Pilemona 1

1Ma Pɔlo bɔ koboso gɔ lende ꞌba Yësu Kurïsïtö mo tönë, ze ti Timatiyo na me dëdï dugu waraga nime zïyï Pilemona, nï lëpï ze ma dɔꞌɔ kulöwö, 2gbï ti lëmï ze Apiya ni ti Akipo bɔ ya lëpï ze, kina gbï ti bilaka ꞌba kanisa ame ga këdï kotɔtɔ dönnï liŋɔ ꞌbï yayi ne.

3Lende këyï ti yëyï ꞌba Bɔkoꞌba ꞌbu ze ti ꞌba Yësu Kurïsïtö ŋere ze koloma kɔtɔ tiye.

Akɔꞌɔ ꞌBa Pilemona

4Mï mötu ma pili möꞌbö tileki yëëꞌdï göyï zi Bɔkoꞌba ma 5römöyï tiꞌdi döyï gɔ lende ꞌba ŋere ze Yësu muwö ꞌdeni gbï ti akɔꞌɔ ꞌbï ma zi bilaka ꞌba kanisa lëpï ze ga pili. 6Mumötu Bɔkoꞌba kiꞌdi rɔ kodɔꞌbɔ ze mï tiꞌdi dɔze gɔ lende ꞌba Kurïsïtö nime koꞌde ŋgiraꞌda ꞌba akikali ma kalo zïyï mï wa ma laka naga pili ame kina ꞌdeni zize ꞌdɔ toꞌdɔ mo dömöyï Kurïsïtö ne.

7Löndö ma, akɔꞌɔ ꞌbï iꞌdi ma ꞌdeni ŋgï mëdï lɔ ti lɔŋɔ bi tiliya gɔ ame nï na kocɔ bilaka ꞌba Bɔkoꞌba ꞌdeni leꞌjete kulöwö mï lende laka.

Ndose ꞌBa Pɔlo Zi Pilemona

8Gɔ lende mo na ma bɔ löndö yï mï Kurïsïtö, dëne ꞌdɔ mëdï ŋgï rɔ dɔ kïtëwu tiꞌdi köꞌdu mo zïyï ꞌdɔ toꞌdɔ wa ame ga gɔ koꞌdɔ ne. 9Ne tine akɔꞌɔ iꞌdi ma ꞌdeni ꞌdɔ momaꞌjo rɔma zïyï. Ma Pɔlo ame ma ꞌdeni pele rɔ bulöbu, kina ma rɔ dɔ kiteli mo ma ꞌdeni mï maboso gɔ lende ꞌba Kurïsïtö ne, ti moꞌdɔ ŋgï tara. 10Momaꞌjo rɔma zïyï gɔ lende ꞌba Onesimo kole ma nime mëdï moja kari zïyï yayi ne. Di dɔ ziŋgiri nime mëdï dɔmo mï maboso bine ne mileki ŋgï yaga rɔ ꞌbu zi bo. 11Kina kɔzɔ ma tönë pa bo kinza pele mɔlo zïyï rɔ ɔtɔ ne, tine leꞌjete bo ꞌdeni yaga rɔ a ma laka zïyï gbï zö.

12Toja bo kari zïyï yayi nime ŋgï kɔzɔ kapa ma na ꞌdeni kari. 13Moꞌdɔkɔ ꞌdɔ tiꞌdi bo koloma gbɔ gɔ bi ꞌbï tö bine tokɔnyi ma di mï maboso nime mëdï ꞌdeni yïmo gɔ lende ꞌba laja laka ꞌba Kurïsïtö ne. 14Tine kinza ma muwö lende ꞌbï gba titi moꞌdɔkɔ dë toꞌdɔ a mɔtɔ kinza lende koꞌdɔ laka ꞌbï këdï ra ŋge gɔ ndose ma. Tine moꞌdɔkɔ ꞌdɔ nï na koꞌdɔ ëꞌbï gɔ mïyï. 15Kina mɔtɔga gɔ ame bo kese ꞌdeni titi mbowa yaga di röyï ne bo kileki gbɔ koloma nati ŋburu tïyï, 16dë kpe nati rɔ atɔli tine ꞌdeni yaga rɔ dɔ kiteli rɔ löndö. Bo ꞌdeni ŋgï rɔ ame mɔꞌɔ kulöwö ne. Kina ti këdï gbï tara zïyï römöyï bo di liŋɔ ꞌbï tine ꞌdeni gbï yaga rɔ löndö mï Kurïsïtö.

17Kina me ɔdɔ kiya te kikali ma ŋgï rɔ lëpï yï, indaꞌba bo kɔzɔ ma na kindaꞌba. 18Ɔdɔ bo kirasi a mɔtɔ zïyï ala bo koꞌdɔ wali mɔtɔ momba dɔŋgoꞌdo ma ꞌdeni teyi, ti mopi zïyï.

19Ma Pɔlo mëdï mugu a nime zïyï te ti közö, “Ti mopi zïyï.” Dëne nï Pilemona na gɔ kopi zö gɔ dïdï yï, ne miya dë tara.

20Löndö ma, moꞌdɔkɔ yi ꞌdɔ koꞌdɔ kɔzɔ a nime te zö mï möyï ŋere Yësu. Ïyëyï dökïꞌdï ma kɔzɔ löndö mï Kurïsïtö tara. 21Mikali ŋgï rɔ ma laka kɔzɔ ame mugu waraga nime zïyï ne ti koꞌdɔ ŋgï tara kina gbï rɔ dɔ kiteli. 22Kina mɔtɔ gbï ileŋo rö zö ndö koda ma yayi. Römöyï mɔtɔga Bɔkoꞌba ti kuwö mötu ꞌbe kileki ma ziye yayi.

23Epapora ame gbï tö mï maboso bine gɔ lende ꞌba Yësu Kurïsïtö ne, oja mötö abo zïyï. 24Bɔ ndɔbɔ lëpï ze ga Marako ni ti Aritaroko ti Dema ti Luka umötö yi gbï.

25Lende këyï ꞌba Yësu Kurïsïtö ŋere ze koloma kɔtɔ tiye pili.

Currently Selected:

Pilemona 1: BEK

Highlight

Copy

Compare