1 Timatiyo 2
2
Mötu ꞌBa Bilaka ꞌBa Kanisa
1Wa ma dɔgba ma mocɔ zïyï na me, bilaka ꞌba kanisa köꞌbö tititi Bɔkoꞌba ti mötu ꞌdɔ kokɔnyi bilaka pili. Lïjë köꞌbö toꞌdɔ yëëꞌdï zi bo gɔ yëyï abo. 2Lïjë köꞌbö tititi bo gbï gɔ bɔ dɔliŋɔ ti bɔ gɔmo ga pili ꞌdɔ bo Bɔkoꞌba kokɔnyi lïjë gɔ dolomake ŋburu rɔ dɔ ŋgölö toꞌdɔ lende laka kɔmɔ Bɔkoꞌba gbï kɔmɔ bilaka lesi. 3Mötu ma te na laka, kina gbï rɔ ma Bɔkoꞌba koꞌdɔkɔ. Bo na kɔmɔ ze ꞌdeni di mï tölë, 4kina bo oꞌdɔkɔ gbï tɔmɔ bilaka pili yaga di mï tölë lïjë kikali lende laka abo.
5Bɔkoꞌba ŋge kɔtɔ ame ꞌdɔ bilaka koro, kina Yësu Kurïsïtö na gbï ŋge kɔtɔ rɔ bɔ ame kodɔꞌbɔ bilaka lesi ꞌdeni kɔtɔ ti Bɔkoꞌba. Bo oloma ꞌdeni dɔliŋɔ bine rɔ bilaka lesi, 6tine bo iꞌdi rɔ bo ꞌdeni ꞌdɔ tutë gɔ bilaka pili di mï tölë. Ndɔbɔ ꞌba Yësu nime ileme ꞌdeni zi bilaka mï kada ma laka mo, Bɔkoꞌba oꞌdɔkɔ tɔmɔ bilaka di mï tölë. 7Ame na rɔ wa ma bo koja ma bɔ laja abo tuwöwö mo zi bilaka. Munzö dë rɔ bëtï, lende ma laka na mëdï miya. Bo oja ma ꞌdeni tiyandi bɔ löwö ti lende ma kodɔrɔ ame ꞌdɔ lïjë kiꞌdi dönnï gɔmo.
8Mï kanisa pili moꞌdɔkɔ gɔ bɔ kindaꞌba mötu këdï ŋge rɔ bɔtɔni ame ga rɔ bɔ koꞌdɔ lende ꞌba Bɔkoꞌba ne. Kina ɔdɔ lïjë këdï kombi közïnnï tɔrɔ toꞌdɔ mötu kinza lïjë kiꞌdi ꞌdïrï, ala tiyeli dë këdï mïnnï.
9Kina gbï tara moꞌdɔkɔ dë gɔ ꞌja kebe tote rönnï ti tusu bɔŋgɔ ma kele kulöwö naga. Lïjë kodɔ rönnï liya kinza lïjë köꞌbö dë ŋge tomeri ꞌdɔ tiyada rönnï ti dɔ kuꞌjö, kina gbï ti wa ꞌba tele ame ga kileŋo di mï yamo ma köbököbö ne ti nyileki ni, gbï ti bɔŋgɔ ma ndögö mo ga kitigɔ kulöwö naga. 10Rɔ kiyada ꞌbënnï oꞌdɔkɔ ꞌdɔ këdï rɔ lende koꞌdɔ laka. Ame na rɔ, rɔ kiyada ma laka ꞌba ꞌja ame ga kiya te lïjë oro Bɔkoꞌba ꞌdeni ne. 11Tine lïjë kudumö koje mbili nnï tuwö lende ꞌba Bɔkoꞌba. Kina ꞌdɔ lïjë kuwö dɔ löbu ꞌba dɔ kanisa. 12ꞌBama mola ꞌja dë ꞌdɔ kiyandi bilaka ti lende ꞌba Bɔkoꞌba. Kina miꞌdi közï kakpa dë gbï zïnnï tëdï mbiri dɔ bɔtɔni. Tine ꞌdɔ lïjë kudumö ꞌbënnï kotomo kpënnï teyi di mï kanisa. 13Römöyï Adama na Bɔkoꞌba koꞌba dɔgba, di gɔmo tine na ꞌjaa koꞌba Awa. 14Kina Adama ne dë gbï Satani kuꞌbölu. Tine ꞌja abo Awa na Satani kuꞌbölu kiꞌdi kïyëyï mï köꞌdu kiꞌdi ꞌba Bɔkoꞌba.
15Tine oꞌdɔkɔ ꞌdɔ ꞌja kodɔ rönnï liya tiꞌdi dönnï gɔ lende ꞌba Bɔkoꞌba, kina gbï toꞌdɔ mo ꞌdɔ tɔꞌɔ lëpï nnï ga. Ɔdɔ lïjë koꞌdɔ ŋgï te mï kada ꞌba löyö Bɔkoꞌba ti kɔmɔ lïjë ŋgï di mï tölë.
Currently Selected:
1 Timatiyo 2: BEK
Highlight
Copy
Compare
Share
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
