŋù-afɔ̀ ɔ̀kã̀ntso. Oŋù-afɔ̀#ɛ́ ní wà dzɛ́ ní: “Ó wà ní o nɛ́ àmúɖɔ̃̀ fú enìkéèdzì-ɛ̀ɛ kíbí nà nɛ́ fú ara-ɛ̀ɛ#ɛ́.”#5:14 Ìwé-Orò ŋa 19:18 (Lévitique 19:18) 15Ó ɖi, kíbí è wà lìlò kíbí ɛrã-kóko ŋa, tsí è wà tse hã̀ã́nyì hã̀ã́nyì fú ara-ŋɛ́ ŋa#á, ó wà ní e tsɔ́ éwo-ara-ŋɛ́. Bí kò tsi bɛ́ɛ̀, è nákó mú ara-ŋɛ́ ŋa tsɛ̀rá.

16Ǹ bòkó wíìnyɛ̀-kã̀ fú ŋɛ́ ró. Òŋu ní wà dzɛ́ ní: È kɔ ara-ŋɛ́ dzɔ̀ɔ́ fú Mímí-Ɔ̀ɖáyé†, tsí kó wà gbɛ̃́ ŋɛ́. Bí è tse bɛ́ɛ̀, è kàkó wà tse si ńǹtá-awù-kíbí è yà gbà#á ró gìɖì. 17Ó ɖi, kíbí ɔ̀nyà yà gbà#á, awù‐ɛ̀ ŋa kà gbé àdzɔ́ bá awù-Mímí-Ɔ̀ɖáyé. Tsí awù-Mímí-Ɔ̀ɖáyé gbó kà gbé àdzɔ́ bá awù-kíbí ɔ̀nyà yà gbà#á. Ó ɖi, àŋa méèdzì méèdzì#ɛ́, à náa wà dzà títí è kàkó nyáa tse awù tɛ̀ŋɛ ká-ŋɛ́. 18Ó ɖi, bí Mímí-Ɔ̀ɖáyé wà ńǹtá-ŋɛ́ si, tsí wà gbɛ̃́ ŋɛ́#ɛ́, ɛkpa-Mɔ̀ɔ́sè† kò nɛ́kpá si ńǹtá-ŋɛ́ ró.

19Kíbí ɔ̀nyà yà gbà#á, è màá rere nɔ̀. Náa sɔ́nɛ, tsí à náa wà tse àlòwá, tsí wà lìlò wérewère ŋa gbo, tsí à náa wà tse bɛ́ɛ̀ náàrì nɛ́ anɔ́ nódzú, 20tsí à náa wà sɛ̃ iŋɛ gbo, tsí wà tsogù gbo, tsí wà nyanɛ kãdzú gbo, tsí wà rã́ã̀rã̀ gbo. Tsí à náa wà dzowú-nɛ gbo, tsí wà bínɔ́ gbo gé, tsí wà ɖugbã̀-nɛ gbo. Tsí à náa kpɛ̃́ si nɛ́gbɛ́ níìkã̀ níìkã̀ gbo, 21tsí odzú-nɛ náa kí ńǹtá-iŋɛ́-nɛ gbo si, tsí à náa wà mɔtí ŋɔ́ gbo, tsí wà dzɛ̀kũ ńŋɛ́ ɔ̀kã̀lɔ́ɔ̀kã̀ gbo, tsí wà tse iŋɛ́-àrɔ̀kpà-òmírɛ̃̀ ŋa gbo. Ǹ tɔ́ wà kã́rã́ ŋɛ́ ró kíbí ǹ ti fɔ̀ɔ́ fú ŋɛ́ wáa lɔ#ɛ́ ní: Ɛnɛ yèé wà lìlò-ìrɔ́-bɛ́ɛ̀ ŋa#á, ìɖì kàkó wáa wà fú ŋa nóyè-Ɔ̀ɖáyé†.

22Ó ɖi, bí Mímí-Ɔ̀ɖáyé wà ńǹtá-ɔ̀nyà-kã̀ si, tsí wà gbɛ̃́ɛ̃, náa nyàá ɖíre ńǹgbèngbé‐ɛ̀. Náa tse tsí ɛnɛ nyɛ̀ŋɛ̀ náa wà nɛ́ àmúɖɔ̃̀ fúnɛ, tsí náa wà náyè títɛ́ gbo si, tsí náa wà ńtútùúrɔ̀ gbo si, tsí náa wà nɛ́ àtɛ̀si gbo, tsí náa wà tse ore fúnɛ gbo, tsí náa wà tsɔ̀nyà gbo, tsí ɔ̀nyà ŋa náa nɛ́ àkaralé si ńǹtá‐ɛ̀ gbo, 23tsí ìlò‐ɛ̀ gbo kà le, tsí náa wà mú ara‐ɛ̀ gbo. Ɛkpa-kã̀ kò wà, tsí kɔ iŋɛ́ yèé ŋa nyí-kã̀ kpókpó ní kò sã̀.

24Ó ɖi, ɛnɛ yèé ŋa dzɛ́ ti Yèésù Kírísítò#ɛ́, ó wà kíbí à kpa awù-kíbí à yà gbà#á nóòkú si bɛ́ ni. À kò wà dzɛ́, tsí awù-kíbí à yà gbà#á kó wà gbɛ̃́ ŋa si ńbàɖí tsítse ró. 25Kíbí Mímí-Ɔ̀ɖáyé wà ńǹtá-wa si, tsí tse tsí àa wà náàyɛ̀ si#ɛ́, ó wà ní àa kó dzɛ́, tsí kó wà gbɛ̃́ wa gbo. 26Àa kó máa wà mú ara-wa ɖíre nódzú-ɔ̀nyà ŋa kíbí àa dzɛ́ iŋɛ́-kã̀, tsí àa kó máa wà ɖáfɔ̀ si náàŋírĩ-ara-wa ŋa, tsí iŋɛ́ yèé enìkéèdzì-wa ŋa gbo dzɛ́#ɛ́, kó máa wà kí nódzú fú wa.

Currently Selected:

Gàlátì ŋa 5: ngl

Highlight

Copy

Compare