Mapinda 22
22
Umucinzi nu kwazwilizya alanda.
1Izina licindame lyazipa penepo ukuluta ukukwata ivyuma ivingi.
Ucindami nao waluta siluva na zaabu.
2Umukama nu mupina yonsi icili conga,
pano Yawe aliwe wayapanzile.
3Umuntu wamano akacevya uzanzo ungamuzana nu kuutuka autuka,
lelo iciwelewele cene cikaitwala sile umu mazanzo.
4Ukuicefya nu koopa Yawe kukaleta ukama,
ucindami nga nu umi.
5Umu nzila ya muntu mwipe mwaya imyunga ni nkose.
Lelo wiyo uwatemwa umi wakwe,
wene akafuntuka kuno vili.
6Sambilizya umwana inzila yakupitamo.
Lino alakota atalafuma mwenemo.
7Umukama akateeka alanda.
Kakongola nawe akaya umuzya wakwe wiyo uwamukongwesya.
8Katovya wa lufyengo, akasinza isyamo.
Intuwa ya cipyu cakwe ilamupola aliwe kwene.
9Kapela wa luse akapolelelwa,
pano wapeela umulanda icakulya cakwe.
10Zinga uwa mitumfyo, nu lwete ala lwasila.
Ivikanza ni ntusi ala vya myalala.
11Umuntu wa mazwi akazanzya umwenzo,
angatandana icuza na yamwene.
Lelo umwene wene watemwa umuntu umutailwe.
12Amanso yakwe Yawe yakawaka antu amanya ivintu ningo.
Lelo amazwi ya muntu waufi akayavulunganya.
13Umukasu akavwanga ati, “Cisama ali panzi!
Ndi naya umu museo amandema!”
14Imivwangile yakwe cizelele yaya wakwe polowe.
Yano Umwene Leza wakwatila icipyu yakaponelamo.
15Ivicitwa vya uwelewele vyazula tupu umu mwana.
Ali cino fwandi umukota ungazinga uwelewele wakwe ukutali.
16Ukucuzya umulanda, kuli kumulundilapo ukama.
Nu kupeela umukama uwila kuli kumucita umulanda.
Imvwango amakumi yatatu izya mano
17Kutika kunondi, nga nani namakunena amazwi
yano antu yamano yavwanga, apakuti uyamanye ningo.
18Ndi cakuti umayawaka nu kuyavwanga lyonsi umu kamwa kako,
ulalola ukuti yalakusansamusya.
19Nemo nkulonda ukuti wemo uwataila muli Yawe.
Uli mulandu kwene umaleka nu kuti nkusambilizye
ni mvwango kwene zii ilelo.
20Nemo natinkulembela imvwango amakumi yatatu.
Zyene zikweti ukumanya nga na umpandamano.
21Nupya zilakwazwa ukulondololola imilandu iyampomvu,
nga nu kwasuka antu ivyacumi ndi yakuuzya.
22Utafyenga umupina pamulandu wakuti umupina.
Nupya utafyengelekezya antu umu cilye.
23Pano Yawe ali kavwangila wao,
aliwe alapokolola nu umi wakwe yano yayapata.
24Utandana icuza na antu acipyu,
utapita na antu aakasoka zuwa.
25Pano limwi ungambula imisango yao,
nu kukowezya umi wako.
26Utalaya ukulipilila uwa milandu inkongole zyakwe.
27Pano ndi waposiwa ukulipila,
yangiza yakupingile nu musanzi wako kwene.
28Utaezya ukutelula yanande yampiti amu citungu cako,
muno ivikolwe vyako vyaputwilile.
29Ndi cakuti wemo walola penepo umuntu umwi umu cincile umu milimo,
wiyo kwene ali wino alinzile ukuombela yamwene,
asi wakuombela antu asilesile foo.
Mambwe-Lungu Bible © The Bible Society of Zambia, 2013