Apostolo 24
24
Felikiꞌa Paulo kotaniro
1Mada fuꞌo enogano, dibuꞌo hauꞌeteꞌe ḡihiꞌaḡa, niḡa Ananiaꞌa, vaze boroboro nu zu Roma goroḡa edeḡa vazeḡa, niḡa Teretulo teite Kaisarea neḡa ovairo. Ebu ze gavana vazeḡa mazao Paulo haḡai rae fureniro. 2Paulo hune zounirotene, Teretuloꞌa gavana vazeḡa mazao ꞌuteꞌenaꞌa haḡaiḡa rae fureniro, raenaꞌa,
“Feliki, ḡihiꞌa hune vazeḡa, ḡae uꞌano eme uniho manoḡa faḡa maha, zu ḡae edeḡa uꞌano habafe zamaḡanoꞌe ḡauḡaniꞌa manoreha. 3Eme ḡae haḡai manoḡa niduꞌa uꞌano matuꞌe rudauꞌohe. 4Rehano madaḡoꞌa hauḡiteꞌe veize eḡe ḡoere tahiḡa ge egoga umiꞌeꞌohe.
5Vaze ꞌadiꞌe emeḡeꞌa ḡianeꞌetene, haḡai sauꞌa haḡaadu, haba niduꞌa zamaḡano Iuda azaḡa tutuzadu harae ḡunuḡuneꞌohe, zu Nazareta rae huzeꞌeteꞌe azaḡa ibito ziniꞌohe. 6Ebu Badiꞌa dibuꞌo neḡa zuni sausaunihi reiro. Eꞌanoꞌo eme obone tiro. [Ebu eme Iuda azaḡa goro ḡoeꞌa hina kotanoga uratiro. 7Rehano uti vazeḡa boro, Lusiaꞌa onaadu emeḡe ꞌevoraonoꞌo riḡa mae vaḡiniro, 8ebu ani ꞌuteꞌeteꞌe azaḡa zinaꞌa, 'Feliki vaḡe onamoꞌi!' reiro.] Ḡae ḡatanaꞌa ane ḡadinine, emeḡeꞌa ḡae mazao ꞌutataꞌaꞌe niduꞌa ḡoere huga rae zamariꞌuma.” 9Iuda azaḡa zuni Teretulo ḡoere atoneꞌenaꞌa “Aniꞌa ḡoerataꞌaꞌe ḡoere huga” rae reiro.
10Ebu gavana vazeḡaniꞌe Pauloꞌa ḡoeroga veize vadini hina taꞌoro harotene, Pauloꞌa ḡoere iḡuniro, raenaꞌa,
“E edeḡa, ḡa muri ḡehaḡa Iuda azaḡa kotazinutaꞌaꞌe. Eꞌebanoꞌo eꞌe matuꞌuheta, ḡae ubumao eḡe none ḡoeꞌa rae fureneꞌohe.
11E, mada gaubanana zu aheu fare (12) onamiroteꞌea, Badiꞌa kurano hanoga veize Ierusalema neḡa itiro. Ḡaeꞌa ḡadimu vaḡine, eꞌe hariḡa zogone ederiꞌuma. 12Eꞌe dibuꞌo neḡa zamaḡano vaze teite mene taꞌiro titido, ga Iuda azaḡa kuru neḡa zamaḡano ga Ierusalema neḡa zamaḡano vaze ḡuḡuvaḡa mene tutuze harae tauḡitauḡido. E zeḡe ubumao ꞌuguḡa haḡaiḡa mene haḡaido. 13Zu zeḡeꞌa izidi rae furenateꞌe haḡaiḡa horoniroteꞌe vazeḡa oꞌoꞌa. Eꞌanoꞌo ḡoereze mae ḡihinoga mene idaḡa. 14Rehano e ꞌadi rae fureneꞌohe. E ibi ꞌahoga, zeḡeꞌa veꞌoḡa raꞌeteꞌe ibiḡano emeḡe vouḡa Badiꞌa kurano hauꞌohe, ebu Mose goro ḡoeꞌa zu peroveta azaḡaniꞌa tiroteꞌe ḡoeꞌa niduꞌa mae ḡihineꞌohe. 15Ebu zeꞌe, vaze manoḡa zu sauꞌa niduꞌaniꞌa runeonoꞌo bare ḡabodiꞌuma raꞌeteꞌe madaḡa zamareꞌenaꞌa, guhineꞌohe. Ebu eḡe zuni eꞌe guhineꞌohe. 16Eꞌanoꞌo iḡaiḡa Badiꞌa zu vaze ubumao zamaheꞌe deheḡano radoga veize haḡai manoḡa haḡae huneꞌohe.
17E muri nu haba ꞌahoga ꞌahogano radiunuteꞌe enogano, bare Ierusalema neḡa itiro, Iuda azaḡa danaze moni zenoga veize, zu Badiꞌa dibuꞌo hanoga veize. 18E deheheꞌeteꞌe haḡaiḡa hauḡadu dibuꞌo neḡano dibuꞌo hau radiuꞌenogano, Iuda azaḡaniꞌa horohiro. Eꞌe zamaḡano eḡe uhiḡanoꞌe vaze ḡuḡuvaḡani oꞌoꞌa zu harae tauḡitauḡoga zu oꞌoꞌa. 19Eꞌe zamaḡano Iuda azaḡa Asia habaꞌanonoꞌo onairotaꞌa zuni eꞌea radiro. Eḡeꞌa haḡai sauꞌa haḡairo rae reifone, zeḡeꞌa onaadu ḡae mazao eꞌe rae furenifo. 20Ga Iuda kanisoro azaḡa nuꞌonuꞌo zamao mae ohohadu ḡadihiroteꞌe zamaḡano, nagi haḡai sauꞌa eḡe mazao horoniroteꞌe, Iuda azaḡa ꞌadaꞌa rae furenine manoḡa. 21Eḡe mazaoꞌe ḡoere ꞌadi daꞌo. Eḡeꞌa zeḡe boꞌaḡano edaunuteꞌe zamaḡano ḡihau ḡoeriro, raenaꞌa, 'E, vazeꞌe runeonoꞌo bare ḡabodiꞌuma raꞌeteꞌe ḡoeꞌa mae ḡihineꞌeteꞌe uꞌano kotaheꞌohe.' reiro.”
22Feliki ani, eꞌe ibiḡa moneo fairu ederoga ꞌahine, kotaḡa ꞌuadu, ꞌahige rae ḡoeriro. “Uti vazeḡa boro, Lusiaꞌa ovaiꞌuduꞌu, ḡoere ḡonaga rae fureniꞌuma.” 23Ebu Felikiꞌa uti azaḡa ibito ziniꞌeteꞌe vazeḡa ninaꞌa, “Pauloꞌe ḡuꞌa gadizeꞌeteꞌe azaḡa ꞌevorao toꞌi, rehano ibihetaḡaꞌe ago ꞌufunoꞌi, zu vazeꞌa dananoga ago gararoꞌi!” reiro.
24Mada nu ḡarugano, Feliki ani inugeita onairo. Inuga niḡa Dunisila. Aniꞌe Iuda roḡaeḡa. Ze uti azaḡa zeadu, Paulo zamahu onairo. Ebu Keriso Iesu mazao fieꞌeteꞌe hariḡa Paulo mazaonoꞌo igiro. 25Pauloꞌa haḡai duduḡa, zu zama rinedeꞌeteꞌe, zu mada ḡonagano Badiꞌaꞌa vaze kotaziꞌuma hariḡa rae furenirotene, Feliki ani ḡiḡaronadu niro, raenaꞌa, “ꞌAi eꞌe daꞌo. Onamoꞌi! Mada manoḡa horonine, bare huḡadiꞌuma.” reiro. 26Felikiꞌa ꞌougirotaꞌaꞌe, Pauloꞌa moni nu zuni hanoga rae zamariro. Eꞌanoꞌo ḡae ḡehaḡa Paulo hune onaadu, ane teite ḡoerido.
27Muri aheu meirotene, Porokio Festoꞌa Feliki iḡuꞌa meiro. Rehano Feliki ani, Iuda azaḡa zamaꞌa manoroga veize Pauloꞌe ḡuꞌano modiro.
Currently Selected:
Apostolo 24: KSJ
Highlight
Copy
Compare
Share
Want to have your highlights saved across all your devices? Sign up or sign in
Wycliffe Bible Translators, INC.
