Roma 13

Faŋ bàw nsiŋ kɨ zɔnə vətɨɨ və shɨ

1Bàw vɨɨ vənshə kɨ zɔnə vɨɨ mbɨə faŋ vəŋ sɔꞌ shɨ, buꞌ laa vɨɨ məsɔꞌ shɨ kee sɔꞌ nə wutə vəŋ, maa laa gì Nwi me. Nùŋsə Nwi nùŋsə vɨɨ məsɔꞌ shɨ faŋ vəŋ lùu taa mbi. 2Wə ntɨə faŋ ŋwə twèy vɨɨ məsɔꞌ shɨ, buu ŋwə twèy nu faŋ Nwi nə nùŋsə. Vɨɨ mbɨə faŋ vəŋ twey nɨniŋ, ŋii nsɔꞌ buꞌ nu vəŋ. 3Vɨɨ məsɔꞌ shɨ kee dùꞌ laa vɨɨ məyɨ vənu vəjəəvə kɨ fee vəŋ me, vəŋ duꞌ laa vɨɨ faŋ vəŋ yɨ vənu vəbwəvə fee vəŋ. Nɨniŋ, a kee kàw laa a duꞌ, fèe vɨɨ məsɔꞌ shɨ me, buu a yɨsə nu ŋkɨə faŋ ŋkə bàw, buu vəŋ biŋ ghɔ. 4Lùu nɨniŋ buꞌ laa vəŋ lùu vɨɨ faꞌ Nwi, gaŋtə ghɔ maa məyɨ nu jəə. Nɨniŋ, a yɨ̀ nu bwə, a kɨ fee, buꞌ laa vəŋ kee yaa kɨ wasə baꞌ yighaw dayday me. Vəŋ lùu vɨɨ faꞌ Nwi maa məmɔꞌ nsɔꞌ Nwi maa vɨɨ mbɨə faŋ vəŋ yɨ kəbwə. 5Lùu ŋiꞌ nu ŋkɨə faŋ ŋkə baw maa məzɔnə vɨɨ mbɨə faŋ vəŋ sɔꞌ shɨ, kee luu sheꞌ buꞌ nsɔꞌ yɔ́ faŋ vəŋ kwaŋ tɔ vɨɨ nə me; baa lùu nu faŋ fwi yə sɔꞌ ghɔ shɔ nɨzi. 6Maa lùu ŋiꞌ nu ŋkɨə faŋ viŋ ndɔꞌ tasə shɔ, buꞌ laa vɨɨ məsɔꞌ shɨ faꞌ tɨ́ Nwi, faꞌ vəfaꞌ vəvəŋ vɔ́ ghee nshə.

Faŋ bàw viŋ kɨ kaw yiŋwaa yiŋ viŋ viŋ

7Nɨniŋ, ndɔꞌ wə tɨ̀ me wə nə fa ŋkɨə faŋ a kìi maa məndɔꞌ tɨ́ ŋwə. Ndɔꞌ tasə tɨ́ wuu məfi tasə, ndɔꞌ ka məshɔɔ fɨ jɨɨsə tɨ́ vɨɨ məfi ka ghɔ́, fee wə ntɨə faŋ luu wə maa məfee, bəŋsə wə ntɨə faŋ məbəŋsə lùu tɨ́ ŋwə.

8Kɨ viŋ jia yikɔɔ wə me. Yikɔɔ njyə faŋ kaꞌ viŋ kìi, lùu laa viŋ kaw wə nə wə. Wə ntɨə faŋ ŋwə kàw weenshu wi, zɔnə ntɨsə Nwi. 9Lùu nɨniŋ buꞌ laa ntɨsə Nwi sənshə faynə sheꞌ maa ntɨ yimuꞌ, yuu kɨ tii wəzwi me, kɨ zwi wə me, kɨ shaw me, kɨ sə fa me, nə ntɨsə Nwi səmɔ́ꞌ sənshə. Nyə yimuꞌ lùu laa, «Kaw weenshu wə yaa nshɨ-tɔ wə!» #Levitikɔs 19.18. 10Wə ntɨə faŋ ŋwə kaw weenshu wi, kaꞌ ŋwə kee yɨ̀ nu bwə maa ŋwə me. Nɨniŋ, wə faŋ ŋwə kaw vɨɨ, zɔnə ntɨsə Nwi sənshə.

Faŋ bàw viŋ kɨ toꞌ yuu ŋkə kùꞌnə maa yighee shə

11Bàw viŋ kɨ yɨsə nɨniŋ, baa kɨɨ laa ndwə lùu yighee maa məyenə fɨ mbweysə. Yighee njyə faŋ nsiŋ ndɔ zɨ məbwey vəlwaŋ lùu nshənə, kee baa lùu ntaŋ me, yuu nyə nə lùu faŋ nsiŋ nə fɔŋ nùŋ fwi saŋ-nsiŋ maa Kristo me. 12Fu vətuꞌ bəə, fu kəə lee. Nɨniŋ, nsiŋ meꞌtə vənu mbɨə faŋ vɨɨ yɨsə taa mfiŋsə, shùŋ luu vətɔ və yighaw və məley maa nsiŋ. 13Nsiŋ kɨ toꞌ ghuu yitoꞌ kaŋ-nsiŋ kəley, yuu ŋkə kuꞌ maa mətoꞌ nə shɨshwi, kee kɨ toꞌ zɨ vətɔ me, tɨꞌnə me nu məluꞌ ghenə me, tɨꞌnə me beꞌsə nu vəki me, vəki kee beꞌsə vəndɔŋ me, kee kɨ zɨ shɨ me, kee tay ntaysə me, kee kɨ səsə vətɔ və vɨɨ me. 14Bàw viŋ mɔꞌ tɨta Yeso Kristo maa viŋ yaa njwi, kee meꞌtə yiŋwaa yiŋ bweꞌsə viŋ, fwi siŋ ndɔ maa vətɔ me.

Currently Selected:

Roma 13: bav

Highlight

Copy

Compare