Yoswa 3
3
Aina Izlaeli yalamba Yodani
1Katondotondo Yoswa na Ina Izlaeli yonsi iyatenuka ukufuma ku Syitimu nga iyaya ku Yodani, kuno yakuuzile insakwe lino yatacili yalambe. 2Apa mpela ya manda yatatu yamusika ya vita iyasalala mu nsakwe zyonsi, 3nga yapeela ilamulo ku antu yati, “Lino mwaca mwalola yasimapepo aina Levi yasenzile Mbokosi ya Upangano yakwe Yawe Leza winu ku nkolelo, namwe kwene mulinzile ukukatuka musye vifulo vinu muilondelele pacisila. 4Lyene mulamanya intunga ukwakuya, pasi pano mwemo mutatazile mupita umu nzila ii. Lelo ukufuma apayelile Mbokosi iyo ya Upangano mulinzile ukusyalikila musye iciposi ukulingana intampulo kilomita wenga.#3:4 Mu Ciyebulai kulingana intampulo izingaya (namanye amamita 900) Mutakezye ukupalamila ku Mbokosi iyo.”
5Yoswa anena antu ati, “Isangululini mweisikulu, pano mutondo Yawe alacita icinjelengwe apakasi kinu.” 6Alino Yoswa anena yasimapepo ati, “Nyemulini Mbokosi ya Upangano nga mupite mukolelele antu.” Acino iyakatusya Mbokosi nga iyakolelela antu.
7Lyene Yawe anena Yoswa ati, “Vino namacita ilelo vimalenga kuti aina Izlaeli yonsi yatandike kucindamika, pakuti yamanye ukuti nemo indi nawe wakwe vino nali na Mose. 8Upeele ilamulo lii kuli yasimapepo yano yakasenda Mbokosi ya Upangano, uti, ‘Lino mulafika pa cituntu ca Luzi lwa Yodani, muce mwingile nu kwimilila mu luzi mukasi.’ ”
9Alino Yoswa anena aina Izlaeli ati, “Palamilini kuno nga muyuvwile amazwi yakwe Yawe Leza winu. 10Lino mulaya pankolelo, wene atalaposiwa ukumuzingila aina Kenani, aina Hiti, na ina Hivi, na ina Pelizi, na ina Giligasi, na ina Amoli nga na ina Yebusi. Vii avino mulamanya ukuti Leza wa umi ali pakasi kinu 11lilyo lino yasimapepo yalasenda Mbokosi ya Upangano ya Mwene wa nsi yonsi nga yamukolelele ukwingila mu Luzi lwa Yodani. 12Lyene alino muce musolole aonsi ikumi na yaili ukufuma mu mitundu ya ina Izlaeli, umonsi wenga ukufuma muli cila mutundu. 13Nga zuwazuwa lino yasimapepo asenzile Mbokosi ya Upangano yakwe Yawe, umwene wa nsi yonsi yalyata mu Luzi lwa Yodani, amanzi yaluko yano yakukonkolokela ukwisika yalaputulwa nga yatulumane pamwi.”
14Caleka lino antu yakuululula insakwe zyao kuti yakalambe Luzi lwa Yodani, yasimapepo asenzile Mbokosi ya Upangano iyapita iyayakolelela. 15Lyene Luzi lwa Yodani lukasambela monsi mu nsita yonsi iya uzombozi, nga lelo zuwazuwa lino yasimapepo asenzile Mbokosi ya Upangano yafika ku Yodani nga ni ngazo zyao zyakumya amanzi mu mbali, 16amanzi ukufuma ukupela ya luzi iyata ukupita. Amanzi iyatulumana kufika na papela ya cituntu kulingana intampulo izingi ukuwelela icisila, ukufika na lwaku musumba wa Adamu, pipi nu ku Zaletani. Pa nsita ili imwi kwene amanzi yano yakonkolokanga yakuya kuli Yemba wa Alaba (kuli kuti Yemba wa Musilya) iyata ukupita iyaputuka. Acino antu iyalambila ku mbalama yuze kulungatana nu musumba wa Yeliko. 17Yasimapepo asenzile Mbokosi ya Upangano yakwe Yawe yimilila silili pa musili uume apakasi ka Luzi lwa Yodani, nga aina Izlaeli yonsi yala yakulamba, mpaka uluko lonsi ilulamba.
Mambwe-Lungu Bible © The Bible Society of Zambia, 2013