2 Samueli 2
2
Davidi yamulasika pa cilimba ca wene waku Yuda
1Pacisila ca nsita imwi, Davidi auzya Yawe ati, “Uzye nje inkateeke umusumba onga pa misumba ya mpanga yakwe Yuda?”
Yawe nawe aasuka ati, “Ee, yanga.”
Davidi nawe auzya ati, “Uzye ungaya umusumba cii?”
Yawe nawe aasuka ati, “Umusumba wa Hebuloni.” 2#1Sam 25:42, 43 Acino Davidi aya ku Hebuloni. Asenda na aci yakwe yoili kwene, Ainoamu uwafumile ku Yezileele, na Abigelo uwatwitwe ku muyazi Nabali, nupya uwafumile ku Kalimeli. 3Asenda na antu yakwe aonsi kumwi na akazi kao, nga yikala mu misumba iyazingulwike Hebuloni. 4#1Sam 31:11-13 Lyene aonsi amu Yuda yiiza ku Hebuloni nga iyapongolwela Davidi mafuta, iyamwika pa cilimba ca wene wakwe Yuda.
Lino Davidi uvwa ukuti aikazi amu Yabesyi mu musumba wa Gileadi yazika Saulo, 5atuma inkombe zimwi ku antu yayo aku Yabesyi Gileadi na mazwi akuti, “Si Yawe amupolelele pa kulanga icuvwilo ku mwene winu pa kumuzika. 6Si Yawe ndakai aye uwa luse nu wakutailwa kunuli. Nani kwene namacitanga ivisuma, pamulandu wakuti watucita icintu cii. 7Kwatini amaka nu kuzyansya! Saulo umwene winu watafwa, nga antu yakwe Yuda yatiyampaka amafuta akunjika pa cilimba ca wene kuti inje umwene wao.”
Isyibosyeti walasikwa uwene wa Izlaeli
8Pa nsita kwene ilya, Abineli umwana umonsi wakwe Neli, uwali musika mukalamba uwa vita vyakwe Saulo, asenda Isyibosyeti umwana wakwe Saulo, nga amuleta ku Maanaimu. 9Lyene amulasika uwene nga aya umwene wa Gileadi, Asyuli na Yezileele, nga nu wa mpanga yonsi yakwe Efulemu na yakwe Benjamini ni ya ina Izlaeli yonsi.
10Isyibosyeti umwana umonsi wakwe Saulo wali ni myaka amakumi yani lino yamulasike pa wene wa Izlaeli, nga wateesile imyaka iili. Lelo nanti cali vivyo amu mutundu wakwe Yuda yalondela Davidi. 11Utali wa nsita ino Davidi wateesile umutundu wakwe Yuda umu Hebuloni cali imyaka cinimbali ni myezi mutanda.
Aina Izlaeli yalwa na ina Yuda
12Abineli umwana umonsi wakwe Neli, pali pamwi na aomvi yakwe Isyibosyeti umwana umonsi wakwe Saulo, iyafuma ku Maanaimu iyaya ku musumba wa Gibyoni. 13Yoabu wino nyina wali a Zeluya, pamwi na aomvi yauze yakwe Davidi iyayakomenkanya pa ciziya caku Gibyoni. Ali vino lyene yonsi iyikala pansi, iumba lyonga kuno mbalama ni umba lyuze ku mbalama yuze.
14Abineli pali pakunena Yoabu ati, “Leka tusolole aonsi yamwi ukufuma muli cila umba kuti yalwe wa vita.”
Yoabu nawe amuzumilizya ati, “Icisuma.”
15Acino aonsi ikumi na yaili ukufuma mu mutundu wakwe Isyibosyeti, umwana umonsi wakwe Saulo, nu mu mutundu wakwe Benjamini, iyalwisya aonsi ikumi na yaili ukufuma mu antu yakwe Davidi. 16Cila muntu avuta umutwe wa muntu wino yamalwa nawe, nga amutota ni sumo lwa mumbazo, cakuti yonsi kwene amakumi yaili na yani iyapona pansi, iyafwa pali pamwi. Acino incende ilya mu Gibyoni ikaamwa ukuti Helekati Hazulimu.
17Lyene kwakatwike inkondo ikakate. Abineli na ina Izlaeli iyayacimvya ku antu yakwe Davidi. 18Ana yatatu aonsi yakwe Zeluya yaa akuno yali: Yoabu, Abisyai, na Asaeli. Asaeli uwakweti ulwilo wakwe mpombo 19atandika kucocovya Abineli. Amulondela pacisila ukwaula kupumba inzila. 20Lino Abineli wapepela icisila, avwanga ati, “Uzye awewe Asaeli?”
Asaeli nawe aasuka ati, “Ee, anene kwene.”
21Abineli amunena ati, “Ta ukunzinganya! Simula londelela sile wenga pa asilika, umupoke vino akweti.” Lelo Asaeli atwalilila sile ukumuzinganya.
22Nupya kwene Abineli anena Asaeli ati, “Ta ukunzinganya! Uzye pacani cino ukumpatikizya ku kukoma? Uzye umu musango cii muno ningaya nkanenele umunyonko Yoabu?”
23Lelo nalyo kwene Asaeli atatiile ukumuzinganya. Icaleka Abineli amutota icundansizi umunda ni sumo lyakwe cakuti ilipuzinkanya ilifumila kunsizi. Asaeli apona pansi afwa nu kufwa. Nupya umuntu wensi uwiza wafika pa ncende pano wafwilile ata ukupita, aimilila papo kwene.
24Lelo Yoabu na Abisyai iyatandika ukuzinganya Abineli. Lino ilanzi lyawa iyafika ku mwamba waku Ama, uwaya lwaku ufumondaka wakwe Giya, umu museo uwalungama ku Lwanga lwa Gibyoni. 25Aonsi aina Benjamini iyakongana ukuzinguluka Abineli. Iyaya yimilila pa mwamba papela.
26Abineli nawe pali pakulaizya Yoabu ati, “Uzye tutwalilile ukulwa vikwene? Uzye wemo utange ulole ukuti apakusyalikizya cili nu kwipisya sana? Ala mwine, sweswe ikalansi yauzo! Alilaci fwandi lino wemo umalesya antu yako ukuta ukutuzinganya?”
27Yoabu aasuka ati, “Nalaya umwi zina lyakwe Leza wa umi ukuti kwene ukana sile ukulanda vino walanda, antu yane yange yatwalilile ukumuzinganya, mpaka sile akatondo.”
28Lyene Yoabu alizya intandala nga ivita vyonsi ivimilila, ivita ukuzinganya aina Izlaeli, nga nu ulwi iusila.
29Usiku ulya onsi Abineli na antu yakwe iyasalala mu Alaba, iyalamba Yodani, nga iyatwalilila ukupita akatondo kaka konsi mpaka iyafika ku Maanaimu.
30Lino Yoabu wata ukuyazinganya, akonganika antu yakwe yonsi nga azana ukuti antu ikumi na fundimbali yakwe Davidi yasipo ukwikapo na Asaeli kwene. 31Antu yakwe Davidi walanga yatiyakoma antu yakwe Abineli, aina Benjamini yano yali imyanda itatu na makumi mutanda 32Yoabu na antu yakwe iyatola icala cakwe Asaeli iyaya iyacizika mwi lindi lya aluko lwakwe ku Betelemu. Lyene iyapita usiku onsi suka iyafika ku Hebuloni pa macaca.
Mambwe-Lungu Bible © The Bible Society of Zambia, 2013