Kufuma 14
14
Aina Izlaeli yalamba Yemba Muyenzu
1Lyene Yawe anena Mose ati, 2“Nena aina Izlaeli ukuti yalinzile kusenuka nu kuya kuula insakwe pa nkolelo ya musumba Pi Hailoti, uwaya pakasi ka musumba Migidoli na Yemba Muyenzu pipi nu musumba Baali Zefoni. 3Falao wilya alelenganya ukuti aina Izlaeli yakululumba sile mu mpanga nupya ulwanga lwatilulenga kuti yataya ku ufumondaka. 4Ndalenga Falao kuti akome umwenzo, nupya alamulondelela kuti aezye kumulema. Lelo vino ndacita kunoli nu ku vita vyakwe, vilalenga kuti antu yancindike. Lyene aina Eguputo yalamanya ukuti nene indi Yawe.” Aina Izlaeli iyayela amazwi yakwe Yawe nga yaya yakuula insakwe kuno wayanenyile.
5Lino umwene waku Eguputo uvwa ukuti aina Izlaeli yatiyapuuka, Falao pamwi na yacilolo yakwe yasenula amano yavwanga yati, “Uzye vino twacita asi kuli kutumpa? Twaleka aina Izlaeli yapuuka, na azya yaa tutalatala tuyalole nupya!” 6Acino Falao anena akuti yamuteyanyizizye celeta lya kuila ku ulwi nga anena ni vita vyakwe kuti vipite nawe. 7Atoola maceleta yakwe yonsi amu Eguputo, pamwi na maceleta imyanda mutanda yano yali ampomvu. Cila celeta lyakweti musika wino wangalilanga celeta lilyo. 8Yawe aleka Falao umwene waku Eguputo kuti akome umwenzo, cakuti alondelela aina Izlaeli lunkwalunkwa, yano afumanga mu mpanga ilya nu kupama. 9Vita vyakwe Falao umwene waku Eguputo, ivyali pa mfwalasi, ivita vino vyali pansi, yalondelela aina Izlaeli lunkwalunkwa nga yaya yayazana lwa pano yakuuzile insakwe mu nkumba yakwe Yemba Muyenzu, pipi na Pi Hailoti na Baali Zefoni.
10Lino aina Izlaeli yalola Falao ni vita vyakwe yafika pipi, yuvwa intete nga yapunda yati, “Yawe, twapapata tutuule!” 11Yanena Mose yati, “Uzye watuleta kuti twize tufwile muno mu lwanga vwile? Uzye pamulandu wakuti mu Eguputo mutali incende ikulu ya malindi? Lola lyene vino wacita pa kutufumya mu Eguputo. 12Uzye tutakunenyile lino tutali tufume ukuti vii vingacitika? Twakunenyile ukuti utuleke sweisikulu tutwalilile ukuya azya ya ina Eguputo. Cange cituzipile ukuya azya kuku ukuluta kufwila muno mu lwanga.”
13Mose aasuka ati, “Awe mutoopa! Posyini, mumalola vino Yawe amacita ilelo pakuti atutuule, mutalatala mulole aina Eguputo yaa nupya. 14Yawe aliwe amamulwila ulwi. Mwemo mwikale sile myaa.”
15Yawe anena Mose ati, “Uzye pacani cino mukulu kupunda kunondi kuti mwazwe? Nena aina Izlaeli yomolole insakwe yatwalilile ulendo. 16Katusya intuwa yako ukonzolole ikasa lyako pali yemba. Amanzi yamapaatukana yaye kuu na kuu pakuti yapeele inzila ku ina Izlaeli kuti yapite mwenemo pa musili uume. 17Ndalenga aina Eguputo kuti yakome imyenzo cuze cakuti yalalondelela aina Izlaeli. Lulumbi lulapelwa kunondi pakucimvya Falao ni vita vyakwe vyamu maceleta kumwi ni vya pa mfwalasi. 18Lino ndacimvya vita vyao, alino aina Eguputo yalamanya ukuti Nene indi Yawe.”
19Lyene mungeli wakwe Leza, wino wali ku nkolelo ya vita vya ina Izlaeli afumako aiza kucisila cao, ni kumbi kwene lifuma ku nkolelo liiza ku cisila cao. 20Liya pakasi ka ina Eguputo na aina Izlaeli. Ikumbi ilipela imfinzi. Cii cilenga kuti vita vitalolana usiku onsi.
Aina Izlaeli yalamba yemba pa musili uume
21Lyene Mose akonzolola ikasa lyakwe pali yemba, alino Yawe alenga kuti muza upunge ukufuma ku ufumondaka. Muza upunga usiku onsi nu kulenga kuti amanzi yapaatukane cakuti musili uume uloleka pali yemba. Amanzi yapaatukana kuu na kuu, 22#1Kol 10:1, 2; Aye 11:29 nga aina Izlaeli yapita mwenemo pa musili uume. 23Ivita ivya ina Eguputo vyonsi ivyali mu maceleta na pa mfwalasi vilondelela aina Izlaeli lunkwalunkwa muli yemba pakasi. 24Ku macaca Yawe wino wali mwi kumbi nu mu cimbilimbili ca moto alolekesya pa vita vya ina Eguputo, alenga kuti yuvwe intete nga yalonda kupuuka. 25Yawe alenga kuti mipeto ya maceleta yao isokozoke, cakuti iyapita panono panono. Aina Eguputo yavwanzyanya yati, “Yawe akulwila aina Izlaeli yaa. Acino lekini tuutuke ukufuma kunoyali.”
26Yawe anena Mose ati, “Konzolola ikasa lyako usonte intuwa yako pali yemba, pakuti amanzi yaswilile nu kulenga kuti aina Eguputo ali mu maceleta, na ali pa mfwalasi, na ali pansi yonsi yamwele.” 27Caleka Mose akonzolola ikasa lyakwe pali yemba. Lino ilanzi lyatunka yemba aswilila vino wali. Aina Eguputo yezya kuti yapuuke amanzi, lelo Yawe aleka yaswilila muli yemba pakasi. 28Amanzi yaswilila nu kutuwizya maceleta ni vita ivya pa mfwalasi, ivita vyonsi vya ina Eguputo yano alondelelanga aina Izlaeli, muli yemba. Kutali nanti wenga wino wapuswike. 29Lelo aina Izlaeli yalamba yemba pa musili uume ala amanzi yatiyapaatukana mbali ziili wa lung'umba kuu na kuu.
30Pa wanda ulya Yawe atuula aina Izlaeli ku ina Eguputo. Aina Izlaeli yalola vyala vikwelela mu mbali yakwe yemba. 31Lino aina Izlaeli yalola maka yano Yawe waomvya pa kucimvya aina Eguputo, iyatandika koopa Yawe. Pali cii aina Izlaeli yataila Yawe na Mose muomvi wakwe.
Currently Selected:
Kufuma 14: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
