GALATIAFƆ 2

Fɔtɔ Banyanɛ Bɛbã a Tɛ Paulo Bido Nɛ Be Kamɛ.

1Nɛ futeli ewuana liti a, bɔmɔ́ Barnaba bubuki bumuniki bɔnaa Yerusalem, ade nkpã Tito lɛmɛ nnamɛna a. 2Nnaa awã kitonɛkĩ Baguma nyɛ ɛtsa yĩ kĩ kɛnɛ kĩ nnaa. Nɛ bɔmɔ́ lɔtɔ banyanɛ a odi katsɛna kamɛ ni, nkpalɛ fɔlɛtsa kamɛ ntsa be nɛ Kalɛ Wĩ lɛtsã a kĩ nlamɛna kade kakpa bikĩ bɛnyɛ́ Yudafɔ a akũ. Ntáwɛ kĩ adzuma a kĩ nkɛna ntɛ̃ a, mɔ ekĩ makɛna finyaa a, ɛkɛna fɔtsa pupulidza. 3Titɔ kĩ yĩ obumɛnanɛ Tito lɛnyɛ́ Yudani malo ni, odima táhɛ ye kĩ etsua lɛkpati. 4Lɛmɛ bavãlɛvã batɛ badonɛ badi tsã tɛdake osi akũ biwo nɛ asɔli bati a kamɛ kĩ banaĩ bɛmɔ boe akũ akũ kadzi a kĩ bɔna nɛ ɔmɔa kakɛna mɔ Kristo Yesu a. Bɛwɛ kĩ bakɛna boe basate bɛkpa be tɛmaniɛ a kĩ bɛnɛɛ a. 5Lɛmɛ ayekĩ bɔwɛ kĩ kalɛ wĩ a ɔnɔkɔali a ɛdza pintii kɛkpa mi sũ ni, bɔtákpa be osi kɔlaa.

6Lɛmɛ bati a kĩ badã ndɛ be nyɛ lɔtɔ banyanɛ a tákpa yĩ kɔdɛ kudima. Lɛmɛ ntɛ bɛnyɛ bati titiliwu badi malo ni, yĩ kɔ̃ ntsɛ́la, kitonɛkĩ Baguma ládã oti anɛ. Mbuki malɛ kĩ lɔtɔ banyanɛ a tákpa yĩ kɔdɛ vɔɛ̃ kudima. 7Mbom bɛmɔ́ kĩ adzuma a kĩ Baguma do yĩ nɛ awɛ nyɛ kĩ nde lɛtsã nɛ Kalɛ Wĩ a akũ nkpã bikĩ bɛnyɛ́ Yudafɔ a, ndɛ ayekĩ edo ye nɛ Petro lɛmɛ awɛ kĩ ede lɛtsã nɛ Kalɛ Wĩ a akũ ɛkpa Yudafɔ a. 8Kitonɛkĩ fɔtsã Baguma kɔbɛ̃ akũ, bɛkɛna yĩ fɔtɔ ɔnyanɛ bɛkpa bikĩ bɛnyɛ́ Yudafɔ ndɛ ayekĩ bɛkɛna Petro fɔtɔ ɔnyanɛ bɛkpa Yudafɔ a. 9Yakobo, mɔ Petro mɔ Yohanes, kĩ bɛkɛna ndɛ lɔtɔ banyanɛ a mɔ́ biyi ɔsũ kĩ Baguma lido yĩ adzuma pɔtii kĩĩ nɛ awɛ. Foesũ bigua bɔmɔ́ Barnaba bɛkɔa bɛtsa kĩ boe flee bɔnyɛ adzuma mɔa bakɛnanɛ. Bɔkɛna onukpɛ̃ mɔa kĩ bɔmɔ́ Barnaba bɔ́akɛna adzuma nɛ bikĩ bɛnyɛ́ Yudafɔ a kamɛ, lɔkɔa be malo bɛkɛna adzuma nɛ Yudafɔ a kamɛ. 10Lɛtsa a kĩ bivia bitomɛna boe sɛkɛ̃ nyɛ kĩ bute anɛ nɛ batɛ badonɛ ahiãfɔ a akũ, kĩ fɔnyɛ lɛtsa titiliwu a kĩ fɔasĩ yĩ akũ kĩ nkɛna.

Paulo Yidza Ɛdza Nɛ Petro Akũ Nɛ Antiokia.

11Lɛmɛ kĩ Petro ya nɛ Antiokia a, ĩyidza ndza nɛ ye akũ nɛ kanade, kitonɛkĩ ɛkɛna lɛtsa kĩ lɛtáfɛta. 12Fɔmɔ batɔ a kĩ Yakobo do a ayawo awã ni, Petro kado awɛ kanya mɔ batɛ badonɛ a kĩ bɛnyɛ́ Yudafɔ a. Lɛmɛ kĩ bati a ya liti a, Petro vɛlɛ ye akũ nɛ be akũ, esĩ kanya mɔ bikĩ bɛnyɛ́ Yudafɔ a, kitonɛkĩ evila be a kĩ batsa kĩ kɛnɛ kĩ oti ɛtsua lɛkpati a. 13Yudafɔ batɛ badonɛ bɛbã a do kakɛna awɛ ndɛ babelibe bitomɔ Petro nɛ liti, ade Barnaba malo fɔ̃ libe lɛkɛnana kĩĩ nya ye akũ a.

14Lɛmɛ kĩ mmɔ́ kĩ bɛtsɛ́ nɛ ɔnɔkɔali Kalɛ Wĩ a osi kpĩĩ akũ ni, mbi Petro nɛ bati a flee anɛ kĩ, “Ntɛ nɔ a kĩ ɔnyɛ Yudani, odzi nkpã ndɛ oti kĩ ɛnyɛ́ Yudani a ni, nde sũ mɔ finyaakĩĩ kɔ̃ ahɛ bikĩ bɛnyɛ́ Yudafɔ a kĩ bidzi ndɛ Yudafɔ aye?”

Yudafɔ Mɔ Bikĩ Bɛnyɛ́ Yudafɔ Na Nkpã Katɛ Bɛtsãmɛna Katɛkado Kamɛ.

15Nɛ ɔnɔkɔali kamɛ ni, Yudafɔ bɔanɛ kito nɛ kama kamɛ, ade ke nnɛ́ bikĩ bɛnyɛ́ Yudafɔ tɔkpa bakɛnanɛ a bɔanɛ. 16Lɛmɛ bunyina kĩ nnɛ́ oti a kĩ yakɛna nɛ mbla a akũ nyɛ oti kĩ ɛkpɔla nɛ Baguma anɛ, mbom oti kĩ ɛtɛ Kristo edo. Boe malo bɔtɛ Kristo Yesu budo, ayekĩ bɔ́akpɔla nɛ Baguma anɛ kĩ bɔtɛ Kristo budo sũ, lɛmɛ nnɛ́ nɛ mbla akũ kakɛna sũ. Kitonɛkĩ odima lɛláakpɔla nɛ Baguma anɛ, nɛ ayekĩ yakɛna nɛ mbla a akũ sũ.

17Foesũ ntɛ bɔabɔa mbɔdi kĩ bɔakɛna bati kĩ bɛkpalɛ nɛ Baguma anɛ nɛ boe ɔmɔa kakɛna mɔ Kristo sũ, mɔ bɛmɔ́ kĩ tɔkpa bakɛnanɛ bɔanɛ ndɛ bikĩ bɛnyɛ́ Yudafɔ a aye ni, katsa fɔatsa kĩ Kristo lɛmɛ tomɔ tɔkpa liti? Oowo, fɔlá lɔmɔ! 18Ntɛ mbuki madzɛla mbla a akũ kakɛna a kĩ nfɔnɛ awɛ a ni, ke kɔ̃ ĩnyɛ yĩ akũ kanya ndɛ odi kĩ yaádi mbla a akũ. 19Nɛ mbla a onukpɛ̃ ni, nku nkpa mbla a, ayekĩ maadzi nkpã nkpa Baguma. 20Bɛbɔa bɔmɔ́ Kristo nɛ asendua akũ. Foesũ finyaa ni, nnɛ́ yĩ mɔawɛ a ndzi nkpã, mbom Kristo dzi nkpã nɛ yĩ kamɛ. Nkpã a kĩ ndzi finyaa nɛ sukɛna kamɛ a, ndzi ye nɛ Baguma Obi a kĩ yawɛ yĩ kalɛ, ɛkɔa ye akũ ɛbɔa afɔliɛ nɛ yĩ lɔlɔ a nɛ katɛkado kamɛ. 21Maáwɛ kĩ masĩ Baguma kɔnyakamɔ a. Lɛmɛ ntɛ oti akpɔla nɛ Baguma anɛ nɛ ayekĩ ɛkɛna nɛ mbla akũ sũ ni, kekɔ̃ fɔatsa kĩ Kristo ku pupulidza!

Currently Selected:

GALATIAFƆ 2: bov

Highlight

Copy

Compare