Apostolo 6
6
Zuhiꞌa Boro tahiꞌa danazoga gauḡano vaze fuꞌo zu aheu fare ohoziro
1Zuhiꞌa Boro tahiꞌaꞌa ḡeharu onaminuteꞌea, Iuda azaḡa boꞌaḡano, Giriki ḡoeꞌano ḡoereꞌeteꞌeꞌa, Heberu ḡoeꞌano ḡoereꞌeteꞌe mazao ufeta ḡoeriro. Zeꞌe raenaꞌa, “Mada niduꞌa ogomu ḡahugeꞌetene, eme ḡozobaꞌe ogomu moneo iḡize modeꞌohe.” 2Eꞌanoꞌo apostolo azaḡa gaubanana aheu fareꞌa (12) Zuhiꞌa Boro tahiꞌa tahiꞌa niduꞌa nuꞌozadu ziro, raenaꞌa, “Eme, apostolo azaḡaꞌe Badiꞌa ḡoere haramoḡa mene haḡaadu, ogomu ḡahugeꞌeteꞌea mada hauḡogaꞌe mene idaḡa. 3Nego nabudi, zae boꞌaḡanonoꞌo vaze fuꞌo zu aheu fare (7) ohozoꞌi! Zaeꞌa ḡiazadu, zamazeo Vine Zaḡoḡaniꞌa irivaꞌozeꞌeteꞌe zu faifaine zamareꞌeteꞌe azaḡa moꞌi! Eme eꞌe gauḡa zeḡe ꞌevorao riꞌiniꞌuma. 4U eme madaꞌe kuru zu haramo moneo daꞌo tiꞌuma.”
5Ḡoere eꞌe igirotene, zeḡe niduꞌa eꞌe ḡoeꞌa mae ḡihiniro. Ebu vaze ꞌahoga niḡa Stefano meiro. Aniꞌe Badiꞌa mazao fie gigaruꞌeteꞌe zu Vine Zaḡoḡaniꞌa irivaꞌoneꞌeteꞌe vazeḡa. Zuni Firifo, Porokoro, Nikanoro, Timona, Pamena zu Antioka vazeḡa, niḡa Nikolao meiro. Nikolaoꞌe Iuda mene vazeḡa rehano, zamaḡa ḡihunadu Iuda azaḡa teite kurau tiburuꞌeteꞌe vazeḡa. 6Ze apostolo azaḡa zamao ohoziro, ebu apostolo azaḡaniꞌa kuranadu, ꞌevoreze zeḡe rana tiro.
7Ebu ze Badiꞌa ḡoere harame ḡehane onamiro. Ebu Zuhiꞌa Boro tahiꞌaꞌa Ierusalema neḡano ḡeharu onamiro, zu dibuꞌo hauꞌeteꞌe azaḡa ḡehaḡa zuni Iesu mazao fiiro.
Stefano obone tiro
8Stefanoꞌe Badiꞌaꞌa ḡahunone manoḡa zu gigiꞌa boro hina irivaꞌoniro ꞌahine, vaze boꞌaḡano zaguzagaꞌuma haḡaiḡa zu Badiꞌa tahi gigiꞌa haḡaiḡa boroboro haḡaido. 9Eꞌe madaḡanoꞌe, ḡutaroteꞌe teige tuḡure vazeḡa haḡairoteꞌeanoꞌo vaḡiniroteꞌe azaḡaniꞌa Iuda azaḡa kuru neḡa ꞌahogano nuꞌoraudo. Eꞌe kuru neḡaꞌe tuḡure vazeḡanonoꞌo vaḡiniroteꞌe azaḡa kuru neḡa rae huniro. U mada ꞌahogano, eꞌe azaḡa nuꞌa Stefano teite taꞌiro titiro. Zeꞌe Iuda azaḡaniꞌa Kurene habaꞌanonoꞌo, Alesandria neḡanonoꞌo, Kilikia habaꞌa zu Asia habaꞌanonoꞌo onairo. 10Stefano ani Vine Zaḡoḡaniꞌa irivaꞌonadu faifaine zamareꞌenaꞌa ḡoeriro ꞌahine, ze naenaenouga mene idararo.
11Eꞌanoꞌo ze sifu vaze nu soꞌoze tuḡuzadu ꞌahige rae fureniro, raenaꞌa, “Stefano ani Mose zu Badiꞌa rae sausaunoga emeḡeꞌa egeha.”
12Eꞌanoꞌo zeḡeꞌa vaze ḡuḡuvaḡa, vaze boroboro zu goro ḡoeꞌa ihozeꞌeteꞌe azaḡa tutuze soꞌozadu, harae iḡuniro. Ebu ze Stefano obone teadu, kanisoro azaḡa zamao tutune onamiro. 13Ebu zeḡeꞌa vaze nu tuḡuzadu ḡuriro ḡoeꞌa rae fureniro, raenaꞌa, “Vaze ꞌadiꞌe Dibuꞌo Neḡa zu Mose goro ḡoeꞌa rae sausauneꞌenaꞌa mene ḡonabeꞌohe. 14Ani ꞌahige rae rouga egeha. 'Iesu, Nazareta neḡa vazeḡaniꞌa Dibuꞌo Neḡa fahiꞌuma, ebu Moseꞌa emeḡe mazao riꞌiniroteꞌe haḡaiḡaꞌe ḡihuniꞌuma.' ” 15Kanisoro azaḡa nuꞌonuꞌo zamaḡano ehorinuteꞌe azaḡa niduꞌa Stefano ḡiane runirotene, ani iraḡaꞌe tuḡure viga heuḡa horoniro.
Currently Selected:
Apostolo 6: KSJ
Highlight
Copy
Compare
Share
Want to have your highlights saved across all your devices? Sign up or sign in
Wycliffe Bible Translators, INC.
