Mateo 23
23
Yesu waceula antu pamulandu wakwe yakasambilizya ya Masunde na Afaliseo
(Mk 12:38-39; Luk 11:43, 46; 20:45-46)
1Lyene Yesu anena maumba na alondezi yakwe ati, 2“Yakasambilizya ya Masunde na Afaliseo ali yano yapeelwa nsambu yakulondolola Masunde yakwe Mose. 3Caleka mulinzile kucita vyonsi vino yakumunena kuti mucite. Lelo mutalondela vicitwa vyao pano yene yasicita vino yakavwanga. 4Pano yene yakanyepa visendo vinyomesye yatwika auze, vino yene yatange yalemeleleko nu kuyazwa. 5#Mpe 15:38; Malg 6:8; Mat 6:1 Vyonsi vino yakacita ivya kuilanga pa manso ya antu. Si lolini vino yene yakapanga tumifuko twa mpapa twakusendelamo malembelo yakwe Leza, tuto tuno yakazwala pa mausyu na pa makasa yao. Yene yakatalimfya masempele ya vyakuzwala vyao. 6Yene yatemwa vifulo visuma pa vimulo nga ni vilimba vya ucindami mu mang'anda ya mapepo. 7Yene yatemwa kulamukwa nu mucinzi mu masokoni, nu kuti antu yayaama yati, ‘Kasambilizya.’ 8Lelo mwemo yatalinzile kuti yamwama yati, ‘Kasambilizya,’ pano mwakwata sile kasambilizya wenga, nupya mwensi mwemwe ina. 9Mutaama umuntu nanti umwi pano pa nsi muti ‘Tata,’ pano mwakwata So wenga sile, wino uwa mwiyulu. 10Mutaleka nanti wenga uwa munomuli aamwa ukuti ntunguluzi, pano Klistu wenga sile ali ntunguluzi inu. 11Mukulu uwa munomuli alinzile aye muomvi winu. 12Pano wino wensi akaikuzya wene alacefiwa, na wino wensi akaicefya wene alakuziwa.
Yesu wapela Afaliseo na Yakasambilizya ya Masunde mulandu
(Mk 12:40; Luk 11:39-42, 44, 52; 20:47)
13“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mukayalila antu kunzi kuti yatingila mu Wene wa mwiyulu. Mweisikulu musyaingilamo nupya mukayalila yano akalonda kwingilamo. [14Kalanda kunomuli mwe yakasambilizya ya Masunde na Afaliseo! Mwe yasomvi mwe! Mukaliila yamukamfwilwa vyuma mu ucenjezi nu kuyasomba pa kuyapepela mapepo atali. Caleka mwemo kuvunukwa kwinu kulaya kukulu cuze.]
15“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mukapita ulendo wa pa musili nga na pali yemba, kuti mukalonke umuntu wenga kuti aye mulondezi winu. Lino mwacita vivyo, mukalenga ukuti umuntu wiyo alinge kuya mu Gehena maila yaili kuluta mwemwe.
16“Kalanda kunomuli mwe ntunguluzi mpafu! Mukasambilizya ukuti umuntu ndi walapa mwi zina lya Ng'anda ikulu yakwe Leza, wene atalinzile kufikilizya mulapo wakwe. Lelo mukalanda ukuti umuntu ndi walapa mwi zina lyakwe zaabu wamu Ng'anda ikulu yakwe Leza, wene alinzile afikilizye mulapo wakwe. 17Mwe mpafu viwelewele mwe! Uzye cino cilusile cuze cili kwi? Uzye a zaabu, nanti Ng'anda ikulu yakwe Leza ino yatilenga zaabu kuya wamuzilo? 18Nupya mukasambilizya ukuti umuntu ndi walapa mwi zina lya kavuwa, wene atalinzile kufikilizya mulapo wakwe. Lelo umuntu ndi walapa mwi zina lya wila uno wati upelwa kuli Leza penepo, wene alinzile kufikilizya mulapo wakwe. 19Mwe mpafu mwe! Uzye cino cilusile cuze cili kwi? Uzye uwila wati upelwa kuli Leza penepo, nanti akavuwa kati kalenga uwila kuya wamuzilo? 20Caleka wino wensi walapa mwi zina lya kavuwa, ala walapa mwi zina lya wila onsi wati upelwa kuli Leza penepo. 21Na wino wensi walapa mwi zina lya Ng'anda ikulu yakwe Leza, ala walapa mwi zina lyakwe Leza uwaya mwenemo. 22#Eza 66:1; Mat 5:34 Na wino wensi walapa mwi zina liyulu, ala walapa mwi zina lya cilimba ca wene cakwe Leza nga nu mwi zina lyakwe Leza kwene.
23 #
Levi 27:30
“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mukapela kuli Leza cikumi ca pa vilimwa vyonsi ivikanunkizya vyakulya vili wakwe kanyenze ni vinzali. Lelo mwatazyela vintu vikulu kuluta, vyamu Masunde wakwe vii. Upinguzi wa mulinganya, mizu nu ufuma cumi. Mulinzile mwacita vii vyonsi kwaula kutazyela vimwi. 24Mwe ntunguluzi mpafu! Mwemo mukatekela nu kufumya kazizi muli vino mukumwa, lelo mumicitile inu iipe mukozile kwati imumila ngamila ipuma.
25“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mwemo mukafula ingako ni mbale kunzi, lelo mukasi zizilemo vintu vino mwapoka mu ukakasi nu kuitemwa. 26Mwe Afaliseo mpafu! Nkolelo mutale mufule ingako ni mbale mukasi nga lyene nu kunzi kwene zimaya zifule.
27 #
Mil 23:3
“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mukoline na malindi yano yatakasa nu mula kunzi yano kunzi yakaloleka ayembe, lelo mukasi kakweyo mwazula mafupa ya antu afwe nga ni vintu vyonsi viole. 28Mu musango uli onga, namwe kunzi mukaloleka ku antu kwati mwemwe ololoke, lelo mukasi ka myenzo inu mwazulamo usomvi ni nkota.
29“Kalanda kunomuli mwe yakasambilizya ya Masunde na Afaliseo! Mwe yasomvi mwe! Mwakuulila yakasema malindi nu kuyemvya vipilala vya pa malindi ya antu aololoke. 30Nupya mukavwanga muti, ‘Ndi tuzanwako mu manda ya vikolwe vitu, tutange tumane kapi nao mukukoma yakasema.’ 31Vivyo kwene mukuisinila mweisikulu ukuti mwemwe ana yakwe yano akomile yakasema. 32Caleka malilini kucita viipe vino yene yacisile.
Yesu wasowela upinguzi wao
(Luk 11:47-51)
33 #
Mat 3:7; 12:34; Luk 3:7 “Mwe nzoka mwe! Mwe ana ya nzoka mwe! Uzye mulapusuka uli ku uvunuko uwamu Gehena? 34Caleka, ndatuma yakasema, na antu yamano na yakasambilizya. Mulakoma nu kutana pa lupanda yamwi munoyali. Yauze nao mulayanyambola nu kuyuma mu mang'anda ya mapepo nu kuyazinganya kufuma mu muzi onga nu uze kwene. 35#Uta 4:8; 2Mil 24:20 Pamulandu kwene uu, Leza alamuvunuka pa kukomwa kwa antu yonsi yano ali akaele, kutandikila pa kukomwa kwakwe Abeli#23:35 Abeli: Wii wali umuntu watandikilepo kukomwa. uwakaele, kufika na pa kukomwa kwakwe Zakaliya#23:35 Zakaliya: Zakaliya wino walandwa pa wali akasema uwakusyalikizya kukomwa. Welengini 2 Mil. 24:20-21 mwana Belekiya, wino mwakomile mu Ng'anda ikulu yakwe Leza pakasi ka cifulo camuzilo na kavuwa. 36Cumi namunena vino mwe antu amu mukulo uu mulavunukwa pa vintu vii vyonsi viipe vino mwacita.
Yesu walila pamulandu wa antu amu Yelusalemu
(Luk 13:34-35)
37“Mwe antu amu Yelusalemu, Yelusalemu! Mwakoma yakasema nu kutama na mawe inkombe zino Leza watuma kunomuli. Amaila yanga yano nalondanga kumufukatila, wakwe vino nyinankoko akafukatila ana mu maapa yakwe, lelo mutanzumilizya! 38#Yel 22:5 Acino Ng'anda inu ikulu yakwe Leza ilasyala citotela. 39#Mas 118:26 Namunena vino mutalandola nupya, kufika lino mulavwanga muti, ‘Walongo awiyo akwiza mwi zina lya Mwene.’ ”
Currently Selected:
Mateo 23: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
