Loma 15
15
Mutaizanzya lelo mwazanzya auzo
1Swe muno twakoma mu utailo twaazwilizya yano atali yakome pakuti yaposya mu macuzi yao. Tutacita vyakutuzanzya sweisikulu. 2Lelo cila muntu aezya kuzanzya mwina atali akome pakuti akomelezye utailo wakwe. 3#Mas 69:9 Pano Klistu nawe kwene ataizanzyanga umwisikulu. Lelo cili ndi vino calembwa mu malembelo cati, “Antu amutuka ala nani kwene yantuka.” 4Vyonsi ivyalembwa mu malembelo vyalemvilwe ukutusambilizya, pakuti tuye nu upaalilo kupitila mu kutekeziwa nu kukomeleziwa kuno malembelo yakutupela. 5Leza, wino akatupeela maka akuteeka myenzo nu kukomeleka, amwazwe mwikale ni lango lyonga lino mukulondela mwata wakwe Klistu Yesu. 6Lyene mwensi pamwi mwalumbanya Leza, Isi wa Mwene witu Yesu Klistu.
Akulukuwa nayo yuvwako Ilandwe Lisuma
7Mwazengelana mwensi ndi vino Klistu wamuzengile, pakuti Leza alumbanyiwe. 8Pano nkumunena vino Klistu watumikilanga Ayuda pa kulanga ukuti Leza uwa cumi pa kufikilizya vino walavile vikolwe vyao, 9#2Sam 22:50; Mas 18:49 alino na kuti Akulukuwa nao kwene yalumbanya Leza pa kuyayela mizu. Ndi vino calembwa mu malembelo cati,
“Acino ndakulumbanya pakasi
ka Akulukuwa
Ndaimba nyimbo zyakukulumbanya.”
10 #
Malg 32:43
Nupya calembwa mu malembelo pamulandu wa Akulukuwa cati,
“Mwe Akulukuwa zangini
pamwi na antu yakwe Leza.”
11 #
Mas 117:1
Nupya calembwa mu malembelo cati,
“Lumbanyini Mwene mwe Akulukuwa mwensi.
Mulumbanyini mwe antu onsi.”
12 #
Eza 11:10
Nupya kasema Ezaya akuti,
“Umwi, cizikulula cakwe Yese aliiza.
Wene aliiza mu kuteeka Akulukuwa,
nga nao yalika upaalilo wao munoli.”
13Mwene Leza ali ntulo ya upaalilo, aleke muzange muye nu mutende cuze kupitila mu utailo winu munoli, pakuti upaalilo winu utwalilile kukula mu maka yakwe Mupasi Wamuzilo.
Mulandu uno Paulo walemvile nu kupama
14Inane nemwisikulu nkusininkizya ndi vino mwensi mwemwe yasuma cuze, nu kuti mukweti kumanya konsi, nga na maka akusambilizyanya. 15Lelo muli kalata wii napama pa kulemba pa milandu imwi ino nati imwiusya. Napama pamulandu wi syuko lino Leza wampela, 16lyakuya muomvi wakwe Yesu Klistu uwa kuombela Akulukuwa. Nkatumikila wakwe simapepo pa kukosola Ilandwe Lisuma kufuma kuli Leza, pakuti Akulukuwa yangaya wa mpolelwa iyapokelelwa kuli Leza, apalamikwa kunoli mu maka yakwe Mupasi Wamuzilo. 17Mukuilundanya na Yesu Klistu, lyene nemo ningaya ni cilumba cakutumikila Leza. 18Ndapama nu kulanda sile pali vino Mwene Yesu Klistu wacita kupitila munondi pa kutungulula Akulukuwa mu kuyela Leza. Wene wacita cii mu mazwi nga nu mu micitile, 19mu maka ya vinjelengwe ni vizungusyo, nga nu mu maka yakwe Mupasi Wamuzilo. Acino mukupita ulendo kufuma ku Yelusalemu kufika ku Ililikumu, nasalanganya Ilandwe Lisuma lya pali Yesu Klistu. 20Kulondesya kwane lyonsi ukwakuti nkosole Ilandwe Lisuma mu vifulo vino Klistu atuvwika, pakuti ntakuula pa mufula uno umwi wimba mpiti. 21#Eza 52:15 Wakwe vino calembwa mu malembelo cati,
“Yano onsi atanenyilwe vya pali aliwe,
yalalola,
nga na yao atuvwa vya pali aliwe yaluvwikisya.”
Paulo wapanga kuya ku Loma
22 #
Lom 1:13
Acino pamulandu kwene uu nalesiwa maila aingi kwiza kunomuli. 23Lelo ndakai pano natimala kutumikila mu miputule ya mpanga ino, nga na pamulandu wakuti pa myaka iingi nalondesyanga kuti nize mulole, 24nkupaalila kucita cii pali ndakai. Ningatemwa kuti nize mulole twikale namwe pa nsita imwi lino ndapita kuya ku Sipeni, pakuti muce mungazwilizye ulendo wa kufikako. 25#1Kol 16:1 Ndakai, nanti cingaya vivyo, nkuya ku Yelusalemu ku kutumikila antu yakwe Leza. 26Pano mauvi aku Makedoniya nu ku Akaya mukuitemelwa yasola ukusangula uwila wakwazwa antu yakwe Leza, apina amu Yelusalemu. 27#1Kol 9:11 Ku kwali kusola kwao. Lelo ukwankanya impiya zyao ku Ayuda cali wa kulipa inkongole, pano Ayuda yalanga yankanyako Akulukuwa kupolelelwa kwao kwa mu mwenzo. 28Lino ndamala mulimo wa kuyapela lupiya lonsi luno yasangwile, ndiza kwiza mutandalila, nga pacisila inje ku Sipeni. 29Lino ndiza kunomuli, manyile vino ndiza mu kuvulilwa kwa upolelelo wakwe Klistu.
30Nkumupapata inane, mu Mwene witu Yesu Klistu nu mu kutemwa kuno Mupasi Wamuzilo akapela, ukuti muilundanye mu kupepa na maka pamwi nani kuli Leza pamulandu wane. 31Pepini pakuti ntaponela mu makasa yakwe yao atataila amu Yudeya nga na pakuti kutumikila kwane mu Yelusalemu kungapokelelwa na antu yakwe Leza aya mwenemo. 32Acino lyene Leza ndi akasi ndiza kunomuli nu luzango cuze, nga ndatemwa pa kumutandalila nupya. 33Leza ali ntulo ya mutende, aye namwe mwensi. Ameni.
Currently Selected:
Loma 15: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
