Oze 9
9
Isirayɛlidenw ben'u tana dumu
1Isirayɛlidenw, aw kana ɲanagwɛ kɛ,
aw kana nisɔndiya i ko siya tɔw.
Bari aw y'aw ka Ala to ka taga joow sɔn.
Aw ye tɔnɔ min sɔrɔ sumangosiyɔrɔw bɛɛ la,
o diyara aw ye.
2Suman min be gosira a kɛnɛ na,
ni tulu min be bɔr'a bɔyɔrɔ la,
tena kɛ aw ta ye.
Aw be duvɛnkura min kɔnɔna,
aw tena o nɛnɛ.
3Aw tena to Masaba ka jamana kɔnɔ.
Efarayimu kɔmɔgɔw bena kɔsegi Ezipiti jamana na.
U bena u tana dumu Asiri jamana na.
4U tena Masaba sɔn ni duvɛn ye tugu.
U ka sarakaw tena diy'a ye.
O bena kɛ u bolo i ko sangadumuni,
ni minw bɛɛ y'o dumu,
olu bɛɛ be nɔgɔ Ala ɲakɔrɔ.
O dumuni nin le bena kɛ u ta ye,
o tena don Masaba ka soo.
5Aw bena mun le kɛ ɲanagwɛba loon na,
Masaba ka lonba la?
U be kira kɔniya
6A ye, u be bolila halakili ɲa.
Ezipiti jamana bena u kunbɛn,
Manfisi dugu bena kɛ u kaburu ye!
U ka nafolo marayɔrɔw bena fa ŋɔni la,
ŋɔni bena falen u ka soow kɔnɔ.
7 #
Luka 21.22
Ɲagwan waati sera,
kojugu juru sarawaati sera.
Isirayɛli k'o lɔn!
Kira kɛra i ko fatɔ
aw ka kojugu caaman kosɔn.
Ala ka dalaminɛ hakili ɲagamina
aw ka juguya barika kosɔn.
8Efarayimu kɔmɔgɔw kɔlɔsibaga be ni ne ka Ala ye, kira lo.
U be jaan l'a ka tɛmɛsiraw bɛɛ kan,
u b'a kɛlɛ hali a ka Ala ka soo kɔnɔ.
9 #
Cɛf 19.1-30
U kɔgɔra juguya la i ko Gibeyakaw.
Ala tena ɲinɛ u ka juguya kɔ,
a bena u ka hakɛw juru sara u la.
Josɔn bɔnɛ
10 #
Kok 25.1-5
Masaba y'a fɔ ko:
«Ne ye Isirayɛlidenw ye,
u tun be i ko *ɛrɛzɛn mɔnin,
kongokolon kɔnɔ.
Ne y'aw faaw ye,
u tun be i ko toro deen fɔlɔw.
Nga u tagara se Baalipewɔri dɔrɔn,
u y'u yɛrɛ kalifa o maloyafɛn nin ma.
O la, u kɛra fɛnjuguw ye
i ko fɛɛn min koo ka di u ye.
11Boɲa min be Efarayimu kɔmɔgɔw kan,
o bena bɔ pewu i ko kɔnɔ vantɔ.
Deen tena wolo tugu,
muso tena kɔnɔ ta tugu,
muso lasiriko tena fɔ tugu.
12Hali n'u ye deenw lamɔ,
yanni o deenw ka kɔrɔbaya,
ne bena u faran ɲɔgɔn na.
Ni ne y'u bila, o ye bɔnɛ ye u ma!
13Ne ɲaa be Efarayimu kɔmɔgɔw la,
i ko Tiri dugu. U sigiyɔrɔ ka ɲi.
Nga, u bena taga n'u deenw ye fagayɔrɔ la.»
14Masaba, u sɔn.
I bena u sɔn ni mun ye?
U sɔn ni wolobaliya ye,
ni sinjitanya ye.
15Masaba y'a fɔ ko:
«U ka juguya bɛɛ bɔra kɛnɛma
Giligali dugu kɔnɔ le.
O yɔrɔ la, u koo goyara ne ye.
U ka kɛwalijuguw kosɔn,
ne bena u gwɛn ka bɔ n ka yɔrɔ la.
U koo tena diya ne ye tugu.
U ɲamɔgɔw bɛɛ ye banbagaw ye.
16Efarayimu kɔmɔgɔw ta cɛnna,
u lili bɛɛ jara,
u tena deen wolo tugu.
Hali n'u ye deenw sɔrɔ fana,
n'u koo ka di u ye,
ne bena u faga.»
17Ne ka Ala bena u bila
bari u ma mɛnni kɛ a fɛ.
U bena munumunu siya wɛrɛw cɛma.
Currently Selected:
Oze 9: AKKDC08
Highlight
Copy
Compare
Share
Want to have your highlights saved across all your devices? Sign up or sign in
La Bible en Jula © Alliance Biblique du Burkina Faso, 2007.
