Efesɔs 5

Faŋ bàw laa viŋ kɨ toꞌ fɨ taa məley Nwi

1Nɨniŋ, viŋ ndi ghuu yitoꞌ Nwi buꞌ laa viŋ lùu vaŋ vi, faŋ ŋwə kaw viŋ. 2Viŋ kɨ toꞌ yitoꞌ yiŋ nə ŋkawnə, sheꞌ faŋ Kristo nə kàw viŋ nə, kù tɔ nsiŋ nə, vɨ feꞌ ŋwə shɔ tɨ́ Nwi. Ŋkə nə bàw tɨ́ Nwi nɨniŋ.

3Kɨ nu mətoꞌ sakə, nə nshinə yibwə, nə nu məzɨ shɨ luu taa ŋwaa viŋ me. Kɨ vɨ kee bee gisə kɔ̀ŋ kəŋ vənu vɔ́ me, tɨ́ kaꞌ viŋ kùꞌnə yaa vɨɨ ley Nwi. 4Kɨ yigisə ŋkɔmə, nə yigisə vəmfaw, nə yigisə yibwənə faŋ nyə kee yikuꞌnə me, kee kɨ fuu fɨ shuu viŋ me! Viŋ bee kɨ kii kɔ məbwaŋ tɨ́ Nwi. 5Viŋ kɔꞌ kɨɨ ŋkee jəə laa kɨ tuu wuu mətii vəki nə mətoꞌ sakə, tɨꞌnə me, yɨ-kəbwə, tɨꞌnə me wuu məzɨ shɨ, ndɔ kɨ shi taa ŋwaa vɨɨ nu yifwàŋ Kristo nə Nwi me. Kəŋ vɨɨ vɔ́ lùu yaa vɨɨ məfeꞌ vənwi vədayday. 6Kɨ wə bweꞌsə viŋ nə yigisə dayday buꞌ vənu vɔ́ me! Luu buꞌ kəŋ vənu vɔ́ faŋ nsɔꞌ Nwi ndɔ luu tɔ vɨɨ mbɨə faŋ vəŋ kee zɔnə Nwi me.

7Nɨniŋ, kɨ viŋ vɨ vəŋ faynə maa vənu vɔ́ me! 8Nə luu maa yighee vɨsɨ, viŋ luu vɨɨ taa mfiŋsə. Luu ndwə, viŋ lùu vɨɨ taa məley buꞌ tɨta Yeso. Nɨniŋ, viŋ kɨ toꞌ yaa vaŋ taa məley. 9Faŋ viŋ lùu taa məley ghɔ́, buu viŋ taa kɨ yɨsə vənu vəjəəvə, nə vənu vəloomə, nə vənu və yinsəŋ. 10Viŋ kɨ kwaꞌtə tɔ kiŋ maa nu ŋkɨə faŋ ŋkə bàw tɨ́ tɨta ŋwaa-nsiŋ. 11Kɨ viŋ kwaŋ ghɔ taa vənu vədayday fɨ taa mfiŋsə me. Viŋ bee kii də vənu vɔ́ ntee laa lùu vənu vəbwəvə. 12Kəŋ vənu vɔ́ faŋ vɨ yɨsə taa vəndenə, lùu vənu vəbwəvə. Ŋkee maa məgi kɔ̀ŋ vənu vɔ́, lùu nu bwə. 13Luu nə, məley Nwi ŋìi taa mbi, vənu fuu ntee, vɨ ye. Vənu vənshə faŋ mbə lùu taa məley, lùu vəley. 14Luu sheꞌ faŋ vɨ gi laa, «Yenə mɔɔ, wuu mbweysə, ndɔ fɨ shɨ yiku, buu Kristo taa kɔ məley tɨ́ ghɔ.»

15Nɨniŋ, viŋ kɨ shiinə yiŋwaa yiŋ faŋ viŋ toꞌ ghuu yitoꞌ kiŋ, kee toꞌ yaa vɨɨ faŋ vəŋ kee lùu vətɔfə me, toꞌ yaa vɨɨ yitɔfə. 16Viŋ toꞌ yaa vɨɨ Nwi faŋ yighee kɨ bii, buꞌ laa vəshi lùu vəbwə. 17Nɨniŋ, kɨ viŋ lùu yaa vəmfaw me, luu nə, kɨɨ faŋ ŋkitə tɨta ŋwaa-nsiŋ lùu. 18Kɨ viŋ kɨ nu məluꞌ mbə kɨ shɔɔ sɨ viŋ me, buꞌ laa nshinə yibwə fuu fɨ fuŋ. Viŋ kɨ yɨ laa lwaŋ sheꞌ Zwitə Nwi taa fwisə viŋ. 19Viŋ shɔꞌtə wə nə wə nə yigi fɨ taa ŋwaꞌlə Sam, nə nyaysə məbəŋsə Nwi, nə nsə Zwitə Nwi, kɨ zwa nyaysə jəəsə tɨ́ tɨta ŋwaa-nsiŋ fɨ taa fwisə viŋ, 20bwaŋ tɨta Nwi ghee nshə maa vənu vənshə fɨ yiba jɨŋ tɨta Yeso Kristo. 21Kɨ zɔnə viŋ viŋ, buꞌ laa viŋ zɔnə Kristo.

Nshinə vəki ghɔ vəndəə vəvəŋ

(Kɔlɔsii 3.18-19)

22Bàw vəki duꞌ ŋiꞌ vəndəə vəvəŋ, sheꞌ faŋ vəŋ dùꞌ ŋiꞌ tɨta Yeso nə. 23Wəndɔŋ lùu tɔ tɨ́ wəzwi, sheꞌ faŋ Kristo lùu tɔ tɨ́ nwaa vɨɨ Nwi. Nwaa vɨɨ Nwi lùu yaa ŋwaa Kristo. Ŋwə baa lùu wuu məbweysə vəŋ. 24Faŋ nwaa vɨɨ Nwi zɔ̀ fɨ ghɔ Kristo nə, bàw vəki kɨ zɔ fɨ ghɔ vəndəə vəvəŋ maa vənu vənshə.

25Gə fɨ maa viŋ, vəndɔŋ, viŋ kɨ kawnə vəki viŋ, sheꞌ faŋ Kristo nə kàw nwaa vɨɨ vi, kù tɔ vəŋ nə. 26Nɨniŋ laa ŋwə yɨ̀sə vəŋ ley tɨ́ Nwi. Ŋwə nə sɔ̀ yibɨsə vəŋ fɨ maa vəŋ, faŋ ŋwə nə kɔ̀ yigisə Nwi nə muu mə Nwi tɨ́ vəŋ. 27Nɨniŋ, ŋwə nuŋsə nwaa vɨɨ Nwi laa vəŋ baw tɨ́ ŋwə, laa tuu nu bwə, tɨꞌnə me tuu wee-ndoꞌ kee lùu maa vəŋ me, laa vəŋ luu ŋkee vɨɨ ley vɨsɨ Nwi. 28Lùu faŋ nu vəndɔŋ luu sheꞌ nɨniŋ, laa wəndɔŋ kɨ kaw zu wi yaa nshɨ-tɔ wi. Wə ntɨə faŋ ŋwə kaw zu wi, buu lùu ŋwaa wi faŋ ŋwə kaw nɨniŋ. 29Wə nə kee ta bèe mbasə ŋwaa wi me, ŋwə zəsə ŋwaa wi, kàw. Luu sheꞌ faŋ Kristo kàw nwaa vɨɨ Nwi nɨzi. 30Maa nsiŋ lùu vəlaŋ və ŋwaa Kristo, faŋ ŋwə kaw vəŋ, zəsə vəŋ nə. 31Luu sheꞌ faŋ vɨ nə nyɔ̀ꞌ taa ŋwaꞌlə Nwi laa, «Wəndɔŋ ndɔ meꞌtə tii wi nə nshu wi, gə̀ fàynə ghɔ zu wi, vəŋ vəbɔɔ gu fa kəmuꞌ.» #Jenesis 2.24. 32Luu ŋkee nu kwalə faŋ ŋkə ndènə fɨ sɨ vɨɨ. Luu nə, mə gì laa muꞌlə wi luu Kristo, faŋ ghɔ nwaa vɨɨ vi faynə̀, gù fa kəmuꞌ nə. 33Nɨniŋ nə, viŋ nɨzi, wə kɨ kaw zu wi, wə kɨ kaw zu wi yaa yiŋwaa yiŋ! Wəzwi kɨ fee ndəə wi!

Currently Selected:

Efesɔs 5: bav

Highlight

Copy

Compare