Mapinda 26
26
1Vivi kwene vino cuuma atange azanwe icisanya pakasi,
nanti imvula icisanya, ali vino ukupeela ucindami
uku ciwelewele citange cilole mwenemo.
2Vino katiti kakapontomoka na kamimbi nako ikafuma ikapapuka,
ali vino ni ntipu zino yakatipwila umuntu wakaele,
zitalatala zimulematile.
3Umukota wazipila imfwalasi, ni cela nu mukowa naco umukanwa kakwe punda,
avino ni ntuwa nayo yazipala ukumila itundu lya ciwelewele.
4Utaasuka iciwelewele ukulinga nu welewele uno cakwata,
pano limwi ungakolana naco.
5Uwaasuka iciwelewele ukulingana na muno uwelewele wakweco wayela,
apakuti citaitunga ukuya icamano.
6Wiyo akatuma inkombe iyaula amano,
aliwe kwene akaifyenga sile umweneco,
nu kuilengesya insonyi.
7Ukuomvya ipinda umu kanwa ka ciwelewele,
caya wa makulu alemale, atange yalenge kuti wimilile.
8Ukupeela umucinzii uku ciwelewele, cili wa kupusa iwe na legeni.
9Ipinda umu kanwa ka ciwelewele lyaya wa musambo
wa myunga umu minwe ya mukolesi.
10Wiyo akalemba iciwelewele incito, wakola ulapwa,
uno ukalasa apita nzila cilaselase.
11Iciwelewele cikaswilila uku uyunganyi
wakwe vino simbwa akaswilila uku malusi yakwe.
12Uzye watala walola umuntu akaitunga ukuya uwa mano?
Fwandi umu ciwelewele mwene calusya.
13Umukasu akavwanga ati, “Cisama awiyo umu nzila!
Mu museo muli cisama mwe!”
14Vino icisasa cikasenuka ku na ku pa maincezi,
avino nu mukasu nawe akasalokela sile apa musanzi wakwe.
15Antu akasu yakatonta na pakulya cakulya,
alino yaposiwa nu kwika ivyakulya umu milomo yao.
16Umuntu umukasu akaitunga ukuya umucenjele
ukuluta napa antu cinimbali yano yangaasuka ningo
lino yakwelenganya ivyamano.
17Ukuitela umu vikanza ivitakukumile,
icili conga nu kulema simbwa umusinda akuipitila.
18Umuntu akatumpoka umuze ati, “Awe nkuseka sile,
19waya wakwe cipena akuzukuza visonsololwa vya moto
nanti ukwanga ni canzo.”
20Ukwaula inkwi, umoto ukazima.
Apasi ukwakwa nu lwete kwene lusiyapo.
21Vivi kwene vino amakala yakanyesuka,
ni nkwi izyaka apa moto,
ali vino umuntu wa lwete waya apa kulumilizya ivyongo.
22Amazwi ya muntu uwa lwambo yakolana wa vilyo vilyompe,
apakwingila umunda zuwazuwa umuntu aumila namankutu.
23Akalomo kaundyondyo ni vitakwa viipe,
cili conga sile ni nyungu ikulumbile, iyaula ukoca.
24Umuntu wa lupato nanti angalufisa uli umu mivwangile yakwe,
lelo lwakasi ka munda yakwe, acisanguka.
25Ndi cakuti wene wavwanga mazwi atelepe, utamuzumila,
pano umunda yakwe mwaya ulupato maila cinimbali.
26Nanti angezya ukufisa ulupato umukucenjeloka,
lelo uyi wakwe uli nu kulolekela pa antu kwaula insita.
27Kimba wakwe polowe alaponelamo umwisikulu,
na kakunkulusya wa mawe yalamuwelelela aliwe kwene.
28Umuntu uwantumpu akapata wiyo akacisa uku ufi wakwe.
Akanwa ka undyondyo kakaleta ilovyo.
Mambwe-Lungu Bible © The Bible Society of Zambia, 2013