Oseya 7
7
1Lilyo lyonsi lino nkulonda kuwezya antu yane apasuma,
lino nkasi kupeela aina Izlaeli ulongo,
amaifyo yao yakaloleka apaswe.
Imilimo iipe ya antu aku Samaliya ikasokololwa.
Yene yakacita vyaucenjezi,
yakatama amang'anda ya antu nu kwiya,
yakazanza nu kuyiila antu umu miseo.
2Lelo yene yasiiluka
ukuti nemo nkaiusya ivicitwa vyao vyonsi iviipe.
Amaifyo yao yayalizizya monsi,
nupya lyonsi kwene nkayalola.
Antu yapangana ukucita iviipe ukwi sano
3Antu yasomba umwene uku vicitwa vyao viipe,
ni vilolo vyakwe uku mapange yao aufi.
4Yonsi kwene yasi na utailo,
nupya usomvi wao ukulunkuma wa moto uwamu citofu,
uno kapanga wa mikate asisonsela
ukutandikila sile lino akukanda umunya
mpaka na lino wakatuka.
5Pa wanda wa kuzevya kwa mwene,
vilolo vyakwe vyakolike waini,
umwene nawe aitela mwi umba lya antu aisawisye.
6Myenzo yao ikupya wa moto mu citofu.
Usiku onsi, ukali wao ukasuuka,
nga akatondo iulunkuma wa cimbilimbili ca moto.
7Yonsi kwene yakaya see wa citofu,
nupya yene yakoma intunguluzi zyao.
Aene yao yonsi yakomwa wenga wenga,
lelo kusi nanti wenga wino watala wapepa kunondi,
kuti njazwilizye.
8Yawe akuti,
“Aluko lwakwe Efulemu yakoline wakwe keke wino yatali yasenule,
pamulandu wakuti yene yuminkana na antu amu mitundu yuze.
9Ainamasi yakayafipa amaka,
ukwaula kuti yamanye.
Yene yakwata imvwi,
ukwaula kuti yamanye.
10Icilumba ca ina Izlaeli cikuyalilila aisikulu.
Lelo nanti cingaya vivyo
yene yatawela kuli Yawe Leza wao,
nanti ukumulondalonda konsi.
11“Aluko lwakwe Efulemu yakoline wa nkunda,
itumpe, iyaula amano.
Yene yakaama aina Eguputo,
nu kuya ku Asilya kukulenga uwazwilizyo.
12Kuli konsi kuno yangaya,
ndayateya isumbo.
Ndayakwetela pansi nu kuyalema wa vyunyi vya mulwelele.
Ndayavunuka apa viipe vino yacita.
13Kalanda kuno yali pano yene yansya.
Si yale yononeke pamulandu wakuti yansangukila.
Nemo nkalondesya ukuyatuula,
lelo yakalukulanda sile vyaufi pali nene.
14Yene yasipepa kunondi ukufuma mu myenzo,
lelo yakaisumba apa misanzi yao nu kulila.
Yakalila impoma wa inamasi
apamulandu wa kulonda cakulya ni cakumwa,
lelo yene yakamfutatila.
15Nanti angala nene nayakuzya nu kuyakomya,
lelo yumana akapi kuti yancitile iviipe.
16Yene yasiseleukila kuli Leza wapapelapela,
lelo yakaya ku tuluwi.
Yakoline wa ulapwa uononeke.
Intunguluzi zyao zilakomwa ku lupanga,
pamulandu wakuti yene yakalanda vyakunsausya.
Acino aina Eguputo yalayaseka wakwe cimwi.”
Mambwe-Lungu Bible © The Bible Society of Zambia, 2013