Naumi 2
2
Ukuwa kwakwe Ninive
1Mwe ina Ninive,
azanzi yatiyiza ku kumonona.
Ikini ivita vinu pa malinga!
Mwalinda imiseo!
Iteyanyini ku kulwa inkondo!
2Yawe ali pipi nu kuwezezya ululumbi ku mpanga ya Izlaeli,
wakwe lulu luno yakweti lino anisi yatali kuti yaizanze.
3Ivita vya anisi vikasenda ivisyangu viyenzu,
nupya vikazwala ivyakuzwala viyenzu ivya ulwi.
Vikuiteyanya ukuya ku kuzanza!
Ivyela vya maceleta yao vikukaoka wa moto.
Imfwalasi zyao zikulinduka.
4Amaceleta yao yakaleluka umu miseo.
Yakapita ulwilo yala yakuya inkolelo
nga ni cundansizi umu misolo.
Yene yakaengesa wa lukozyo
nu kumyantula wa nkuwa.
5Wene akwaama yamusika yakwe avita,
yakuwela ala yatiyacisika.
Yakuutukila ukwi linga lya musumba,
nu kuikuulila iciumba cakuitasizya kweneko.
6Nu kuyula impongolo yaku vifula vya manzi,
kwi sano lya mwene kwazula intete.
7Namwene wene wasendwa uku uzya.
Aomvi yakwe yakulila wa vipeele,
nu kuyumola apa visao.
8Antu amu Ninive yali wa ciziya,
icati cipongoka na manzi yakweco yakwikilila.
Antu yamwi yakupunda yati, “Imililini! Imililini!”
Lelo kutali uwakuswilila mwenemo.
9Sampini siluva!
Sampini zaabu!
Icuma cao cavula sana.
Cene icamutengo ukulu wakwe cimwi
10Umusumba wa Ninive ononeka,
wasanguka waya itongwa ilyaula antu.
Imyenzo yaluluka uku ntete,
na makokola yakuzakaza.
Umu nteo monsi mwamyalala,
ni vinso vyapona uku masakamiko.
11Uzye lyene umusumba ulya uli kwi?
Wene wakoline wa ninga yakwe yacisama,
muno yalisyanga ana yao.
Mumo muno yacisama kumwi na ana yao
yayanga ukwaula ukoopa cimwi.
12Cisama uwakalume ndi walema inyama
yene iyakulya uwakaci na ana yakwe.
Ndi waikakola nga aisalanganya umu ninga
yakwe yacisama kuti yailyokezye.
13Yawe Wamaka yonsi akunena aikazi aku Ninive ati,
“Nemo indi wa mwanisi winu.
Ndoca maceleta inu.
Ivita vinu vilakomwa ku lupanga,
vivyo ivikoline na yacisama.
Nemo ndamupokolola ivisampwe vinu vyonsi.
Inkombe zinu zitalalolola izwi nanti limwi ilinguvwika.”
Mambwe-Lungu Bible © The Bible Society of Zambia, 2013