Mpendwa 32
32
Ukwankanya impanga yaku mbalama yakwe Yodani
(Malg 3:12-22)
1Amu mutundu wakwe Lubeni na wakwe Gadi yakweti iviteekwa ivivule cuze, ing'ombe ni mfwele. Lyene ilola ukuti impanga zya ina Yazeli na ina Gileadi iziyalinga ukucemelako iviteekwa ivikalamba. 2Acino yaile kuli Mose na Eleaza simapepo nu ku ntunguluzi zyuze zi uvi, iyayanena yati, 3“Umuputule uu uwa mpanga ino Yawe wataazwilizya aina Izlaeli ukwingila mwenemo, imisumba ya Ataloti, Diboni, Yazeli, Nimula, Hesyiboni, Eleale, Sibamu, Nebo, nga na Beoni, 4twalola ukuti isuma cuze ukucemelako iviteekwa. 5Swemo fwandi twalenga impanga iyo ukuti ili ino mutwankanye. Nupya swemo tusikulonda ukulamba ku mbalama ya Yodani.”
6Mose aasuka ati, “Uzye mukunena ukuti anyonko ndi yaya ku nkondo mwemo mulasyala mutenzi kuno kwene? 7Uzye kuko kusi kuli kutovola auzo apakukana ingila mu mpanga ino Yawe walaya? 8#Mpe 13:17-33 Nupya vivyo kwene avino na yaso yacisile lino nayatumile ku kwendezya impanga, ala tuli ku Kadesyi Banea. 9Pacisila cakutumbela impanga ilya suka iyafika nu ku Cifoloma ca Esyikoli, yalola vino impanga ili, yene yatovwile aina Izlaeli, ukukana ingila mu mpanga ino Yawe wayapile. 10#Mpe 14:26-35 Yawe nawe wasosile, nga alapa ati, 11‘Nalapa ukuti pamulandu wakuti yatatwalilile ukuya acumi kunondi, kusi nanti wenga uwamu antu yonsi ali ni myaka amakumi yaili nanti ukuluta, yano yafumile mu mpanga ya Eguputo, alalola impanga ino nalavile Abulaamu, Isaki, na Yakobo.’ 12Umulapo uwo wakumile umuntu wensi ukufumyako sile Kalebu umwana wakwe Yefune umwina Kenizi alino na Yoswa umwana umonsi wakwe Nuni. Yao ali yano yalondile vino Yawe walondanga umucumi. 13Yawe wasokile aina Izlaeli nga aleka yalulumba mu lwanga pa myaka amakumi yani, mpaka inkulo yonsi ino itamuzanzizye ifwa. 14Mwalola lyene mwe ntalanganyi mwe! Mwapyanikizya pali yaso. Mwalundapo na pa cipyu cakwe Yawe cino wakwatile aina Izlaeli lili. 15Ndi mwala mwatalamila Yawe, nupya kwene wene alatazyela antu ya yonsi mu lwanga, nga mwemwe mulalenga kuti yalowe”.
16Lyene nayo iyapalamila Mose iyamunena yati, “Utale fwandi utuzumilizye kukuula amaluwa ya viteekwa vitu ni misumba mwakuti aci itu na ana itu yatundumale. 17Lyene alino swemo sweisikulu tulasenda ivyanzo nu kukolelela aina Izlaeli pa nkolelo. Tulayatwala nu ku ncende ino yayasontelile. Ana itu yalasyala yakwikala mu misumba izingulusye na malinga ku mulandu wa kuyacingilila ku ikazi ya mpanga ii. 18Tukulaya ukuti tutalatala tuswilile kumwitu suka sile tukasininkizye ukuti cila muntu mu ina Izlaeli wakwata impanga. 19Alino swemo tutalakwata impanga ku mbalama yuze ya Yodani, pamulandu wakuti twapelwa mpiti impanga muno mbalama lwaku ufumondaka wakwe Yodani.”
20Mose apakuvwa vivyo aasuka ati, “Kwene mu cumi ndi cakuti mukulandilila, pa manso yakwe Yawe nani ali cino nkuti icisuma iteyanyini ku ulwi. 21Aonsi yonsi akwinu akalwa ulwi yalinzile kulamba Luzi lwa Yodani na pi lamulo lyakwe Yawe yalinzile kuzanza anisi itu suka Yawe ayacimvye 22nu kupoka impanga ilya. Pacisila cakwe cico mungawela, pamulandu wakuti ala mwatimufikilizya umulimo winu kuli Yawe nu ku ina Izlaeli asyala. Lyene Yawe angamunena ukuti impanga ii lwaku ufumondaka wa Yodani iyakwinu. 23Lelo ndi mwaposiwa ukucita cii, ale mwaifya kuli Yawe nga sininkizini ukuti mulavunukwa pa maifyo inu. 24Aleni lyene kuulini imisumba umwa kwikala aci inu na ana inu, mukuule ni vitata umwa kusunga imfwele ni mbuzi zinu. Lelo mulinzile kufikilizya vino mwalaya ukucita!”
25Aina Gadi na amu mutundu wakwe Lubeni iyanena Mose yati, “Musambazi, icumi tulacita wakwe vino watupeela ilamulo. 26Aci itu pamwi na ana itu pamwi ni ng'ombe ni mfwele yalasyala yakwikala mu misumba ya kuno ku Gileadi. 27Lelo swensi swemuno tuli ni vyanzo tulalamba mu mbalama ku kulwa inkondo ndi muno Yawe wavwangile.” 28#Yaka 1:12-15 Lyene Mose pali pakupeela malamulo kuli Eleaza simapepo na Yoswa umwana umonsi wakwe Nuni nga nu ku ntunguluzi zya ng'anda zya mitundu ya ina Izlaeli, ati, 29“Ndi cakuti aina Gadi na amu mutundu wakwe Lubeni yalamba Luzi lwa Yodani ku kulwa inkondo pamwi namwe, alino mwaya mwacimvya ulwi ku maka yakwe Yawe, lyene muce muyapeele impanga ilya ya Gileadi iye iyakwao. 30Lelo ndi cakuti yatasenzile ivyanzo vyao, yakana nu kulamba, ale lyene yali nu kwankanyiwa impanga mu Kenani pamwi na ina Izlaeli yauze.”
31Alino aina Gadi na amu mutundu wakwe Lubeni yamunena yati, “Musambazi, tulacita wakwe vino Yawe wapeela ilamulo. 32Tulalamba imbalama yakwe Yodani pamwi ni vyanzo vitu, wakwe vino Yawe wapeela ilamulo, pakuti yace yatupele impanga itu kuno mbalama ya Yodani.”
33Acino Mose aankanya umutundu wakwe Gadi na wakwe Lubeni nga na citika wa mutundu wakwe Manase umwana wakwe Yosefu, impanga yonsi yakwe Siooni umwene wa ina Amoli, na yakwe Ogi umwene wa ina Basyani, ukuminkanya kumwi ni misumba yonsi ni mpanga iyayazinguluka. 34Aina Gadi iyakuululula imisumba izingulusye amalinga iya Diboni, Ataloti, Aloeli, 35Atiloti Syofani, Yazeli, Yogobeya, 36Beti Nimula, nga na Beti Halani, nga yakuula ni vitata vya mfwele ni mbuzi zyao. 37Aina Lubeni nayo iyakuululula imisumba ya Hesyiboni, Eleale, Kilyataimu, 38Nebo, Baali Meoni (amazina yaa yasenulwa), na Sibima. Lino yizile iyakuululula imisumba iyo, iyaitemela amazina yauze.
39Amu mupanda wakwe Makili umwana wakwe Manase yaile ku Gileadi, iyapoka impanga nu kuzinga aina Amoli aikala mwenemo. 40Acino Mose apeela Gileadi ku aluko lwakwe Makili, amu mupanda wakwe Manase, nga nayo muli muno yikala. 41Yaili, uwamu mupanda wakwe Manase, nawe aya apoka imizi ya kweneko nga aitemela amazina ati, “Imizi yakwe Havoti Yaili.” 42Noba nawe aya azanza nu kupoka umusumba wa Kenati kumwi ni mizi ya mumbali, nga autemela ni zina lyakwe, lya Noba.
Mambwe-Lungu Bible © The Bible Society of Zambia, 2013