Tileme 5
5
Bɔ Dɔ Kïtï
1Tine moꞌja bɔ dɔ kïtï nima këdï ti buku löbu közï bo ma dörï, kugu a mo ga ꞌdeni kebe kapa mo ga kpaki rïyö, kina kora kpamo ꞌdeni teyi ti ꞌboŋa ŋbö mï modɔmorïyö. 2Kina moꞌja malayika ma ti tigɔ dɔ kiteli kënyï ŋgï tuwöwö mo rɔ ma kembe, iya te, “Yë na ti kɔꞌbɔ tunyë ꞌboŋa naga nime yaga kobenye mï buku nime?”
3Tine bɔtɔ ma kɔtɔ mɔtɔ te inza ame kɔꞌbɔ tunyë ꞌboŋa naga nima yaga koŋgɔ mï buku nima, pele di mï bilaka ꞌba mïtɔrɔ ala di mï dɔyayi bine ala di mï maliti. 4Gɔ köꞌdu mo na mudu ŋgï rɔ ma kënyë römöyï oꞌja bɔtɔ ma kɔtɔ mɔtɔ dë du te ame kɔꞌbɔ tunyë ꞌboŋa naga nima yaga koŋgɔ mï buku nima. 5Tine löbu ma kɔtɔ mɔtɔ ënyï kiya zö te, “Kinza kudu dë, tabïyö ꞌba eꞌbe Yuda kupö dɔ kïlëbï ꞌba ŋere Dawidi aꞌda wa ꞌdeni. Bo na ti kunyë ꞌboŋa modɔmorïyö naga nima yaga koŋgɔ mï buku nima.”
6Kina moꞌja kamölö ꞌbɔꞌbi yayi kinda kɔzɔ umu ꞌdeni këdï kɔrɔ mï löŋgö kïtï nima ti yërï sowɔ naga nima ti löbu ꞌbutë rïyö dɔmosowɔ naga nima. Kazo mo modɔmorïyö kina kɔmɔ mo gbï modɔmorïyö, ame kina rɔ Nyï Kɔtɔ Laka modɔmorïyö ꞌba Bɔkoꞌba ame koja ꞌdeni kari mï dɔyayi nime toko ne. 7Kina moŋgɔ kamölö ꞌbɔꞌbi tönë kako ŋgï kogba buku tönë di dörï bɔ nima koloma dɔ kïtï ne.
8Kina ɔdɔ bo kari kogba ꞌdeni tara tine, na yërï sowɔ tönë ga gbï ti löbu ꞌbutë rïyö dɔmosowɔ tönë ga kënyï kolɔdɔ ŋgï bërï kɔmɔ bo. Löbu naga nima me ti tɔmo kina lïjë pili indaꞌba lebe yamo ma köbököbö teyi kpaki lɔ ti a ma kato kele yïmo. Omba kina rɔ mötu ꞌba bɔ lende laka ꞌba Bɔkoꞌba. 9Kina lïjë koloma ŋgï rɔ toba ŋgala laꞌja ame kiya te, “Nï na laka kɔꞌbɔ tindaꞌba buku nima kunyë ꞌboŋa mo ga yaga, römöyï umu yi ꞌdeni kina me kugö bilaka ꞌdeni ti roma yï koꞌde zi Bɔkoꞌba di mï dɔ kupö pili ame ga kpamo rɔ gege ne pili rɔ gɔ dɔkomali bilaka. 10Oꞌdɔ lïjë ꞌdeni rɔ ꞌba ŋere löbu ꞌba Bɔkoꞌba rɔ bɔ akumu toja laja zi Bɔkoꞌba ze nime kina lïjë ti këdï ŋgï ti közï kakpa dɔ dɔyayi.”
11Kina moŋgɔ, muwö birɔ ꞌba malayika ame lïjë ŋgï rɔ tïndï ma kinza kiya konzi ŋgï rɔ dɔ kiteli ne ŋgï. Lïjë ako kɔrɔ kuru dɔ kïtï tönë ti yërï sowɔ tönë ga gbï ti löbu ꞌbutë rïyö dɔmosowɔ tönë ga. 12Kina lïjë koloma ŋgï rɔ toba ŋgala rɔ ma kembe, kiya te, “Kamölö ꞌbɔꞌbi ame kumu ꞌdeni ne na laka kɔꞌbɔ tindaꞌba közï kakpa ti mɔri ti akikali ti tigɔ ti lende koro gbï ti rɔ löbu ti akïlëlu.”
13Kina muwö dɔkomali wa pili ma mïtɔrɔ ti ma mï dɔyayi kpaki ti ma mï maliti ti ma mï mini löbu ni, pili rɔ gɔ wa ame ga ti dïdï yïmo ne këdï koba kiya te, “Akïlëlu ti lende koro ti rɔ löbu ti tigɔ këdï zi bɔ ame koloma ꞌdeni dɔ kïtï ne gbï zi kamölö ꞌbɔꞌbi nduwë ŋbö rɔ ŋburuŋburu.”
14Kina yërï sowɔ tönë ga kënyï kutï ŋgï gɔmo, tëgë, “Amini.” Kina löbu ma ꞌbutë rïyö dɔmosowɔ tönë ga kolɔdɔ ŋgï bërï toꞌdɔ mötu.
Currently Selected:
Tileme 5: BEK
Highlight
Copy
Compare
Share
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
