Loma 8
8
Kwikala umi kupitila mu maka yakwe Mupasi Wamuzilo
1Ndakai pasi kuvunukwa kuli yano ailundanya kuli Klistu Yesu. 2Pano maka ya Masunde yakwe Mupasi Wamuzilo yao akatuletela umi muli Klistu Yesu, yatukulula kwi sunde lya maifyo ni mfwa. 3Leza wene watacita vino Masunde yakwe Mose yaposiwe kucita pamulandu wakuti miyele ya untunze yaya itonte. Wene wavunwike iifyo mu untu apa kutuma Mwana wakwe, uwizile mu musango wa untu wakwe sweswe swe yakaifya, pakuti aiize aipeele kuya impolelwa ya kukulula antu ku maifyo yao. 4Leza wacisile cico pakuti vino Masunde yalondanga ukuti antu yacite vifikiliziwe ningo munotuli swe muno tusyalondela ivya untunze lelo tukatungululwa na Mupasi Wamuzilo. 5Yano akaikala ndi vino untunze wao ukayanena ukwikala yene yakaomba vino mili yao ikalonda. Lelo yano akaikala ndi vino Mupasi Wamuzilo akayanena kwikala yene milimo yao ili wakwe vino Mupasi Wamuzilo akalonda. 6Kutungululwa ni vilondwa vya mwili ukuiletelela imfwa, kutungululwa na Mupasi Wamuzilo kwene kukatuletela umi nu mutende. 7Pano umuntu akaya umwanisi wakwe Leza ndi akutungululwa ni vilondwa vya mwili wakwe, pano wene asyayela Masunde yakwe Leza, nupya atangayela. 8Yano akacita kulonda kwa mili yao yatangazanzya Leza. 9Lelo musilondela vino mwili ukamunena kucita lelo mukalondela vino Mupasi Wamuzilo akamunena kucita pano Mupasi Wamuzilo akaikala munomuli. Lelo umuntu wino atakweti Mupasi wakwe Klistu, wene asi wakwe Klistu. 10Lelo ndi Klistu akaikala munomuli, nanti angala imili inu ilafwa pamulandu wa maifyo, ale Mupasi Wamuzilo amamupeela umi pano mwacitwa kuya aololoke pa manso yakwe Leza. 11#1Kol 3:16 Ndi Mupasi wakwe Leza, wino uwazyukwile Yesu kufuma ku afwe, akaikala munomuli, ale Leza wino uwazyukwile Klistu kufuma ku afwe alapeela umi ku mili inu iikafwa.
12Caleka mwe inane, tutalinzile kulondela vilondwa vya untunze vya mili itu. 13Pano ndi mukwikala mu untunze, mulafwa. Lelo ndi mwacimvya vilondwa vya mili inu, ku maka yakwe Mupasi Wamuzilo, ale lyene mulaya nu umi. 14Yano onsi akatungululwa na Mupasi Wamuzilo yene ana yakwe Leza. 15#Mk 14:36 Pano Mupasi wino Leza wamupeela asi mupasi wakumucita azya nu kumucita intete. Lelo Mupasi akamucita ukuya ana yakwe Leza nga nu kupitila mu maka yakwe, tukalilila Leza tuti, “Tata, Tata!” 16#Gal 4:5 Mupasi wakwe Leza akatulenga kuti cumi tuye sweswe ana yakwe Leza. 17Lyene pano twaya ana yakwe Leza tulapokelela upolelelo uno walaya antu yakwe nu kwiza pokelela pamwi na Klistu vino Leza wamuteyanyizizya. Pano ndi twakuma ku kucula pamwi na Klistu ale tulakumako nu kululumbi lwakwe kwene.
Lulumbi ululapelwa kunotuli
18Nemo nasininkizya ukuti amacuzi yano tukucula ndakai yataine nu lulumbi ululapelwa kunotuli inkolelo. 19Pano uumbo onsi ukalolela kasita kano Leza alasokolola ana yakwe. 20#Uta 3:17 Uumbo nanti wavulungana, lelo kusi ukulonda kwakweo kuti uvulungane. Leza wakasi kuti ciye vivyo mu 21upaalilo wakuti wanda umwi uumbo ulakululwa ku uzya wa kuola, kuti ukakume ku untungwa wa lulumbi lwa ana yakwe Leza. 22Pano twamanya vino kufika na ndakai uumbo onsi ukuteta nu kuwaika kwa umbuza. 23#2Kol 5:2 Lelo usi uumbo utupu ukateta. Naswe kwene swe muno twapokelela uwila wa Mupasi Wamuzilo uno Leza watalike ukutupela uwa pa mawila yakwe, tukateta cimyamya, ala tukulolela Leza ukutucita ana yakwe nu kukulula mili itu. 24Pano twatuulwa mu upaalilo. Lelo ndi tukulola cino tukupaalila, ale lyene usi upaalilo. Uzye pali umuntu angapaalila cino akulola? 25Lelo ndi tukupaalila cino tusikulola, ale tukulolela mukuteka mwenzo.
26Mu musango uli onga kwene Mupasi Wamuzilo nawe akatwazwa, swe muno tuli atonte. Pano tutamanyile vino tulinzile kupepa. Lelo Mupasi Wamuzilo umwisikulu akatupapatila kuli Leza mu musango uno utangalondololwa. 27Na Leza wino aakalola mu myenzo ya antu akamanya cino Mupasi akulonda kuvwanga, pano Mupasi Wamuzilo akapapatila mu musango uno Leza akalonda. 28Nupya twamanya ukuti mu vintu vyonsi Leza akaomba kuti vizipile yao amutemwa. Yao ali yano Leza waama pano lyali lili pange lyakwe. 29Pano yano Leza wasolwile calimwi ayano wapaatula kuti yaye wa Mwana wakwe, pakuti Mwana aye iyeli lya ina aingi. 30Caleka yano Leza wasolwile, ali yano waama. Na yao yano waama ayano wacita kuya aololoke pa manso yakwe, nga nu kuyapelako lulumbi lwakwe.
Leza watutemelwa muli Klistu Yesu
31Uzye tumati uli pa vintu vii? Ndi Leza ali naswe, aweni amatucimvya? 32Cumi Leza atakanyizye kufima Mwana wakwe, lelo wamupile pamulandu witu swensi! Vino wene watupile Mwana wakwe, uzye lyene atalatupela vintu vyonsi uwila? 33Uzye aweni angapeela asololwe yakwe Leza mulandu? 34Uzye lyene aweni angayavunuka? Vino Leza umwisikulu wati yasi na mulandu. Klistu Yesu wino uwafwile, nupya uwazyukwike kufuma ku mfwa, wino ndakai wikala kwi kasa lilunji lyakwe Leza, akutupapatila kunoli. 35Uzye lyene aweni angatupaatukanya ku kutemwa kwakwe Klistu? Uzye utazi, nanti ucuzi nanti ukuzunyiwa, nanti icipowe, nanti kuulizya? Uzye amazanzo nanti imfwa? 36#Mas 44:22 Wakwe vino malembelo yakati,
“Pamulandu wako tuli mu uzanzo
wa kukomwa musanya nu usiku.
Tukoline wa mfwele zino zyasendwa ku kukomwa.”
37Lelo mu vintu vii vyonsi tukweti kucimvya mu maka yakwe Leza wino watutemwa. 38Pano ninsininkizya ukuti kusi nanti cimwi icingatupaatukanya ku kutemwa kwakwe Leza, cingaya imfwa, nanti umi, angeli, nanti mipasi, nanti vintu vya ndakai nanti vikwiza. 39Kusi cintu icaya mwiyulu nanti pano pa nsi icingatupaatukanya ku kutemwa kwakwe Leza muli Klistu Yesu Mwene witu.
Currently Selected:
Loma 8: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
