1 Tɛ̀sàlòníkì ŋa 2

1Ìnàbí-wa ŋa, ɛ̀ŋɛ ká-ŋɛ́, è ti mà ní kíbí àa wá ńɖi-ŋɛ́#ɛ́, kò tsi itsɛ́ nákpo ní àa wáa tse#ɛ́. 2Tã́ná ká tó ńɖi-ŋɛ́#ɛ́, è mà ní àa gbé ńǹlú-Fìlíkpò. Tsí kíbí àa wà bɛ̀ si#ɛ́, à mú wa réré, tsí lò wá ńǹlòkíìlò gbo. È ti gbɔ́ɔ nɔ̀! Kíbí ó dzɛ́ gìɖì ní àa réré bɛ́ɛ̀#ɛ́, àa sì wá ńɖi-ŋɛ́. Tsí kíbí àa tó ńɖi-ŋɛ́#ɛ́, ɔ̀nyà kpíkpɔ̀ kò wà dzɛ́ fú wa gìɖì ɖã́wò ní àa kó dzíkɔ̀-Ɔ̀ɖáyé fú ŋɛ́. Ó ɖi, Ɔ̀ɖáyé mú ɛ̀ɖɔ̃̀ kã̀ wá ní àa kó dzɛ́ɛ.

3Tsí kíbí àa náa wà wíìnyɛ̀ fúnɛ#ɛ́, òtítɔ́ ní àa náa wà wí#ɛ́, àa kà tsàá. Àa náa wà wíìnyɛ̀ fúnɛ òŋu inɔ́ mímá ni. Tsí àa kà wà wò ní àa kó rúnɛ gbo. 4Kà kàa bɛ́ɛ̀, àa náa wà wíìnyɛ̀, tsí àa kó dzɔdzú-Ɔ̀ɖáyé ni. Ɔ̀ɖáyé òŋu tse àɖã́wò fú wa, tsí kó rí ní àkaralé wà ńǹtá-waà? Tsí kíbí ó rí bɛ́ɛ̀#ɛ́, ó mú ikɔ̀-Yèésù bɔwɔ́-wa ní àa kó dzɛ́ɛ fúnɛ wérí. Ńbɛ̀ɛ́, àa kò wà wíìnyɛ̀, tsí àa kó dzɔdzú-ɔ̀nyà. Ɔ̀ɖáyé ní àa wà wò ní àa kó dzɔdzú#ɛ́. Òŋu ní náa kpa inɔ́-wa wò, tsí kó ma ìsérè-wa#á.

5Kíbí àa tó ńɖi-ŋɛ́#ɛ́, è mà ní àa kò ɖɔ̃ arũ fú ŋɛ́ wòrí, tsí è mà gbo ní àa kò ɖinɔ́, tsí ń wíìnyɛ̀ fú ŋɛ́, tsí ká dzèrè ńǹtá-ŋɛ́. Ɔ̀ɖáyé òŋu ká‐ɛ̀ mà. 6Tsí àa kò wò ní ɛ̀ŋɛ gbo, ɛnɛ-àtíbɔ̀ ŋa gbo, e wà nyɛ̀ wá. 7Kíbí ó dzɛ́ gìɖì ní àa dzɛ́ adzítsɛ́-Kírísítò ŋa#á, ńǹwèrè yèé àa gbé ńɖi-ŋɛ́#ɛ́, àa má nyáa kpɛ̀tsɛ fú ŋɛ́ nɔ̀! Ó ɖi, àa tédzú gbé bá ŋɛ́ òŋu ɛ̀ɖɔ̃̀ tútù. Kíbí ìnà-olɔ́ma-kã̀ náa wà fú ɔma‐ɛ̀ nɔ́mɔ́, tsí náa wà banɛ́‐ɛ̀ gbà#á, bɛ́ɛ̀ ní àa wà fú ŋɛ́#ɛ́. 8Àa nɛ́ àmúɖɔ̃̀ fú ŋɛ́ títí ó wù wá gìɖì ní àa kó mú ara-wa kpó akpá akpá, ɛsɛ̀ ɛsɛ̀ má ikɔ̀-Ɔ̀ɖáyé#ɛ́ fú ŋɛ́. Ó ɖi, è ɖi àrínódzú-wa gìɖì ni.

9Ìnàbí-wa ŋa, è kò tédzú kíbí àa tsitsɛ́ gba#á òŋu awɔ̀ yèé wà ńnɛ̀#ɛ́ɛ̀? Àa tsitsɛ́ nóòsã́ gbo, nóoru gbo, àtóoríi àa kó máa dzɛ́ arù, tsí kpa ɔ̀nyà-kã̀. Àa náa wà tsitsɛ́ bɛ́ɛ̀, tsí wà dzíkɔ̀-Ɔ̀ɖáyé fú ŋɛ́ gbo. 10Ɛ̀ŋɛ gbo, Ɔ̀ɖáyé gbo, è nákó nyáa nya àyídzá-kíbí àa gbé náàŋírĩ-ŋɛ́ gbà#á. Ɛ̀ŋɛ olí-Yèésù ŋa, àa gbé náàŋírĩ-ŋɛ́ kíbí ó dzɔ ní ɔ̀nyà kó gbé gbà#á. Àa kò tse íbàɖí-kã̀ bá ŋɛ́, tsí ɔ̀nyà-kã̀ gbo kó nyáa ɖáàbi fú wa. 11Tsí è ma kíbí àa wà fú kṹnukṹ gbà#á gbo. Àa tse fú ŋɛ́ kíbí boba náa tse fú ɔma‐ɛ̀ gbà#á ni. 12Àa náa wà ɖáàmí le ŋɛ́, tsí àa náa wà wí fú ŋɛ́ gbo rere ní ìgbèngbé-ŋɛ́ kó máa mú Ɔ̀ɖáyé dzanɔ́. Òŋu ní wà kpè ŋɛ́, tsí e rí lílákṹ-oyè‐ɛ̀#ɛ́.

13Nóláànkéèdzì ró#ɛ́, àa náa wà ɖɔ́kpɛ́ fú Ɔ̀ɖáyé náàrìmáa mí, iŋɛ́ yèé tse#ɛ́, kíbí àa dzíkɔ̀-Ɔ̀ɖáyé fú ŋɛ́#ɛ́, è kò gbàá kíbí afɔ̀-arũ-ɔ̀nyà. È gbàá kíbí afɔ̀ yèé ti ńɖi-Ɔ̀ɖáyé#ɛ́ ni. Ìɖéǹɖè#ɛ́, afɔ̀#ɛ́ ti ńɖi-Ɔ̀ɖáyé, tsí ó wà tsitsɛ́ ńǹsérè-ɛ̀ŋɛ olí-Yèésù ŋa.

14Ìnàbí-wa ŋa, iŋɛ́ yèé ŋa wà tse ńɖi-ŋɛ́ báàyí#ɛ́, à ti tse wáa lɔ ńɖi-ɛgbɛ́-Kírísítò yèé ŋa wà nérè-Yùɖéyà#á, tsí tse ɔ̀kã̀ntso bá Yèésù Kírísítò si, tsí wà sɛ̃ Ɔ̀ɖáyé#ɛ́. Kíbí ɛnɛ tiŋɛ́ ŋa wà mú ŋɛ́ réré#ɛ́, bɛ́ɛ̀ ké ní ɔma-Ìyúɖà† ŋa gbo wà mú ɛgbɛ́-Kírísítò ŋa gbo réré bɛ̀#ɛ́. 15Dzɔ̀ɔ́ dzɔ̀ɔ́#ɛ́, ɔma-Ìyúɖà ŋa, à kpa agbáfɔ̀-Ɔ̀ɖáyé fɔ̀† ŋa nóòkú, tsí à wáa kpa Yèésù Ɔlá-wa gbo. Tsí báàyí gbo ró#ɛ́, à nyí kã̀ wá, tsí wà lé wa, tsí wà lò wá ńǹlòkíìlò. À wà tse bɛ́ɛ̀, tsí Ɔ̀ɖáyé bínɔ́ fú ŋa, tsí à ɖi ɔ̀tɛ̀-ɔ̀nyà kpó. 16À náa wà ɖí ɔ̀nà fú wa ní àa kó máa dzíkɔ̀-Ɔ̀ɖáyé fú ɛnɛ-àtíbɔ̀ ŋa, ɛnɛ yèé kò dzɛ́ ɔma-Ìyúɖà ŋa#á. Àa má nyáa dzíkɔ̀#ɛ́ fú ŋa#á, Ɔ̀ɖáyé má gbà ŋá là. Íbàɖí-ìkã́ã̀nyì yèé à wà tse nyɛ̀ŋɛ̀#ɛ́, òŋu ní mú èkèlè-kã̀ yɔ#ɛ́. Ó ɖi báàyí#ɛ́, Ɔ̀ɖáyé nya inɔ́ bíbí‐ɛ̀ ŋà ŋá ńǹkɛ̀ɛ́.

Àmì-ɛnɛ-Tɛ̀sàlòníkì ŋa wà kpa Kpɔ́lù ŋa, tsí à wà wo ká rí ŋa

17Ìnàbí-wa ŋa, kíbí àa ǹɖe ńɖi-ŋɛ́ náàrìmódzúlé#ɛ́, kò kpɛ̃́ gé, tsí àmì-ŋɛ́ kpé wa kpíkpa. Ìsérè-wa kpó kí ńɖi-ŋɛ́ si gé ni. Ó ɖi, àwa ká-wa gé ní kò wà ńɖi-ŋɛ́#ɛ́. Àmì-ŋɛ́ wà kpa wá títí àa ɖìgírí ní àa kó sɛ̃̀ wáa rí ŋɛ́ ró. 18Kíbí àa wà wò ní àa kó wá ńɖi-ŋɛ́ ró#ɛ́, èmi, Kpɔ́lù ǹ rɛ̃ ɔ̀nà‐ɛ̀ láre gbà ogú, tsí Ètsù† náa wà ɖí ɔ̀nà fú wa gé ni.

19Nóòtítɔ́#ɛ́, nɛ̀ɛ́ àa módzú si nɔ́ɔ̀nà si fú ná? Nɛ̀ɛ́ wà mú ayè tɛ́ wa gbo ná? Ɛ̀ŋɛ ni. Ńǹwèrè yèé Yèésù Ɔlá-wa nákó wá#á, nɛ̀ɛ́ nákó tse tsí àa nákó nyáa ɖóro ńwádzú‐ɛ̀, tsí nyɛ ara-wa, tsí gba èrè-wa gbo ni ná? Ɛ̀ŋɛ ké ni. 20Ìɖéǹɖè#ɛ́, ɛ̀ŋɛ ní módzú-wa má#á, tsí tse tsí ayè gbo wà tɛ́ wa#á.

Currently Selected:

1 Tɛ̀sàlòníkì ŋa 2: ngl

Highlight

Copy

Compare