នាវនតើម 11
11
ជៃទុតព្រេសប្លឺវតានតុកប៝នបាបិល
1នោកកាល់អែនើសទឹងលែៈឞូនុយ្សតានែសនតូអ្យាទូនាវងើយទើម មឞើសងើយតឹមឞានឞាល់។ 2ជេសរីខាន់ពាង់នត្រើននតុកឞើសលោសនារ ត៝ត់តានតុកល៝ង់តាឞ្រីឆីនើរ ខាន់ពាង់គុជានប៝នតានៃ។ 3ខាន់ពាង់តឹមលាសនទ្រាង់ខាន់ពាង់នើម៖ “ហោៈឞ៝ន់ លែវឞាល់ម៝ននែសគុច អ៝ន់ពាង់មាក្រ៝សអ៝ន់ទាង់”។ ជេសរីខាន់ពាង់ឆ៝ៈនែសអីគុចនៃមាជានជៃ ឆ៝ៈចាយក្រាក់មាជាននទើលឹរមាក្រេប។ 4ជេសរីខាន់ពាង់លាស៖ “អ៝ន់ឞ៝ន់ជានទូប៝នក្វ៝ង់ ជេសរីជានទូមល៝ម់ជៃអ៝ន់ទុតព្រេសប្លឺវត៝ត់អាត្រោកងាន់ អ៝ន់ឞូលឺឞ៝ន់ រីមើឞ៝ន់មោអោសចាសច្រាយលាមនែសនតូអ្យា”។ 5ជេសខាន់ពាង់ជានជៃទុតព្រេសអីនៃ ឞ្រាសយេហោវា ជុរអ្វាញ់ប៝ន នទ្រែលមាជៃព្រេសអីឞូនុយ្សជានអីនៃ 6ជេសរីឞ្រាសយេហោវា លាសអេងពាង់នើម៖ “យី! ខាន់ពាង់អ្យាជេងទូមពោលទើម មឞើសងើយទូនាវងើយទើមដ៝ង់ លាសឞ្លាវជានអ្យាអាបៃរី តាជឹតនាប់តៃខាន់ពាង់ទើយជានដ៝ង់ម៝សនទើអីខាន់ពាង់អុច។ 7លាសនទ្រីឞ៝ន់ជុរជានវិលើយនាវងើយខាន់ពាង់ប៝ត់ លើយហោមអោសអ៝ន់ខាន់ពាង់តឹមគឹតងើយជឹតនាប់តៃ”។ 8ជេសរីឞ្រាសយេហោវា អ៝ន់ខាន់ពាង់ចាសច្រាយឞាល់ទូងាយតាៈឞើសនតុកអីនៃ ទឹងគែសលាមនែសនតូអ្យា នទ្រីខាន់ពាង់ឞាសជានប៝នតានតុកអីនៃជឹត។ 9កើតនទ្រីទឹងឞូតេៈរាញាប៝នអីនៃលាស បាបីល រាឞ្លាងលាស«វិ» យ៝រលាសតានតុកអីនៃអីឞ្រាសយេហោវា ជានវិនាវងើយអ៝ន់ឞូនុយ្សទឹងលែៈតានែសនតូអ្យាងើយតឹមតីសឞាល់ អ៝ន់ឞូនុយ្សចាសច្រាយឞាល់តាៈឞើសនតុកនៃទឹងគែសលាមនែសនតូអ្យា។
នាវងក៝ចរាន៝យទែសអីអូចែអាឞ្រាហាម់
10អ្យានាវងក៝ចរាន៝យទែសឆិម ។ ត៝ត់ឆិម គែស ១០០ នាម់ពាង់ឞាៈអារពាក់ឆាត #១១:១០៖ ទឹងលែៈនាវតាងក៝ចយៅអ្យាលាសមោមឞើសនហេលលាសឞូអូរ លែៈឞូនុយ្សនៃជេងឞូក្លោទាទេ។ នាម់អីនៃលែៈគែសឞារនាម់ ជេសទាកលេងទាកទើងក្វ៝ង់អីនៃនើស។ 11ជេសពាង់ឞាៈអារពាក់ឆាត រី ពាង់រេសគែស ៥០០ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 12ត៝ត់អារពាក់ឆាត គែស ៣៥ នាម់ ពាង់ឞាៈឆេលាស ។ 13ជេសពាង់ឞាៈឆេលាស ពាង់រេសគែស ៤០៣ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 14ត៝ត់ឆេលាស គែស ៣០ នាម់ ពាង់ឞាៈអេបែរ ។ 15ជេសពាង់ឞាៈអេបែរ រី ពាង់រេសគែស ៤០៣ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 16ត៝ត់អេបែរ គែស ៣៤ នាម់ ពាង់ឞាៈផេលេក ។ 17ជេសពាង់ឞាៈផេលេក រី ពាង់រេសគែស ៤៣០ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 18ត៝ត់ផេលេក គែស ៣០ នាម់ ពាង់ឞាៈរេអូ ។ 19ជេសពាង់ឞាៈរេអូ រី ពាង់រេសគែស ២០៩ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 20ត៝ត់រេអូ គែស ៣២ នាម់ ពាង់ឞាៈឆេរូក ។ 21ជេសពាង់ឞាៈឆេរូក រី ពាង់រេសគែស ២០៧ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 22ត៝ត់ឆេរូក គែស ៣០ នាម់ ពាង់ឞាៈនាហោរ ។ 23ជេសពាង់ឞាៈនាហោរ រី ពាង់រេសគែស ២០០ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 24ត៝ត់នាហោរ គែស ២៩ នាម់ ពាង់ឞាៈថេរា ។ 25ជេសពាង់ឞាៈថេរា រី ពាង់រេសគែស ១១៩ នាម់ជឹត នហ៝ឞាៈអ៝សឞាៈក៝ន គែសក៝នឞូអូរក៝នឞូក្លោដ៝ង់។ 26ត៝ត់ថេរា គែស ៧០ នាម់ ពាង់ឞាៈអាប់រាម ឞាៈនាហោរ នទ្រែលមាឞាៈហារាន ។
27អ្យាជេងនាវងក៝ចរាន៝យទែសថេរា ។ ថេរា ឞាៈអាប់រាម ឞាៈនាហោរ នទ្រែលមាឞាៈហារាន ។ ជេសរីហារាន ឞាៈលុត ។ 28ហារាន ខឹតតាប៝នអូរ តាឞ្រីខាលដេ នតុកឞ្រីពាង់នើម ទោលអីឞឹពាង់ថេរា ហោមរេសដ៝ង់។ 29អាប់រាម នទ្រែលមានាហោរ អីអ៝សពាង់រី ខាន់ពាង់ឆ៝ៈអូរ។ អីអូរអាប់រាម រាញាឆារាយ អីអូរនាហោរ រីរាញាមីលកា អីក៝នហារាន ហារាន អីរីអីឞឹក៝នឞូអូរមីលកា នទ្រែលមាអីសកា ។ 30ល៝ង់ឆារាយ អីអូរអាប់រាម នៃ ជេងឞូអូរមោអោសឞាៈក៝ន ពាង់មោគែសក៝នវាៈ។#១៦:១-២; ១៧:១៥-១៧
31ជេសរីថេរា លែវអាប់រាម អីក៝នពាង់នើមរី នទ្រែលមាអីឆៅលុត ពាង់រី អីក៝នហារាន រីនើស ជេសរីឆារាយ អីមាន់ពាង់នើមរីដ៝ង់ ខាន់ពាង់លោសតាៈឞើសប៝នអូរ ឞ្រីខាលដេ នៃ ហាន់ជឹតឞ្រីកានាន ។ ត៝ត់តាប៝នចារាន រី ខាន់ពាង់ជាននតុកមាគុតាប៝ននៃ អេអោសត៝ត់តាឞ្រីកានាន ។#យោឆ ២៤:២; នេហ ៩:៧ 32ថេរា រេសគែស ២០៥ នាម់ ជេសរីខឹត ពាង់ខឹតតាប៝នចារាន នៃ។
Currently Selected:
នាវនតើម 11: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.