Loma 5
5
Vino cikasenula kuya mololoke pa manso yakwe Leza
1Caleka pano twati tuya aololoke pa manso yakwe Leza pamulandu wa utailo, lyene tukweti mutende pakasi kitu na Leza, kupitila mu Mwene witu Yesu Klistu. 2Pano twataila muli Klistu, Klistu kwene uwalenga kuti tukwate longo lwakuti twaikalilila mu luse lwakwe Leza. Acino tukailumba pa kukwata upaalilo wa kukumako ku ucindami wakwe Leza! 3Pasi pali cico sile cino tukailumbilapo lelo na pa macuzi itu kwene, pano twamanya vino ucuzi ukaleta kuposya 4nu kuposya kukalenga Leza azumilizye ukuti sweswe ya cumi, nu kuzumilizya kwakwe kukatupela upaalilo. 5Nu upaalilo uu usyatulenga insonyi pano Leza wapongolwela kutemwa kwakwe mu myenzo itu muli Mupasi Wamuzilo, ali wila witu kufuma kuli Leza.
6Lino twali aula maka akucita cimwi, Klistu watufwilile swe yakaifya, pa nsita ino Leza wateinye. 7Pano caya icitale kuti umuntu afwile umuntu musuma. Manye umwi angaposya kufwila umuntu musuma. 8Lelo Leza watulanga vino watutemwa, pano lino twali tucili yakaifya Klistu watufwilile. 9Ndakai twacitwa kuya aololoke pa manso yakwe Leza mu mfwa yakwe Klistu. Caleka kuluta pali cii, alatutuula nu ku ukali wakwe Leza. 10Twali anisi yakwe Leza, lelo mu mfwa ya Mwana wakwe watuwikizyanya nawe. Lyene vino twaya yacuza yakwe Leza, cumi Klistu alatutuula pano wene umumi. 11Nupya cisi cico citupu. Tukazanga pali vino Leza wacita mu Mwene witu Yesu Klistu, uwalenga kuti tukwate kuwikizyanya na Leza.
Adamu na Klistu
12 #
Uta 3:6
Iifyo lingile muno nsi pamulandu wa muntu wenga, nga ni iifyo lyakwe ilyaleta imfwa. Caleka, imfwa nayo yasalangine mu antu yonsi pano antu yonsi iifizye. 13Iifyo lyali muno nsi ala Masunde yatali kuti yapelwe. Lelo kutali ivyalemvilwe pa lwa maifyo, pano kutali Masunde. 14Lelo kufuma pa nsita yakwe Adamu kufika na pa nsita yakwe Mose, imfwa yateekanga antu onsi, pamwi na yao atifizyeko wakwe vino Adamu wifizye pa kuntayela ilamulo lyakwe Leza. Adamu wali ali unkolanya wakwe wiyo uwali nu kwiza. 15Lelo ya yaili yasi ali yamwi, pano uwila wakwe Leza utangakolana ni iifyo lyakwe Adamu. Iifyo lya muntu wenga ilyaleta imfwa pa antu aingi. Lelo cikuku nu wila wakwe Leza ivikulu cuze, pano vyaleta upolelelo ku antu aingi. Nu wila uno Leza wapela, umuntu wenga sile Yesu Klistu. 16Pali kupusana pa wila wakwe Leza ni iifyo lya muntu wenga. Pano iifyo lya muntu wenga lyalesile kuvunukwa kwa antu aingi. Lelo uwila wa luse lwakwe Leza waleta kwelelwa kwa maifyo yao aingi. 17Mu cumi kwifya kwa muntu wenga ukwalenga kuti maka ya mfwa yatandike kuteeka antu onsi. Lelo cino Yesu Klistu wacita cilusile pali cii. Antu yonsi akapokelela cikuku cikulu cuze cakwe Leza, nu kucitwa ukuya aololoke pa manso yakwe Leza yalaya nu umi nu kuteeka wa ene pamulandu wa muntu wenga Yesu Klistu. 18Caleka ndi vino iifyo lya muntu wenga lyalenga kuti antu yonsi yavunukwe, mu musango uli onga kwene Klistu wacita ca wololoke cikalenga kuti antu yonsi yaye antungwa nupya aumi. 19Ndi vino antu aingi yaya akaifya pamulandu wa kuntayela Leza kwa muntu wenga, mu musango uli onga kwene antu aingi yalacitwa kuya aololoke pa manso yakwe Leza pamulandu wa kuyela kwa muntu wenga.
20Masunde yapilwe pakuti antu yalole kuvula kwa maifyo. Lelo kuno maifyo yavula, cikuku cakwe Leza cavulilako kuluta. 21Caleka ndi vino iifyo lyateekanga kupitila mu mfwa, avino ni cikuku cakwe Leza kwene cikayateeka kupitila mu kuyacita kuya aololoke pa manso yakwe Leza, nu kuyatungulula ku umi wape muli Yesu Klistu, Mwene witu.
Currently Selected:
Loma 5: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
