Mpendwa 26
26
Yaswilizya ukupenda iila lyakwe ciili
1 #
Mpe 1:1-46
Pacisila ca mpungo Yawe anena Mose na Eleaza umwana wakwe Aloni, ati, 2“Pendini aina Izlaeli yonsi ukupitila muli cila lupwa lwao. Mupende aonsi yonsi yano yali ni myaka amakumi yaili nanti ukuluta, yonsi angalinga pa musinku wa kulwa inkondo.” 3Mose na Eleaza ali pa kulanda kunoyali, ale yali mu manyika aku Moabu, mu pipi na Yodani ulunga na Yeliko, yayanena yati, 4“Pendini aonsi yonsi ali ni myaka ukutandikila pa makumi yaili nu kuya apapela, ukulingana namuno Yawe wapeezile ilamulo kuli Mose.”
Yaa ali ina Izlaeli yano yafumile mu mpanga ya Eguputo:
5Amu mupanda wakwe Lubeni, umwana iyeli lyakwe Izlaeli, aeya: Hanoki nu luko lwakwe lwa ina Hanoki, Palu nu luko lwakwe lwa ina Palu, 6Heziloni nu luko lwakwe lwa ina Heziloni, Kalimi nu luko lwakwe lwa ina Kalimi. 7Zizyo zili nko zya amu mutundu wakwe Lubeni. Yayapenzile aonsi yatupu ukufika 43,700. 8Mwana wakwe Palu umonsi wali a Eliabu, 9nga ana yakwe Eliabu aonsi yali a Nemueli, na Datani na Abilamu. (Yakwene, Datani na Abilamu ali yamwi kwene, intunguluzi zya mwi uvi, akatukile Mose na Aloni. Nupya yali mwi umba lyakwe Kola lino yasangukile Yawe. 10Impanga nayo yasiime akanwa nu kuyamila. Kola nawe kwene walovile kumwi ni umba lyakwe lyonsi. Cali pa nsita ilya lino umoto wosile antu yaya, ali 250. Yao tungati yali sile wa cilangililo cakusoka antu. 11Ukuya kwene ana yakwe Kola yatafwile foo.)
12Ana yakwe Simeoni aonsi mu nko zyao a Nemueli nu luko lwakwe lwa ina Nemueli, Yamini nu luko lwakwe lwa ina Yamini, Yakini nu luko lwakwe lwa ina Yakini, 13Zela nu luko lwakwe lwa ina Zela, nga na Syauli nu luko lwakwe lwa ina Syauli. 14Zizyo zili nko zya ina Simeoni. Yapenzilwe aonsi yatupu ukulingana 22,200.
15Ana yakwe Gadi aonsi mu nko zyao a Zefoni nu luko lwakwe lwa ina Zefoni, Hagi nu luko lwakwe lwa ina Hagi, Syuni nu luko lwakwe lwa ina Syuni, 16Ozini nu luko lwakwe lwa ina Ozini, Ele nu luko lwakwe lwa ina Ele, 17Alodi nu luko lwakwe lwa ina Alodi, na Aleli nu luko lwakwe lwa ina Aleli. 18Zizyo zili nko zya ana yakwe Gadi. Yapenzilwe aonsi yatupu ukulingana 40,500.
19Ana yakwe Yuda aonsi a Eli na Onani, lelo yafwilile mu mpanga ya Kenani. 20Ana yakwe Yuda aonsi mu nko zyao a Syela nu luko lwakwe lwa ina Syela, Pelezi nu luko lwakwe lwa ina Pelezi, Zela nu luko lwakwe lwa ina Zela. 21Ana yakwe Pelezi a Heziloni nu luko lwakwe lwa ina Heziloni, Hamuli nu luko lwakwe lwa ina Hamuli. 22Zizyo zili nko zya ina Yuda. Yapenzilwe mwenemo aonsi yatupu ni mpendwa yao yali 76,500.
23Ana yakwe Isakali mu nko zyao aeya: Toola nu luko lwakwe lwa ina tola, Puwa nu luko lwakwe lwa ina Puwa, 24Yasyubu nu luko lwakwe lwa ina Yasyubu, Syimuloni nu luko lwakwe lwa ina Syimuloni. 25Amu mutundu wakwe Isakali yapenzilwe mwenemo aonsi yatupu ni mpendwa yao yali 64,300.
26Ana yakwe Zebuluni mu nko zyao aeya: Seledi nu luko lwakwe lwa ina Seledi, Eloni nu luko lwakwe lwa ina Eloni, Yaleeli nu luko lwakwe lwa ina Yaleeli. 27Yapenzilwe mwenemo aonsi yatupu ni mpendwa yao yali 60,500.
28Ana yakwe Yosefu mu nko zyao ukupitila muli Manase na Efulemu aeya:
29Makili umwana wakwe Manase nu luko lwakwe lwa ina Makili (Makili wali a isi wakwe Gileadi). 30Ana yakwe Gileadi mu nko zyao aeya: Iezeli nu luko lwakwe lwa ina Iezeli, Heleki nu luko lwakwe lwa ina Heleki, 31Asilieli nu luko lwakwe lwa ina Asilieli, Syekemu nu luko lwakwe lwa ina Syekemu, 32Syemida nu luko lwakwe lwa ina Syemida, na Hefeli nu luko lwakwe lwa ina Hefeli. 33Zelofeadi umwana wakwe Hefeli atakweti ana aonsi, lelo wakweti sile ana anaci, na mazina yao a Maala, Nowa, Hogila, Milika, na Tiliza. 34Yapenzilwe mwenemo aonsi yatupu ni mpendwa yao yali 52,700
35Ana yakwe Efulemu mu nko zyao aeya: Syutela nu luko lwakwe lwa ina Syutela, Bekeli nu luko lwakwe lwa ina Bekeli, na Taani nu luko lwakwe lwa ina Taani. 36Uluko lwakwe Elani ulwa mu mupanda wakwe Syutela. 37Inko zii zyapenzilwe mwenemo aonsi yatupu ni mpendwa yao yali 32,500.
Yaa yali amu mupanda wakwe Efulemu.
38Ana yakwe Benjamini mu nko zyao aeya: Bela nu luko lwakwe lwa ina Bela, Asyibeli nu luko lwakwe lwa ina Asyibeli, Aiilamu nu luko lwakwe lwa ina Aiilamu 39Syefufamu nu luko lwakwe lwa ina Syefufamu, na Hufamu nu luko lwakwe lwa ina Hufamu. 40Ana yakwe Bela ukupitila muli Alidi na Naamani aeya: Alidi nu luko lwakwe lwa ina Alidi, na Naamani nu luko lwakwe lwa ina Namani. 41Yapenzilwe mwenemo aonsi yatupu ni mpendwa yao yali 45, 600.
42Ana yakwe Dani mu nko zyao aeya: Syuamu nu luko lwakwe lwa ina Syuamu, 43Antu apenzilwe mu luko lwakwe Syuamu aonsi yatupu impendwa yao yali 64,400.
44Ana yakwe Asyeli mu nko zyao aeya: Imuna nu luko lwakwe lwa ina Imuna, Isyivi nu luko lwakwe lwa ina Isyivi, na Beliya nu luko lwakwe lwa ina Beliya. 45Ana yakwe Beliya a Hebeli nu luko lwakwe lwa ina Hebeli, na Malikieli nu luko lwakwe lwa ina Malikieli. 46(Asyeli wakweti umwana umwanaci ni zina lyakwe a Selaa.) 47Amu luko lwakwe Asyeli Yapenzilwe mwenemo aonsi yatupu ni mpendwa yao yali 53,400.
48Ana yakwe Nafutali mu nko zyao aeya: Yazeeli nu luko lwakwe lwa ina Yazeeli, Guni nu luko lwakwe lwa ina Guni, 49Yezeli nu luko lwakwe lwa ina Yezeli, na Syilemu nu luko lwakwe lwa ina Syilemu. 50Zizyo zili nko zyakwe Nafutali, muno inko zyao zyaela. Nalino yapenzile aonsi, impendwa yao yali 45, 400.
51Fwandi aina Izlaeli aonsi yonsi yano yapenzile yali 601,730.
52 #
Mpe 34:13; Yaka 14:1, 2 Alino Yawe anena Mose ati, 53“Yakwene yaa, ali yano uce wankanye impanga kulingana ni mpendwa yati lembwa pakuti ice iye icuma cao. 54Uluko ululi ni mpendwa ikulu, uce ulupeele nu musonso ukulu. Na yano yali ni mpendwa inono, nayo uce uyapeele impanga inono. Umuntu wensi ace apelwe impanga ukulingana ni mpendwa ya antu yakwe. 55Lelo kwene pa kuyankanya yace yapendola pakuti iyalola pano cimaponela. Yali nu kupeela impanga ukulingana ni mpendwa ya mazina yao amu mitundu ya vikolwe vyao. 56Lino cafikila api zina lya mutundu, napo kwene yalinzile yapendola, nupya wensi apelwe ukulingana nu ukulu wa mpendwa yao, ndi iikulu nanti inono.”
Aina Levi nayo yapendwa
57Aina Levi yano yapenzilwe ukulingana nu mwayelile inko zyao aeya: Gelisyoni nu luko lwakwe lwa ina Gelisyoni, Koati nu luko lwakwe lwa ina Koati, na Melali nu luko lwakwe lwa ina Melali. 58Inko zya ina Levi nazyuze kwene aezi: uluko lwa ina Libini, uluko lwa ina Hebuloni, uluko lwa ina Maali, uluko lwa ina Musyi, nu luko lwa ina Kola. Koati wali a isi wakwe Amulamu. 59Umuci wakwe Amulamu wali a Yokebedi, wino wavyalilwe mu Eguputo nupya wali uwamu mupanda wakwe Levi. Wene wamuvyalile ana aonsi yaili, Aaloni na Mose, nga nu mwana umwanaci, Milyamu. 60#Mpe 3:2 Aaloni wali a isi wakwe Nadabu, Abiu, Eleaza, na Itamali. 61#Levi 10:1, 2; Mpe 3:4 Lelo Nadabu na Abiu yafwile lino yatwazile impolelwa kumwi nu moto uno yayinda pa manso yakwe Yawe. 62Aina Levi aonsi yonsi yano yapenzile yano yali nu mwezi onga nu kuluta yali 23,000. Yene yatapendilwe pamwi na ina Izlaeli yauze, pano yatapezilwe nanti cimwi caupyanyi.
63Fwandi yaa ali yano yapenzilwe kuli Mose na kuli simapepo Eleaza. Yapenzile aina Izlaeli ala yali ku manyika aku Moabu, mu pipi na Yodani ulunga na Yeliko. 64Muli yao, mutali nanti awenga uwa muli yaya yano Mose na simapepo Aaloni yapenzile, lino yapenzilwe mu Lwanga lwa Sinai. 65#Mpe 14:26-35 Pasi pano Yawe wayanenyile ukuti yonsi kwene yalafwila mu lwanga, nupya kutasiile nanti wenga, suka sile Kalebu umwana wakwe Yefune na Yoswa umwana umonsi wakwe Nuni.
Mambwe-Lungu Bible © The Bible Society of Zambia, 2013