Esita 5
5
Esita waama umwene na Hamani uku cakulya
1Pa wanda wakwe citatu uwa kuleka ukulya, Esita azwala umwingila wakwe unamwene. Lyene aya aimilila umukasi ka musolo wakwisano, ala wataikala, asumvile na manso uku mulyango. Umwene Aasuwelo amuno wali, ala atenzi apa cilimba ca wene, watalozya ni cinso lwaku mulyango. 2Lino walola namwene Esita aimi mu musolo ulya, umwene akatusya intuwa ya wene iyembe, yakwe zaabu, nu kumusonta ni ntuwa iyo. Nawe fwandi ali pakukonzolola ikasa akumya insongo yakweyo.
3Lyene umwene amuuzya ati, “Uzye icani, we namwene Esita? Uzye icani cino ukulonda? Namakupeela nanti sile uwene wane apakasi.”
4Nawe Esita aasuka ati, “Ndi cakuti cingazanzya umwene, si umwene pamwi na Hamani, yale yize ilelo uku cimulo cino natinjateyanyizizya.”
5Umwene ali pa kuvwanga ati, “Mwe! Siamini zuwa Hamani aize, apakuti tufikilizye ulwamo lwakwe Esita.” Fwandi umwene ali pakuya na Hamani uku malila yano Esita wateinye. 6Lino yakumwa waini, umusambazi auzya Esita ati, “We! Nena zuwa cino ukulonda ukulenga, nanti uwene wane apakasi ningakupeela.”
7Esita nawe, aasuka ati, 8“Ndi cakuti umusambazi angankwatila uluse nu kuvwa ukulenga kwane, cingazipa sana ukuti umusambazi pamwi na Hamani yakazanwe uku cimulo cino indayateyanyizizya mutondo. Ali lino ndaasuka iuzyo lya mwene.”
Hamani wapanga ukukoma Modekai.
9Uwanda uwa walanga Hamani akufuma umu ng'anda ya cimulo, ala watazanga nu kusansamuka. Alola Modekai, aimilile apa mpongolo ya mwene kusi nu kulanga umucinzi uno walinzile ukupeela Hamani lino akupita. Hamani fwandi wene pasi pakusokela Modekai. 10Lelo Hamani azizimizya nu kuivulunganya kwati atasosile, apita aya nu ku ng'anda ukwakwe.
Alino lyene aama yacuza yakwe nu kulenga Zelesyi kuti aize apali ponga nayo ukwakwe. 11Nga Hamani atandika ukuitakizya apa ukama wakwe ni vyuma vyakwe. Apa ana yakwe aingi, na pali vyonsi vino umwene wamucindamika nu kumupeela icifulo cikalamba ukuluta apa alasi yonsi asyala na yamusika ya mwene. 12Hamani lyene alunda nu kuti, “Namwene Esita watalalika nene nenga ukuzanwa ku cimulo cino watateyanyizizya nene nu musambazi. Namutondo kwene Esita watandalika pamwi nu musambazi sile. 13Lelo kwene vyonsi vivyo vitakweti incito nanti imwi kuli nene, pano ncili nkulola Modekai Umuyuda wiya atenzi apa mulyango wa mpongolo ya mwene.”
14Zelesyi umuci wakwe pamwi na auze yakwe yonsi yamutolelela iyati, “Si wemo yanga sile ukimike icimuti icitali icingafika nu ku mamita amakumi yaili na yatatu. Mutondo akatondo tondo uce ukanene umusambazi ukuti Modekai akulikwe sile. Alino muce muye uku cimulo pamwi nu mwene ni myenzo isansamuke.” Apakuvwa vivyo, Hamani pasi pakusansamuka. Apela ni lamulo lya kwimbila icimuti ukwakukulikila Modekai.
Mambwe-Lungu Bible © The Bible Society of Zambia, 2013