Kufuma 16
16
Mana ni nkwale
1Pacisila cakwe vii iuvi lyonsi lya ina Izlaeli ilitenuka ilifuma ku Elimu. Pa wanda uwalenga ikumi na yasano mu mwezi wakwe ciili ukufuma lino yafumile mu Eguputo iyafika ku Lwanga lwa Sinai. Ulwanga lulo lwaya pakasi kakwe Elimu nu Mwamba wa Sinai. 2Mumu mu lwanga iuvi lyonsi likatuka liilizyanya kuli Mose na Aloni. 3Liyanena liti, “Ngani cazifile kuti Yawe aleke tufwile mu Eguputo. Kuku twalyanga inyama ni vyakulya vyuze tukwikuta. Lelo mwatuleta mu lwanga kuti swensi tufwe ni nzala.”
4Lyene Yawe anena Mose ati, “Ndakai namalenga kuti ivyakulya vinu mwensi vipone wa mvula ukufuma mwi yulu. Antu yalinzile yafuma yaya yakolonganika ivyakulya nu kusenda vyakulingana nu kulya kwa wanda onga. Mu nzila kwene ii ningamanya ndi antu yangalondela malamulo yane. 5Pa wanda uwalenga mutanda antu yalinzile kukolonganika nu kuteyanya ivyakulya vya manda yaili.”
6Caleka Mose na Aaloni yanena aina Izlaeli yonsi yati, “Ilelo manguzi mumamanya ukuti Yawe ali wino wamufumizye mu Eguputo. 7Mutondo katondo mulalola uluswepo luyengese lwakwe Yawe. Pamulandu wakuti swemo akatutuma sile kuti tumunene malamulo yakwe, nga kuilizyanya kwinu kwatikuvwika kunoli, endi kunoli.” 8Lyene Mose atwalilila kuvwanga ati, “Yawe ali wino alamupeela inyama zyakulya cila manguzi nu kumupeela umukate uvule cila katondo pano Yawe atauvwa kuilizyanya kwinu kunoli. Nga naswe sweswe yaweni? Lino mukuilizyanya kuli sweswe ala mutakucita cico kunotuli, lelo akuli Yawe.”
9Mose anena Aaloni ati, “Nena iuvi lyonsi lya ina Izlaeli ilyati likongana, kuti lipalamile kuli Yawe, pamulandu wakuti Yawe watauvwa kuilizyanya kwao.” 10Lino Aaloni akunena iuvi lyonsi lya ina Izlaeli, nalyo ilisenukila ku lwanga, nga ililola uluswepo luyengese lwakwe Yawe mwi kumbi. 11Yawe anena Mose ati, 12“Natinuvwa kuilizyanya kwa ina Izlaeli. Yanene ukuti lino ilanzi lyatilyawa yamapokelela inyama zyakulya, nga na katondo yalapokelela umukate wakulya iikute. Lyene yalamanya ukuti Nene, ne Yawe, nene indi Leza wao.”
13Manguzi kwene yalya mukumbi wa nkwale wiza uwa nu kulimba cifulo ca nsakwe consi. Katondo nako kuya lumi kuzinguluka cifulo ca nsakwe consi. 14Lino lumi lwasila mu lwanga pa musili paloleka tuntu tumwi tunyale nupya tupapatane ngati amamba nupya tutiswe ngati akungwi wino ali pansi. 15#1Kol 10:3 Lino aina Izlaeli yacilola yatacimanyile foo, nga yauzyanya yati, “Uzye cii icani?”
Mose aasuka kunoyali ati, “Cii icakulya cino Yawe watapeela kunomuli kuti mulye. 16Yawe watapeela ilamulo kuti cila muntu akolonganike cipimo icingalingana na makilogalamu yaili, akulingana cila muntu.”
17Aina Izlaeli iyacita wakwe vino yanenyilwe. Yamwi yakolonganika twingi, lelo yamwi tunono. 18#2Kol 8:15 Lelo lino yapima pa cipimilo ca makilogalamu yaili yalola ukuti yano yakolonganike twingi tutalusile pa cipimilo, na yano yakolonganike tunono tutacefile foo. Cila muntu wakolonganike kulingana na vino walondanga. 19Lyene Mose ayanena ati, “Kusi umuntu nanti umwi wakuti asunge vilyo vii kufika mutondo katondo.” 20Lelo yamwi munoyali yatasakamile vino Mose wavwanzile, iyasunga ivyakulya vimwi kufika katondo. Nga lino kwaca iyalola ukuti vyonsi vyativiola, muli ni ngonyo nupya ala vikununka. Cii cilenga kuti Mose asokele antu. 21Lyene katondo umuntu wensi akolonganika kulingana nu kulonda kwakwe. Lelo ndu musanya wawala, kwakaya, vino vyasile pansi visunguluka.
22Pa wanda uwalenga mutanda yakolonganika ivyakulya kulingana maila yaili, cila muntu malita yani. Alino intunguluzi zyonsi zya ina Izlaeli ziza zinena Mose pali cii. 23#Kuf 20:8-11 Alino Mose azinena ati, “Yawe watapeela ilamulo ukuti mutondo uwanda wa kupuza, uwanda wi Sabata uwapaatulwa kuli Yawe. Mupange umukate onsi uno mukulonda, nupya mweleke consi cino mukulonda kweleka. Ivyasyala muvisunge pa mbali mpaka mutondo.” 24Antu iyacita wakwe vino Mose wapeezile ilamulo. Iyasunga ivyasyala mpaka katondo, lelo kwaula kuti vyononeke nanti kuola. Nupya vitakweti ingonyo foo. 25Mose anena antu ati, “Ilelo lini vikwene, pano ilelo uwanda wi Sabata, uwanda wakupuza uwapaatulwa kuli Yawe. Ilelo mutakuyazana cakulya kunzi ya nsakwe. 26Mulinzile mwakolonganika ivyakulya mu manda mutanda. Lelo pa wanda uwalenga cinimbali, uwanda wa kupuza, ivyakulya visiizanwako.”
27Pa wanda uwalenga cinimbali antu yamwi yaya kukukolonganika ivyakulya, lelo yatavizanyile. 28Lyene Yawe auzya Mose ati, “Uzye kufika insita cii lino mumakana kuyela malamulo yane? 29Mwiusye ukuti Nene, ne Yawe, namupeela uwanda wi Sabata. Cili cino pa wanda uwalenga mutanda nkamupeela ivyakulya vivule vya manda yaili. Muntu wensi alinzile aikala kunoli pa wanda uwalenga cinimbali. Atafuma pa ng'anda yakwe.” 30Caleka antu yataombanga imilimo pa wanda uwalenga cinimbali.
31 #
Kuf 11:7, 8 Aina Izlaeli yatemela ivyakulya vivi izina yati, “Mana.” Mukuloleka mana walolekanga ngati tupece twa nkona, nupya tutiswe. Ndi walya utulyompe ngati umukate wa mpanda upapatale uno yapangila nu uci. 32Lyene Mose avwanga ati, “Yawe watapeela ilamulo kunotuli kuti tusunge mana umwi pakuti aizikulu itu yakalole cakulya cino Yawe watupile kuti tulye mu lwanga lino watufumizye mu Eguputo.” 33#Aye 9:4 Mose anena Aaloni ati, “Tola inyungu, itilamo mana wakulingana na malita yaili. Ndi wacita vivyo umwike pa manso yakwe Yawe pakuti mana wiyo asungwe na kuti aizikulu inu yace yamulole.” 34Wakwe vino Yawe wapeezile ilamulo kuli Mose, Aaloni aiika inyungu ku nkolelo ya Mbokosi ya Upangano, pakuti mana angasungwa. 35#Yos 5:12 Aina Izlaeli yalyanga mana pa myaka amakumi yani, mpaka lino yafisile ku mpanga ya Kenani, kuno yaile yikala. 36(Cipimilo cino caomviwanga mwingilanga inteko kulingana na malita amakumi yaili.)
Currently Selected:
Kufuma 16: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
