Mapinda 7
7
1We mwanane, uwaiusya amazwi yane,
nu kuwaka amalamulo yane.
2Uwalondela amalamulo yane, ngu wapita ulumi.
Uwawaka amasunde yane ndi vino ungawaka nyinalinso uwi linso lyako.
3Uyacite kwati wayanyepelela apa minwe yako
nu kuyalemba umu mwenzo wako ungati api seleti.
4Uwanena amano uti, “Wewe uli kaci wane,”
nga nu kwiluka nako ukunene uti, “Wewe uli cuzane uwapa mwenzo.”
5Ivintu vii vilakufuntusya uku mwanaci cizelele,
nu ku mwanaci cipitepite uwakwata amazwi akulyongofya.
6Uwanda umwi mu nzota ya ng'anda yane,
nacevizye uku museo,
7nga muli yayo atali yakule, ndola umulumendo uwaula amano,
8Nga nawe apita pa museo, apalama uku masansa yakwe cizelele wilya,
alino atoola ni nzila iyalungama uku ng'anda yakwe.
9Lyene amanguzi lino ilanzi lyawa,
nga na lino kakuku katola,
10awe mukwai umwanaci wilya aiza ku kumukomenkanya,
ala azwite ungati acizelele, ala watavimba ni citambala uku manso.
11Umwanaci wiyo pasi pakukamuka, ni nsonyi atakweti,
lyonsi asi wakupumbwa nanti wakupuswa apa museo.
12Limwi angaya akimilile apa cinsyoko ca museo,
limwi nalyo aya aimilila apa museo uze,
na limwi aya aimilila lwamu musolo.
13Awe mukwai umwanaci wa kantu afukatila nu mulumendo,
amutonsola nu kumuzyongwela amanso, nga avwanga ati,
14“Nemo ilelo nalindi wakutuula uwila wautandano,
nafikilizya ilelo ulayo wane.
15Ali cino nizile nkukulonda, asi papo lyene nasuka nakuzana!
16Ala nemo natinanzikila calimwi amalangeti pa musanzi wane,
inanzikapo ni nsalu izitelepelele zyaku Eguputo.
17Nimfumilizya penepo na mule nga nu usule uwa cinunu cisuma,
nga na kinamoni.
18Ale twapita tukaipakizye icitemwiko mpaka kuce.
19Pano uwane asi pa ng'anda, walela apa lwendo ulutali.
20Wasenda icola icizilemo impiya,
nga atalawela zuwa, suka pacisila ca milungu iili.”
21Fwandi avino amutunka apa kumukolopezya vivyo,
amukwetela ing'anda kasi apa kumuongola kwakwe apa kanwa.
22Nga nawe amulondela umu kukolopekwa,
kwati amasaye wino yatwala uku kufyula,
nanti wa nswela iyalemwa uku citeyo,
23mpaka yaitulinkanya itima uku luceto,
wa cunyi icaisumbila umwi liya, citamanyile ukuti yacipangila mpiti umi wa ciko.
24Lelo ndakai mwe ana yane sumbini amano uku mazwi yano nkumunena.
25Mutaleka imyenzo inu ipumbukile ku misango ya mwanaci kwene wiyo.
Mutalulumba umu kulondela umwanaci wiyo.
26Pano wene wonona aonsi avule sana,
nu kuletelela aingi mpaka yafwa.
27Ing'anda yakwe ili inzila yakuyila ku mbiko,
iyatentemukila uku misolo ya mfwa.
Mambwe-Lungu Bible © The Bible Society of Zambia, 2013