1 Tesalonika 5
5
Loma Ti Bi Koda
1Löndö ze ga, wa mɔtɔ inza kpe ma ꞌdɔ diya ziye gɔ lende ꞌba kada ma wa naga nime këdï koꞌdɔ rönnï yïmo, 2römöyï kpe gbï ikalike ꞌdeni bɔtɔ mɔtɔ inza kikali kada ma ŋere Yësu këdï kileki kako timo dɔliŋɔ nime bine. Kada mo ëdï kömö ŋgï tuguꞌdu kɔzɔ tako ꞌba bɔ ꞌbögö rɔ mï korɔndɔ naga tara. 3Ɔdɔ bilaka kiya te, “Gɔ bi pili ëdï laka,” tëgë me tondo te yɔ na kada ꞌba gomɔ ma löbu kuꞌdu rönï ŋgï zïnnï kɔzɔ mï kɔꞌɔ ꞌba löyö ame këdï kömö dɔ ꞌja ne tara. Tine bɔtɔ mɔtɔ inza kokpe di mï gomɔ nima.
4Ne kpe ꞌbeye löndö ze ga, inzake mï bi kölu kina tako ꞌba ŋere Yësu inza kiyere ye ŋgï kɔzɔ tako ꞌba bɔ ꞌbögö naga tara. 5Kpe pili rɔ bilaka ma këdï koꞌdɔ wa yaga mï kada. Ze ꞌbeze ma tiye nime dinzake kpe rɔ ꞌba bi kölu. 6Gɔ köꞌdu mo kinza döꞌböke dë nduwë töꞌdö kɔzɔ ꞌba ya ma laki. Zize tëdï rɔ ma koŋgɔ bi togbɔ dɔ yida rɔze ga. 7Mï korɔndɔ na bilaka këdï köꞌdö, kina mï korɔndɔ na gbï bilaka këdï kitiri rönnï ti layi ŋbö kupö wa. 8Ne ze ꞌbeze ꞌdeni rɔ bɔ toꞌdɔ wa yaga mï kada kina gɔ dogbɔke dɔ yida rɔze ti. Zize gɔ döꞌböke tiꞌdi dɔze gɔ lende ꞌba Bɔkoꞌba ti tɔꞌɔ lëpï ze ga ꞌdɔ dëdïke ti wa ꞌba titata yida rɔze timo di zi kɔmo ꞌba Satani. Döꞌböke gbï tiꞌdi dɔze gɔmo ma Yësu këdï kɔmɔ ze di mï tölë ꞌdɔ dëdïke ti wa ꞌba titata dɔze timo di zi kɔmo ꞌba Satani.
9Römöyï Bɔkoꞌba igeli ze dë ꞌdɔ todɔ karama dɔze. Tine bo igeli ze ꞌdɔ kiꞌdi ŋere ze Yësu Kurïsïtö kɔmɔ ze di mï tölë. 10Kina me Yësu kölë ꞌdeni tokɔnyi ze ꞌdɔ mï kada ma bo këdï kako yïmo nima ɔdɔ dëdïke gba ti kɔmɔze ala dölëke ꞌdeni pele gɔ dëdïke ti dïdï ma ŋburuŋburu kɔtɔ ti bo. 11Kina me lende nime otoke nduwë tiya mo rɔ gɔ rɔye ꞌdɔ kocɔ mï këddï ziye kɔzɔ ame këddïke rɔ toꞌdɔ mo ne.
Ndose Ma Ŋburuŋburu
12Diya ame ziye löndö ze ga, oroke ya ame ga këdï koꞌdɔ ndɔbɔ ꞌba Bɔkoꞌba mï löŋgö ye ne. Ŋere Yësu na kiꞌdi lïjë ꞌdeni ꞌdɔ toŋgɔ gɔye gbï tiyandi ye. 13Gɔ köꞌdu mo ꞌdɔ kɔꞌɔke, koroke lïjë gbï rɔ mbëmbë gɔ ndɔbɔ ma lïjë këdï koꞌdɔ nima. Kina gɔ kolomake ti, ti mï këyï rɔ gɔ rɔye.
14Kina ame gbï ziye löndö ze ga, ziye ꞌdɔ tamo dɔ ya ma tïkëpï naga. Ocɔke ya ma dökïꞌdï kököbö naga gɔ këdï ti mï këddï. Okɔnyike ya ma korɔꞌbɔ naga kina ꞌdɔ këddïke ti kɔmɔ kele dɔ bilaka pili. 15Kinza kebeke dë tileki dɔ lende kënyë ti lende kënyë. Tine iꞌdike rɔye toꞌdɔ lende laka rɔ gɔ rɔye gbï zi bilaka pili.
16Ziye töꞌbö rɔ lɔŋɔ 17ti mötu koꞌdɔ zi Bɔkoꞌba 18kina ꞌdɔ köꞌböke toꞌdɔ yëëꞌdï nduwë zi bo mï kada ꞌba wa pili. Ame na rɔ wa ma Bɔkoꞌba koꞌdɔkɔ ziye ꞌdɔ toꞌdɔ mo römöyï kpe ꞌdeni rɔ akɔtɔ ti Yësu Kurïsïtö.
19Kinza kilagike tuwö wa ame ga Nyï Kɔtɔ Laka këdï kiya ziye ne dë. 20Kinza kudölïke köꞌdu ꞌba bɔ kumë lende dë gbï, 21tine iyɔzɔke pili kina ꞌdɔ koroke ma laka mo ga ame rɔ ꞌba Bɔkoꞌba ne 22tine gɔ kilagike ma kënyë mo ga pili yaga.
23Bɔkoꞌba na këdï kiꞌdi ze pili toloma ti mï këyï. Bo kiꞌdi ye nduwë toꞌdɔ lende laka abo ꞌdɔ ɔdɔ ŋere ze Yësu Kurïsïtö këdï kileki ꞌdeni kako dɔliŋɔ nime ꞌdɔ kɔrɔke kɔmɔ bo rɔ ma kɔpɔ kinza wa ma kënyë mɔtɔ du te mï loma ꞌbe. 24Bɔkoꞌba na kïdëkï ye ꞌdeni bo ti koꞌdɔ wa naga nime gbï pili ziye römöyï bo ëdï nduwë koꞌdɔ wa ame ga bo kiya toꞌdɔ mo ne.
25Ititike Bɔkoꞌba gbï gɔze, löndö ze ga. 26Umötöke löndö ma yayi naga nima pili ti közï rïyö mï möyï Bɔkoꞌba.
27Miꞌdi köꞌdu mo ziye ti közï kakpa ꞌba ŋere Yësu tïdëkï waraga nime zi bilaka ꞌba kanisa pili.
28Lende këyï ꞌba ŋere ze Yësu Kurïsïtö koloma tiye.
Currently Selected:
1 Tesalonika 5: BEK
Highlight
Copy
Compare
Share
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
