Kufuma 7
7
1Yawe anena Mose ati, “Namalenga kuti uye wakwe Leza kuli Falao, nu munyonko Aaloni alavwanga kunoli wakwe kasema wako. 2Unene Aaloni vyonsi vino namakupeela ilamulo kuti ucite, nga nawe anene Falao kuti ate aina Izlaeli yafume mu mpanga yakwe. 3#Mil 7:36 Lelo ndalenga Falao akome umwenzo cuze. Nanti angala ndacita vizungusyo vya maka vivule mu Eguputo, wene ataluvwa kunomuli. 4Lyene ndaomvya maka yane pa kuvunuka cuze aina Eguputo. Alino ndatungulula imitundu ya ina Izlaeli ukufuma mu mpanga ya Eguputo. 5Lilya lino ndaomvya maka yane panoyali nu kufumya aina Izlaeli mu Eguputo, alino aina Eguputo yalamanya ukuti Nene indi Yawe.” 6Mose na Aaloni iyacita wakwe vino Yawe wapeezile ilamulo kunoyali. 7Pa nsita ino yavwanzile kuli Falao, Mose wali ni myaka amakumi cinani, nga Aaloni nawe wali ni myaka amakumi cinani na itatu.
Intuwa yakwe Aloni
8Yawe anena Mose na Aaloni ati, 9“Lino Falao aluzya wewe na Aaloni kuti mucite vizungusyo vya kusininkizya ukuti Leza winu watamutuma, lyene wewe Mose ulinzile ukupeela ilamulo kuli Aaloni kuti asumbe intuwa yakwe pansi ino akapitila, ku nkolelo yakwe Falao. Intuwa iyo ilasanguka iye inzoka.” 10Caleka Mose na Aaloni yaya kuli Falao wilya yaya yacita wakwe vino Yawe wayapile ilamulo. Aaloni asumba intuwa yakwe pansi ku nkolelo yakwe Falao na yacilolo yakwe, nga lilyo kwene intuwa isanguka iya inzoka. 11Lyene Falao atuma akuya ama antu yakwe, amamanyamano na amalele. Alino aina Eguputo yalya mu malele yao yeleuzya vino Aaloni wacisile. 12Cila wenga asumba intuwa yakwe pansi, nga ni ntuwa zisanguka ziya inzoka. Lelo intuwa yakwe Aaloni imila inzoka zyao zyonsi. 13Lelo nanti cali vii, Falao atwalilila ukukoma umwenzo wakwe vino Yawe wavwanzile ukuti, Falao ataluvwa kuli Mose na Aloni.
Amanzi yasanguka uwazi
14Lyene Yawe anena Mose ati, “Umwene wilya watakoma umwenzo cuze, nupya watakana kuleka antu yane yapite. 15Caleka mutondo uce upite ukamukomenkanye katondo lino akuya ku Luzi lwa Nailo. Uce usende intuwa ino yasangwike inzoka, alino ukamulolela mumbali ya luzi. 16Lyene uce unene Falao uti, ‘Yawe, Leza wa Ayebulai watantuma kuti nkunene ukuta antu yakwe yapita, pakuti yangaya yakamupepe mu lwanga. Lelo kufika na ndakai utasakamile kumuyela. 17#Umb 16:4 Mwene wakwisaci, ndakai Yawe wavwanga ukuti amacita icintu cimwi cino cimalanga kunuli ukuti mucumi wene ali Yawe. Silola, namauma pa luzi ni intuwa ii, na manzi yamasanguka yaye uwazi. 18Inswi zili mwenemo zimafwa, nga nu luzi lumanunka cuze cakuti aina Eguputo yatangamwamo amanzi.’ ”
19Yawe anena Mose ati, “Unene Aaloni kuti atoole intuwa yakwe asonte pa nguzi zyonsi, pa mifolo ya manzi yonsi, na pa viziya vyonsi vyamu Eguputo. Amanzi yamaya uwazi, nu mu Eguputo monsi mumaya uwazi, mu nkolo nu mu nsembo kwene mumaya uwazi.”
20Lyene Mose na Aaloni iyacita wakwe vino Yawe wapeezile ilamulo. Pa manso yakwe Falao na yacilolo yakwe, Aaloni akatusya intuwa yakwe auma papela pa luzi, nga amanzi yonsi yasanguka yaya uwazi. 21Inswi zyamu luzi zifwa, nga lununka cuze cakuti aina Eguputo yatamwilemo amanzi. Mu Eguputo monsi imuya uwazi. 22Lyene amamanyamano amu Eguputo nayo yeleuzya icili conga kwene kupitila mu malele yao. Nga Falao atwalilila ukukoma umwenzo ndi vino Yawe wavwanzile ukuti wene ataluvwa kunoyali. 23Mu cifulo cakusakamala pali cii, Falao asenuka aswilila kwi sano. 24Aina Eguputo yonsi iyatandika kwimba vifula mu nkumba ya Luzi lwa Nailo kuti yazane amanzi akumwa, pamulandu wakuti yaposiwe kumwa amanzi amu Luzi lwa Nailo.
25Ipapita amanda cinimbali ukufuma pano Yawe wasenwile amanzi amu Luzi lwa Nailo yaya uwazi.
Currently Selected:
Kufuma 7: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
