2 Tɛ̀sàlòníkì ŋa 1
1
1Èmi, Kpɔ́lù òŋu Sìlásì má nára-Tìmɔ̀té, àwa ní wà tse ìwé yèé bɛ́ fú ɛgbɛ́-Kírísítò yèé wà ńǹlú-Tɛ̀sàlòníkì#ɛ́. È dzɛ́ ti Ɔ̀ɖáyé Boba-wa, tsí dzɛ́ ti Yèésù† Kírísítò† Ɔlá-wa gbo. Àa wà kí ŋɛ́ kpó. 2Ɔ̀ɖáyé Boba-wa òŋu Yèésù Kírísítò Ɔlá-wa méèdzì ká tse ore-ɔ̀fɛ́ fú ŋɛ́, tsí ká fú ŋɛ́ ńtútùúrɔ̀ gbo.
Kpɔ́lù ŋa wà ɖɔ́kpɛ́ fú Ɔ̀ɖáyé ní ɛnɛ-Tɛ̀sàlòníkì ŋa wà ɖonùgbó ńnɔ́-àkaralé yèé à nɛ́ si ńǹtá-Yèésù#ɛ́
3Ìnàbí-wa ŋa, bí àa wà wúùre fú Ɔ̀ɖáyé#ɛ́, ó dzɔ ní àa kó wà ɖɔ́kpɛ́ fúu fú ŋɛ́. Ó dzɛ́ iŋɛ́-ire ní àa kó ɖɔ́kpɛ́ fúu bɛ́ɛ̀, iŋɛ́ yèé tse#ɛ́, àkaralé yèé è nɛ́ si ńǹtá-Yèésù#ɛ́, ó wà ta ogùgù múlɛ̀ máa, tsí àmúɖɔ̃̀ yèé ɛnɛ kṹnukṹ nɛ́ fú enìkéèdzì‐ɛ̀ gbo#ɛ́, òŋu gbo wà kpɔ̀ máa. 4Kíbí ó dzɛ́ bɛ́ɛ̀#ɛ́, bí àwa gbo, àa lɔ nɛ́gbɛ́-Ɔ̀ɖáyé ŋa, tsí ká káà wíìnyɛ̀ fú ɔ̀nyà ŋa#á, àa náa wà mú ŋɛ́ nya akpá. Àa náa wà wí fú ŋa ní bí ɔ̀nyà ŋa gìɖì wà tsoró bá ŋɛ́, tsí wà mú ŋɛ́ réré#ɛ́, ɛ̀ŋɛ náa gbódzú, tsí nɛ́ àkaralé si ńǹtá-Yèésù si ró gé ni.
5Kíbí è wà ńǹréré si bɛ́ɛ̀, tsí è gbódzú ńnɛ̀ si#ɛ́, ó nyà ɖíre ní Ɔ̀ɖáyé kà kpɛdzɔ́-òkṹnù. Ńbɛ̀ɛ́, nákó fɔ̀ ní ɛ̀ŋɛ dzɔ ní òŋu kó gbà ŋɛ́ si ńbí òŋu wà dzoyè#ɛ́. Ó ti wà dzoyè si ńǹtá-ŋɛ́ gìɖì ná. Ńnɛ̀ ní ɔ̀nyà ŋa wà mú ŋɛ́ réré#ɛ́. 6Tsí kíbí ó dzɛ́ ní Ɔ̀ɖáyé òŋu kà kpɛdzɔ́-òkṹnù#ɛ́, nákó wáa mú ìréré má ìréré fú ɛnɛ yèé wà tse bá ŋɛ́ ŋa#á. 7Tsí ɛ̀ŋɛ yèé ŋa wà ńǹréré si báàyí#ɛ́, nákó wáa tse tsí ɛ̀ɖɔ̃̀-ŋɛ́ nákó dzilɛ̀, tsí nákó tse tsí ɛ̀ɖɔ̃̀ tiwa gbo nákó dzilɛ̀.
Iŋɛ́ nyɛ̀ŋɛ̀ ŋa#á nákó wáa tse nɔ́dzɔ́ yèé Yèésù nákó ti nɔ́ɔ̀rɔ̃ wá nódzú-ɔ̀nyà kpó#ɛ́ ni. Ńǹwèrè nyɛ̀ŋɛ̀#ɛ́, nákó wá òŋu adzítsɛ́-ɔ̀rɔ̃† ŋa, olíkpá ŋa. 8Ńná gbígbã̀ lìlìlì ní nákó wà, tsí wá#á. Tsí ɛnɛ yèé ŋa kà mú Ɔ̀ɖáyé kpe iŋɛ́-kã̀, tsí à kà gba ikɔ̀ ɖíɖɔ̃̀ ti nára-Yèésù Ɔlá-wa gbo gbɔ́, tsí ká ń tsitsɛ́ tse#ɛ́, nákó wáa sã ɛŋɛ̀ fú ɔ̀nyà-ìrɔ́-bɛ́ɛ̀ ŋa. 9Ɛŋɛ̀#ɛ́ ní dzɛ́ ní à nákó lɔ ńǹréré-àrìtã́#á. À nákó kí ńǹɖì dzídzɛ̃̀ fú Ɔlá-wa, tsí à kàkó nyáa rí mímá‐ɛ̀ òŋu ikpá‐ɛ̀ gìɖì gbo láyé.
10Nɔ́dzɔ́-ɔdzɔ́ nyɛ̀ŋɛ̀#ɛ́, ɔ̀nyà ŋa nákó ríi, tsí à nákó kí dzã̀maa. Tsí à nákó wà nyɛ̀ɛ́, àtsùgbé-iŋɛ́ tsítse‐ɛ̀ ŋa, iŋɛ́ yèé ó tse fú ɛnɛ yèé ŋa dzɛ́ tɛ̀ɛ̀, tsí gbàá gbɔ́#ɛ́. Tsí ɛ̀ŋɛ òŋu, è nákó wà náàŋírĩ-ɛnɛ nyɛ̀ŋɛ̀ ŋa, iŋɛ́ yèé tse#ɛ́, afɔ̀ yèé àa wáa fɔ̀ fú ŋɛ́#ɛ́, è gbàá gbɔ́.
11Àtsùgbée bɛ́ɛ̀ ní àa náa wà wúùre fú Ɔ̀ɖáyé fú ŋɛ́#ɛ́, tsí àa náa wà bèrèé ní kó rí ìgbèngbé-ŋɛ́, tsí kó fɔ̀ ní è dzɔ ní òŋu kó kpè ŋɛ́ ní tòŋu ŋa. Tsí iŋɛ́-ire yèé è wà wò ní e tse#ɛ́, kó fú ŋɛ́ ńkpá, tsí e nyáa tseé. Tsí kó fú ŋɛ́ ńkpá gbo, tsí itsɛ́ yèé è wà tse kíbí è gba Yèésù gbɔ́#ɛ́, kó dzɛ́ itsɛ́ gbuɖu. 12Àa náa wà wúùre bɛ́ɛ̀, tsí ká wà nyɛ Yèésù Ɔlá-wa náàtsùgbé-ŋɛ́. Tsí òŋu gbo kó wà nyɛ̀ ŋɛ́. Kíbí ó dzɛ́ ní Ɔ̀ɖáyé òŋu Yèésù Kírísítò Ɔlá-wa náa tse ore-ɔ̀fɛ́ fú ŋɛ́#ɛ́, à nákó tse iŋɛ́ ŋa#á kpó fú ŋɛ́ ìɖéǹɖè.
Currently Selected:
2 Tɛ̀sàlòníkì ŋa 1: ngl
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.