Popular Bible Verses from Loma 8

Share

Nupya twamanya ukuti mu vintu vyonsi Leza akaomba kuti vizipile yao amutemwa. Yao ali yano Leza waama pano lyali lili pange lyakwe.

Pano ninsininkizya ukuti kusi nanti cimwi icingatupaatukanya ku kutemwa kwakwe Leza, cingaya imfwa, nanti umi, angeli, nanti mipasi, nanti vintu vya ndakai nanti vikwiza. Kusi cintu icaya mwiyulu nanti pano pa nsi icingatupaatukanya ku kutemwa kwakwe Leza muli Klistu Yesu Mwene witu.

Mu musango uli onga kwene Mupasi Wamuzilo nawe akatwazwa, swe muno tuli atonte. Pano tutamanyile vino tulinzile kupepa. Lelo Mupasi Wamuzilo umwisikulu akatupapatila kuli Leza mu musango uno utangalondololwa.

Uzye tumati uli pa vintu vii? Ndi Leza ali naswe, aweni amatucimvya?

Ndakai pasi kuvunukwa kuli yano ailundanya kuli Klistu Yesu.

Kutungululwa ni vilondwa vya mwili ukuiletelela imfwa, kutungululwa na Mupasi Wamuzilo kwene kukatuletela umi nu mutende.

Lelo mu vintu vii vyonsi tukweti kucimvya mu maka yakwe Leza wino watutemwa.

Nemo nasininkizya ukuti amacuzi yano tukucula ndakai yataine nu lulumbi ululapelwa kunotuli inkolelo.

Uzye lyene aweni angatupaatukanya ku kutemwa kwakwe Klistu? Uzye utazi, nanti ucuzi nanti ukuzunyiwa, nanti icipowe, nanti kuulizya? Uzye amazanzo nanti imfwa?

Na Leza wino aakalola mu myenzo ya antu akamanya cino Mupasi akulonda kuvwanga, pano Mupasi Wamuzilo akapapatila mu musango uno Leza akalonda.

Yano onsi akatungululwa na Mupasi Wamuzilo yene ana yakwe Leza.

Yano akaikala ndi vino untunze wao ukayanena ukwikala yene yakaomba vino mili yao ikalonda. Lelo yano akaikala ndi vino Mupasi Wamuzilo akayanena kwikala yene milimo yao ili wakwe vino Mupasi Wamuzilo akalonda.

Cumi Leza atakanyizye kufima Mwana wakwe, lelo wamupile pamulandu witu swensi! Vino wene watupile Mwana wakwe, uzye lyene atalatupela vintu vyonsi uwila?

Mupasi wakwe Leza akatulenga kuti cumi tuye sweswe ana yakwe Leza. Lyene pano twaya ana yakwe Leza tulapokelela upolelelo uno walaya antu yakwe nu kwiza pokelela pamwi na Klistu vino Leza wamuteyanyizizya. Pano ndi twakuma ku kucula pamwi na Klistu ale tulakumako nu kululumbi lwakwe kwene.

Pano umuntu akaya umwanisi wakwe Leza ndi akutungululwa ni vilondwa vya mwili wakwe, pano wene asyayela Masunde yakwe Leza, nupya atangayela.

Pano uumbo onsi ukalolela kasita kano Leza alasokolola ana yakwe.

Pano twamanya vino kufika na ndakai uumbo onsi ukuteta nu kuwaika kwa umbuza.